1 Mme ikɔ Jacob, eyen eka eren Nephi, emi enye eketiŋde ye ikɔt Nephi:

2 Sese, ndima nditɔ eka mi iren, ami, Jacob, ke Abasi ama okokot mi, onyuŋ enim mi ke edisana ndaha esie, ndien ke eyen eka mi eren Nephi ama okosio mi enim, emi mbufo esede nte edidem mme andikpeme, ye emi mbufo edoride enyin enɔ ndibɔhɔ, sese, mbufo emefiɔk ete ke ami mma ntiŋ ata ediwak ŋkpɔ nnɔ mbufo.

3 Edi, ami mfiak ntiŋ nnɔ mbufo; koro ami nkerede mbaŋa unwam ukpɔŋ mbufo. Iŋ, ekikere mi okpon abaŋa mbufo; ndien mbufo ke idem mbufo emefiɔk ete ke edi ntre kpukpru ini. Koro ami mmeteme mbufo ye kpukpru ifik; ndien ami mmekpep mbufo mme ikɔ ete mi; ndien ami mmetiŋ nnɔ mbufo kpukpru ŋkpɔ emi ewetde, tɔŋɔ ke edibot ererimbot.

4 Ndien idahaemi, sese, ami nyetiŋ nnɔ mbufo kabaŋa mme ŋkpɔ emi edude, ye emi edidide; ke ntre, ami nyekot mme ikɔ Isaiah nnɔ mbufo. Ndien mmɔ edi mme ikɔ emi eyen eka mi eren ebeŋede ete yak ami ŋkot nnɔ mbufo. Ndien ami ntiŋ nnɔ mbufo ke ntak mbufo, man mbufo ekpep enyuŋ etoro enyiŋ Abasi mbufo.

5 Ndien idahaemi, mme ikɔ emi ami ndikotde edi emi Isaiah eketiŋde kabaŋa ofuri ufɔk Israel; ke ntre, ekeme ndidomo mmɔ ye mbufo, koro mbufo edi eke ufɔk Israel. Ndien ediwak ŋkpɔ edu emi Isaiah eketiŋde emi ekemede ndidomo ye mbufo, koro mbufo edide eke ufɔk Israel.

6 Ndien idahaemi, emi edi mme ikɔ oro: Ntem ke Jehovah Abasi ɔdɔhɔ: Sese, ami nyemenede ubɔk mi nnɔ mme Gentile, nnyuŋ nnim udomo mi nnɔ mme owo; ndien mmɔ eyeda nditɔ iren mbufo edi ke ubɔk mmɔ, ndien eyemenede nditɔ iban mbufo ke afara mmɔ.

7 Ndien ndidem eyedi ete edibɔkde mbufo, ndien mbɔŋ iban mmɔ edi eka edibɔkde mbufo; mmɔ eyesuk ibuot enɔ mbufo ye iso mmɔ ke isɔŋ, enyuŋ edei ntɔŋ ikpat mbufo; ndien mbufo eyefiɔk ete ke ami ndi Jehovah; koro but idinamke mmɔ emi ebetde mi.

8 Ndien idahaemi, ami, Jacob, nyetiŋ ekpri mbaŋa mme ikɔ emi. Koro sese, Jehovah owut mi ete mbon emi ekedude ke Jerusalem, emi nnyin ikitode idi, ewot enyuŋ emen mmɔ ewɔrɔ nte nkpɔkɔbi.

9 Edi, Jehovah owut mi ete ke mmɔ eyefiak enyɔŋ edi. Ndien enye ŋko owut mi ete ke Jehovah Abasi, Edisana Abasi Owo, ayayarede idem esie ɔnɔ mmɔ ke obukidem; ndien ke ini enye ama ayarade idem esie mmɔ eyemia enye enyuŋ ewot enye ke cross, nte asaŋade ye mme ikɔ angel emi eketiŋde enye ɔnɔ mi.

10 Ndien ke ini mmɔ ema ekesɔŋ esit mmɔ enyuŋ esɔŋ itɔŋ mmɔ ye Edisana Abasi Israel, sese, mme ubiere ikpe Edisana Abasi Israel eyesim mmɔ. Ndien usen kedi emi edimiade inyuŋ ikut mmɔ.

11 Ke ntre, ke ini ema ekebin mmɔ enɔ iso ye edem, koro ntem ke angel ɔkɔdɔhɔ, ediwak eyekut ukut ke obukidem, ndien Jehovah idiyakke mmɔ etak, ke ntak mme akam mme anam akpanikɔ; eyesuan mmɔ, enyuŋ emia, enyuŋ esua; edi, Jehovah eyenyene mbɔm abaŋa mmɔ, man ke ini mmɔ edinyenede ifiɔk Andifak mmɔ, eyefiak etaŋ mmɔ ebok kiet ke mme isɔŋ inyene mmɔ.

12 Ndien eyediɔŋ mme Gentile, mmɔ emi prophet ekewetde abaŋa; koro sese, edieke edide ete ke mmɔ eyekabade esit inyuŋ inwanake ye Zion, inyuŋ idianke idem mmɔ ye akamba ye mbubiam ufɔk Abasi oro, eyenyaŋa mmɔ; koro Jehovah Abasi eyenam mme ediomi esie osu emi enye anamde ye nditɔ esie; ndien ke ntak emi prophet ewet mme ŋkpɔ emi.

13 Ke ntre, mmɔ emi enwanade ye Zion ye mbon ediomi Jehovah eyedei ntɔŋ ikpat mmɔ; ndien but idinamke mbio ediomi Jehovah. Koro ikɔt Jehovah edi mmɔ emi ebetde enye; koro mmɔ kesuk ebet edidi eke Messiah.

14 Ndien sese, nte asaŋade ye mme ikɔ prophet, Messiah ke idem esie ɔyɔtɔŋɔ ɔyɔhɔ ikaba ndinyaŋa mmɔ; ke ntre, enye eyeyarare idem esie ɔnɔ mmɔ ke odudu ye akwa ubɔŋ, man esobo mme asua mmɔ, ke ini usen oro edide ke ini mmɔ edibuɔtde idem ke enye; ndien ndomo kiet enye idisoboke emi ebuɔtde idem ke enye.

15 Ndien eyesobo mmɔ emi mibuɔtke idem ke enye, ke ikaŋ, ye ke oyobio, ye ke mme unyek isɔŋ, ye ke uduɔk iyip, ye ke udɔŋɔ, ye ke akaŋ. Ndien mmɔ eyefiɔk ete ke Jehovah edi Abasi, Edisana Abasi Israel.

16 Ndi unam emi unam efen omumde man ata eyebɔhɔ ke ubɔk andikpon, mme eyenam owo nkpɔkɔbi emi mbet okomumde ɔbɔhɔ?

17 Edi ntem ke Jehovah ɔdɔhɔ: Ke akpanikɔ eyenam mme owo nkpɔkɔbi emi andikpon akataŋde ɔwɔrɔ, ye unam emi unam efen okomumde man ata ebɔhɔ; koro Abasi andikpon ŋkan eyenam mbio ediomi esie ebɔhɔ. Koro ntem ke Jehovah ɔdɔhɔ: Ami nyeneni ye mmɔ emi enenide ye mbufo—

18 Ndien ami nyebɔk mmɔ emi efikde mbufo, ye obukidem mmɔ; ndien iyip mmɔ eyenaam mmɔ nte edinem mmin; ndien kpukpru owo eyefiɔk ete ke ami Jehovah ndi Andinyaŋa mbufo ye Andifak mbufo, Ɔkpɔsɔŋ Abasi Jacob.