1 Kag karon natabo ini nga samtang nagapanglakaton si Alma halin sa duta sang Gideon pa-sur, padulong sa duta sang Manti, tan-awa, sa iya kakibot, nasugat-an niya ang mga anak nga lalaki ni Mosias nga nagapanglakaton padulong sa duta sang Zarahemla.

2 Karon ining mga anak ni Mosias nakaupod kay Alma sa tion nga una nga nagpakita ang anghel sa iya; gani si Alma nagkasadya sing tuman nga makita ang iya mga kauturan; kag ang nagdugang pa sa iya kalipay, mga kauturan pa gihapon niya sila sa Ginuo; huo, kag nagbakod sila sa ihibalo parte sa kamatuoran; kay mga lalaki sila nga may sibo nga paghangop kag gintun-an nila sing matutum ang balaan nga mga kasulatan agud mahibal-an nila ang pulong sang Dios.

3 Apang indi lamang ini; gindedikar nila ang ila mga kaugalingon sa madamo nga pangamuyo, kag pagpuasa; gani may yara sila sang espiritu sang propesiya, kag sang espiritu sang rebelasyon, kag kon sila magtudlo, nagatudlo sila upod ang gahum kag awtoridad halin sa Dios.

4 Kag nagapanudlo sila sang pulong sang Dios sa sulod sang katorse ka tuig sa mga Lamanhon, nga nagmadinalag-on sa pagdala sang madamo sa ihibalo parte sa kamatuoran; huo, paagi sa gahum sang ila mga pulong madamo ang nadala sa atubang sang altar sang Dios, agud magtawag sa iya ngalan kag magkumpisar sang ila mga sala sa iya atubang.

5 Karon amo ini ang mga sirkumstansya nga ila gin-atubang sa ila mga pagpanglakaton, kay nag-angkon sila sing madamo nga pag-antos; nag-antos sila sing tuman, sa lawas kag sa kaisipan, pareho sang kagutom, kauhaw kag kakapoy, kag amo man tuman nga pagpangabudlay man sa espiritu.

6 Karon amo ini ang ila mga pagpanglakaton: Pagkatapos nga nagpaalam sila sa ila amay, kay Mosias, sa una nga tuig sang mga hukom; pagkatapos nga ginbalibaran nila ang ginharian nga luyag ihatag sang ila amay sa ila, kag amo man ini ang luyag sang katawhan;

7 Apang naghalin sila sa duta sang Zarahemla, kag gindala ang ila mga espada, kag ang ila mga bangkaw, kag ang ila mga pana, kag ang ila mga baslay, kag ang ila mga tirador; kag ini ila ginhimo agud mapanigan-an nila sing pagkaon ang ila mga kaugalingon samtang yara sa kamingawan.

8 Kag gani naghalin sila padulong sa kamingawan upod ang pila nila ka tawo nga ila ginpili, agud magtaklad sa duta sang Nefi, agud magwali sang pulong sang Dios sa mga Lamanhon.

9 Kag natabo ini nga nagpanglakaton sila sa madamo nga inadlaw sa kamingawan, kag nagpuasa sila sing tuman kag nagpangamuyo sing tuman agud hatagan sila sang Ginuo sing isa ka bahin sang iya Espiritu nga mag-upod sa ila, kag magpabilin upod sa ila, nga sila mangin isa ka instrumento sa mga kamot sang Dios sa pagdala, kon mahimo, sang ila mga kauturan, ang mga Lamanhon, sa ihibalo parte sa kamatuoran, sa ihibalo parte sa kalainan sang mga tradisyon sang ila mga amay, nga indi husto.

10 Kag natabo ini nga ginbisita sila sang Ginuo paagi sa iya Espiritu, kag nagsiling sa ila: Magkalipay. Kag nalipay sila.

11 Kag ang Ginuo nagsiling man sa ila: Maglakat kamo upod sa mga Lamanhon, nga inyo mga kauturan, kag palig-ona ang akon pulong; apang mangin mapainumuron kamo sa malawig nga mga pag-antos kag mga kabudlayan, agud nga makapakita kamo sa ila sang maayo nga mga ehemplo sa akon, kag himuon ko kamo nga instrumento sa akon mga kamot tuhoy sa kaluwasan sang madamo nga kalag.

12 Kag natabo ini nga ang mga tagipusuon sang mga anak ni Mosias, kag inang mga kaupod man nila, nagpakaisog nga maglakat sa mga Lamanhon agud ipahayag sa ila ang pulong sang Dios.

13 Kag natabo ini, sang nag-abot sila sa mga dulonan sang duta sang mga Lamanhon, nagbinulagay sila kag naglinakat ang kada isa, nga nagasalig sa Ginuo nga magakitaay sila liwat sa katapusan sang ila pag-ani; kay nagapati sila nga dako ang buluhaton nga ila pagahimuon.

14 Kag wala’y duhaduha nga dako ini, kay pagahimuon nila ang pagwali sang pulong sang Dios sa isa ka mabangis kag matig-a kag mapintas nga katawhan; isa ka katawhan nga nagakalipay sa pagpamatay sang mga Nefinhon, kag pagpangawat kag pagpangagaw sa ila; kag ang ila mga tagipusuon napahamtang sa mga manggad, ukon sa mga bulawan kag mga pilak, kag malahalon nga mga bato; apang nagatinguha sila sa pag-angkon sining mga butang paagi sa pagpamatay kag pagpangagaw, agud indi na sila magpangabudlay pa para sa mga ini sa ila kaugalingon nga mga kamot.

15 Gani tuman sila katamad nga katawhan, nga ang madamo sa ila nagasimba sa mga dios-dios, kag ang sumpa sang Dios nagtupa sa ila tungod sang mga tradisyon sang ila mga amay; bisan pa nga gintanyag sa ila ang mga promisa sang Ginuo sa kondisyon sang paghinulsol.

16 Gani, amo ini ang kabangdanan nga himuon sang mga anak ni Mosias ang buluhaton, agud basi pa lang madala nila sila sa paghinulsol; agud basi pa lang madala nila sila nga mahibal-an ang plano sang pagtubos.

17 Gani nagbinulagay sila, kag naglakat sa tunga nila, ang tagsa ka tawo nga nagaisahanon, suno sa pulong kag gahum sang Dios nga ginhatag sa iya.

18 Karon si Amon nga amo ang puno sa ila, ukon sa mas maathag, nagbulig sia sa ila, kag nagbiya sia sa ila, pagkatapos nga ginpakamaayo sila suno sa ila lain-lain nga mga palangakoan, nga nagpaambit sang pulong sang Dios sa ila, ukon nagbulig sa ila antes sia naghalin; kag gani nagpanglakaton sila sa lain-lain nga mga lugar sa bug-os nga kadutaan.

19 Kag si Amon nagkadto sa duta sang Ismael, ang duta nga ginatawag sunod sa mga anak nga lalaki ni Ismael, nga nangin mga Lamanhon man.

20 Kag sang nagsulod si Amon sa duta sang Ismael, gindakop sia kag gingapos sang mga Lamanhon, suno sa ila gawi nga gapuson ang tanan nga Nefinhon nga mahulog sa ila mga kamot, kag dal-on sila sa atubang sang hari; kag gani ginabilin sa ikalipay sang hari nga patyon sila, ukon ipabilin sila sa pagkabihag, ukon ihunong sila sa bilanggoan, ukon tabugon sila pagwa sa iya duta, suno sa iya kabubut-on kag ikalipay.

21 Kag gani si Amon gindala sa atubang sang hari nga yara sa duta sang Ismael; kag ang iya ngalan amo si Lamoni; kag isa sia ka kaliwat ni Ismael.

22 Kag ang hari namangkot kay Amon kon luyag niya magpuyo sa duta upod sa mga Lamanhon, ukon upod sa iya katawhan.

23 Kag si Amon nagsiling sa iya: Huo, luyag ko magpuyo upod sa sining katawhan sa malip-ot nga tion; huo, kag ayhan tubtob sa adlaw nga mapatay ako.

24 Kag natabo ini nga si haring Lamoni nalipay gid kay Amon, kag nagsugo nga hubaron ang iya mga gapos; kag luyag niya nga pangasaw-on ni Amon ang isa sang iya mga anak nga babayi.

25 Apang si Amon nagsiling sa iya: Indi, kundi mangin alagad mo ako. Gani si Amon nangin isa ka alagad ni haring Lamoni. Kag natabo ini nga ginbutang sia upod sa iban pa nga mga alagad agud bantayan ang mga panong ni Lamoni, suno sa gawi sang mga Lamanhon.

26 Kag pagkatapos sang tatlo ka adlaw nga yara sia sa pag-alagad sa hari, samtang nagaupod sia sa mga alagad nga Lamanhon nga nagadala sang ila mga panong sa lugar nga may tubig, nga ginatawag ang tubig sang Sebus, kag ang tanan nga Lamanhon nagatabog sang ila mga panong pakadto sa sini nga lugar, agud makainom ang mga ini sang tubig—

27 Gani, samtang ginatabog nanday Amon kag sang mga alagad sang hari ang ila mga panong pakadto sa sini nga lugar nga may tubig, tan-awa, may pila ka mga Lamanhon, nga nauna na upod sa ila mga panong sa tubig, ang nagtilindog kag ginpalapta ang mga panong nanday Amon kag sang mga alagad sang hari, kag ginpalapta nila ang mga ini sa bagay nga nagpalalagyo ang mga ini sa bisan diin.

28 Karon ang mga alagad sang hari nagsugod nga magkumod nga nagasiling: Karon pamatyon kita sang hari, pareho sang aton mga kauturan kay naglinapta ang ila mga panong tungod sang kalainan sining mga lalaki. Kag nagsugod sila sa paghinibi sing tuman nga nagasiling: Tan-awa, ang aton mga panong naglinapta na.

29 Karon naghilibion sila tungod sang kahadlok nga pamatyon. Karon sang nakita ini ni Amon napuno ang iya tagipusuon sa sulod niya tungod sa kalipay; kay, siling niya, ipakita ko ang akon gahum sa sining kapareho ko nga mga alagad, ukon ang gahum nga yari sa akon, sa pagpapanumbalik sining mga panong sa hari, agud mabihag ko ang mga tagipusuon sining kapareho ko nga mga alagad, agud madala ko sila sa pagpati sa akon mga pulong.

30 Kag karon, amo ini ang mga ginahunahuna ni Amon sang nakita niya ang mga pag-antos sinang iya ginatawag nga iya mga kauturan.

31 Kag natabo ini nga ginpaisog niya sila paagi sa iya mga pulong nga nagasiling: Mga kauturan ko, magpakalig-on kamo kag aton pangitaon ang mga panong, kag panipunon naton sila kag dal-on sila pabalik sa lugar nga may tubig; kag sa sini nga paagi maamligan naton ang mga panong para sa hari kag indi niya kita pagpamatyon.

32 Kag natabo ini nga ginpangita nila ang mga panong, kag nagsunod sila kay Amon, kag nagdali-dali sila sa tuman nga kaabtik kag naunahan ang mga panong sang hari, kag ginpanipon ang mga ini liwat sa lugar nga may tubig.

33 Kag yadtong mga lalaki nagtindog liwat agud laptahon ang ila mga panong; apang si Amon nagsiling sa iya mga kauturan: Palibutan ninyo ang mga panong agud indi sila makapalagyo; kag makig-away ako sa sining mga lalaki nga nagapalapta sang aton mga panong.

34 Gani, ginhimo nila ang ginsugo ni Amon sa ila, kag nagtindog sia agud magpakig-away sinang mga nagatindog malapit sa mga tubig sang Sebus; kag indi sila diutay lang.

35 Gani wala sila nahadlok kay Amon, kay naghunahuna sila nga ang isa sang ila mga tawo makasarang sa pagpatay sa iya suno sa ila luyag, kay wala sila nakahibalo nga ang Ginuo nagpromisa kay Mosias nga luwason niya ang iya mga anak halin sa ila mga kamot; kag wala man sila sing nahibal-an nga bisan ano parte sa Ginuo; gani nagkalipay sila sa kalaglagan sang ila mga kauturan; kag sa sini nga kabangdanan nagtindog sila agud laptahon ang mga panong sang hari.

36 Apang si Amon nagtindog kag nagsugod sa pagbato sa ila paagi sa iya tirador; huo, nga may dako nga gahum gintirador niya sila; kag sa sini nga paagi ginpatay niya ang pila sa ila sa bagay nga nagsugod sila nga matingala sa iya gahum; apang naakig sila tungod sa pagpatay sa ila mga kauturan, kag determinado sila nga dapat sia mapatay; gani, bangod nakita nila nga indi nila sia sarang nga maigo sang ila mga bato, nagsalakay sila nga may mga inuglampos agud patyon sia.

37 Apang tan-awa, ang tagsa ka lalaki nga nag-alsa sang iya inuglampos agud lampusan si Amon, gin-utdan niya sang ila mga butkon paagi sa iya espada; kay nasagang niya ang ila mga lampos paagi sa paglabo sang ila mga butkon sa sulab sang iya espada, sa bagay nga nagsugod sila nga matingala, kag nagsugod sa pagpalagyo sa iya atubang; huo, kag indi sila diutay lang; kag ginpapalagyo niya sila paagi sa kusog sang iya butkon.

38 Karon anum sa ila ang nagkalatumba paagi sa tirador, apang wala sia sing ginpatay luwas sa ila lider paagi sa iya espada; kag ginpang-utod niya ang mga butkon sang tanan nga nag-alsa batok sa iya, kag indi ini diutay.

39 Kag sang mapanabog niya sila sa malayo, nagbalik sia kag ginpainom nila ang ila mga panong kag ginbalik ang mga ini sa halalban sang hari, kag dayon nagkadto sa hari, nga ginadala ang mga butkon nga ginpang-utod paagi sa espada ni Amon, nga iya sadtong mga nagtinguha nga patyon sia; kag gindala ang mga ini sa hari bilang testimonya sang mga butang nga ila ginhimo.