1 Ā, i pahawa ake, i kohikohia e mātou ngā momo purapura katoa o ia āhua, me ngā kerēne o ia āhua, me ngā purapura hua rākau anō hoki o ia āhua.

2 Ā, i pahawa ake, i tōku matua e noho ana i te koraha ka kī mai ia ki a mātou, e mea ana: Nana, kua moea e ahau he moemoeā; me kī kē rānei, kua kite ahau i tētahi whakakitenga.

3 Ā nana, nā te mea i kite ai ahau, kua whaitake ahau kia hari i roto i te Ariki nā Nīwhai rāua ko Hāmi; nā te mea kua whaitake taku whakapono atu ko rāua, me te tini anō o ō rāua uri, ka whakaorangia ai.

4 Heoi nana, e Rāmana me Remuere, he nui rawa atu tōku wehi mō kōrua; nana rā, ki taku mahara i kite ai au i taku moemoeā, he koraha pōuri mokemoke.

5 Ā, i pahawa ake, i kite ahau i tētahi tangata, e kākahuria ana ki tētahi kahu mā; ā, ka haere mai ia me te tū ki mua i ahau.

6 Ā, i pahawa ake, i kōrero mai ia ki ahau, ā, ka tonoa au kia aru atu i a ia.

7 Ā, i pahawa ake, i ahau e aru atu ana i a ia ka kite ahau i ahau anō i roto i tētahi wāhi tītōhea pōuri mokemoke.

8 Ā, i pahawa ake, taku haeretanga mō ngā haora maha i te pōuritanga, ka tīmata au ki te inoi atu ki te Ariki kia whaiaroha ia mōku, e ai ki ōna tini aroha noatanga.

9 Ā, i pahawa ake, whai muri i taku inoi ki te Ariki i kite ahau i tētahi whīra nui whakaharahara.

10 Ā, i pahawa ake, i kite ahau i tētahi rākau, ko ōna hua i hiahiatia nei kia whakakoa ai i tētahi.

11 Ā, i pahawa ake, i haere whakamua ahau me te kai i ngā hua o reira; ā, ka kite anō ahau he tino reka rawa ake i ngā mea katoa kua kainga e ahau. Āe rā, ka kite anō ahau he mā ngā hua o reira, he mā ake i ngā mā katoa kua kite rā anō ahau.

12 Ā, i ahau e kai ana i ngā hua o reira ka kīa tōku wairua ki te hari tino nui; nā reira, ka tīmata taku hiahia kia kai anō ai tōku hapū; nā te mea i mōhio ahau he mea e hiahiatia ana i runga ake i ērā atu hua katoa.

13 Ā, i ahau e whiu haere ana i ōku kamo huri noa, me kore pea e kite ai i tōku hapū anō hoki, ka kitea e ahau he awa wai; e rere ana, e pātata ana ki te rākau nōna ngā hua i kai ai au.

14 Ā, ka titiro atu e kite ai nōhea rā anō ia; ā, ka kite au i tōna mātāpuna kāore i tawhiti atu; ā, i tōna mātāpuna ka kite au i tō whaea Haraia, me Hāmi, me Nīwhai; ā, i te tū rātou me te mea nei kāore rātou i te mōhio ki hea haere ai rātou.

15 Ā, i pahawa ake, i tāwhiri atu au ki a rātou; ā, ka kī atu anō ahau ki a rātou i runga i te reo kaha kia haere mai ai rātou ki ahau, me te kai i te hua, koia e hiahiatia ana i runga ake i ērā atu hua katoa.

16 Ā, i pahawa ake, i haere mai rātou ki ahau, ā, ka kai anō i te hua.

17 Ā, i pahawa ake, i te hiahia ahau kia haere mai ai a Rāmana rāua ko Remuere ki te kai i te hua anō hoki; nā reira, ka whiua ōku kamo ki te mātāpuna o te awa, me kore pea au e kite i a rāua.

18 Ā, i pahawa ake, i kite ahau i a rāua, engari kāore rāua mō te haere mai ki ahau ki te kai i te hua.

19 Ā, ka kite ahau i tētahi tokotoko rino, ā, e takoto whārōrō ana ia i te tahatika o te awa, ā, e ārahina ana ki te rākau i tū ai ahau.

20 Ā, ka kite anō hoki ahau i tētahi ara tōtika, ara whāiti, e haere hāngai ana ki te tokotoko rino, tae atu ana ki te rākau i tū ai ahau; ā, i ārahina anōtia rā ki te mātāpuna o te awa, ki tētahi whīra nui whakaharahara, me te mea nei he ao ia.

21 Ā, ka kite ahau i ngā tāngata manomano tini, he tokomaha o rātou e tāruke whakamua ana, kia tae atu ai rātou ki te ara i ārahina atu ai ki te rākau i tū ai ahau.

22 Ā, i pahawa ake, i haere mai rātou, ā, ka tīmata atu i te ara i ārahina atu ai ki te rākau.

23 Ā, i pahawa ake, i ara mai he kohu pōuriuri; āe rā, he kohu pōuriuri nui whakaharahara; nā konā rātou te hunga kua tīmata i te ara i ngaro atu ai i tō rātou ara, nā, ka ātiutiu atu rātou, ā, ka ngaro rātou.

24 Ā, i pahawa ake, i kite ahau i ētahi atu e tāruke whakamua ana, ā, ka haere mai rātou, ā, ka mau i a rātou te pito o te tokotoko rino; ā, ka tāruke whakamua rātou ki waenganui i te kohu pōuriuri, e rapa ana ki te tokotoko rino, tae atu ana ki tā rātou putanga mai, ā, ka kai i te hua o te rākau.

25 Ā, whai muri iho i tā rātou kai i te hua o te rākau ka whiu haere rātou i ō rātou kamo me te mea nei i whakamā rātou.

26 Ā, ka whiu haere anō ahau i ōku kamo, ā ka kitea, i tērā atu taha o te awa wai, he whare nui whakaharahara; ā, i te tū ia me te mea nei i te hau takiwā, i runga rawa ake i te whenua.

27 Ā, i kī katoa i te tangata, kaumātua mai, tamariki mai, tāne mai, wahine mai; ā, ko te āhua o ō rātou kākahu he tino pai rawa atu; ā, i te tāwai rātou me te tuhi mai i ō rātou matikara ki te hunga i haere mai ai, ā, e kai ana i te hua.

28 Ā, whai muri iho i tā rātou kai i te hua ka whakamā rātou, nā te hunga e taunu ana i a rātou; ā, ka taka atu rātou ki ngā ara kua whakakāhoretia atu, ā, ka ngaro.

29 Ā, ko au ianei, a Nīwhai, e kore e kōrero i ngā kupu katoa a tōku matua.

30 Engari, kia poto ai i te tuhinga, nana, i kite ia i ngā marea e tāruke whakamua ana; ā, i haere mai rātou me te whakamau ki te pito o te tokotoko rino; ā, ka tāruke whakamua rātou, e ū ana ki te pupuri ki te tokotoko rino, tae atu ana ki tā rātou putanga mai, ā, ka hinga ki raro, ā, ka kai i te hua o te rākau.

31 Ā, i kite anō i ētahi atu marea e whāwhā haere ana rātou whaka-te-whare nui whakaharahara.

32 Ā, i pahawa ake, i toromi iho rātou ki ngā rire o te awa; ā, he tokomaha i ngaro atu ai i tōna kitenga, e ātiutiu ana i ngā ara hē kē atu.

33 Ā, he nui rawa atu te marea i kuhu ai ki roto i taua whare kē. Ā, whai muri iho i tā rātou kuhu ki roto i taua whare ka tuhi rātou i te matikara taunu ki ahau me te hunga anō e kai ana i te hua; engari kāore mātou i aro atu.

34 Koinei ngā kupu a tōku matua: Nā te mea ko te hunga katoa i aro atu ki a rātou, i taka atu.

35 Ā, kāore a Rāmana rāua ko Remuere i kai i te hua, te kī a tōku matua.

36 Ā, i pahawa ake, i muri iho i te kōrero a tōku matua i ngā kupu katoa o tana moemoeā, whakakitenga rānei, koia he mea maha, ka kī mai ia ki a mātou, nā ēnei mea i kite ai ia i tētahi whakakitenga, i tino nui whakaharahara tōna wehi mō Rāmana rāua ko Remuere; āe rā, i wehi ia kei makaia atu rāua i te aroaro o te Ariki.

37 Ā, ka akiaki ia i a rāua i konā i runga i te aroha katoa o tētahi matua ngāwari, kia whakarongo ai rāua ki ana kupu, e aroha nui pea te Ariki ki a rāua, ā, kia kaua e makaia atu rāua; āe rā, i kauhau ai tōku matua ki a rāua.

38 Ā, whai muri iho i tana kauhau atu ki a rāua, ā, ka poropiti atu ia ki a rāua i ngā mea maha, ka tono ia ki a rāua kia puritia ai ngā whakahaunga a te Ariki; ā, ka mutu tana kōrero atu ki a rāua.