1 Ndien idahaemi, sese, ndima nditɔ eka mi, ami menim nte mbufo emekere ekpri ke esit mbufo kabaŋa se anade nte mbufo enam ke ini mbufo edukde ke usuŋ. Edi, sese, ntak emi mbufo ekerede mme ŋkpɔ emi ke esit mbufo?

2 Nte mbufo itihi ete ke ami mma ndɔhɔ mbufo nte ke ini mbufo ema ebɔ Edisana Spirit mbufo eyekan etiŋ ikɔ ye usem mme angel? Ndien idahaemi, didie ke mbufo editiŋ ikɔ ye usem mme angel ibɔhɔke oto ke Edisana Spirit?

3 Mme angel etiŋ ikɔ ke odudu Edisana Spirit; ke ntre, mmɔ etiŋ mme ikɔ Christ. Ke ntre, ami mma ndɔhɔ mbufo, edia usɔrɔ ke ikɔ Christ; koro sese, mme ikɔ Christ eyedɔhɔ mbufo kpukpru ŋkpɔ emi anade mbufo enam.

4 Ke ntre, idahaemi ke ini mma ŋketiŋ mme ikɔ emi, edieke mbufo mikanke ifiɔk mmɔ eyedi ke ntak emi mbufo mibeŋeke, mbufo inyuŋ ituakke; ke ntre, Abasi idaha mbufo isin ke uŋwana, edi ana etak ke ekim.

5 Koro sese, ami mfiak ndɔhɔ mbufo nte edieke mbufo edidukde ke usuŋ, enyuŋ ebɔ Edisana Spirit, enye oyowut mbufo kpukpru ŋkpɔ emi anade mbufo enam.

6 Sese, emi edi ukpep-ŋkpɔ Christ, ndien Jehovah idinɔhɔ ukpep-ŋkpɔ efen tutu ke ini enye ama ayarare idem esie ɔnɔ mbufo ke obukidem. Ndien ke ini enye ama ayarare idem esie ɔnɔ mbufo ke obukidem, mme ŋkpɔ emi enye editiŋde inɔ mbufo ke mbufo editiŋ enyin inam.

7 Ndien idahaemi, ami, Nephi, nkanke ŋtiŋ ŋkan emi; Spirit etre ikɔ mi, ndien ayak mi mfuhɔ ke ntak unana mbuɔtidem, ye ibak, ye unana ifiɔk, ye usɔŋ obot itɔŋ mme owo; koro mmɔ iyomke ukpep-ŋkpɔ, ndien akamba ifiɔk iŋwaŋake, ke ini enɔde mmɔ iŋwaŋ iŋwaŋ, kpa nte ikɔ akpakannde aŋwaŋa.

8 Ndien idahaemi, ndima nditɔ eka mi, ami mɔfiɔk nte ke mbufo emesuk ekere ke esit mbufo; ndien anam mi mfuhɔ nte ke ana ami ntiŋ ikɔ kabaŋa ŋkpɔ emi. Koro edieke mbufo edikpaŋde utɔŋ inɔ Spirit emi ekpepde owo nte ebɔŋde akam, mbufo eyefiɔk ete ke ana mbufo ebɔŋ akam; koro idiɔk spirit ikpepke owo nte ebɔŋde akam, edi ekpep enye ete enye okubɔŋ akam.

9 Edi sese, ami ndɔhɔ mbufo nte ana mbufo ebɔŋ akam kpukpru ini, ekunyuŋ ukpa mba; nte mbufo ekunam ŋkpɔ ndomo kiet unɔ Jehovah ibɔhɔke ke akpa ifet mbufo eyebɔŋ akam enɔ Ete ke enyiŋ Christ, man enye osio edinam mbufo enim ɔnɔ mbufo, man edinam mbufo edi unwam ɔnɔ ukpɔŋ mbufo.