1 Ndien idahaemi, Jacob, ami ndɔhɔ fi nte: Afo edi akpa eyen mi amanade ke mme eyo ukut mi ke ikɔt. Ndien sese, ke uyen fo ke afo ɔyɔ mme ukut ye ediwak mfuhɔ, ke ntak nsɔŋido nditɔ eka fo iren.

2 Edi, Jacob, akpa eyen mi amanade ke ikɔt, afo ɔmɔfiɔk odudu Abasi; ndien enye ɔyɔdiong mme ukut fo enim ɔnɔ udori fo.

3 Ke ntre, eyediɔŋ ukpɔŋ fo, ndien afo oyoduŋ ke emem ye eyen eka fo eren, Nephi; ndien mme eyo fo ke edidi ke ndinam utom Abasi fo. Ke ntre, ami mefiɔk nte ke efak fi, ke ntak edinen ido Andifak fo; koro afo omokut ete ke ɔyɔhɔ ini ke enye eyedi ndida edinyaŋa nsɔk mme owo.

4 Ndien afo omokut ke uyen fo ubɔŋ esie; ke ntre, ediɔŋ fi kpa nte mbon emi enye edinamde utom inɔ ke obukidem; koro Spirit edi ukem ukem, mkpɔŋ, mfin ye ke nsinsi. Ndien ema enim usuŋ tɔŋɔ ke iduɔ owo, ndien erinyaŋa edi ke mfɔn.

5 Ndien etim eteme mme owo nte mmɔ efiɔk eti ye idiɔk. Ndien enɔ mme owo mbet. Ndien oto ke mbet ikpe itebeke obukidem ndomokiet; mme, oto ke mbet esibe mme owo esio. Iŋ, oto ke mbet emi edibede ifep ema esibe mmɔ esio; ndien ŋko, oto ke mbet eke spirit mmɔ etak ewɔrɔ ekpɔŋ enyemi edide eti, ndien ekabade edu ke unana inemesit ke nsinsi.

6 Ke ntre, erifak edi oto onyuŋ ebe ke Edisana Messiah; koro enye ɔyɔhɔde ye mfɔn ye akpanikɔ.

7 Sese, enye awa idemesie nte uwa ɔnɔ idiɔkŋkpɔ, man ɔbɔrɔ mme utit mbet, ɔnɔ kpukpru mbon emi enyenede ibuŋɔ esit ye edinuaha spirit; ndien ke owo ndomokiet efen idikanke ibɔrɔ mme utit mbet.

8 Ke ntre, edi akamba ufɔn ndinam mbon eduŋde ke ererimbot efiɔk mme ŋkpɔ emi, man mmɔ efiɔk ete ke obukidem ndomokiet ikemeke ndiduŋ ke iso Abasi, ibɔhɔke oto ke ndidot, ye mbɔm, ye mfɔn Edisana Messiah, emi akayakde uwem esie ɔduɔk ke obukidem, onyuŋ afiak ɔbɔ ada ke odudu Spirit, man enye anam eriset ke mkpa osu, koro akanade nte edi akpa owo ndiset.

9 Ke ntre, enye edi mme akpa mfri ɔnɔ Abasi, koro enye edikpe-ubɔk inɔ kpukpru nditɔ owo; ndien eyenyaŋa mbon emi ebuɔtde idem ke enye.

10 Ndien ke ntak mkpe-ubɔk nnɔ kpukpru owo, kpukpru owo edi ebine Abasi; ke ntre, mmɔ eda ke iso Abasi, man ebiere ikpe enɔ mmɔ etiene akpanikɔ ye edisana emi odude ke enye. Ke ntre, mme utit mbet emi Ata Edisana ɔnɔde, man emia ufen emi enimde, ufen emi enimde emi misaŋake ye eke inemesit emi enimde, man ebɔrɔ mme utit usio-isop—

11 Koro ana nte edi, ete ke efanga ana odu ke kpukpru ŋkpɔ. Edieke midihe ntre, akpa eyen mi amanade ke ikɔt, owo ikpinamke edinen ido etibe, mme ibak, mme edisana ye ukut, mme eti ye idiɔk. Ke ntre, kpukpru ŋkpɔ ana nte ebuaha kiet; ke ntre, edieke anade nte edi idem kiet ana nte edi nte akpa, sia minyeneke uwem mme mkpa, mme mbiara mme se mikemeke ndibiara, inemesit mme ukut, mme ndidiɔŋɔ mme nditre ndidiɔŋɔ.

12 Ke ntre, ana edi nte ke ekebot enɔ ŋkpɔ emi miduhe; ke ntre uduak ikpiduhe ke ntak edibot esie. Ke ntre, ŋkpɔ emi ana nte osobo ifiɔk Abasi ye mme nsinsi uduak esie, ndien ŋko odudu, ye mbɔm, ye edinen ikpe eke Abasi.

13 Ndien edieke mbufo edɔhɔde ete ke mbet iduhe, mbufo ŋko eyedɔhɔ ete ke idiɔkŋkpɔ iduhe. Edieke mbufo edidɔhɔde ete ke idiɔkŋkpɔ iduhe, mbufo ŋko eyedɔhɔ ete ke edinen ido iduhe. Ndien edieke edinen ido miduhe inemesit iduhe. Ndien edieke edinen ido mme inemesit miduhe ufen mme ukut iduhe. Ndien edieke mme ŋkpɔ emi miduhe Abasi iduhe. Ndien edieke Abasi miduhe nnyin iduhe, ŋko ererimbot; koro edibot mme ŋkpɔ ikpiduhe, ŋko ndinam ŋkpɔ mme ndinam ŋkpɔ etibe; ke ntre, kpukpru ŋkpɔ ekpebe efep.

14 Ndien idahaemi, nditɔ mi iren, ami ntiŋ mme ŋkpɔ emi nnɔ mbufo man edi udori ye ukpepŋkpɔ ɔnɔ mbufo; koro Abasi odu, ndien enye ama obot kpukpru ŋkpɔ ke enyɔŋ ye isɔŋ, ye kpukpru ŋkpɔ emi edude ke esit mmɔ, mme ŋkpɔ ndinam ye ndinam mme ŋkpɔ ke owo mbiba.

15 Ye ndida mme nsinsi uduak esie ke utit owo, ke ini enye ama okobot akpa ete ye eka nnyin, ye mme unam ikɔt ye inuen enyɔŋ, ndien ke akpatre, kpukpru mme ŋkpɔ emi ebotde, ana ete efanga odu; kpa mfri emi ekekpande ete ekudia ke se misaŋake ye eto uwem; kiet edide edinem ndien eken edide ndot-ndot.

16 Ke ntre, Jehovah Abasi ɔnɔ owo ete anam ŋkpɔ ɔnɔ idem esie. Ke ntre, owo ikikanke inam ŋkpɔ inɔ idem esie ibɔhɔke ete ke kiet mme eken etap enye.

17 Ndien ami, Lehi, etienede mme ŋkpɔ emi ami ŋkotde, ana nte nkere nte ke angel Abasi, nte se ekewetde, ama ɔduɔ ke heaven; ke ntre, enye akabade edi satan, koro enye okoyomde se ikidiɔkde ke iso Abasi.

18 Ndien koro enye ɔkɔduɔde oto heaven, onyuŋ akabade enyene ukut ke nsinsi, enye ŋko oyom ukut ɔnɔ kpukpru owo. Ke ntre, enye ɔdɔhɔ Eve, iŋ, kpa akani urukikɔt, emi edide satan, emi edide ete kpukpru nsu, ke ntre enye ɔdɔhɔ ete: Dia mfri emi ekekpande ete okudia, ndien afo udukpaha, edi afo eyetie nte Abasi, ɔfiɔk eti ye idiɔk.

19 Ndien ke ini Adam ye Eve ema ekedia mfri emi ekekpande ete ekudia ema ebin mmɔ esio ke iŋwaŋ Eden, ete efuŋ ererimbot.

20 Ndien mmɔ enyene nditɔ; iŋ, kpa ufɔkemana eke kpukpru ererimbot.

21 Ndien ema enam mme usen nditɔ owo ebihi, etiene uduak Abasi, man mmɔ ekabade esit ke ini edude ke obukidem; ke ntre, idaha mmɔ akabade edi idaha udomo, ndien enam ini mmɔ ɔniɔŋ, etiene mme mbet emi Jehovah Abasi ɔkɔnɔde nditɔ owo. Koro enye ɔkɔnɔde mbet ete ke ana kpukpru owo ekabade esit; koro enye okowutde kpukpru owo ete ke mmɔ ema esop, ke ntak ndudue ete ye eka mmɔ.

22 Ndien idahaemi, sese, edieke Adam mikiduehe enye ikpiduɔhɔ, edi enye ekpedu ke iŋwaŋ Eden. Ndien kpukpru ŋkpɔ emi ekebotde ekpedu ke ukem ukem idaha emi mmɔ ekedude ke ini ekebotde mmɔ; ndien mmɔ ekpedu ke nsinsi, ndien inyeneke utit.

23 Ndien mmɔ ikpinyeneke nditɔ; ke ntre mmɔ ekpedu ke idaha unana ndudue, inyeneke idaresit, koro mmɔ mifiɔkke ukut; inamke eti ŋkpɔ, koro mmɔ mifiɔkke idiɔk ŋkpɔ.

24 Edi sese, enam kpukpru ŋkpɔ ke ifiɔk owo emi ɔfiɔkde kpukpru ŋkpɔ.

25 Adam ɔkɔduɔ man mme owo edu; ndien mme edu, man mmɔ enyene idaresit.

26 Ndien Messiah edi ke uyɔhɔ ini, man enye afak nditɔ owo osio ke iduɔ. Ndien ke ntak ete koro ema efak mmɔ esio ke iduɔ mmɔ ekabade ebɔhɔ ke nsinsi, efiɔk eti ye idiɔk; ndinam ŋkpɔ nnɔ idem mmɔ ndien idihe ndinam ŋkpɔ ke owo, ibɔhɔke edi ke ufen mbet ke akamba ye akpatre usen, etiene mme mbet emi Abasi ɔnɔde.

27 Ke ntre, mme owo ebɔhɔ ke obukidem; ndien kpukpru ŋkpɔ ke enɔ mmɔ emi ɔfɔnde ye owo. Ndien mmɔ enyene unen ndimek ubɔhɔ ye nsinsi uwem, oto ke akamba Etie-ubiɔŋ nnɔ kpukpru owo, mme ndimek nkpɔkɔbi ye mkpa, etiene nkpɔkɔbi ye odudu satan; koro enye oyom ete kpukpru owo edu ke ukut nte enye.

28 Ndien idahaemi, nditɔ mi iren, ami nyom nte mbufo ese akamba Etie-ubiɔŋ, enyuŋ ekpaŋutɔŋ enɔ akamba mme mbet esie; ndien enim mme ikɔ esie, ndien emek nsinsi uwem, etiene uduak Edisana Spirit esie;

29 Inyuŋ imekke nsinsi mkpa, etiene uduak obukidem ye idiɔk emi odude ke enye, emi ɔnɔde spirit satan odudu ndikɔbi, ndida mbufo nsuhɔre nduk hell, man enye akara mbufo ke obio ubɔŋ esie.

30 Ami ntiŋ mme ikɔ ifaŋ emi nnɔ kpukpru mbufo, nditɔ mi iren, ke mme akpatre usen udomo mi; ndien ami mma mmek eti udeme, etiene mme ikɔ prophet. Ndien ami nyeneke udɔŋ efen ke mibɔhɔke nsinsi ufɔn ukpɔŋ mbufo. Amen.