1 Ndien idahaemi ami ntiŋ ye afo, Joseph, akpatre eyen mi. Afo akamana ke ikɔt eke mme ukut mi; iŋ, ke mme usen emi mfuhɔ mi okokponde akan ke eka fo akaman fi.

2 Ndien yak Jehovah osio isɔŋ emi enim ŋko ɔnɔ fi, emi edide isɔŋ emi ɔsɔngde urua akan, man edi inyene fo ye inyene ubon fo ye nditɔ eka fo iren, edi ukpeme ɔnɔ fi ke nsinsi, edieke edide ete ke afo eyenim mme mbet eke Edisana Abasi Israel.

3 Ndien idahaemi, Joseph, akpatre eyen mi, emi ami mmende ŋwɔrɔ ke ikɔt eke mme ukut mi, yak Jehovah ɔdiɔŋ fi ke nsinsi, koro owo idisoboke ubon fo ofuri ofuri.

4 Koro sese, afo edi mfri idem mi; ndien ami ndi ubon Joseph emi ekemende nte owo ŋkpɔkɔbi eka Egypt. Ndien akamba ekedi mme ediomi Jehovah emi enye akanamde ye Joseph.

5 Ke ntre, Joseph ke akpanikɔ ama okut eyo nnyin. Ndien enye ɔbɔ eŋwɔŋɔ oto Jehovah, ete ke mfri idem esie ke Jehovah Abasi edimenede edinen ŋkɔk inɔ ufɔk Israel; idihe Messiah, edi nkɔk emi akanade nte ebuŋ efep, edi, ana eti ke mme ediomi Jehovah ete ke ana eyarare Messiah enɔ mmɔ ke ukperedem usen, ke odudu spirit, man esio mmɔ ke ekim esin ke unwana—iŋ, esio ke ndedibe ekim ye ke ŋkpɔkɔbi esin ke ubɔhɔ.

6 Koro Joseph ke akpanikɔ ama etie ntiense, ete: Okut ŋkukut ke Jehovah Abasi mi edimenere, emi edidide okut ŋkukut emi emekde enɔ mfri idem mi.

7 Iŋ, Joseph ke akpanikɔ ama ɔdɔhɔ ete: Jehovah ɔdɔhɔ mi ete: Okut ŋkukut emi emekde ke ami ndimenede ke mfri idem fo; ndien ayada enye nte akamba ŋkpɔ ke ufɔt mfri idem fo. Ndien ami nyɔnɔ enye mbet nte yak enye anam utom ɔnɔ mfri idem fo, nditɔ eka esie iren, emi edidide akamba ufɔn inɔ mmɔ, tutu ke ndinam mmɔ efiɔk mme ediomi emi ami nnamde ye mme ete mbufo.

8 Ndien ami nyenɔ enye mbet nte yak enye okunam utom efen, ibɔhɔke utom emi ami ndinɔde enye uyo. Ndien ami nyanam enye okpon ke enyin mi; koro enye edinamde utom mi.

9 Ndien enye eyedi akamba nte Moses, emi ami ndɔhɔde ke nyemenede nnɔ mbufo, ndinam ikɔt mi ebɔhɔ, O ufɔk Israel.

10 Ndien Moses ke ami ndimenere, ndinam ikɔt fo ebɔhɔ ewɔrɔ ke isɔŋ Egypt.

11 Edi okut ŋkukut ke ami ndimenere ke mfri idem fo; ndien enye ke ami ndinɔ odudu ndida ikɔ mi nsɔk ubon idem fo—ndien idihe ke ndida ikɔ mi ndi ikpɔŋ, Jehovah ɔdɔhɔ, edi edi ke ndinam mmɔ enim ikɔ mi, emi ama okototo ɔwɔrɔ ke ufɔt mmɔ.

12 Ke ntre, mfri idem fo eyewet; ndien mfri idem Judah eyewet; ndien enyemi mfri idem fo ediwetde, ndien ŋko enyemi mfri idem Judah ediwetde, eyekori kiet, ke ndisin mme nsu-nsu ukpep-ŋkpɔ ye ndikpan mme eneni, ye ndisiak emem ke ufɔt mfri idem fo, nnyuŋ nda mmɔ ndi ke ifiɔk mme ete mmɔ ke ukperedem usen, ndien ye ifiɔk mme ediomo mi, Jehovah ɔdɔhɔ.

13 Ndien ke ɔwɔrɔde ke mmem idem eyenam enye okop nsɔŋidem, ke usen oro ke ini utom mi editɔŋɔde ke ufɔt kpukpru ikɔt mi, ke ndifiak mmen fi nnim, O ufɔk Israel, Jehovah ɔdɔhɔ.

14 Ndien ntem ke Joseph eketiŋ prophecy, ete: Sese, okut ŋkukut oro ke Jehovah edidiɔŋ; ndien eyetimere mmɔ emi eyomde ndisobo enye; koro eŋwɔŋɔ emi, emi ami mbɔde nto Jehovah, kabaŋa mfri idem mi, oyosu. Sese, ami mmetim mfiɔk mbaŋa edisu eŋwɔŋɔ emi;

15 Ndien eyekot enyiŋ esie edian mi; ndien enye edidi ke enyiŋ ete esie. Ndien enye eyedi ukem ukem nte ami; koro ŋkpɔ oro, emi Jehovah edidade idi ito ke ubɔk esie, oto ke odudu Jehovah ayada erinyaŋa ɔsɔk ikɔt mi.

16 Iŋ, ntem ke Joseph eketiŋ prophecy ete: Ami mmetim mfiɔk mbaŋa ŋkpɔ emi, kpa nte ami mtim mfiɔkde mbaŋa eŋwɔŋɔ Moses; koro Jehovah ama ɔdɔhɔ mi ete, ami nyetim ubon fo nnim ke nsinsi.

17 Ndien Jehovah ama ɔdɔhɔ ete: Ami nyemenede Moses; ndien ami nyenɔ enye odudu ke esaŋ; ndien ami nyenɔ enye ukeme ndiwewet. Edi ami nditatke edeme esie, man enye etiŋ ediwak ikɔ, koro ami ndinamke enye edi akwa ikɔ. Edi ami nyewet mbet mi nnɔ enye, ke nnuenubɔk mi; ndien ami nyemek etiŋ ikɔ nnɔ enye.

18 Ndien Jehovah ama ɔdɔhɔ mi ŋko ete: Ami nyemenede nnɔ mfri idem fo; ndien ami nyemek etiŋ ikɔ nnɔ enye. Ndien ami, sese, ami nyenam enye nte enye ewet ŋwed mfri idem fo, ɔnɔ mfri idem fo, ndien etiŋ ikɔ ubon fo eyenam enye aŋwaŋa.

19 Ndien mme ikɔ emi enye ediwetde eyedi mme ikɔ emi ɔfɔnde ke ifiɔk mi ete aka ebine mfri idem fo. Ndien enye eyedi nte ke mfri idem fo eseme ɔnɔ mmɔ ke ntan; koro ami mmefiɔk mbuɔtidem mmɔ.

20 Ndien mmɔ eyeseme ke ntan; iŋ, kpa erikabade esit nnɔ nditɔ eka mmɔ iren, tutu ke ini emi mmɔ ema ekebe ediwak emana. Ndien eyedikem ete eseme mmɔ ayaka, kpa nte usem mmɔ edide mmem mmem.

21 Ke ntak mbuɔtidem mmɔ mme etop mmɔ eyewɔrɔ oto ke inua mi ɔnɔ nditɔ eka esie iren emi edide mfri idem fo; ndien mmem mmem usem mmɔ ke ami ndinam enyene odudu oto ke mbuɔtidem mmɔ, man mmɔ eti ediomi mi emi ami ŋkanamde nnɔ mme ete mmɔ.

22 Ndien idahaemi, sese, eyen mi Joseph, ke utɔ usuŋ emi ke ete mi ke eset eketiŋ prophecy abaŋa.

23 Ke ntre, ke ntak ediomi emi ediɔŋ fi; koro owo idisoboke ubon fo, koro mmɔ eyekpaŋ utɔŋ enɔ mme ikɔ ŋwed oro.

24 Ndien owo odudu kiet ayadaha ada ke ufɔt mmɔ, emi edinamde ediwak eti ŋkpɔ, ke ikɔ ye ke edinam mbiba, ndien enye eyedi ŋkpɔ utom ke ubɔk Abasi, ye ata akpanikɔ, ndinam ikpɔ utibe ŋkpɔ, nnyuŋ nnam ŋkpɔ emi edide akamba ke iso Abasi, man eda ediwak mfiak nnim ke itie enɔ ufɔk Israel, ye ubon nditɔ eka fo iren.

25 Ndien idahaemi, ɔfɔfɔn ɔnɔ fi, Joseph. Sese, afo edi ekpri eyen; ke ntre kpaŋ utɔŋ nnɔ mme ikɔ eyen eka fo, Nephi, ndien eyenam ye afo kpa nte mme ikɔ emi ami ntiŋde. Ti mme ikɔ ete fo emi oyomde ndikpa. Amen.