Ang Libro ni Alma
ang Anak nga Lalaki ni Alma

1 Karon natabo ini nga sa una nga tuig sang pagginahum sang mga hukom sa katawhan ni Nefi, sumugod sini nga tion, bangod si haring Mosias naglakat na sa alagyan sang bug-os nga duta, nga nakig-away sing maayo nga pagpakig-away, nga naglakat sing matarong sa atubang sang Dios, nga wala sing ginbilin nga maggahum bulos sa iya; apang nagpahamtang sia sang mga layi, kag ginkilala ini sang katawhan; gani kinahanglan sila magtuman sang mga layi nga iya ginhimo.

2 Kag natabo ini nga sa una nga tuig sang pagginahum ni Alma sa hukom-lingkuranan, may isa ka lalaki nga gindala sa iya atubang agud hukman, isa ka dako nga lalaki, kag nakilal-an tungod sang iya tuman nga kusog.

3 Kag naglibot sia sa tunga sang katawhan, nga nagawali sa ila sinang iya gintawag nga pulong sang Dios, nga nagapanudlo batok sa simbahan; nga nagapahayag sa katawhan nga ang tagsa ka pari kag manunudlo dapat nga mangin kilala; kag indi sila dapat magpangabudlay paagi sa ila mga kamot, kundi nga dapat sila sakdagon sang katawhan.

4 Kag nagpamatuod man sia sa katawhan nga ang tanan nga tawo maluwas sa katapusan nga adlaw, kag indi sila dapat nga magkahadlok ukon magkurog, kundi nga mahimo sila nga magbayaw sang ila mga ulo kag magkasadya; kay ang Ginuo nagtuga sang tanan nga tawo, kag gintubos man niya ang tanan nga tawo; kag, sa katapusan, ang tanan nga tawo magaangkon sang kabuhi nga wala’y katapusan.

5 Kag natabo ini nga gintudlo niya ining mga butang sa bagay nga madamo ang nagpati sa iya mga pulong, bisan sa pagkadamo nga nagsugod sila sa pagsakdag sa iya kag paghatag sa iya sang kwarta.

6 Kag nagsugod sia nga mag-alsa sa bugal sang iya tagipusuon, kag sa pagsul-ob sing tuman kamalahalon nga biste, huo, kag nagsugod man sa pagpahamtang sing isa ka simbahan suno sa sari sang iya pagpangwali.

7 Kag natabo ini samtang nagalakat sia, agud magwali sa sinang mga nagapati sa iya pulong, nasugata niya ang isa ka lalaki nga miyembro sang simbahan sang Dios, huo, bisan isa sang ila mga manunudlo; kag nagsugod sia sa pagpakigbais sa iya sing matigdas agud nga mahimo niya nga madala palayo ang katawhan sang simbahan; apang ang lalaki nakigbais sa iya nga nagasaway sa iya paagi sa mga pulong sang Dios.

8 Karon ang ngalan sang lalaki amo si Gideon; kag sia amo yadtong nangin instrumento sa mga kamot sang Dios sa paghilway sang katawhan ni Limhi halin sa pagkaulipon.

9 Karon, tungod si Gideon nakigbais sa iya paagi sa mga pulong sang Dios naakig sia kay Gideon, kag naggabot sang iya espada kag nagsugod sa paglabo sa iya. Karon si Gideon tungod nga tigulang na, gani wala niya masarangi ang pagsagang sang iya mga labo, gani napatay sia paagi sa espada.

10 Kag ang lalaki nga nagpatay sa iya gindakop sang katawhan sang simbahan, kag gindala sa atubang ni Alma agud hukman suno sa mga krimen nga iya nahimo.

11 Kag natabo ini nga nagtindog sia sa atubang ni Alma kag ginpangapinan ang iya kaugalingon nga may tuman nga kaisog.

12 Apang si Alma nagsiling sa iya: Tan-awa, ini ang una nga tion nga ang butig nga pagkapari ginsugdan sa sining katawhan. Kag tan-awa, indi ka lamang nakasala tungod sang butig nga pagkapari, kundi nga nagpilit pa nga ipatuman ini paagi sa espada; kag kon ang butig nga pagkapari igapatuman sa sining katawhan magaresulta ini sa ila lubos nga kalaglagan.

13 Kag ginpaagay mo ang dugo sing isa ka matarong nga tawo, huo, isa ka tawo nga nakahimo sing dako nga kaayohan sa sining katawhan; kag kon patawaron ka namon ang iya dugo magatupa sa amon agud magtimalus.

14 Gani ginasentensyahan ka nga mapatay suno sa layi nga ginhatag sa aton ni Mosias, ang aton katapusan nga hari; kag ini ginkilala na sining katawhan; gani ining katawhan kinahanglan gid nga magsunod sa layi.

15 Kag natabo ini nga gindakop nila sia; kag ang iya ngalan amo si Nehor; kag gindala nila sia sa ibabaw sang bungyod sang Manti, kag didto ginpaako sia, ukon sa mas maathag nag-ako sia, sa tunga sang kalangitan kag sang duta, nga ang iya ginpanudlo sa katawhan batok sa pulong sang Dios; kag didto nag-antos sia sing makahuluya nga kamatayon.

16 Apang, wala sini mapauntat ang paglapnag sang butig nga pagkapari sa bug-os nga duta; kay may madamo nga maluyagon sang wala’y pulos nga mga butang sang kalibutan, kag naglibot sila nga nagawali sang sayop nga mga doktrina; kag ini ila ginhimo tungod sang manggad kag kadungganan.

17 Apang, wala sila nangisog nga magbinutig, kon ini mahibal-an, tungod sa kahadlok sa layi, kay ang mga butigon ginasilotan; gani nagpakunokuno sila sa pagwali suno sa ila ginapatihan; kag karon ang layi wala sing gahum sa bisan sin-o nga tawo tungod sang iya ginapatihan.

18 Kag wala sila nangisog nga magpangawat, tungod sa kahadlok sa layi, kay ang amo sina ginasilotan; ukon wala man sila nangisog nga magpangagaw, ukon magpamatay, kay sia nga nagapamatay ginasilotan sang kamatayon.

19 Apang natabo ini nga ang bisan sin-o nga indi miyembro sang simbahan sang Dios nagsugod sa paghingabot sang mga miyembro sang simbahan sang Dios, kag nagdala sa ila kaugalingon sang ngalan ni Cristo.

20 Huo, ginhingabot nila sila, kag ginsakit sila sang tanan nga sari sang mga pulong, kag ini tungod sang ila pagkamapainubuson; tungod indi sila bugalon sa ila kaugalingon nga mga mata, kag tungod nagpahayag sila sang pulong sang Dios, sa isa kag isa, nga indi kinahanglan ang kwarta kag wala sing bayad.

21 Karon may isa ka istrikto nga layi sa katawhan sang simbahan, nga wala dapat sing bisan sin-o nga tawo, nga miyembro sang simbahan, ang magapang-una sa paghingabot sinang indi mga miyembro sang simbahan, kag wala dapat sing paghingabutay sa tunga nila.

22 Apang, may madamo sa ila nga nagsugod nga mangin bugalon, kag nagsugod sa pagpakigbais sing mainiton sa ila mga kaaway, bisan tubtob sa pagtinapungolay; huo, nagasinumbaganay sila paagi sa ila mga inumol.

23 Karon yara na ini sa ika-duha nga tuig sang pagginahum ni Alma, kag nangin isa ini ka rason sing tuman nga pag-antos sa simbahan; huo, nangin isa ini ka rason sing tuman nga pagtilaw sang simbahan.

24 Kay ang mga tagipusuon sang madamo nagtig-a, kag ang ila mga ngalan ginpamanas, nga wala na sila pagdumduma sa katawhan sang Dios. Kag madamo man ang nagpalayo sang ila mga kaugalingon halin sa ila.

25 Karon isa ini ka dako nga pagtilaw sa sinang mga nagpabilin nga malig-on sa pagtuo; apang, mga malig-on sila kag mabakod sa pagtuman sang mga kasugoan sang Dios, kag ginbatas nila sing may pagpaumod ang paghingabot nga gintampok sa ila.

26 Kag kon magbiya ang mga pari sang ila mga buluhaton agud magpahayag sang pulong sang Dios sa katawhan, ang katawhan nagabiya man sang ila mga buluhaton agud magpamati sa pulong sang Dios. Kag kon mapahayag na sang mga pari sa ila ang pulong sang Dios, tanan sila nagabalik liwat sing matutum sa ila mga buluhaton; kag ang mga pari, wala nagakabig sang iya kaugalingon nga labaw sangsa iya mga tagpalamati, kay ang manugwali indi mas maayo sangsa tagpalamati, kag ang manunudlo indi man mas maayo sangsa nagatuon; kag gani tanan sila palareho, kag nagpangabudlay sila tanan, ang tagsa ka tawo suno sa iya kusog.

27 Kag nagpaambit sila sang ila manggad, ang tagsa ka tawo suno sa sinang yara sa iya, sa mga imol, kag sa mga nagakinahanglan, kag sa mga masakiton, kag sa mga nagaantos; kag wala sila nagasul-ob sang malahalon nga panapton, apang mahipid sila kag maanyag.

28 Kag gani ginpahamtang nila ang mga kahilabtanan sang simbahan; kag gani nagsugod sila sa pag-agom liwat sang dalayon nga paghidaet, sa pihak sang tanan nga mga paghingabot sa ila.

29 Kag karon, tungod sang kalig-on sang simbahan nagsugod sila nga mangin tuman kamanggaranon, nga may kabuganaan sa tanan nga butang bisan ano man nga ila ginakinahanglan—kabuganaan sa mga panong kag mga baka, kag mga pinatambok sang tagsa ka sahi, kag amo man kabuganaan sang uyas, kag sang bulawan, kag sang pilak, kag sang malahalon nga mga butang, kag kabuganaan sang sida kag lino nga manipis, kag tanan nga sari sang maayo nga simple nga tela.

30 Kag gani, sa ila mauswagon nga mga sirkumstansya, wala nila ginatabog ang bisan sin-o nga mga hublas, ukon inang mga ginagutom, ukon inang mga ginauhaw, ukon inang mga nagamasakit, ukon inang mga wala mapakaon; kag wala nila ginapahamtang ang ila mga tagipusuon sa mga manggad; gani nangin maalwan sila sa tanan, nga tigulang kag lamharon, nga ulipon kag hilway, nga lalaki kag babayi, bisan sa gwa man sang simbahan ukon sa sulod sang simbahan, nga wala sing ginapasulabi nga mga tawo sa sinang mga nagakinahanglan.

31 Kag gani nag-uswag sila kag nangin labaw nga mas manggaranon sangsa sinang mga indi miyembro sang ila simbahan.

32 Kay inang mga indi miyembro sang ila simbahan nagpinagusto sang ila mga kaugalingon sa mga pagpanghiwit, kag sa pagpangdios-dios ukon pagkatamad, kag sa mga pagwakal, kag sa mga paghinisaay kag pag-ilinaway; pagsul-ob sang malahalon nga panapton; nga naalsa sa bugal sang ila kaugalingon nga mga mata; nga nagahingabot, nagabinutig, nagapangawat, nagapangagaw, nagapanghilawas, kag nagapamatay, kag tanan nga sari sang kalainan; apang, ang layi ginpatuman sa tanan sinang mga naglapas sa sini, tubtob sa mahimo.

33 Kag natabo ini nga paagi sa amo nga pagpatuman sang layi sa ila, nga ang tagsa ka tawo nagaantos suno sa sinang iya nahimo, mas nagpahimuyong sila, kag wala naghimo sing bisan ano nga kalainan kon ini mahibal-an; gani, may dako nga paghidaet sa katawhan ni Nefi tubtob sa ika-lima nga tuig sang pagginahum sang mga hukom.