1 Karon amo ini ang mga pulong nga ginwali ni Amulek sa katawhan nga yara sa duta sang Amonihas nga nagasiling:

2 Ako si Amulek; ako ang anak ni Gidonas, nga anak ni Ismael, nga kaliwat ni Aminadi; kag sia ang amo man nga Aminadi nga nagpatpat sang sinulat nga yara sa dingding sang templo nga ginsulat sang tudlo sang Dios.

3 Kag si Aminadi isa ka kaliwat ni Nefi, nga anak ni Lehi, nga naggwa sa duta sang Jerusalem, nga isa ka kaliwat ni Manases, nga anak ni Jose nga ginbaligya sa Egipto paagi sa mga kamot sang iya mga kauturan.

4 Kag tan-awa, isa man ako ka lalaki nga dungganon sa tanan nga nakakilala sa akon; huo, kag tan-awa, madamo ako sang paryente kag mga abyan, kag nakaagom ako sang madamo nga manggad paagi sa kamot sang akon kapisan.

5 Apang, sa pihak sini tanan, wala gid ako sing madamo nga nahibal-an parte sa mga paagi sang Ginuo, kag sang iya mga misteryo kag makatilingala nga gahum. Nagsiling ako nga wala gid ako sing madamo nga nahibal-an parte sining mga butang; apang tan-awa, nagsala ako kay madamo ako sing nakit-an sang iya mga misteryo kag sang iya makatilingala nga gahum; huo, bisan sa pag-amlig sang mga kabuhi sining katawhan.

6 Apang, ginpatig-a ko ang akon tagipusuon kay gintawag ako sa madamo nga beses kag indi ako mamati; gani nakahibalo ako parte sining mga butang, apang indi ko luyag nga makahibalo; gani nagpadayon ako sa pagrebelde batok sa Dios, sa kalainan sang akon tagipusuon, bisan tubtob sa ika-apat nga adlaw sining ika-pito nga bulan nga yara sa ika-napulo nga tuig sang pagginahum sang mga hukom.

7 Samtang nagapanglakaton ako agud magpakigkita sa isa ka suod kaayo nga paryente, tan-awa, isa ka anghel sang Ginuo ang nagpakita sa akon kag nagsiling: Amulek, magbalik ka sa imo kaugalingon nga puluy-an kay pakaunon mo ang isa ka propeta sang Ginuo; huo, isa ka balaan nga tawo, nga isa ka pinili nga tawo sang Dios; kay nagpuasa sia sa madamo nga inadlaw tungod sang mga sala sining katawhan, kag ginagutom sia, kag batonon mo sia sa imo puluy-an kag pakaunon sia, kag pakamaayohon ka niya kag ang imo panimalay; kag ang pagpakamaayo sang Ginuo mangin sa imo kag sa imo panimalay.

8 Kag natabo ini nga gintuman ko ang tingug sang anghel, kag nagbalik sa akon puluy-an. Kag samtang nagapakadto ako didto nakita ko ang tawo nga ginasiling sa akon sang anghel: Batonon mo sa imo puluy-an—kag tan-awa, amo man ini nga tawo nga nagahambal sa inyo parte sang mga butang sang Dios.

9 Kag ang anghel nagsiling sa akon nga isa sia ka balaan nga tawo; gani nahibal-an ko nga isa sia ka balaan nga tawo tungod ginsiling ini sang anghel sang Dios.

10 Kag sa liwat, nahibal-an ko nga ang mga butang nga ginpamatud-an niya matuod; kay tan-awa ginasiling ko sa inyo, nga pareho nga buhi ang Ginuo, sa amo man nagpadala sia sang iya anghel agud ipakita ining mga butang sa akon; kag ini iya ginhimo samtang ining si Alma nagpuyo sa akon puluy-an.

11 Kay tan-awa, ginpakamaayo niya ang akon panimalay, ginpakamaayo niya ako, kag ang akon kababayin-an, kag ang akon mga anak, kag ang akon amay kag ang akon mga paryente; huo, bisan ang tanan sang akon mga himata ginpakamaayo niya, kag ang pagpakamaayo sang Ginuo nangin sa amon suno sa mga pulong nga iya ginhambal.

12 Kag karon, sang nahambal ni Amulek ining mga pulong nakibot ang katawhan, nga nakita nga may kapin sa isa ka saksi nga nagpamatuod parte sang mga butang nga ginaakusar sa ila, kag amo man sang mga butang nga magaabot, suno sa espiritu sang propesiya nga yara sa ila.

13 Apang, may pila sa ila nga naghunahuna nga magpamangkot sa ila, agud nga paagi sa ila tuso nga mga padihot madakop nila sila sa ila mga pulong, agud makakita sila sang ebidensya batok sa ila, agud madala nila sila sa ila mga hukom agud mahukman sila suno sa layi, kag patyon sila ukon ihunong sa bilanggoan, suno sa krimen nga ila mapakita ukon maprobahan batok sa ila.

14 Karon amo yadto ang mga tawo nga nagtinguha sa paglaglag sa ila, nga mga mananabang, nga ginbayaran ukon ginpili sang katawhan nga magpatuman sang layi sa tinion sang mga pagbista sang ila mga kaso, sa mga pagbista sang mga krimen sang katawhan sa atubang sang mga hukom.

15 Karon ining mga mananabang maalam sa tanan nga taktika kag katusohan sang katawhan; kag ini agud mabuligan sila nga mangin batid sila sa ila propesyon.

16 Kag natabo ini nga ginsugdan nila ang pagpamangkot kay Amulek agud paagi sa sini basi mapasupak nila sia sa iya mga pulong, ukon mapabaylo-baylo ang mga pulong nga ihambal niya.

17 Karon wala sila nakahibalo nga mahimo nga mahibal-an ni Amulek ang ila mga plano. Apang natabo ini nga sang nagsugod sila sa pagpamangkot sa iya, nahibal-an niya ang ila mga hunahuna, kag nagsiling sia sa ila: O kamo nga malain kag batinggilan nga henerasyon, kamo nga mga mananabang kag mga hipokrito, kay nagapasad kamo sang mga pundasyon sang yawa; kay nagapahamtang kamo sang mga tugalbong kag mga siod agud dakpon ang mga balaan sang Dios.

18 Nagapahamtang kamo sang mga plano agud patikuon ang mga dalanon sang mga matarong, kag agud patup-on ang kaakig sang Dios sa inyo mga ulo, bisan sa lubos nga kalaglagan sining katawhan.

19 Huo, husto gid ang ginhambal ni Mosias, nga amo ang aton katapusan nga hari, sang madali na lang niya itugyan ang ginharian, nga wala sing bilinan sini, nga nagpahanabo nga ining katawhan pagadumalahan sang ila kaugalingon nga mga tingug—huo, husto gid ang iya ginhambal nga kon mag-abot ang tion nga ang tingug sining katawhan magapili sang kalainan, kon sayuron, kon mag-abot ang tion nga ining katawhan mahulog sa kalapasan, mangin luto na sila para sa kalaglagan.

20 Kag karon ginasiling ko sa inyo nga husto lamang nga hukman sang Ginuo ang inyo mga kalainan; husto lamang nga magsinggit sia sa sining katawhan paagi sa tingug sang iya mga anghel: Maghinulsol kamo, maghinulsol, kay ang ginharian sang langit malapit na.

21 Huo, husto lamang nga magsinggit sia paagi sa tingug sang iya mga anghel nga: Magapanaog ako sa akon katawhan upod ang katarongan kag hustisya sa akon mga kamot.

22 Huo, kag ginasiling ko sa inyo nga kon indi tungod sa mga pangamuyo sang mga matarong, nga yara subong sa duta, bisan subong pagabisitahan kamo sing lubos nga kalaglagan; apang indi ini paagi sa baha, pareho sang mga tawo sadtong mga adlaw ni Noe, kundi ini mangin paagi sa tiggulutom, kag paagi sa peste, kag sa espada.

23 Apang tungod ini sa mga pangamuyo sang mga matarong nga naluwas kamo; gani karon, kon panabugon ninyo ang mga matarong halin sa inyo, kon mag-amo, indi ang Ginuo magpugong sang iya kamot; kundi nga sa iya mabangis nga kaakig magagwa sia batok sa inyo; dayon pagasakiton kamo paagi sa tiggulutom, kag paagi sa peste, kag paagi sa espada; kag ang tion nagahilapit na luwas lang nga maghinulsol kamo.

24 Kag karon natabo ini nga ang katawhan mas naakig kay Amulek, kag nagsinggit sila nga nagasiling: Ini nga tawo nagapasipala batok sa aton mga layi nga matarong, kag sa aton maalam nga mga mananabang nga aton ginpili.

25 Apang gin-untay ni Amulek ang iya kamot, kag nagsinggit sing mas mabaskog pa gid sa ila nga nagasiling: O kamo nga malain kag batinggilan nga henerasyon, ngaa si Satanas nakapanguyapot sing hugot sa inyo mga tagipusuon? Ngaa itugyan ninyo ang inyo mga kaugalingon sa iya agud nga may gahum sia sa inyo, nga bulagon ang inyo mga mata, sa bagay nga indi ninyo mahangpan ang mga pulong nga ginhambal suno sa kamatuoran sini?

26 Kay tan-awa, nagpamatuod bala ako batok sa inyo layi? Wala kamo nakahangop; nagasiling kamo nga naghambal ako batok sa inyo layi; apang wala ko ina nahimo, kundi nga naghambal ako bilang pagsakdag sang inyo layi tuhoy sa pagkondenar sa inyo.

27 Kag karon tan-awa, ginasiling ko sa inyo, nga ang pundasyon sang kalaglagan sining katawhan ginasugdan na nga ipasad sang pagkadi-matarong sang inyo mga mananabang kag sang inyo mga hukom.

28 Kag karon natabo ini nga sang nahambal ni Amulek ining mga pulong ang katawhan nagsinggit batok sa iya nga nagasiling: Karon nahibal-an naton nga ini nga tawo anak sang yawa kay nagbutig sia sa aton; kay naghambal sia batok sa aton layi. Kag karon nagasiling sia nga wala sia nakahambal batok sini.

29 Kag sa liwat, nagpasipala sia batok sa aton mga mananabang, kag sa aton mga hukom.

30 Kag natabo ini nga gintanom ini sang mga mananabang sa ila mga tagipusuon nga dapat nila dumdumon ining mga butang batok sa iya.

31 Kag may isa sa ila nga ang ngalan amo si Zisrom. Karon sia ang nagapanguna sa pagpasibangod kanday Amulek kag Alma, sia nga isa sang pinakabatid sa ila, nga may madamo nga pagpakig-angot nga ginahimo sa katawhan.

32 Karon ang tuyo sining mga mananabang amo ang makakwarta; kag nakakwarta sila suno sa ila obra.