1 Ke ini Christ ama eset ke mkpa enye oyowut mbufo idem esie, nditɔ mi, ye ndima nditɔ eka mi; ndien mme ikɔ emi enye editiŋde ye mbufo eyedi mbet emi mbufo edinamde.

2 Koro sese, ami ndɔhɔ mbufo nte ke ami mokut nte ke ediwak emana eyebe efep, ndien mme ikpɔ ekɔŋ ye mme eneni eyedu ke ufɔt ikɔt mi.

3 Ndien ke ini Messiah ama edi eyenɔ ikɔt mi mme idiɔŋɔ kabaŋa emana esie, ŋko ye mkpa ye eriset ke mkpa esie; ndien akamba ye enyene ndik ke usen oro edi-di inɔ mme idiɔk owo, koro mmɔ eyetak; ndien mmɔ editak koro mmɔ ema ebin mme prophet ye mme ndisana owo esio, enyuŋ etɔ mmɔ ke itiat, enyuŋ ewot mmɔ; ke ntre ntua-eyet iyip mmendisana owo eyeto isɔŋ ɔdɔk ebine Abasi abaŋa mmɔ.

4 Ke ntre, kpukpru mbon emi etaŋde idem, enyuŋ enamde idiɔk, usen emi edide eyefɔp mmɔ, Jehovah mme Udim ɔdɔhɔ, koro mmɔ eyetie nte itak nnyanyaha.

5 Ndien mmɔ emi ewotde mme prophet, ye mme ndisana owo, mme utuŋɔ ererimbot eyemen mmɔ, Jehovah mme Udim ɔdɔhɔ; ndien mme obot eyefuk mmɔ, ndien oyobio eyemen mmɔ osio, ndien mme ufɔk eyeduɔ efuk mmɔ enyuŋ enuak mmɔ mbio mbio enyuŋ ɔkɔk mmɔ nte ntɔŋ.

6 Ndien mme obuma eyedise mmɔ, ye mme emireŋ-mireŋ, ye mme uyeŋe isɔŋ, ye kpukpru utɔ nsobo, koro ikaŋ iyaresit Jehovah ɔyɔfɔp mmɔ, ndien mmɔ eyetie nte itak nnyayaha, ndien usen emi edide ɔyɔfɔp mmɔ, Jehovah mme Udim ɔdɔhɔ.

7 O ubiak, ye ndutuhɔ ukpɔŋ mi ke ntak edisop ikɔt mi emi ekewotde! Koro ami, Nephi, mma ŋkut enye, ndien esisit ɔkɔsuhɔ enye okposobo mi ke iso Jehovah; edi ana nte ami nseme nnɔ Abasi: Mme usuŋ fo edi edinen.

8 Edi sese, ndinen mme owo emi ekpaŋde utɔŋ enɔ mme ikɔ mme prophet, inyuŋ iwotke mmɔ, edi etiŋ enyin ese Christ kabaŋa mme idiɔŋɔ emi enɔde, isehe kpukpru ukɔbɔ—sese, mmɔ edi mmɔ emi miditakke.

9 Edi Eyen Edinen-ido oyowut mmɔ idem; ndien enye ɔyɔsɔbɔ mmɔ, ndien mmɔ eyenyene emem ye enye, tutu emana ita ebe efep, ndien ediwak ke ɔyɔhɔ emana inaŋ eyebe efep ke edinen ido.

10 Ndien ke ini mme ŋkpɔ emi ema ebe efep nsobo ɔyɔsɔp edi etiene ikɔt mi; koro, ke misehe mme ubiak ukpɔŋ mi, ami mokut enye; ke ntre, ami mɔfiɔk nte ke eyetibe ntre; ndien mmɔ enyam idem mmɔ ke ikpikpu; koro, kabaŋa utip ntaŋidem mmɔ ye ndisime mmɔ mmɔ eyedɔk nsobo; ndien ke ntak oro mmɔ eyak idem enɔ satan enyuŋ emek mme utom ekim ekan uŋwana, ke ntak oro ana nte mmɔ esuhɔre eka hell.

11 Koro Spirit Jehovah idiŋwanake ye owo ke nsinsi. Ndien ke ini Spirit etrede ndiŋwana ye owo ndien ke nsobo edisɔp idi, ndien emi anam ukpɔŋ mi ɔfuhɔ.

12 Ndien nte nketiŋde kabaŋa mme Jew ndikpuhɔre ekikere, ete ke Jesus edi Christ oro, ana nte enam mme Gentile efiɔk ete ke Jesus edi Christ, Nsinsi Abasi;

13 Ndien ke enye ayarare idem esie ɔnɔ kpukpru mbon emi ebuɔtde idem ke enye, oto ke odudu Edisana Spirit; iŋ, ɔnɔ ofuri idut, iman, usem, ye mme owo, ke ndinam mme ikpɔ utibe ŋkpɔ, mme idiɔŋɔ, ye mme utibe ŋkpɔ, ke ufɔt nditɔ owo nte mbuɔtidem mmɔ edide.

14 Edi sese, ami ntiŋ nte prophet nnɔ mbufo kabaŋa mme akpatre usen; kabaŋa mme usen emi Jehovah Abasi edimende mme ŋkpɔ emi idi inɔ nditɔ owo.

15 Ke ini emi ubon mi ye ubon nditɔ eka mi ema eketaha ke unana edinim, ndien mme Gentile emia mmɔ; iŋ, ke ini emi Jehovah Abasi ama akanam nna ekɔŋ akanare mmɔ okuk, onyuŋ efik mmɔ ye obot, onyuŋ emenere mme ŋkpɔ ukpeme abaŋa mmɔ; ndien ke ini ema ekemen mmɔ esuhɔre ke ntan, tutu ete ke mmɔ iduhe, edi eyewet mme ikɔ ndinen owo, ndien eyebɔrɔ akam mbon mbuɔtidem, ndien owo idifreke kpukpru mbon emi etahade ke unana ndinim.

16 Koro mbon emi edisobode eyetiŋ ikɔ enɔ mmɔ eto ke isɔŋ, ndien ikɔ mmɔ ɔyɔsuhɔre ɔwɔrɔ ke ntan, ndien uyo mmɔ eyetie nte enye emi enyenede uyo ekpo; koro Jehovah Abasi eyenɔ enye odudu, man enye ɔdɔŋ odu kabaŋa mmɔ, nte ɔwɔrɔ ke isɔŋ; ndien ikɔ mmɔ eyedɔŋ odu oto ke ntan.

17 Koro ntem ke Jehovah ɔdɔhɔ ete: Mmɔ eyewet mme ŋkpɔ emi edinamde ke ufɔt mmɔ, ndien eyewet mmɔ enyuŋ ekɔbi ke ŋwed enim, ndien mbon emi eketahade ke unana edinim idinyeneke mmɔ, koro mmɔ eyomde ndisobo mme ŋkpɔ Abasi.

18 Ke ntre, nte ekesɔpde esobo mbon emi ekesobode; ndien otu mbon afai mmɔ eyebiet mbio emi ekpɔride efep—iŋ, ntem ke Jehovah ɔdɔhɔ ete: Enye ke ini kiet, ayabuat—

19 Ndien eyedikem, ete ke mbon emi eketahade ke unana ndinim ke eyemia mmɔ ke ubɔk mme Gentile.

20 Ndien emenere mme Gentile ke ŋtaŋidem enyin mmɔ, ndien eduɔŋɔ, ke ntak ŋkpɔ iduɔ mmɔ okponde, ndien mmɔ ebɔp ediwak ufɔk Abasi; edi, mmɔ esin odudu ye mme utibe ŋkpɔ Abasi, enyuŋ ekwɔrɔ enɔ idem mmɔ ifiɔk mmɔ ye ukpep ŋkpɔ mmɔ, man mmɔ enyene udori enyuŋ etuk iso ubuene.

21 Ndien ediwak ufɔk Abasi edu emi ebɔpde emi esinde mme ufip, ye mme eŋwan, ye utɔk.

22 Ndien mme ebuana ŋkari edu, kpa nte ke ini eset, nte asaŋade ye mme ebuana andidiɔk, koro enye edi andisiak kpukpru mme ŋkpɔ emi; iŋ, andisiak uwot owo, ye mme utom ekim; iŋ, onyuŋ ada mmɔ usuŋ ye mmem mmem uruk, tutu enye ɔbɔp mmɔ ye mme ɔkpɔsɔŋ uruk esie ke nsinsi.

23 Koro sese, nditɔ eka mi, ami ndɔhɔ mbufo nte ke Jehovah Abasi inamke ŋkpɔ ke ekim.

24 Enye inamke ŋkpɔ ndomo kiet ibɔhɔke edi ke ndinyaŋa ererimbot; koro enye ama ererimbot, tutu enye ayak uwem esie ɔduɔk man enye ada kpukpru owo ɔnɔ idem esie. Ke ntre, enye inɔhɔ owo ndomo kiet uyo ete okubuana ke erinyaŋa esie.

25 Sese, ndi enye eseme ɔnɔ owo ndomo kiet, ete: Daha kpɔŋ mi? Sese, ami ndɔhɔ mbufo nte, Iŋ iŋ; edi enye ɔdɔhɔ ete: Etiene mi kpukpru mbufo utit ererimbot, edep mmɔŋ-eba ye araŋ ɔkwɔk, idihe ke okuk inyuŋ idihe ke ekɔm urua.

26 Sese, nte enye ama ɔnɔ uyo ete owo mmɔ ndomokiet ɔwɔrɔ ke mme synagogue, mme ɔwɔrɔ ke mme ufɔk ukpono? Sese, ami ndɔhɔ mbufo, Iŋ iŋ.

27 Ndi Enye ama ɔnɔ uyo ete owo mmɔ ndomokiet okubuana ke erinyaŋa esie? Sese ami ndɔhɔ mbufo nte, Iŋ iŋ; edi ke enye ama ɔnɔ kpukpru owo ke mfɔn; ndien enye ama ɔnɔ ikɔt esie uyo ete mmɔ enam kpukpru owo ekabare esit.

28 Sese, ndi Jehovah ama ɔnɔ owo ekededi uyo ete mmɔ ekubuana ke mfɔn esie? Sese ami ndɔhɔ mbufo nte, Iŋ iŋ; edi kpukpru owo enyene ufaŋ kiet nte eken, ndien ikpanke owo ndomo kiet.

29 Enye ama ɔnɔ uyo ete mme ifɔt okudu; koro sese, mme ifɔt edi se mme owo ekwɔrɔde enyuŋ esiakde idem mmɔ nte uŋwana enɔ ererimbot, man mmɔ enyene udori eto ererimbot; edi mmɔ iyomke uŋwam inɔ Zion.

30 Sese, Jehovah akpan ŋkpɔ emi; ke ntre, Jehovah ama ɔnɔ kpukpru owo ibet ete enyene ata-ima, ata-ima emi edide ima. Ndien ibɔhɔke mmɔ enyene ata-ima mmɔ idihe baba ŋkpɔ kiet. Ke ntre, edieke mmɔ enyenede ata-ima mmɔ idiyakke anam utom ke Zion atak.

31 Edi anam utom ke Zion ayanam utom ɔnɔ Zion; koro edieke mmɔ enamde utom ke ntak okuk mmɔ eyetak.

32 Ndien nko, Jehovah Abasi ama ɔnɔ uyo ete mme owo ekuwot owo; ete mmɔ ekusu nsu; ete mmɔ ekuyip inɔ; ete mmɔ ekumen enyiŋ Jehovah Abasi mmɔ etomo ke ikpikpu; ete mmɔ ekufip ufip; ete mmɔ ekubi ubi; ete mmɔ ekuneni eneni ye kiet eken; ete mmɔ ekunam mme use; ndien ete mmɔ ekunam mme ŋkpɔ emi ndomo kiet; koro owo ekededi emi anamde mmɔ ayatak.

33 Koro mme ukwaŋ-ŋkpɔ emi ndomo kiet itoho Jehovah; koro enye anam se ifɔnde ke ufɔt nditɔ owo; ndien enye inamke baba ŋkpɔ kiet ibɔhɔke enye edi iŋwaŋ-iŋwaŋ ɔnɔ nditɔ owo; ndien enye okot kpukpru ete edi etiene enye enyuŋ ebuana ke mfɔn esie; ndien enye ikaŋke owo ndomo kiet emi edide etiene enye, obubit ye afia, ofin ye eyen-isɔŋ, eren owo ye ŋwan; ndien enye eti okpono ndem; ndien kpukpru edi ukem ukem enɔ Abasi, Jew ye Gentile mbiba.