1 Ndien idahaemi, sese, nditɔ eka mi, ami metiŋ ikɔ nnɔ mbufo, nte Spirit enyikde mi; ke ntre, ami mɔfiɔk ke akpanikɔ nte ke ana nte mmɔ etibe.

2 Ndien mme ŋkpɔ emi ediwetde isio ke ŋwed oro eyenyene akamba ufɔn ɔnɔ nditɔ owo, ŋko akpan akpan ɔnɔ ubon nnyin, emi edide nsuhɔ ufɔk Israel.

3 Koro eyedikem ke usen oro ete mme ufɔk Abasi emi ebɔpde, emi midihe eke Jehovah, ke ini kiet edidɔhɔde kiet eken ete: Sese, ami, ami ndi eke Jehovah; ndien mbio oko eyedɔhɔ ete: Ami, ami ndi eke Jehovah; ndien ntem ke owo kiet kiet emi ebɔpde mme ufɔk Abasi edidɔhɔ, emi midihe eke Jehovah—

4 Ndien mmɔ eyeneni eneni ye kiet eken; ndien mme oku mmɔ eyeneni eneni ye kiet eken, ndien mmɔ eyekpep ye ifiɔk mmɔ, enyuŋ ekaŋ Edisana Spirit, emi ɔnɔde ukeme nditiŋ ikɔ.

5 Ndien mmɔ ekaŋ odudu Abasi, Edisana Owo Israel; ndien mmɔ edɔhɔ mme owo ete: Ekpaŋutɔŋ enɔ nnyin, enyuŋ ekop item nnyin; koro sese Abasi iduhe mfin, koro Jehovah ye Andifak ama anam utom esie, ndien enye ama ɔnɔ mme owo odudu esie;

6 Sese, mbufo ekpaŋutɔŋ enɔ item mi; edieke mmɔ edidɔhɔde ke ubɔk Jehovah anam utibe ŋkpɔ, ekubuɔt idem ke enye; koro mfin emi enye idige Abasi mme utibe ŋkpɔ; enye ama anam utom esie.

7 Iŋ, ndien ediwak eyedu emi edidɔhɔde ete: Edia, eŋwɔŋ, enyuŋ enam idara, koro mkpɔŋ nnyin iyikpa; ndien ɔyɔfɔn ye nnyin.

8 Ndien ediwak ŋko eyedu emi edidɔhɔde ete: Edia, eŋwɔŋ, enyuŋ enam idara; edi, ebak Abasi—enye ayanam ikpe etebe ke ndinam ekpri idiɔk ŋkpɔ; iŋ, su nsu ekpri, ekan owo ubɔk ke ntak mme ikɔ esie, etibi obube enɔ mbɔhiduŋ mbufo; idiɔk iduhe ke emi; enyuŋ enam kpukpru mme ŋkpɔ emi, koro mkpɔŋ nnyin ikpa; ndien edieke edide ete ke nnyin midue, Abasi ayamia nnyin ye ubɔk ikpa ifaŋ, ndien ke akpatre ayanyaŋa nnyin ke obio ubɔŋ Abasi.

9 Iŋ, ediwak eyedu emi edikpepde ke utɔ usuŋ emi, nsu nsu ye ikpikpu ye mme ndisime ukpep-ŋkpɔ, eyenyuŋ ekohore idem ke esit mmɔ, ndien eyeduk ke ntuŋɔ man edip Jehovah item mmɔ; ndien mme utom mmɔ eyedi ke ekim.

10 Ndien iyip ndisana owo oyosioro uyo oto ke isɔŋ ebine mmɔ.

11 Iŋ, kpukpru mmɔ ewɔrɔ ekpɔŋ usuŋ; mmɔ ekabare edi eke abiarade.

12 Ke ntak ntaŋidem, ye ke ntak mme nsu nsu andikpep, ye nsu nsu ukpep-ŋkpɔ, ufɔk Abasi mmɔ akabare edi eke abiarade, enyuŋ emenere mme ufɔk Abasi mmɔ; ke ntak ntaŋidem mmɔ ekohore idem.

13 Mmɔ ebɔ eto mme ubuene ke nkanubɔk ke ntak ediye edisana ebiet mmɔ; mmɔ ebɔ eto mme ubuene ke nkanubɔk ke ntak ediye ɔfɔŋ mmɔ; ndien mmɔ ekɔbɔ mme suŋ-suŋ owo ye mme ubuene ke esit, koro ke ntaŋidem mmɔ mmɔ ekohore idem.

14 Mmɔ esɔŋ obot-itɔŋ enyuŋ emenere ibuot; iŋ, ndien ke ntak ntaŋidem, ye ibak, ye mme mbubiam ido, ye mme use, kpukpru mmɔ ewɔrɔ ekpɔŋ usuŋ ibɔhɔke owo ifaŋ, emi edide mme ɔsuhɔre idem emi etienede Christ; edi, eda mmɔ usuŋ, ndien ke ediwak ini mmɔ edue koro ekpepde mmɔ eto item mme owo.

15 O owo eti ibuot, ye ekpep-ŋkpɔ, ye owo inyene, emi ekohore idem ke ntaŋidem esit mmɔ, ye kpukpru mmɔ emi ekwɔrɔde mme nsu nsu ukpep-ŋkpɔ, ye kpukpru mmɔ emi enamde use, enyuŋ ekwaŋade nnen nnen usuŋ Jehovah, ɔyɔdɔdiɔk, ɔyɔdɔdiɔk ɔyɔdɔdiɔk ɔnɔ mmɔ, Jehovah Abasi Ibom ɔdɔhɔ, koro eyetop mmɔ esin ke hell!

16 Ɔyɔdɔdiɔk ɔnɔ mmɔ emi ebinde edinen owo esio ke ikpikpu ŋkpɔ enyuŋ esuŋide enye emi ɔfɔnde, enyuŋ edɔhɔde ete ke inyeneke ufɔn! Koro usen eyedi emi Jehovah Abasi edisɔpde idise mme andiduŋ ke ererimbot; ndien ke usen oro emi mmɔ edatde ema ke ukwaŋ-ŋkpɔ ke mmɔ editak.

17 Edi sese, edieke mme andiduŋ ke ererimbot midikabakere esit ikpɔŋ ibak ye mme mbubiam ido mmɔ eyesobo mmɔ, Jehovah mme Udim ɔdɔhɔ.

18 Edi sese, akamba ufɔk Abasi mbubiam oro, akpara ofuri ererimbot, ana ɔduɔ ke isɔŋ, ndien akamba ke iduɔ esie edi-di.

19 Koro obio ubɔŋ satan ana enyeŋ, ndien ana nte edemere mbon emi edude ke enye enɔ erikabare esit, midige ntre satan ɔyɔkɔbi mmɔ ye mme nsinsi ebuka, ndien edemere mmɔ ɔnɔ iyaresit, ndien etak;

20 Koro sese, ke usen oro ke enye editimere ke esit nditɔ owo, onyuŋ edemere mmɔ ɔnɔ iyaresit kabaŋa enye emi ɔfɔnde.

21 Ndien mbon efen ke enye edinam esit emem, onyuŋ ekpeme mmɔ ke obukidem, man mmɔ ekpedɔhɔ ete: Kpukpru ɔfɔn ama ke Zion; iŋ, Zion oforo, kpukpru ɔfɔn ama—ndien satan otuk mme ukpɔŋ mmɔ, onyuŋ ada mmɔ ye ŋkari ɔwɔrɔ ɔsuhɔre oduk ke hell.

22 Ndien sese, mbon efen enye abiaŋa ada ɔwɔrɔ, onyuŋ ɔdɔhɔ mmɔ ke hell iduhe; onyuŋ ɔdɔhɔ mmɔ ete: Ami ndihe andidiɔk, koro utɔ oro iduhe—onyuŋ ɔdɔŋ odu ke utɔŋ mmɔ, tutu enye ɔkɔbi mmɔ ye enyene ndik ebuka esie, emi ubɔhɔ miduhe.

23 Iŋ, emum mmɔ ke mkpa, ye hell; ye mkpa, ye hell, ndien satan, ye kpukpru mbon emi ekemumde ana eda ke iso ebekpo Abasi, enyuŋ ekpe ikpe nte utom mmɔ edide, mmɔ eto do ewɔrɔ eka ebiet emi ekenimde enɔ mmɔ, kpa mkpɔdiɔhɔ ikaŋ ye brimstone, emi edide anana utit ndutuhɔ.

24 Ke ntak oro, ɔyɔdɔdiɔk ɔnɔ enye emi odude ke emem ke Zion!

25 Ɔyɔdɔdiɔk ɔnɔ enye emi ɔdɔhɔde ete: Kpukpru ɔfɔn!

26 Iŋ, ɔyɔdɔdiɔk ɔnɔ enye emi akpaŋde utɔŋ ɔnɔ mme item owo, onyuŋ akaŋde odudu Abasi, ye enɔ Edisana Spirit!

27 Iŋ, ɔyɔdɔdiɔk ɔnɔ enye emi ɔdɔhɔde ete: Nnyin imibɔ, ndien nnyin iyomke efen aba!

28 Ndien ke akpatre, ɔyɔdɔdiɔk ɔnɔ kpukpru mmɔ emi enyekde idem, enyuŋ eyatde esit ke ntak akpanikɔ Abasi! Koro sese, enye emi ebɔpde ke enyɔŋ itiat ɔbɔ enye ye idaresit; ndien enye emi ɔbɔpde ke enyɔŋ utan enyeŋ idem man enye ama ɔduɔ.

29 Ɔyɔdɔdiɔk ɔnɔ enye emi edidɔhɔde ete: Nnyin imibɔ ikɔ Abasi, ndien nnyin iyomke ikɔ Abasi efen aba, koro iminyene se ikemde ye nnyin!

30 Koro sese, ntem ke Jehovah Abasi ɔdɔhɔ ete: Ami nyɔnɔ nditɔ owo ewuhɔ ke ewuhɔ, item ke item, mi esisit ye ko esisit; ndien ediɔŋ mmɔ emi ekpaŋde utɔŋ ekop mme item, enyuŋ enɔ item mi utɔŋ, koro mmɔ eyekpep ifiɔk; koro enye emi ɔkɔbɔde ke ami ndidian efen; ndien mbɔ mbon emi edidɔhɔde ete, Nnyin iminyene se ikemde, mmɔ ke edibɔ kpa se mmɔ ekenyenede.

31 Esuŋi enye emi odoride enyin ke owo, mme anamde obukidem edi odudu esie, mme emi edikpaŋde utɔŋ inɔ mme item owo, ibɔhɔke edibɔ mme item mmɔ ito odudu Edisana Spirit.

32 Ɔyɔdɔdiɔk ɔnɔ mme Gentile, Jehovah Abasi mme Udim ɔdɔhɔ! Koro ɔkpɔsukedi ke ami nyenyan ubɔk mi nnɔ mmɔ ke usen ke usen, mmɔ eyekaŋ mi; edi, ami nyenyene mbɔm mbaŋa mmɔ, Jehovah Abasi ɔdɔhɔ, edieke mmɔ edikabare esit enyuŋ etiene mi; koro ubɔk mi anyanare ke ofuri usen, Jehovah Abasi mme Udim ɔdɔhɔ.