1 Ā ināianei au, a Nīwhai, ka haere tonu taku tuhinga i runga i ēnei papa mō aku mahi, ā, ko taku whakahaeretanga me taku minitatanga; nā reira, kia haere tonu ai taku tuhinga, me paku kōrero ahau mō ngā mea a tōku matua, mō ōku tuākana anō hoki.

2 Nana rā, i pahawa ake, i muri iho i te whakakapinga kōrero a tōku matua i ngā kupu o tana moemoeā, ā, me tana akiaki i a rātou kia tākare katoa ai, ka kōrero ia ki a rātou e pā ana ki ngā Hūrai—

3 Nā, whai muri iho i tō rātou whakangaromanga, ko taua pā nui whakaharahara pū anō a Hiruharama, ā, me te tokomaha anō ka mauheretia atu ki roto i a Papurona, e ai ki te wā e rite ai i te Ariki, ka hoki mai anō rātou, āe rā, ka whakahokia pū anō mai i waho i te hereherenga; ā, whai muri iho i te whakahokinga mai i a rātou i waho i te hereherenga ka nohoia anōtia e rātou tō rātou whenua tuku iho.

4 Āe rā, kia ono rau rā anō ngā tau mai te wā i wehe ai tōku matua i Hiruharama, ka whakaarahia e te Ariki te Atua tētahi poropiti i waenganui i ngā Hūrai—he Mīhaia pū anō, me kī kē rānei, tētahi Kaiwhakaora mō te ao.

5 Ā, ka kōrero anō ia e pā ana ki ngā poropiti, anō te tokomaha rawa kua whakaatuhia mō ēnei mea, e pā ana ki tēnei Mīhaia, kua kōrerotia e ia, ko tēnei Kaihoko rānei mō te ao.

6 Nā reira, i tau ai ngā tāngata katoa i tētahi āhuatanga ngaro, i tētahi āhuatanga taka, ā, ka pērā mō āke tonu atu ki te kore rātou e whakawhirinaki i runga i tēnei Kaihoko.

7 Ā, ka kōrero anō ia e pā ana ki tētahi poropiti ka haere mai ki te aroaro o te Mīhaia, kia whakaritea te huarahi o te Ariki—

8 Āe rā, me haere whakamua atu ia me te kauhau i te koraha: Whakaritea e koe te huarahi o te Ariki, ā, kia whakatōtikahia ōna ara; nā te mea e tū ana tētahi i waenganui i a koutou kāore i te mōhiotia e koutou; ā, he nui kē atu tōna mana i tōku, kāore au e pai ana kia wewete i te here o ōna hū. Ā, he nui anō tā tōku matua i kōrero ai e pā ana ki tēnei mea.

9 Ā, ka kī mai tōku matua ka rūmaki ia ki Petapara, ki kō atu i a Hōrana; ā, i kī mai anō ia ka rūmaki ia ki te wai; ka rūmaki pū anō ia i te Mīhaia ki te wai.

10 Ā, whai muri iho i tana rūmaki i te Mīhaia ki te wai, ka mōhio ia, ā, ka kitea, ā, ka whakaatuhia atu e ia nāna te Reme a te Atua i rūmaki, koia ka tango atu i ngā hara o te ao.

11 Ā, i pahawa ake, i muri iho i tā tōku matua kōrero i ēnei kupu ka kōrero ia ki ōku tuākana e pā ana ki te rongopai ka kauhautia atu i waenganui i ngā Hūrai, ā, e pā ana anō hoki ki te memeha haeretanga o te whakapono o ngā Hūrai. Ā, whai muri iho i tā rātou whakamate i te Mīhaia, ka haere mai nei, ā, whai muri iho i tana whakamatenga ka ara ake anō ia i te mate, ā, ka whakaatu atu ia i a ia anō, mā te Wairua Tapu, ki ngā Tauiwi.

12 Āe rā, he nui pū anō tā tōku matua i kōrero ai e pā ana ki ngā Hūrai, ā, e pā ana anō hoki ki te whare o Iharaira, nā, ka whakatauritehia rātou kia rite ki te rākau ōriwa, ko ōna manga me whati atu, ā, ka whakamararatia atu i runga katoa i te mata o te ao.

13 Nā reira, i kī mai ia me pēnei kē kia ārahina tahitia ai tātou i runga i te whakaaro kotahi ki roto i te whenua whakaari, tae atu ana ki te whakatutukitanga i te kupu a te Ariki, nā, ka whakamararatia tātou ki runga i te mata katoa o te ao.

14 Ā, i muri iho i te whakamararatanga i te whare o Iharaira, ka huihuia mai anō rātou; arā, rānei, hei muri iho i te rironga o te rāneatanga o te Rongopai, ko ngā manga tupu o te rākau ōriwa, ko ngā mōrehu rānei o te whare o Iharaira, ka hono whakarotohia rātou, ka ako rānei ki te mātauranga o te Mīhaia pono, tō rātou Ariki me tō rātou Kaihoko.

15 Ā, koinei te āhua o te reo i poropiti ai, i kōrero ai tōku matua ki ōku tuākana, ā, he maha anō ngā mea kāore au e tuhituhi ki roto i tēnei pukapuka; nā te mea kua tuhituhi au i ngā mea katoa e pai ana ki ahau i roto i tērā atu o āku pukapuka.

16 Ā, koinei mea katoa, kua kōrero nei ahau, i mahia ai i tōku matua e noho tēneti ana, i te raorao o Remuere.

17 Ā, i pahawa ake, i muri iho i tāku, tā Nīwhai, rangona ngā kupu katoa a tōku matua, e pā ana ki tāna i kite ai i tētahi whakakitenga, ā, ko ngā mea anō i kōrero ai ia i runga i te kaha o te Wairua Tapu, koia nei te kaha i riro mai i a ia i runga i te whakapono ki te Tama a te Atua—ā, ko te Tama a te Atua te Mīhaia ka haere mai—ko au, ko Nīwhai, ka hiahia anō kia kite ai ahau, kia rongo ai, kia mōhio ai i ēnei mea, mā te kaha o te Wairua Tapu, koia te takohatanga o te Atua ki te hunga katoa e ū ana ki te whai atu i a ia, pērā anō i ngā wā onamata me ō te wā e whakakite ai ia i a ia anō ki ngā tamariki a te tangata.

18 Nā te mea e tūturu tonu ana ia inānahi, ināianei, ā, āke ake tonu atu; ā, kua whakaritea te huarahi mō ngā tāngata katoa mai i te orokohanganga o te ao, ki te mea ka rīpeneta rātou, ā, ka haere mai ki a ia.

19 Nā te mea ko ia e ū ana ki te whai atu i a ia ka kite; ā, ka whakapuarehia ngā mea ngaro a te Atua ki a rātou, mā te kaha o te Wairua Tapu, pērā anō i ēnei wā me ngā wā onamata, ā, pērā anō ki ngā wā onamata me ngā wā anamata; nā reira, ko te huarahi o te Ariki he ara mutunga kore kotahi.

20 Nō reira mahara, Auē e te tangata, nā te mea ko āu mahinga katoa ka whakawākia ai.

21 Nā reira, mehemea kua whai atu koe ki te mahi whakarihariha i ngā rā o tō poropeihana, tēnā, kua kitea koe e poke ana i mua i te aroaro o te nohoanga-whakawā o te Atua; ā, kāore tētahi mea poke e āhei ana ki te noho tahi me te Atua; nā reira, ka makaia atu koe mō āke tonu atu.

22 Ā, kua homai e te Wairua Tapu te mana kia kōrero ai au i ēnei mea, ā, kaua ēnā e whakakāhoretia.