1 Ā, i pahawa ake, ko au, ko Nīwhai, i hoki mai i taku kōrerotanga ki te Ariki, ki te tēneti o tōku matua.

2 Ā, i pahawa ake, i kōrero mai ia ki ahau, e mea ana: Nana, kua moeā e au he moemoeā, i reira rā anō i whakahau mai te Ariki ki ahau kia hoki atu ai koe me ō tuākana ki Hiruharama.

3 Nana rā, kei a Rāpana te tuhinga o ngā Hūrai me tētahi whakapapa nō ōku mātua tīpuna, ā, kua whakairohia i runga i ngā papa parāhe.

4 Nā reira, kua whakahaua ahau e te Ariki kia haere ai koe me ō tuākana ki te whare o Rāpana, me te whai atu i ngā tuhinga, me te kawe iho mai nei ki roto i te koraha.

5 Ā, ianei, nana ō tuākana e amuamu ai, e kī ana he mea uaua tāku e tono nei ki a rātou; engari nana, ehara i ahau tēnei tono ki a rātou, engari he whakahaunga ia nā te Ariki.

6 Nō reira haere, taku tama, ā, ka whakamanawatia koe e te Ariki, nā te mea kīhai koe i amuamu.

7 Ā, i pahawa ake i a au, a Nīwhai, ka kī atu ki tōku matua: Ka haere ahau me te mahi i ngā mea kua whakahaua e te Ariki, e mōhio ana rā ahau e kore te Ariki e homai i tētahi whakahaunga ki ngā tamariki a te tangata, engari ka whakaritea e ia he huarahi mō rātou e tutuki ai i te mea kua whakahaua rātou.

8 Ā, i pahawa ake i te rongonga a tōku matua i ēnei kupu ka koa rawa ia, nā te mea rā kua mōhio ia kua manaakitia au e te Ariki.

9 Ā, ko au, ko Nīwhai, me ōku tuākana ka tīmata i tā mātou haerenga i roto i te koraha, me ō mātou tēneti, kia haere ake ai ki te whenua o Hiruharama.

10 Ā, i pahawa ake tā mātou haere ake ki te whenua o Hiruharama, ka kōrerorero tahi au me ōku tuākana tētahi ki tētahi.

11 Ā, ka whiu rotarota mātou—ko wai o mātou me haere ki te whare o Rāpana. Ā, i pahawa ake, ka tau iho te rotarota ki runga i a Rāmana; ā, ka haere a Rāmana ki te whare o Rāpana, ā, ka kōrero ia ki a ia i a ia e noho ana i roto i tōna whare.

12 Ā, ka inoi ia ki a Rāpana mō ngā tuhinga kua whaowhaoa ki runga i ngā papa parāhe, i mau nei te whakapapa o tōku matua.

13 Ā nana, i pahawa ake, ka riri a Rāpana, ā, ka panaia atu ia i tōna aroaro; tē whakaae ia kia mau i a ia ngā tuhinga. Nā reira, ka kī atu ia ki a ia: Nana he kaipāhua koe, ā, ka whakamate au i a koe.

14 Engari ka tahuti atu a Rāmana i tōna aroaro, ā, ka kōrerohia ngā mea nā Rāpana i mahi, ki a mātou. Ā, ka pā mai te hinapōuri nui ki a mātou, ā, whano ka hoki ōku tuākana ki tōku matua i te koraha.

15 Engari nana, ka mea atu au ki a rātou: E ora ana te Ariki, ā, e ora ana anō tātou, engari tātou mō te haere iho ki tō tātou matua i te koraha kia tutuki rā anō te mea kua whakahaua tātou e te Ariki.

16 Nā reira, kia ū tātou ki te pupuri i ngā whakahaunga a te Ariki; nō reira tukuna tātou kia haere iho ki te whenua tuku iho o tō tātou matua, nana rā, kua mahue i a ia he kōura, he hiriwā, me ngā momo taonga katoa. Koinei katoa kua mahi nei ia nā ngā whakahaunga a te Ariki.

17 Nā te mea i mōhio ia, me whakangaro a Hiruharama, nā ngā whakarihariha o te iwi.

18 Nana rā, kua whakaparahakongia ngā kupu a ngā poropiti. Nā reira, mehemea ka noho tōku matua i te whenua whai muri iho i te whakahau i a ia kia tahuti atu i te whenua, nana, ka mate anō hoki ia. Nā reira, koia pū anō me tahuti atu i te whenua.

19 Ā nana, he whaimōhiotanga ia nō roto i te Atua kia mau i a tātou ēnei tuhinga, kia tiakina e tātou mō ā tātou tamariki te reo o ō tātou tīpuna;

20 Ā, e tiakina anōtia ai e tātou mō rātou ngā kupu kua kōrerotia e ngā māngai o ngā poropiti tapu katoa, kua tukuna ki a rātou e te Wairua me te mana o te Atua, nō te tīmatanga o te ao, ā mohoa noa nei.

21 Ā, i pahawa ake, i pēnei taku momo reo hei whakapakepake au i ōku tuākana, me kore pea e ū rātou ki te pupuri i ngā whakahaunga a te Atua.

22 Ā, i pahawa ake, i haere iho mātou ki tō mātou whenua tuku iho, ka kohikohi mātou i ā mātou kōura, me ā mātou hiriwā, me ā mātou mea utu nui.

23 Ā, whai muri iho i tā mātou kohikohi tahi i ēnei mea, ka haere ake anō mātou ki te whare o Rāpana.

24 Ā, i pahawa ake, i haere mātou ki roto ki a Rāpana, ā, ka inoi atu ki a ia kia homai e ia ki a mātou ngā tuhituhinga kua whaowhaoa ki runga i ngā papa parāhe, hei reira mātou hoatu ai ki a ia ā mātou kōura, me ā mātou hiriwā, me ā mātou mea utu nui katoa.

25 Ā, i pahawa ake, kitea ana e Rāpana ā mātou rawa, ā, he mea nui whakaharahara ia, ka apohia mai e ia, nā konā ka panaia atu mātou ki waho, ā, ka tukuna āna pononga ki te whakamate i a mātou, me kore pea e mau i a ia ā mātou rawa.

26 Ā, i pahawa ake, i tahuti atu mātou i ngā pononga a Rāpana, ā, ka meinga mātou kia mahue iho ki muri ā mātou rawa, ā, ka taka ki roto i ngā ringaringa o Rāpana.

27 Ā, i pahawa ake, i tahuti atu mātou ki roto i te koraha, kīhai ngā pononga a Rāpana i mau ki a mātou, ā, ka huna mātou i te ana o tētahi toka.

28 Ā, i pahawa ake, i riri a Rāmana ki ahau, ā, ki tōku matua anō hoki; ā, i pēnā anō a Remuere, nā te mea i aro katoa atu ia ki ngā kupu a Rāmana. Nā reira, he nui ngā kupu taunu i kōrero mai ai a Rāmana rāua ko Remuere ki a māua, ā rāua teina, ā, ka patua māua ki tētahi tokotoko.

29 Ā, i pahawa ake, i a rāua e patu ana i a māua ki te tokotoko, nana, ka puta mai he anahera o te Ariki, ā, ka tū mai ki mua i a rāua, ka kōrero anō ia ki a rāua, e kī ana: He aha kōrua e patu ai i tā kōrua teina ki te tokotoko? Kāore kōrua e mōhio nei kua whiriwhiri te Ariki i a ia hei rangatira i runga i a kōrua, ā, he haututū nō kōrua i pēnei ai? Nana, ka haere ake anō koutou ki Hiruharama, ā, ka tukuna e te Ariki a Rāpana ki roto i ō koutou ringaringa.

30 Ā, whai muri iho i te kōrero a te anahera ki a mātou, ka wehe atu ia.

31 Ā, whai muri iho i te wehenga a te anahera, ka tīmata anō a Rāmana rāua ko Remuere ki te amuamu, e kī ana: Me pēhea e taea ai e te Ariki te tuku mai i a Rāpana ki roto i ō tātou ringaringa? Nana, he tangata mārohirohi ia, ā, i a ia te kaha ki te whakahau e rima tekau, āe rā, e taea nei e ia te whakamate e rima tekau; nō konei, he aha e kore ai tātou?