1 Āianei, i pahawa ake, i muri iho i tāku, tā Nīwhai, whakakapi kōrero ki ōku tuākana, nana i kī mai rātou ki ahau: Kua whakapuakina e koe ngā mea mārō maha, he nui kē atu i tō mātou āhei ki te amo.

2 Ā, i pahawa ake, i kī atu ahau ki a rātou, nā, i mōhio ahau kua kōrero ahau i ngā mea mārō maha ki te hunga whakarihariha, e ai ki ngā kōrero pono; ā, ko te hunga tika kua whakatikaia e ahau, ā, kua whakaaturia nei ka whakateiteihia ake hei te rā whakamutunga; nā reira, ka mārō ngā kōrero pono ki te hunga hara, nā te mea ka wero pū anō ia i a rātou ki te tino pokapū.

3 Ā ināianei ōku tuākana, mehemea i tika koutou me te hia whakarongo atu ki ngā kōrero pono, me te aro atu ki a ia, kia hīkoi tōtika i mua i te Atua, kua kore ā koutou amuamu nā ngā kōrero pono, me te kī: Kei te kōrero koe i ngā mea mārō ki a mātou.

4 Ā, i pahawa ake, nāku, nā Nīwhai, i akiaki i ōku tuākana, i runga i te kaha nui, kia pupuri ai i ngā whakahaunga a te Ariki.

5 Ā, i pahawa ake, i whakaiti pū rātou i a rātou anō i mua i te Ariki; nā konā i nui tōku hari me ōku manako mō rātou, nā, ka hīkoi rātou i ngā ara o te tika.

6 Inakuanei, i kōrerohia, i mahia ēnei mea katoa i tōku matua e noho tēneti ana i te raorao kua huaina ko Remuere.

7 Ā, i pahawa ake, nāku, nā Nīwhai, i taumau tētahi o ngā tamāhine a Ihimaera hei hoa wahine māku; ā waihoki, ka taumau ōku tuākana i ngā tamāhine a Ihimaera hei hoa wahine.

8 Ā, pēnei kua tutuki i tōku matua ngā whakahaunga katoa a te Ariki kua tukuna atu nei ki a ia. Ā waihoki, ko au, ko Nīwhai, kua manaakitia nuitia e te Ariki.

9 Ā, i pahawa ake, i kōrero mai te reo o te Atua ki tōku matua i te pō, ā, ka whakahaua ia hei āpōpō me haere ia ki roto i te koraha.

10 Ā, i pahawa ake, i tōku matua e ara ana i te ata, ā, ka haere whakamua atu i te whatitoka o tana tēneti, ki tōna mīharo nunui i kite iho ia i runga i te papa tētahi pōro pōtakataka he whakamīharo tōna mahinga; ā, he parāhe horomata ia. Ā, kei roto i te pōro e rua ngā pīnara; ka tuhi atu tētahi i te huarahi me haere ai mātou ki roto i te koraha.

11 Ā, i pahawa ake, i kohikohi mātou i ngā mea e tika ana hei mauhanga mā mātou ki roto i te koraha, me ērā atu toenga ō kua homai e te Atua ki a mātou; ā, ka haria e mātou ngā kākano o ia tū, o ia tū kia kawea atu ai e mātou ki roto i te koraha.

12 Ā, i pahawa ake, i haria ō mātou tēneti, ā, ka wehe atu ki roto i te koraha, whakawhiti ana i te awa o Rāmana.

13 Ā, i pahawa ake, i haere mātou mō te takiwā o ngā rā e whā, e āhua tonga-tonga mā rāwhiti te aronga, ā, ka whakatū anō mātou i ō mātou tēneti; ā, ka huaina e mātou ko te ingoa o taua wāhi ko Heiha.

14 Ā, i pahawa ake, i haria e mātou ā mātou kōpere me ā mātou pere, ā, ka haere whakamua atu ki roto i te koraha kia patu kai mā ō mātou whānau; ā, i muri iho i tā mātou patu kai mā ō mātou whānau ka hoki anō mātou ki ō mātou whānau i roto i te koraha, ki te wāhi o Heiha. Ā, ka haere whakamua atu anō mātou ki roto i te koraha, e whai ana i taua aronga anō, e pūmau ana ki ngā wāhi mōmona o te koraha, koia i ngā rohe e pātata ana ki te Moana Whero.

15 Ā, i pahawa ake, i haere mātou mō te takiwā o ngā rā maha, e patu kai ana i te huarahi, ki ā mātou kōpere me ā mātou pere me ā mātou kōhatu me ā mātou kōtaha.

16 Ā, i whaiwhai mātou i ngā tohutohu a te pōro, koia i ārahina ai mātou ki ngā wāhi mōmona rawa o te koraha.

17 Ā, i muri iho i tā mātou haere mō te takiwā o ngā rā maha, i whakatū mātou i ō mātou tēneti mō tētahi wā, kia whakatā ai mātou me te hopu kai mā ō mātou whānau.

18 Ā, i pahawa ake, i ahau, a Nīwhai, e haere whakamua atu ana ki te patu kai, nana, i whati au i taku kōpere, i hangaia ai ki te maitai pai rawa; ā, i muri iho i taku whatinga i taku kōpere, nana, i riri ōku tuākana ki ahau nā te ngaronga o taku kōpere, nā te mea kāore mātou i hopu kai.

19 Ā, i pahawa ake, i hoki kai kore atu mātou ki ō mātou whānau, ā, nō te ruha nui, nā tā rātou haerenga, i mate nui ai rātou i te hiakai.

20 Ā, i pahawa ake, i tīmata a Rāmana rāua ko Remuere me ngā tama a Ihimaera ki te kaha amuamu, nā ngā matenga me ō rātou mamaetanga i roto i te koraha; ā, i tīmata anō hoki tōku matua ki te amuamu ki te Ariki tōna Atua; āe rā, i tino pōuri rawa atu anō hoki rātou katoa, tae atu ana ki tā rātou amuamu atu ki te Ariki.

21 Nā, i pahawa ake, ko au, ko Nīwhai, nā taku mamae tahi me ōku tuākana nā te ngaronga o taku kōpere, ā, me te ngaronga i ā rātou kōpere ōna turapa, ka tīmata tōna uaua haere, āe rā, nā konei rā kīhai i taea e mātou te hopu kai.

22 Ā, i pahawa ake, nāku, nā Nīwhai, i kaha kōrero ki ōku tuākana, nā te mea kua whakapakekehia anōtia ō rātou ngākau, tae atu ana ki te amuamu atu ki te Ariki tō rātou Atua.

23 Ā, i pahawa ake, nāku, nā Nīwhai, i hanga ki te rākau he kōpere, ā, ki te rākau torotika he pere; nā reira, i whakawhītikiria ahau e ahau anō ki tētahi kōpere me tētahi pere, ki tētahi kōtaha me ngā kōhatu. Ā, i kī atu ahau ki tōku matua: Me haere rānei au ki hea ki te hopu kai?

24 Ā, i pahawa ake, i uiui atu ia ki te Ariki, nā te mea kua whakaitia rātou e rātou anō nā aku kupu; nā te mea he maha ngā mea i kōrero ai au ki a rātou i runga i te kaha o tōku wairua.

25 Ā, i pahawa ake, i pā mai te reo o te Ariki ki tōku matua; ā, i tino kohetehia ia nā ana amuamu atu ki te Ariki, tae atu ana ki tana hekenga iho ki te hōhonutanga o te pōuri.

26 Ā, i pahawa ake, i kī atu te reo o te Ariki ki a ia: Titiro ki runga i te pōro, ā, tirohia ngā mea kua tuhia.

27 Ā, i pahawa ake, i te tirohanga a tōku matua i ngā mea kua tuhia i runga i te pōro, i nui tōna wehi me tōna tūoioi, ā, ko ōku tuākana me ngā tama a Ihimaera me ā mātou hoa wāhine anō hoki.

28 Ā, i pahawa ake, nāku, nā Nīwhai, i kite atu i ngā kaiaro i roto nei i te pōro, nā, i mahi ai rāua e ai ki tō mātou whakapono, ki tō mātou ū me tō mātou aro i tukuna e mātou ki a rāua.

29 Ā, i reira anō he tuhinga hou kua tuhituhia ki runga i a rāua, koia he mārama kia pānuitia ai, nāna i homai māramatanga ki a mātou e pā ana ki ngā huarahi o te Ariki; ā, ka tuhituhia, ā, ka tīnia mai i tētahi wā ki tētahi wā, e ai ki tō mātou whakapono me tō mātou ū i tukuna atu e mātou ki a ia. Ā, nō konei tātou kite ai mā ngā mea iti ka taea e te Ariki ngā mea nunui te whakaputa mai.

30 Ā, i pahawa ake, nāku, nā Nīwhai, i haere whakamua ake ki te kōtihi o te maunga, e ai ki ngā tohutohu i homai mā runga i te pōro.

31 Ā, i pahawa ake, i patu ahau i ngā kararehe mohoao, nā konā au i hopu kai ai mā ō mātou whānau.

32 Ā, i pahawa ake, i hoki atu ahau ki ō mātou tēneti, e waha ana i ngā kararehe kua patua nei e ahau; nā, kite ana rātou i taku hopuranga kai, anō te nui o tō rātou koa! Ā, i pahawa ake, i whakaiti rātou i a rātou anō i mua i te Ariki, me te tuku whakamoemiti ki a ia.

33 Ā, i pahawa ake, i whakatika atu anō i tā mātou haere, e tata haere ana i taua huarahi pū anō i tō te tīmatanga; ā, i muri iho i tō mātou haere mō te takiwā o ngā rā maha ka whakatū mātou i ō mātou tēneti anō, kia noho ai mātou mō te takiwā o tētahi wā.

34 Ā, i pahawa ake, i mate a Ihimaera, ā, ka tanumia i te wāhi i huaina nei ko Nāhoma.

35 Ā, i pahawa ake, i tangi hotuhotu ngā tamāhine a Ihimaera, nā te ngaronga o tō rātou matua, ā, nā ō rātou mamaetanga i roto i te koraha; ā, ka amuamu atu rātou ki tōku matua, nā te mea nāna rātou i kawe mai i waho i te whenua o Hiruharama, e mea ana: Kua mate tō mātou matua; āe rā, kua kāewaewa nui mātou i roto i te koraha, ā, kua mate mātou i ngā mamaetanga nui, matekaitanga, matewaitanga, me te ruhatanga; ā, i muri iho i ēnei matenga katoa ka hemo mātou i te koraha i te matekai.

36 Ā, i pēnei tā rātou amuamu atu ki tōku matua, ā, ki ahau anō hoki; ā, i te hiahia rātou kia hoki atu anō ai ki Hiruharama.

37 Ā, ka kī atu a Rāmana ki a Remuere me ngā tama a Ihimaera: Nana, tēnā me patu e tātou tō tātou matua, me tā tātou teina anō hoki a Nīwhai, nāna ake anō te tikanga i hāpai i runga i a ia kia noho ai hei rangatira, hei kaiako mō tātou ōna tuākana.

38 Nā, e kī ana ia kua kōrero tahi te Ariki me ia, ā, kua minita anō ngā anahera ki a ia. Engari nana, e mōhio nei tātou kei te rūkahu ia ki a tātou; ā, ka kōrero mai ia i ēnei mea, ā, ka mahi ia i ngā mea maha mā ana tinihanga, kia whakapōhēhē i ō tātou karu, e whakaaro ana, tērā pea, ka ārahi atu ia i a tātou ki roto i tētahi koraha kē; ā, i muri iho i tana ārahitanga atu i a tātou, kua whakaaro ia kia whakatūria ia e ia anō hei kīngi, hei rangatira i runga i a tātou, kia mahi ia ki a tātou e ai ki tāna e pai ai. Ā, nō tēnei āhuatanga i whakaohooho ai tōku tuakana a Rāmana i ō rātou ngākau ki te whakatakariri.

39 Ā, i pahawa ake, nā, i a mātou te Ariki, āe rā, i tau rawa mai te reo o te Ariki me te kōrero i ngā kupu maha ki a rātou, ā, i kohetehia rawatia rātou; ā, i muri iho i tā rātou kohetehanga e te reo o te Ariki ka tahuri kē atu tō rātou whakatakariri, ā, ka rīpeneta rātou mō ō rātou hara, nā konei i manaakitia anōtia mātou e te Ariki ki te kai, nā, kāore mātou i hemo.