1 Ndien idahaemi, Jacob etiŋ ediwak ŋkpɔ efen ɔnɔ ikɔt mi ke ini oro; edi mme ŋkpɔ emi ikpɔŋ ke ami nnam ewet, koro mme ŋkpɔ emi ami ŋwetde ekem ye ami.

2 Ndien idahaemi ami, Nephi, ŋwet mme ŋkpɔ efen mbaŋa mme ikɔ Isaiah, koro ukpɔŋ mi okopde idaresit ke mme ikɔ esie. Koro ami nyedomo mme ikɔ esie ye ikɔt mi, ndien ami nyɔnɔ mmɔ esɔk nditɔ mi, koro enye ke akpanikɔ ama okut Andifak mi, kpa nte ami ŋkutde enye.

3 Ndien eyeneka mi eren, Jacob, ŋko okut enye nte ami ŋkutde enye; ke ntre, ami nyɔnɔ mme ikɔ mmɔ esɔk nditɔ mi ndiwut mmɔ ete ke mme ikɔ mi edi akpanikɔ. Ke ntre, ke mme ikɔ ntiense ita, Abasi ama ɔdɔhɔ, ami nyesiak ikɔ mi. Edi, Abasi ɔnɔ mme ntiense efen, ndien enye anam kpukpru ikɔ esie esɔŋɔ eda.

4 Sese, ukpɔŋ mi adaresit ke ndiwut ikɔt mi akpanikɔ ke abaŋa edidi Christ; koro, ke ntak emi ke ekenɔ ibet Moses; ndien kpukpru ŋkpɔ emi enɔde eto Abasi tɔŋɔ ke eritɔŋɔ ererimbot, emi enɔde owo, eda enɔ enye.

5 Ndien ŋko ukpɔŋ mi adaresit ke mme ediomi Jehovah emi enye akanamde ɔnɔ mme ete nnyin; iŋ, ukpɔŋ mi adaresit ke mfɔn esie, ye nnen nnen ido esie, ye odudu, ye mbɔm ke akwa ye nsinsi uduak edibɔhɔ ke mkpa.

6 Ndien ukpɔŋ mi adaresit ke ndiwut ikɔt mi ete ke mibɔhɔke Christ edi ke kpukpru owo ana nte etak.

7 Koro edieke Christ miduhe ndien Abasi iduhe; ndien edieke Abasi miduhe nnyin iduhe, koro edibot ikpikiduhe. Edi Abasi odu, ndien enye edi Christ, ndien enye kedi ke ɔyɔhɔ ini esie.

8 Ndien idahaemi ami ŋwet usuk mme ikɔ Isaiah, man ikɔt mi ekededi emi edikutde mme ikɔ emi emenede esit mmɔ enyuŋ edaresit ebaŋa kpukpru owo. Idahaemi emi edi mme ikɔ oro, ndien mbufo emekeme ndidomo mmɔ ye idem mbufo ye kpukpru owo.