1 Tan-awa, karon natabo ini nga pagkatapos nga makapuyo ang katawhan ni Amon sa duta sang Jerson, huo, kag pagkatapos man nga napanabog ang mga Lamanhon pagwa sa duta, kag ang ila mga patay ginpanglubong sang katawhan sang duta—

2 Karon ang ila mga patay wala naisip tungod sang tuman nila nga kadamuon; kag wala man naisip ang mga patay sang mga Nefinhon—kundi natabo ini, pagkatapos nga mapanglubong nila ang ila mga patay, kag amo man pagkatapos sang mga adlaw sang pagpuasa, kag pagpangalisud, kag pagpangamuyo, (kag sa ika-disesais ini nga tuig sang pagginahum sang mga hukom sa katawhan ni Nefi) nga nagsugod nga may dalayon nga paghidaet sa bug-os nga kadutaan.

3 Huo, kag ang katawhan nagtinguha sa pagsunod sang mga kasugoan sang Ginuo; kag nangin istrikto sila sa pagtuman sang mga ordinansa sang Dios, suno sa layi ni Moises; kay gintudloan sila sa pagsunod sang layi ni Moises tubtob nga matuman ini.

4 Kag gani ang katawhan wala sing kinagamo sa bug-os nga ika-disesais nga tuig sang pagginahum sang mga hukom sa katawhan ni Nefi.

5 Kag natabo ini nga sa pagsugod sang ika-disesiyete nga tuig sang pagginahum sang mga hukom, may dalayon nga paghidaet.

6 Apang natabo ini, sa hingapusan nga bahin sang ika-disesiyete nga tuig, may isa ka lalaki nga nag-abot sa duta sang Zarahemla, kag Anti-Cristo sia, kay nagsugod sia sa pagwali sa katawhan batok sa mga propesiya nga ginpanghambal sang mga propeta, parte sa pagkari ni Cristo.

7 Karon wala sing layi batok sa pagpati sing isa ka tawo; kay lubos nga supak sa mga kasugoan sang Dios nga mangin may isa ka layi nga magabutang sang mga tawo sa di-patas nga mga tilindugan.

8 Kay amo ini ang ginasiling sang balaan nga kasulatan: Pili kamo sa sini nga adlaw, kon sin-o ang inyo alagaran.

9 Karon kon ang isa ka tawo maluyag mag-alagad sa Dios, iya ini pribilihiyo; ukon sa mas maathag, kon nagapati sia sa Dios iya ini pribilihiyo nga mag-alagad sa iya; apang kon wala sia nagapati sa iya wala sing layi nga silotan sia.

10 Apang kon magpatay sia silotan sia sang kamatayon; kag kon manguha sia sang indi iya silotan man sia; kag kon mangawat sia silotan man sia; kag kon magpanglahi sia silotan man sia; huo, para sa tanan sining kalainan ginasilotan sila.

11 Kay may isa ka layi nga ang mga tawo pagahukman suno sa ila mga krimen. Apang, wala sing layi batok sa pagpati sing isa ka tawo; gani, ang isa ka tawo ginasilotan lamang sa mga krimen nga iya nahimo; gani ang tanan nga tawo yara sa patas nga mga tilindugan.

12 Kag ining Anti-Cristo, nga ang ngalan amo si Korihor, (kag ang layi indi makalagas sa iya) nagsugod sa pagwali sa katawhan nga mangin wala sang Cristo. Kag sa sini nga paagi sia nagwali nga nagasiling:

13 O kamo nga nagapos sa idalom sing isa ka binuang kag isa ka wala’y pulos nga paglaum, ngaa ginagotahan ninyo ang inyo mga kaugalingon sang amo kabinuang nga mga butang? Ngaa nagapaabot kamo sa isa ka Cristo? Kay wala sing tawo nga mahimo nga makahibalo sing bisan ano nga magaabot.

14 Tan-awa, ining mga butang nga inyo ginatawag nga mga propesiya, nga inyo ginasiling nga ginpasa-pasa sang balaan nga mga propeta, tan-awa, ang mga ini binuang nga mga tradisyon sang inyo mga amay.

15 Paano ninyo nahibal-an ang kapat-uran sang mga ini? Tan-awa, indi mahimo nga mahibal-an ninyo ang mga butang nga indi ninyo makita; gani indi mahimo nga mahibal-an ninyo nga mangin may Cristo.

16 Nagapaabot kamo kag nagasiling nga makita ninyo ang kapatawaran sang inyo mga sala. Apang tan-awa, amo ini ang epekto sing isa ka nagabuang nga kaisipan; kag ining pagkagumon sang inyo mga kaisipan natabo tungod sa mga tradisyon sang inyo mga amay, nga nagapatalang sa inyo padulong sa pagpati sang mga butang nga indi matuod.

17 Kag madamo pa sang amo sina nga mga butang ang iya ginhambal sa ila, nga nagasiling sa ila nga indi mahimo nga may pagbayad-sala nga himuon para sa mga sala sang mga tawo, kundi nga ang madangatan sang tagsa ka tawo sa sini nga kabuhi suno sa pagdumala sang tinuga; gani ang tagsa ka tawo nagauswag suno sa iya duna nga kaalam, kag ang tagsa ka tawo nagamadinalag-on suno sa iya kusog; kag kon ano man ang himuon sang tawo indi krimen.

18 Kag gani nagwali sia sa ila, nga ginapatalang ang mga tagipusuon sang madamo, nga nagtulod sa ila nga magpabugal sa ila mga kalainan, huo, ginapatalang ang madamo nga babayi, kag mga lalaki man, tuhoy sa paghimo sang mga pagkamakihilawason—nga nagasiling sa ila nga kon patay na ang isa ka tawo, amo na ina ang katapusan niya.

19 Karon ini nga tawo nagkadto man sa duta sang Jerson, agud magwali sining mga butang sa katawhan ni Amon, nga sadto nangin katawhan sang mga Lamanhon.

20 Apang tan-awa mas maalam sila sangsa madamo sang mga Nefinhon; kay gindakop nila sia, kag gingapos sia, kag gindala sia sa atubang ni Amon nga amo ang mataas nga pari sa sina nga katawhan.

21 Kag natabo ini nga nagsugo sia nga dapat sia dal-on pagwa sa duta. Kag nagkadto sia sa duta sang Gideon, kag nagsugod sa pagwali man sa ila; kag diri indi sia nangin tuman kamadinalag-on, kay gindakop sia kag gingapos kag gindala sa atubang sang mataas nga pari, kag sa puno nga hukom man sang duta.

22 Kag natabo ini nga ang mataas nga pari nagsiling sa iya: Ngaa nagalibot ka sa pagpatiko sang mga dalanon sang Ginuo? Ngaa ginatudloan mo ining katawhan nga mangin wala sang Cristo, agud tublagon ang ila pagkinasadya? Ngaa nagahambal ka batok sa tanan nga propesiya sang balaan nga mga propeta?

23 Karon ang ngalan sang mataas nga pari amo si Gidonas. Kag si Korihor nagsiling sa iya: Bangod wala ako nagapanudlo sang binuang nga mga tradisyon sang inyo mga amay, kag bangod wala ako nagapanudlo sa sining katawhan nga gapuson ang ila mga kaugalingon sa idalom sang binuang nga mga ordinansa kag mga hilikuton nga ginpahamtang sang dumaan nga mga pari, agud mag-agaw sang gahum kag awtoridad sa ila, agud magapabilin sila sa pagkaignorante, agud indi sila makapabugal, kundi nga mabutong paidalom suno sa imo mga pulong.

24 Ginasiling ninyo nga ining katawhan isa ka hilway nga katawhan. Tan-awa, ginasiling ko nga yara sila sa pagkaulipon. Ginasiling ninyo nga yadtong dumaan nga mga propesiya matuod. Tan-awa, ginasiling ko nga wala kamo nakahibalo nga matuod ang mga ini.

25 Ginasiling ninyo nga ining katawhan may sala kag nalaglag nga katawhan tungod sang kalapasan sing isa ka ginikanan. Tan-awa, ginasiling ko nga ang isa ka bata wala’y sala tungod sang iya mga ginikanan.

26 Kag ginasiling man ninyo nga magakari si Cristo. Apang tan-awa, ginasiling ko nga wala kamo nakahibalo nga mangin may Cristo. Kag ginasiling man ninyo nga pagapatyon sia tungod sang mga sala sang kalibutan—

27 Kag gani ginapatalang ninyo ining katawhan suno sa binuang nga mga tradisyon sang inyo mga amay, kag suno sa inyo kaugalingon nga mga luyag; kag padayon ninyo sila nga ginapaidalom, bisan pareho nga daw yara sila sa pagkaulipon, agud makapaayaw kamo sang inyo mga kaugalingon sa mga pinangabudlayan sang ila mga kamot, agud nga indi sila magtangla nga may kaisog, kag agud nga indi nila pag-agomon ang ila mga kinamatarong kag mga pribilihiyo.

28 Huo, wala sila nagapangisog sa paggamit sinang mga ila mismo kay basi masaklaw nila ang ila mga pari, nga nagagota sa ila suno sa ila mga luyag, kag nagdala sa ila sa pagpati, paagi sa ila mga tradisyon kag sa ila mga dalamguhanon kag sa ila mga luyag kag sa ila mga panan-awon kag sa ila mga ginpakunokuno nga mga misteryo, nga masaklaw nila, kon indi sila maghimo suno sa ila mga pulong, ang wala makilal-i nga persona, nga ila ginasiling nga amo ang Dios—isa ka persona nga wala pa gid makita ukon makilal-i, nga wala gid halin pa sadto ukon man sa palaabuton.

29 Karon sang makita sang mataas nga pari kag sang puno nga hukom ang katig-a sang iya tagipusuon, huo, sang makita nila nga magapasipala sia bisan pa gani batok sa Dios, indi sila maghatag sing bisan ano nga sabat sa iya mga pulong; kundi nagsugo sila nga gapuson sia; kag gintugyan nila sia sa mga kamot sang mga opisyales, kag ginpadala sia sa duta sang Zarahemla, agud madala sia sa atubang ni Alma, kag sang puno nga hukom nga amo ang gobernador sa bug-os nga kadutaan.

30 Kag natabo ini nga sang nadala sia sa atubang ni Alma kag sang puno nga hukom, nagpadayon sia sa amo man nga paagi pareho sang iya ginhimo sa duta sang Gideon; huo, nagpadayon sia sa pagpasipala.

31 Kag naghambal sia sa mabaskog kag matinaas-taason nga mga pulong sa atubang ni Alma, kag nagpasipala batok sa mga pari kag mga manunudlo, nga ginaakusar sila sang pagpatalang sa katawhan suno sa binuang nga mga tradisyon sang ila mga amay, agud magpaayaw sa mga pinangabudlayan sang katawhan.

32 Karon si Alma nagsiling sa iya: Nakahibalo ka gid nga wala kami nagapaayaw sang amon mga kaugalingon sa mga pinangabudlayan sining katawhan; kay tan-awa nagpangabudlay ako bisan halin sa pagsugod sang pagginahum sang mga hukom tubtob karon, paagi sa akon kaugalingon nga mga kamot para sa akon palangabuhian, sa pihak sang akon madamo nga pagpanglakaton sa palibot sang kadutaan agud ipahayag ang pulong sang Dios sa akon katawhan.

33 Kag sa pihak sang madamo nga pagpangabudlay nga akon ginhikot sa simbahan, wala gid ako nakabaton sing bisan isa ka senine para sa akon pagpangabudlay; kag wala man ang bisan sin-o sang akon mga kauturan, luwas lang nga ini sa hukom-lingkuranan; kag dayon nagbaton lamang kami sing suno sa layi para sa amon tion.

34 Kag karon, kon wala kami nagabaton sing bisan ano para sa amon mga pagpangabudlay sa simbahan, ano ang kapuslanan sa amon sa pagpangabudlay sa simbahan luwas lang nga ini amo ang pagpahayag sang kamatuoran, agud nga magkasadya kami sa kalipay sang amon mga kauturan?

35 Gani ngaa ginasiling mo nga nagawali kami sa sining katawhan agud makakwarta, samtang nga ikaw, sa imo kaugalingon, nakahibalo gid nga wala kami nagabaton sang bayad? Kag karon, nagapati ka bala nga ginapatalang namon ining katawhan, nga nagatuga sang amo sina nga kalipay sa ila mga tagipusuon?

36 Kag ginsabat sia ni Korihor, Huo.

37 Kag dayon si Alma nagsiling sa iya: Nagapati ka bala nga may Dios?

38 Kag nagsabat sia, Wala.

39 Karon si Alma nagsiling sa iya: Ipanghiwala mo bala liwat nga may Dios, kag ipanghiwala man ang Cristo? Kay tan-awa, ginasiling ko sa imo, nakahibalo ako nga may Dios, kag amo man nga si Cristo magakari.

40 Kag karon ano ang ebidensya mo nga wala sang Dios, ukon nga si Cristo indi magkari? Ginasiling ko sa imo nga wala, luwas lamang sa imo pulong.

41 Apang, tan-awa, sa akon, ang tanan nga butang testimonya nga ining mga butang matuod; kag sa imo man, ang tanan nga butang testimonya sa imo nga matuod ang mga ini; kag imo bala ipanghiwala ang mga ini? Nagapati ka bala nga ining mga butang matuod?

42 Tan-awa, nakahibalo ako nga nagapati ka, apang ginsudlan ka sing isa ka nagabinutig nga espiritu, kag ginsikway mo ang Espiritu sang Dios sa bagay nga wala na ini sang lugar sa imo; kundi nga ang yawa ang may gahum sa imo, kag ginakaptan ka niya, nga nagahikot sang mga padihot agud nga malaglag niya ang mga anak sang Dios.

43 Kag karon si Korihor nagsiling kay Alma: Kon pakitaan mo ako sing isa ka tanda, agud nga mahimo ako nga makumbinsi nga may Dios, huo, ipakita sa akon nga may gahum sia, kag dayon makumbinsi ako sang kamatuoran sang imo mga pulong.

44 Apang si Alma nagsiling sa iya: Tuman na ang nabaton mo nga mga tanda; sulayon mo bala ang imo Dios? Magasiling ka bala, Ipakita sa akon ang isa ka tanda, samtang yara sa imo ang testimonya sang tanan sining imo mga kauturan, kag amo man sang tanan nga balaan nga propeta? Ang balaan nga mga kasulatan nahumlad sa imo atubang, huo, ang tanan nga butang nagapakita nga may Dios; huo, bisan ang duta, kag ang tanan nga butang nga yara sa ibabaw sini, huo, ang iya pagtiyog, huo, kag ang tanan man nga planeta nga nagatiyog sa ila kinaandan nga alagyan nagasaksi nga may isa ka Labing Gamhanan nga Tagtuga.

45 Bisan pa nagalibot ka, nga ginapatalang ang mga tagipusuon sining katawhan, nga nagasaksi sa ila nga wala sang Dios? Bisan pa magapanghiwala ka bala batok sa tanan sining mga saksi? Kag nagsiling sia: Huo, magapanghiwala ako, luwas lang nga pakitaan mo ako sing isa ka tanda.

46 Kag karon natabo ini nga si Alma nagsiling sa iya: Tan-awa, nagakasubo ako tungod sang katig-a sang imo tagipusuon, huo, nga pamatokan mo gihapon ang espiritu sang kamatuoran, agud nga ang imo kalag malaglag.

47 Apang tan-awa, mas maayo pa nga ang imo kalag ang madula sangsa ikaw ang mangin paagi sa pagdala sang madamo nga kalag sa kalaglagan, paagi sa imo pagbinutig kag paagi sa imo nagapanginto nga mga pulong; gani kon magpanghiwala ka liwat, tan-awa pagasakiton ka sang Dios, nga mangin apa ka, nga indi mo na gid liwat matikab pa ang imo baba, agud nga indi mo na mapatalang pa ining katawhan.

48 Karon si Korihor nagsiling sa iya: Wala ako nagapanghiwala nga may Dios, kundi nga wala ako nagapati nga may Dios; kag ginasiling ko man, nga wala kamo nakahibalo nga may Dios; kag luwas lang nga pakitaan ninyo ako sing isa ka tanda, indi ako magpati.

49 Karon si Alma nagsiling sa iya: Ini ang ihatag ko sa imo bilang isa ka tanda, nga magaapa ka, suno sa akon mga pulong; kag ginasiling ko, nga sa ngalan sang Dios, magaapa ka, nga indi ka na makahambal pa.

50 Karon sang nasiling ni Alma ining mga pulong, nag-apa si Korihor, sa bagay nga indi na sia makahambal, suno sa mga pulong ni Alma.

51 Kag karon sang nakita ini sang puno nga hukom, gin-untay niya ang iya kamot kag nagsulat kay Korihor nga nagasiling: Nagapati ka na bala sa gahum sang Dios? Sa kay sin-o mo luyag nga ipakita ni Alma ang iya tanda? Luyag mo bala nga sakiton niya ang iban agud pakitaan ka sing isa ka tanda? Tan-awa, nagpakita na sia sa imo sing isa ka tanda; kag karon mabais ka pa bala?

52 Kag gin-untay ni Korihor ang iya kamot kag nagsulat nga nagasiling: Nahibal-an ko nga nag-apa ako, kay indi ako makahambal; kag nahibal-an ko nga wala sing bisan ano luwas sa gahum sang Dios ang makahimo sini sa akon; huo, kag dalayon ko gid nga nahibal-an nga may Dios.

53 Apang tan-awa, ginpatalang ako sang yawa; kag nagpakita sia sa akon sa dagway sing isa ka anghel, kag nagsiling sa akon: Bawia liwat ining katawhan, kay sila tanan nagtalalang sa pagsunod sa isa ka wala makilal-i nga Dios. Kag nagsiling sia sa akon: Wala sang Dios; huo, gintudloan niya ako sang dapat ko ihambal. Kag ginpanudlo ko ang iya mga pulong; kag ginpanudlo ko ang mga ini tungod makapalipay ang mga ini sa dutan-on nga kaisipan; kag ginpanudlo ko ang mga ini, bisan tubtob nga nakaangkon ako sing dako nga kadalag-an, sa bagay nga nagpati gid ako nga matuod ang mga ini; kag sa sini nga kabangdanan ginpamatokan ko ang kamatuoran, bisan tubtob nga napatupa ko ining dako nga sumpa sa akon.

54 Karon sang nasiling niya ini, nagpakitluoy sia nga si Alma magpangamuyo sa Dios agud makakas ang sumpa halin sa iya.

55 Apang si Alma nagsiling sa iya: Kon ining sumpa kakason halin sa imo dal-on mo liwat palayo ang mga tagipusuon sining katawhan; gani, mangin sa imo bisan pa ang suno sa kabubut-on sang Ginuo.

56 Kag natabo ini nga ang sumpa wala ginkakas kay Korihor; kundi nga gintabog sia, kag nagpamalaybalay sia nga nagapangayo-kayo para sa iya pagkaon.

57 Karon ang ihibalo sa kon ano ang natabo kay Korihor gilayon nga ginbantala sa bug-os nga kadutaan; huo, ang pabantala ginpadala sang puno nga hukom sa tanan nga katawhan sa kadutaan, nga nagapahayag sa sinang mga nagpati sa mga pulong ni Korihor nga kinahanglan gid nga maghinulsol sila sing gilayon, kay basi ang amo man nga mga paghukom matabo sa ila.

58 Kag natabo ini nga tanan sila nakumbinsi sang kalainan ni Korihor; gani tanan sila nahaylo liwat sa Ginuo; kag ini ang nagtapos sa kalainan suno sa paagi ni Korihor. Kag si Korihor nagpamalaybalay nga nagapangayo-kayo sang pagkaon para mabuhi.

59 Kag natabo ini nga samtang nagapakigsimpon sia sa katawhan, huo, sa katawhan nga nagpain sang ila mga kaugalingon sa mga Nefinhon kag nagtawag sang ila mga kaugalingon nga mga Zoramnon; nga ginapangunahan sing isa ka lalaki nga ang ngalan amo si Zoram—kag samtang nagapakigsimpon sia sa ila, tan-awa, gintapakan sia kag gintasak, bisan tubtob nga napatay sia.

60 Kag gani makita naton ang katapusan niya nga nagpatiko sang mga dalanon sang Ginuo; kag gani makita naton nga ang yawa indi magsakdag sang iya mga anak sa katapusan nga adlaw, kundi nga ginabutong sila sing madasig paidalom sa impiyerno.