1 Whakarongo mai kia rongo ai i tēnei, E te whare o Hākopa, e te hunga kua karangatia nei ki te ingoa o Iharaira, ā, kua puta mai i ngā wai o Hura, kua puta rānei i ngā wai o te rūmakitanga, e whakaoatitia ana ki te ingoa o te Ariki, me te whakahua ake i te Atua o Iharaira, engari kāore e whakaoatitia ana i runga i te pono me te tika.

2 Hei aha koa, ko tā rātou e karanga nei nō te pā tapu rātou, engari kāore rātou e whakawhirinaki ana ki runga i te Atua o Iharaira, ko ia te Ariki o ngā Mano, āe rā, ko te Ariki o ngā Mano tōna ingoa.

3 Nana, kua whakapuakina ake e ahau ngā mea o mua mai i te tīmatanga; ā, i puta whakamua atu ērā i tōku māngai, ā, nāku rātou i whakaatu. Nāku rātou i whakaatu whakarere.

4 Ā, i mahi ahau nā te mea i mōhio ahau he taikaha koe, ā, ko tō kakī he uaua rino, ā, he parāhe tō rae;

5 Ā, nāku pū anō i whakapuaki atu mai i te tīmatanga ki a koe; i mua rā anō i tōna pahawatanga nāku ērā i whakaatu atu ki a koe; ā, nāku ērā i whakaatu atu he wehi nōku kei kī mai koe—Nā taku hautipua ērā i mahi, nā taku whakapakoko anō, ā, nā taku whakaahua whakarewanga ērā i whakahau.

6 Kua kitea, kua rangona tēnei katoa e koe; ā, kua kore e whakapuakina atu ērā e koe? Kua whakaaturia atu e ahau ngā mea hou ki a koe mai i tēnei wā, ko ngā mea huna pū anō, ā, kīhai i mōhiotia ērā e koe.

7 Kua hangaia ērā ināianei, ā, ehara mai i te tīmatanga, i mua pū anō i te rā i rongo kore ai koe i ērā kua whakapuakina ērā ki a koe, kei kī ake koe—Nana i mōhio ahau.

8 Āe rā, kīhai koe i rongo; āe rā, kīhai koe i mōhio; āe rā, nō taua wā kīhai tō taringa i puarehia; nā te mea i mōhio au ka mahi tino tinihanga koe, ā, kua karangatia ake he kaihara nō te kōpū.

9 Hei aha koa, ka whakaaro au ki tōku ingoa, ka tārewa au i tōku riri, ā, ka whakaaro ki taku whakamoemititanga ka pupuri mai i a koe, kia kaua au e hātepe atu i a koe.

10 Nā, nana, nāku koe i whakapakari, nāku koe i whiriwhiri i roto i te ahi o te whakamamaetanga.

11 He whakaaro hoki ki ahau, āe rā, he whakaaro ki ahau e meatia ai tēnei e ahau, nā te mea kua kore au e tuku kia whakapokea tōku ingoa, ā, kua kore e hoatu e ahau tōku korōria ki tētahi atu.

12 Whakarongo mai ki ahau, E Hākopa, me Iharaira tāku i karangahia ai, nā te mea ko au ia; ko au te tuatahi, ā, ko au hoki te whakamutunga.

13 Nā tōku ringa anō i whakatakoto te tūranga o te ao, ā, nā tōku ringa matau ngā rangi i whanganga. Ka karanga atu au ki a rātou, ā, ka tū tahi ake rātou.

14 Koutou katoa, huihui koutou anō, rongo mai anō hoki; nā wai o rātou i whakapuaki ēnei mea ki a rātou? Kua arohaina rātou e te Ariki; āe rā, kua whakatutukihia anōtia e ia tana kupu kua whakapuakina e ia mā roto i a rātou; ā, māna tāna e pai ai ki Papurona, ā, ka pā iho tōna ringa ki ngā Karari.

15 Waihoki, e kī ana te Ariki; ko ahau te Ariki, āe rā, nāku i kōrero; āe rā, nāku ia i karanga kia whakapuaki ai, nāku ia i kawe, ā, māna anō tōna huarahi e whakahoukura.

16 Whakatata mai koe ki ahau; kāore au i kōrero puku; mai i te tīmatanga, mai i te wā i whakapuakina ai nāku i kōrero; ā, nā te Ariki te Atua, me tōna Wairua, ahau i tono mai.

17 Ā, ko te kupu tēnei a te Ariki, tō Kaihoko, ko te Mea Tapu o Iharaira; nāku ia i tono, ko te Ariki tō Atua ko ia e whakaakongia nei koe kia whai painga mōu, ko ia e ārahina nei koe mā te ara e haere ai, i mahi ai.

18 Auē me i whakarongo koe ki aku whakahau—i konā, kua rite ki tētahi awa te mau o tō rongo, ā, ko ngā ngaru o te moana te mau o tō tika.

19 Kua rite ō uri ki te onepū; ko ngā āti o ō whēkau he rite ki ngā kirikiri o reira; me kore tōna ingoa i hātepea atu, whakangaromia rānei i tōku aroaro.

20 Haere whakamua atu koe i Papurona, tahuti atu i ngā Karari, i runga i te reo waiata e whakapuaki ai koe, kōrerotia tēnei, whakatauākīhia ki te pito o te whenua; kī atu koe: Kua hokona e te Ariki tana pononga a Hākopa.

21 Ā, i matewai kore rātou; nāna rātou i ārahi i roto i ngā tuakau; nāna i mea kia rere mai ngā wai i te toka; nāna hoki te toka i wāwahi, ā, ka pupū mai ngā wai.

22 Ā, ahakoa kua oti i a ia tēnei katoa, me tōna nui noa atu anō hoki, kāore he maungārongo, tā te Ariki, ki te hunga whakarihariha.