1 Kag natabo ini nga pagkatapos nga nakahambal sia sa katawhan madamo sa ila ang nagpati sa iya mga pulong, kag nagsugod sa paghinulsol, kag sa pagtuon sang balaan nga mga kasulatan.

2 Apang ang kalabanan sa ila nagahandum nga mapatay nila sanday Alma kag Amulek; kay naakig sila kay Alma, tungod sang kaathag sang iya mga pulong kay Zisrom; kag nagsiling man sila nga si Amulek nagbinutig sa ila, kag nagpasipala batok sa ila layi kag batok man sa ila mga mananabang kag mga hukom.

3 Kag naakig man sila kanday Alma kag Amulek; kag tungod nagpamatuod sila sing tuman kaathag batok sa ila mga kalainan, nagtinguha sila sa pagpatay sa ila sing sekreto.

4 Apang natabo ini nga wala nila ini nahimo; kundi nga gindakop nila sila kag gingapos sila sang mabakod nga mga higot, kag gindala sila sa atubang sang puno nga hukom sang duta.

5 Kag ang katawhan nagkadto kag nagsaksi batok sa ila—nga nagapamatuod nga nagpasipala sila batok sa layi, kag sa ila mga mananabang kag mga hukom sang duta, kag sa tanan man nga katawhan nga yara sa duta; kag nagpamatuod man nga may isa lamang ka Dios, kag magapadala sia sang iya Anak sa katawhan, apang indi sia magluwas sa ila; kag madamo sang amo nga mga butang ang ginpamatuod sang katawhan batok kanday Alma kag Amulek. Karon ginhimo ini sa atubang sang puno nga hukom sang duta.

6 Kag natabo ini nga si Zisrom nakibot sa mga pulong nga ginpanghambal; kag nakahibalo man sia parte sa kabulag sang mga kaisipan, nga ginpahanabo niya sa katawhan paagi sa iya mga pulong sang kabutigan; kag ang iya kalag nagsugod nga matublag sa idalom sing ihibalo sang iya kaugalingon nga kabasulanan; huo, nagsugod sia nga malikupan sang mga kasakit sang impiyerno.

7 Kag natabo ini nga nagsugod sia sa pagsinggit sa katawhan nga nagasiling: Tan-awa, ako ang may sala, kag ining mga tawo wala’y mantsa sa atubang sang Dios. Kag nagsugod sia sa pagpakitluoy para sa ila sumugod sa sina nga tion; apang ginpasipalahan nila sia nga nagasiling: Ginsudlan ka man bala sang yawa? Kag ginduplaan nila sia, kag ginpalayas nila sia halin sa ila, kag amo man ang tanan nga nagpati sa mga pulong nga ginpanghambal nanday Alma kag Amulek; kag ginpalayas nila sila, kag nagsugo sang mga tawo nga paantuson sila.

8 Kag ginpangdakop nila ang ila mga asawa kag mga kabataan, kag kon sin-o man ang nagpati ukon natudloan nga magpati sa pulong sang Dios ginpadap-ong nila sa kalayo; kag ginpangdala man nila ang ila mga kasulatan nga nagaunod sang balaan nga mga kasulatan, kag ginpangdap-ong man ang mga ini sa kalayo, agud masunog ang mga ini kag maupos sang kalayo.

9 Kag natabo ini nga gindakop nila sanday Alma kag Amulek, kag gindala sila sa lugar sang pagkamartir, agud masaksihan nila ang kalaglagan sinang mga ginalamon sang kalayo.

10 Kag sang nakita ni Amulek ang mga kasakit sang mga babayi kag mga kabataan nga ginalamon sang kalayo, nasakitan man sia; kag nagsiling sia kay Alma: Paano nga ginasaksihan naton ining kalain kaayo nga hitabo? Gani iuntay naton ang aton mga kamot, kag gamiton ang gahum sang Dios nga yari sa aton, kag luwason sila halin sa mga dabadaba sang kalayo.

11 Apang si Alma nagsiling sa iya: Ginapunggan ako sang Espiritu nga indi ko dapat iuntay ang akon kamot; kay tan-awa ginabaton sila sang Ginuo sa iya kaugalingon, sa himaya; kag ginatugotan niya nga himuon nila ini nga butang, ukon nga himuon sang katawhan ini nga butang sa ila, suno sa katig-a sang ila mga tagipusuon, agud ang mga paghukom nga ipatuman niya sa ila sa iya kaakig mangin matarong; kag ang dugo sang inosente magatindog bilang saksi batok sa ila, huo, kag magasinggit sing mabaskog batok sa ila sa katapusan nga adlaw.

12 Karon si Amulek nagsiling kay Alma: Tan-awa, ayhan sunogon man nila kita.

13 Kag si Alma nagsiling: Ini mangin suno sa kabubut-on sang Ginuo. Apang, tan-awa, ang aton buluhaton wala pa natapos; gani indi nila kita pagsunogon.

14 Karon natabo ini nga sang maupos ang mga lawas sadtong mga ginpangdap-ong sa kalayo, kag amo man ang mga kasulatan nga ginpangdap-ong upod sa ila, ang puno nga hukom sang duta nagpalapit kag nagtindog sa atubang nanday Alma kag Amulek, samtang ginagapos sila; kag gintampa niya ang ila mga guya nga gamit ang iya kamot, kag nagsiling sa ila: Pagkatapos sang inyo nakita, magawali pa bala kamo liwat sa sining katawhan, agud idap-ong sila sa linaw nga kalayo kag asupre?

15 Tan-awa, nakita ninyo nga wala kamo sing gahum sa pagluwas sadtong mga ginpangdap-ong sa kalayo; kag wala man sila ginluwas sang Dios bisan pa nga yara sila sa inyo pagtuluohan. Kag gintampa liwat sang hukom ang ila mga guya, kag nagpamangkot: Ano ang inyo masiling para sa inyo mga kaugalingon?

16 Karon ini nga hukom nagasunod sa paagi kag pagtuluohan ni Nehor, nga amo ang nagpatay kay Gideon.

17 Kag natabo ini nga sanday Alma kag Amulek wala nagsabat sa iya; kag gintampa niya sila liwat, kag gintugyan sila sa mga opisyales agud ihunong sa bilanggoan.

18 Kag sang nahunong sila sa bilanggoan sing tatlo ka adlaw, may nag-abot nga madamo nga mananabang, kag mga hukom, kag mga pari, kag mga manunudlo, nga iya sang pagtuluohan ni Nehor; kag nagsulod sila sa bilanggoan agud makita sila, kag ginpamangkot nila sila parte sa madamo nga pulong; apang wala nila sila pagsabta.

19 Kag natabo ini nga ang hukom nagtindog sa ila atubang, kag nagsiling: Ngaa wala ninyo ginasabat ang mga pulong sining katawhan? Wala bala kamo nakahibalo nga may gahum ako sa pagtugyan sa inyo sa mga dabadaba sang kalayo? Kag ginsugo niya sila nga maghambal; apang wala sila nagsabat sing bisan ano.

20 Kag natabo ini nga naglakat sila kag nagpadayon sa ila mga hilikuton, apang nagbalik sila liwat pagkaaga; kag gintampa naman liwat sang hukom ang ila mga guya. Kag madamo man ang nagpalapit, kag nagtampa sa ila nga nagasiling: Magatindog pa bala kamo liwat kag hukman ining katawhan, kag pakalainon ang amon layi? Kon may amo kamo sina kadako nga gahum ngaa indi ninyo pagluwason ang inyo mga kaugalingon?

21 Kag madamo sang amo sina nga mga butang ang ila ginsiling sa ila, nga nagapabagrot sang ila mga ngipon sa ila, kag nagadupla sa ila, kag nagasiling: Ano bala ang amon mangin hitsura kon pagasilotan kami?

22 Kag madamo sang amo sina nga mga butang, huo, tanan nga sari sang amo sina nga mga butang ang ila ginsiling sa ila; kag gani ginyaguta nila sila sa sulod sang madamo nga inadlaw. Kag gindumili nila ang pagkaon sa ila agud nga gutumon sila, kag tubig agud nga uhawon sila; kag ginkuha man nila halin sa ila ang ila mga panapton agud nga mangin hublas sila; kag gani gingapos sila sa mabakod nga mga higot, kag ginhunong sa bilanggoan.

23 Kag natabo ini nga pagkatapos nga nag-antos sila sing amo sini sa sulod sang madamo nga inadlaw, (kag sa ika-dose nga adlaw yadto, sa ika-napulo nga bulan, sa ika-napulo nga tuig sang pagginahum sang mga hukom sa katawhan ni Nefi) nga ang puno nga hukom sa duta sang Amonihas kag madamo sang ila mga manunudlo kag ila mga mananabang nagsulod sa bilanggoan nga sa diin sanday Alma kag Amulek nagapos sang mga higot.

24 Kag ang puno nga hukom nagtindog sa ila atubang, kag gintampa sila liwat, kag nagsiling sa ila: Kon yara sa inyo ang gahum sang Dios hilwaya ang inyo mga kaugalingon halin sa sining mga higot, kag dayon mapati kami nga pagalaglagon sang Ginuo ining katawhan suno sa inyo mga pulong.

25 Kag natabo ini nga sila tanan nagpalapit kag gintampa sila, nga nagasiling sang amo man nga mga pulong, bisan tubtob sa katapusan; kag sang ang katapusan nakahambal na sa ila, ang gahum sang Dios nangin yara kay Alma kag kay Amulek, kag nagbangon sila kag nagtindog sa ila mga tiil.

26 Kag si Alma nagpakitluoy nga nagasiling: Ano pa kalawig nga batason namon ining tuman nga mga pag-antos, O Ginuo? O Ginuo, hatagi kami sing kusog suno sa amon pagtuo nga yara kay Cristo, bisan tuhoy sa pagkahilway. Kag ginbugto nila ang mga higot nga nagagapos sa ila; kag sang makita ini sang katawhan, nagsugod sila sa pagpalagyo, kay ang kahadlok sa pagkalaglag nagpangibabaw sa ila.

27 Kag natabo ini nga sa pagkadako sang ila kahadlok sa bagay nga nagkalatumba sila sa duta, kag wala nakalab-ot sa guluwaan sang bilanggoan; kag ang duta nag-uyog sing mabaskog, kag ang mga pader sang bilanggoan nagkalapihak, sa bagay nga nagkalarumpag ang mga ini sa duta; kag ang puno nga hukom, kag mga mananabang, kag mga pari, kag mga manunudlo, nga nagtampa kanday Alma kag Amulek, nagkalamatay tungod sang pagkarumpag sini.

28 Kag sanday Alma kag Amulek naggwa halin sa bilanggoan, kag wala sila nasamad; kay ang Ginuo naghatag sa ila sing gahum, suno sa ila pagtuo nga yara kay Cristo. Kag gilayon sila nga nakagwa halin sa bilanggoan; kag nahubaran sila halin sa ila pagkagapos; kag ang bilanggoan nagkalarumpag sa duta, kag ang tagsa ka tawo sa sulod sang mga dingding sini, luwas kanday Alma kag Amulek, nagkalamatay; kag gilayon sila nga naggwa padulong sa siyudad.

29 Karon sang nabatian sang katawhan ang tuman nga gahod nagdinalagan ang kadam-an agud hibaluon ang kabangdanan sini; kag sang nakita nila sanday Alma kag Amulek nga nagagwa halin sa bilanggoan, kag ang mga pader sini nagkalarumpag sa duta, nakabatyag sila sang dako nga kahadlok, kag nagpinalagyo halin sa atubang nanday Alma kag Amulek pareho sa isa ka kanding nga nagapalagyo upod sa iya tinday halin sa duha ka leon; kag gani nalagyo sila halin sa presensya nanday Alma kag Amulek.