1 Nā te mea i pahawa ake, i muri iho i taku hiahia kia mōhio ai i ngā mea kua kitea e tōku matua, me te whakapono anō e taea ana e te Ariki ērā te whakamōhio mai ki ahau, i ahau e noho ana ki te whakaaroaro i tōku ngākau ka kahakina atu ahau i roto i te Wairua o te Ariki, āe rā, ki runga i tētahi maunga tiketike, kīhai nei ahau i kite noa i mua, kīhai nei ahau i tau noa tōku waewae i runga.

2 Ā, ka kī mai te Wairua ki ahau: Nana, he aha tāu e hiahia nei?

3 Ā, ka kī atu ahau: E hiahia ana ahau kia kitea ai ngā mea i kite ai tōku matua.

4 Ā, ka kī mai te Wairua ki ahau: E whakapono ana rānei koe i kite ai tō matua i te rākau i kōrero ai ia?

5 Ā, ka kī atu ahau: Āe rā, e mōhio ana koe kei te whakapono ahau ki ngā kupu katoa a tōku matua.

6 Ā, ka oti i ahau te kōrero i ēnei kupu, ka karanga kaha nei te Wairua, e mea ana: Ōhana ki te Ariki, te Atua i runga rawa; nā te mea ko ia te Atua i runga i te ao katoa, āe rā, i runga pū anō i te katoa. Ā, kua manaakitia koe, e Nīwhai, nā te mea kei te whakapono koe i te Tama a te Atua i runga rawa; nā reira, ka kite koe i ngā mea kua hiahia nei koe.

7 Ā, nana ka hoatu tēnei ki a koe hei tohu, nā, i muri iho i tō titiro atu ki te rākau nāna i hua ai ngā hua i kaingia ai e tō matua, ka kite anō koe i tētahi tangata e heke ana i te rangi, ā, ko ia tāu e kitea ai; ā, i muri iho i tāu kite atu i a ia ka tuku whakaaturanga koe ko ia te Tama a te Atua.

8 Ā, i pahawa ake, i kī mai te Wairua ki ahau: Titiro! Ā, ka titiro ahau, ā, ka kitea he rākau; ā, he rite tonu ia ki te rākau i kite ai tōku matua; ā, kei tua noa atu tōna ātaahua, āe rā, he ātaahua ake i ngā ātaahua katoa; ā, ko tōna mā he nui ake i te mā o te hukarere e pūhia haeretia ana.

9 Ā, i pahawa ake, i muri iho i taku kite atu i te rākau, i kī atu au ki te Wairua: Kua kite nei ahau kua whakaatu mai koe ki ahau te rākau tongarerewa i runga ake i te katoa.

10 Ā, ka mea mai ia ki ahau: He aha tāu e hiahia nei?

11 Ā, ka kī atu ahau ki a ia: Kia mōhio ai ki tōna māramatanga—nā te mea i kōrero ahau ki a ia me te mea nei he tangata e kōrero ana; nā te mea i kite atu ahau i te āhua o tētahi tangata ia; hei aha koa, i mōhio ahau ko te Wairua o te Atua ia; ā, ka kōrero mai ia ki ahau anō nei he tangata e kōrero ana ki te tangata.

12 Ā, i pahawa ake, i kī mai ia ki ahau: Titiro! Ā, ka titiro ahau kia kite ai i a ia, ā, kāore au i kite i a ia; nā te mea kua wehe atu ia i mua i tōku aroaro.

13 Ā, i pahawa ake, i titiro, ā, ka kite i te pā nui whakaharahara o Hiruharama, ā, me ētahi atu pā anō hoki. Ā, ka kite ahau i te pā o Nahareta; ā, kei roto i te pā o Nahareta i kite ai au i tētahi puhi, ā, he ātaahua rawa atu, he kiritea rawa atu ia.

14 Ā, i pahawa ake, i kite au i ngā rangi e tūwhera ana; ā, ka heke iho mai tētahi anahera, ā, ka tū i mua i ahau; ā, ka kī mai ia ki ahau: E Nīwhai, he aha tāu e kite nei?

15 Ā, Ka kī atu ahau ki a ia: He puhi, he ātaahua rawa ake, ā, he kiritea rawa ake i ērā atu puhi katoa.

16 Ā, ka kī mai ia ki ahau: E mōhio ana rānei koe i te tapatuhanga a te Atua?

17 Ā, ka kī atu au ki a ia: E mōhio ana ahau kei te aroha ia i āna tamariki; hei aha koa, kāore au e mōhio ana te tikanga o ngā mea katoa.

18 Ā, ka kī mai ia ki ahau: Nana, ko te puhi e kite nā koe ko ia te whaea o te Tama a te Atua, i runga i te ritenga o te kikokiko.

19 Ā, i pahawa ake, i kite ahau i a ia e kahakina atu ana i roto i te Wairua; ā, i muri iho i tōna kahakitanga atu i roto i te Wairua mō tētahi wā ka kī mai te anahera ki ahau, e mea ana: Titiro!

20 Ā, ka titiro ahau, ā, ka kite anō i te puhi, e okooko ana i tētahi tamaiti i ōna ringaringa.

21 Ā, ka kī mai te anahera ki ahau: Tirohia te Reme a te Atua, āe rā, ko te Tama pū anō a te Matua Ora Tonu! E mōhio ana rānei koe te tikanga o te rākau i kite ai tō matua?

22 Ā, ka whakautu au i a ia, e mea ana: Āe rā, ko te aroha o te Atua, e riringi whānui atu ai i a ia anō ki roto ki ngā ngākau o ngā tamariki a te tangata; nā reira, he mea e hiahia nuitia ana i runga i ngā mea katoa.

23 Ā, ka kī mai ia ki ahau, e mea ana: Āe rā, he whakakoa rawa atu anō hoki ki te wairua.

24 Ā, i muri iho i tana kīanga i ēnei kupu, ka kī mai ia ki ahau: Titiro! Ā, ka titiro ahau, ā, ka kite au i te Tama a te Atua e haere whakamua ana ki waenganui i ngā tamariki a te tangata; ka kite anō ahau i te tokomaha e tāpapa iho ana ki ōna waewae, ā, koropiko ana ki a ia.

25 Ā, i pahawa ake, i kite ahau i te tokotoko rino, i kite ai tōku matua, ko te kupu ia a te Atua, e ārahina atu ana ki te mātāpuna o ngā wai ora, ki te rākau rānei o te ora; ko aua wai rā he tohu mō te aroha o te Atua; ka kite anō ahau ko te rākau o te ora he tohu mō te aroha o te Atua.

26 Ā, ka kī mai te anahera ki ahau: Titiro, tirohia te tapatuhanga a te Atua!

27 Ā, ka titiro ahau, ā, ka kite i te Kaihoko o te Ao, ko ia nei i kōrerotia ai e tōku matua; ā, ka kite anō ahau i te poropiti māna nei te huarahi e whakarite i mua i a ia. Ā, ka haere whakamua te Reme a te Atua, ā, ka rumakina e ia; ā, i muri iho i tana rumakitanga, ka kite au i te tūwheratanga o ngā rangi, ā, ka heke iho mai te Wairua Tapu mai i te rangi, ā, ka tau iho ki runga i a ia i te āhuatanga o te kererū.

28 Ā, ka kite ahau, nā, ka haere whakamua ia e minita ana ki te iwi, i runga i te kaha me te korōria nui; ā, ka huihuia ngā mano ki te whakarongo ki a ia; ā, ka kite ahau, nā, ka panaia atu ia e rātou i waenganui i a rātou.

29 Ā, ka kite anō ahau i ētahi atu tekau mā rua e aru ana i a ia. Ā, i pahawa ake, i kahakina atu rātou i roto i te Wairua Tapu mai i te aroaro o tōku kanohi, ā, tē kitea rātou e ahau.

30 Ā, i pahawa ake, i kī mai anō te anahera ki ahau, e mea ana: Titiro! Ka titiro ahau, ā, ka kite ahau i ngā rangi e tūwhera ana anō, ā, ka kite ahau i ngā anahera e heke iho ana ki runga i ngā tamariki a te tangata; ā, ka minita rātou ki a rātou.

31 Ā, ka kī mai anō ia ki ahau, e mea ana: Titiro! Ā, ka titiro ahau, ā, ka kite ahau i te Reme a te Atua e haere whakamua ana ki waenganui i ngā tamariki a te tangata. Ā, ka kite ahau i ngā mano tāngata e māuiui ana, e mamae ana i ngā tūmomo mate katoa, ā, i ngā rēwera me ngā wairua poke; ā, ka kī mai te anahera me te whakaatu mai i ēnei mea katoa ki ahau. Ā, ka whakaorangia rātou e te mana o te Reme a te Atua; ka peia atu anō hoki ngā rēwera me ngā wairua poke.

32 Ā, i pahawa ake, i kī mai anō te anahera ki ahau, e mea ana: Titiro! Ā, ka titiro ahau, ā, ka kite ahau i te Reme a te Atua, nā, kua kawea ia e te iwi; āe rā, te Tama a te Atua ora tonu kua whakawākia e te ao; ā, i kite ai ahau, e whakaaturia ana anō hoki.

33 Ā, ko au, ko Nīwhai, i kite i a ia e whakairia ana ki runga ki te rīpeka, ā, ka whakamatea mō ngā hara o te ao.

34 Ā, i muri iho i tana whakamatenga ka kite ahau i ngā mano o te ao, nā, kua huihuia tahitia kia whawhai atu ki ngā āpotoro a te Reme; nā te mea koirā te tekau mā rua i karangahia ai e te anahera o te Ariki.

35 Ā, kua oti ngā mano tini o te ao te huihui tahi; ā, ka kite ahau, nā, kei roto rātou i tētahi whare nui whakaharahara, e rite ana ki te whare e kite ai tōku matua. Ā, ka kī mai anō te anahera a te Ariki ki ahau, e mea ana: Tirohia te ao me tō reira mātauranga; āe rā, tirohia te whare o Iharaira kua huihuia tahitia kia whawhai ai ki ngā āpotoro tekau mā rua a te Reme.

36 Ā, i pahawa ake, nā, i kite ahau, ā, e whakaaturia ana anō hoki, ko te whare nui whakaharahara ko te whakapehapeha o te ao; ā, i hinga ia, he nunui rawa atu nei tōna hinganga. Ā, ka kī mai anō te anahera a te Ariki ki ahau, e mea ana: Koirā te whakangaromanga o ngā iwi katoa, ngā hapū, ngā reo, me ngā tāngata, e whawhai ai ki ngā āpotoro tekau mā rua a te Reme.