1 Ndien idahaemi ami, Nephi, ŋkemeke ndiwet kpukpru ŋkpɔ emi ekekpepde ke ufɔt ikɔt mi; ndien ami mkponke ke ŋdiwewet, nte ke utiŋ ikɔ; koro ke ini owo etiŋde ikɔ ke odudu Edisana Spirit odudu Edisana Spirit emen enye esin ke mme esit nditɔ owo.

2 Edi sese, ediwak edu emi esɔŋde esit mmɔ ye Edisana Spirit, man enye okunyene itie ke esit mmɔ; ke ntre, mmɔ esin ediwak ŋkpɔ emi ewetde enyuŋ eda mmɔ nte mme ikpikpu ŋkpɔ.

3 Edi ami, Nephi, mewet se ami ŋwetde, ndien ami nse enye nte enyene akamba ufɔn, akpan akpan ɔnɔ ikɔt mi. Koro ami mbɔŋ akam ofuri ofuri ini nnɔ mmɔ ke usen, ndien mmɔŋ eyet mi ebit udoribuot mi ke okoneyo, ke ntak mmɔ; ndien ami nseme nnɔ Abasi ye mbuɔtidem, ndien ami mɔfiɔk nte ke enye oyokop eseme mi.

4 Ndien ami mɔfiɔk nte ke Jehovah Abasi oyosio mme akam mi enim nte udori ɔnɔ ikɔt mi. Ndien eyenam mme ikɔ emi ami ŋwetde ke mmem idem enyene odudu ɔnɔ mmɔ; koro enye anam mmɔ enam eti; enye anam mmɔ efiɔk mme ete mmɔ; ndien enye etiŋ abaŋa Jesus, onyuŋ anam mmɔ ebuɔtidem ke enye, enyuŋ eme tutu esim utit, emi edide nsinsi uwem.

5 Ndien enye asua ke ɔkpɔsɔŋ uyo ɔnɔ idiɔk ŋkpɔ, nte asaŋade ye iŋwaŋ-iŋwaŋ akpanikɔ; ke ntre, owo ndomo kiet idiyatke esit ye mme ikɔ emi ami ŋwetde ibɔhɔke enye edi eke spirit satan.

6 Ami ndaresit ke iŋwaŋ-iŋwaŋ ido; ami ndaresit ke akpanikɔ; ami ndaresit ke Jesus koro enye ama afak ukpɔŋ mi osio ke hell.

7 Ami menyene ima nnɔ ikɔt mi, ye akamba mbuɔtidem ke Christ nte ke ami nyosobo ye ediwak ukpɔŋ ye unana ntɔi ke itie ikpe esie.

8 Ami menyene ima nnɔ Jew—Ami ndɔhɔ Jew, koro ami nse mmɔ ke ebiet ami ŋkotode ndi.

9 Ami ŋko menyene ima nnɔ mme Gentile. Edi sese, koro ndomo kiet ke otu emi ami nyeneke idorenyin ibɔhɔke mmɔ ekpe emem ye Christ, enyuŋ eduk ke mfafaha inua otop, enyuŋ esaŋa ke nnen nnen usuŋ emi adade aka uwem, enyuŋ eka iso ke usuŋ oro tutu esim utit usen udomo.

10 Ndien idahaemi, ndima nditɔ eka mi, ŋko ye Jew, ye kpukpru mbufo utit ererimbot, ekpaŋutɔŋ enɔ mme ikɔ emi enyuŋ ebuɔtidem ke Christ; ndien edieke mbufo mibuɔtke idem ke mme ikɔ emi ebuɔtidem ke Christ. Ndien edieke mbufo edibuɔtde idem ke Christ mbufo eyebuɔt idem ke mme ikɔ emi, koro mmɔ edi mme ikɔ Christ, ndien enye ɔnɔ mi mmɔ; ndien mmɔ ekpep kpukpru owo ete mmɔ enam eti.

11 Ndien edieke mmɔ midige mme ikɔ Christ, mbufo ebiere ikpe—koro Christ oyowut mbufo, ye odudu ye akwa ubɔŋ, ete ke mmɔ edi ikɔ esie, ke akpatre usen; ndien ami ye afo iyida iso ye iso ke iso ebiet uda ikpe ke esop esie; ndien mbufo eyefiɔk ete ke enye ɔkɔnɔ mi uyo ete ŋwet mme ŋkpɔ emi, isehe ukeme mi.

12 Ndien ami mbeŋe Ete ke enyiŋ Christ nte yak ediwak nnyin, edieke midihe kpukpru, inyene erinyaŋa ke obio ubɔŋ esie ke akamba ye akpatre usen oro.

13 Ndien idahaemi, ndima nditɔ eka mi, kpukpru emi edide eke ufɔk Israel, ye kpukpru mbufo utit ererimbot, ami ntiŋ ikɔ nnɔ mbufo nte uyo owo emi esemede ke ntan: Esiere tutu akamba usen oro edi.

14 Ndien mbufo emi midibuanake ke ima Abasi, enyuŋ ekpono mme ikɔ mme Jew, ŋko ye mme ikɔ mi, ye mme ikɔ emi editode ke inua Eyen-erɔŋ Abasi iwɔrɔ, sese, ami ŋkɔm mbufo esiere nsinsi, koro mme ikɔ emi eyebiom mbufo ke akpatre usen.

15 Koro se ami ndiande ke ererimbot, eyeda ebaŋa mbufo ke ebiet uda ubiere ikpe ke esop; koro ntem ke Jehovah ɔnɔ mi uyo, ndien ana ami ŋsuk ibuot. Amen.