1 Karon natabo ini nga pagkatapos sang kamatayon ni Korihor, si Alma nga nakabaton sang balita nga ang mga Zoramnon nagapatiko sang mga dalanon sang Ginuo, kag nga si Zoram, nga amo ang ila lider, nagakumbinsi sang mga tagipusuon sang katawhan nga magluhod sa apa nga mga dios-dios, nagkasubo liwat ang iya tagipusuon tungod sang kalainan sang katawhan.

2 Kay nangin kabangdanan ini sang dako nga kasubo kay Alma nga mahibal-an ang kalainan sang iya katawhan; gani ang iya tagipusuon tuman nga nangin masinulub-on tungod sang pagpain sang mga Zoramnon sa mga Nefinhon.

3 Karon ang mga Zoramnon nagtililipon sang ila mga kaugalingon sa isa ka duta nga gintawag nila nga Antionum, nga yara sa este sang duta sang Zarahemla, nga nahamtang halos sa dulonan sang baybayon, nga yara sa sur sang duta sang Jerson, nga yara man sa dulonan sang kamingawan sa sur, nga ang amo nga kamingawan napuno sang mga Lamanhon.

4 Karon dako ang kahadlok sang mga Nefinhon nga ang mga Zoramnon magsulod sa isa ka pagpakig-angot sa mga Lamanhon, kag mangin paagi ini sang dako nga kapierdihan sa bahin sang mga Nefinhon.

5 Kag karon, tungod ang pagwali sang pulong may dako nga huyog sa pagtuytuy sa katawhan sa paghimo sang matarong—huo, may mas gamhanan ini nga epekto sa mga kaisipan sang katawhan sangsa espada, ukon bisan ano pa man, nga natabo sa ila—gani nakahunahuna si Alma nga nagakaigo nga tilawan nila ang epektibo nga gahum sang pulong sang Dios.

6 Gani gindala niya sanday Amon, kag Aaron, kag Omner, kag si Himni ginbilin niya sa simbahan sa Zarahemla; apang ang nauna nga tatlo gindala niya upod sa iya, kag amo man sanday Amulek kag Zisrom, nga yara sa Melek; kag gindala man niya ang duha sang iya mga anak nga lalaki.

7 Karon ang kamagulangan sang iya mga anak nga lalaki wala niya pagdal-a upod sa iya, kag ang iya ngalan amo si Helaman; apang ang mga ngalan sinang iya gindala upod sa iya amo sanday Siblon kag Corianton; kag amo ini ang mga ngalan sinang mga nag-ulopod sa iya sa mga Zoramnon, agud iwali sa ila ang pulong.

8 Karon ang mga Zoramnon nagsilipak sa mga Nefinhon; gani nawali na sa ila ang mga pulong sang Dios.

9 Apang nahulog sila sa dalagko nga mga kasaypanan kay indi sila magtinguha sa pagtuman sang mga kasugoan sang Dios, kag sang iya mga pagsulundan, suno sa layi ni Moises.

10 Kag indi man sila maghimo sang mga hilikuton sang simbahan, nga amo ang pagpadayon sa pangamuyo kag pag-ampo sa Dios adlaw-adlaw, agud indi sila magsulod sa tentasyon.

11 Huo, sa malip-ot nga pulong, ginpatiko nila ang mga dalanon sang Ginuo sa madamo kaayo nga beses; gani, sa sini nga kabangdanan, si Alma kag ang iya mga kauturan nagkadto sa duta agud iwali ang pulong sa ila.

12 Karon, sang nakasulod na sila sa duta, tan-awa, sa ila kakibot nakita nila nga ang mga Zoramnon nagpatindog sang mga sinagoga, kag nagatipon sila sang ila mga kaugalingon sa isa ka adlaw sang semana, nga ang amo nga adlaw ila ginatawag nga adlaw sang Ginuo; kag nagasimba sila suno sa paagi nga wala pa gid nakita ni Alma kag sang iya mga kauturan;

13 Kay may isa sila ka lugar nga ginpatindog sa sentro sang ila sinagoga, isa ka lugar para sa pagtindog, nga mataas pa sa ulohan; kag isa lang ka tawo ang makasulod sa ibabaw sini.

14 Gani, kon sin-o man ang maluyag nga magsimba kinahanglan gid nga magkadto didto kag magtindog sa ibabaw sini, kag mag-untay sang iya mga kamot sa langit, kag magsinggit sa isa ka mabaskog nga tingug nga nagasiling:

15 Balaan, balaan nga Dios; nagapati kami nga ikaw ang Dios, kag nagapati kami nga ikaw balaan, kag isa ikaw sadto ka espiritu, kag isa ikaw karon ka espiritu, kag ikaw mangin isa ka espiritu sa wala’y katapusan.

16 Balaan nga Dios, nagapati kami nga ginpain mo kami sa amon mga kauturan; kag wala kami nagapati sa tradisyon sang amon mga kauturan, nga ginpasa-pasa sa ila tungod sang pagkabinata-bata sang ila mga amay; kundi nagapati kami nga pinili mo kami nga mangin imo balaan nga mga anak; kag amo man imo ginpahibalo sa amon nga mangin wala sang Cristo.

17 Kundi nga ikaw amo man gihapon kahapon, subong, kag tubtob sa wala’y katapusan; kag pinili mo kami nga kami maluwas, samtang ang tanan sa amon palibot pinili nga idap-ong paagi sa imo kaakig paidalom sa impiyerno; tungod sa amo nga pagkabalaan, O Dios, nagapasalamat kami sa imo; kag nagapasalamat man kami sa imo nga pinili mo kami, nga indi kami mapatalang suno sa binuang nga mga tradisyon sang amon mga kauturan, nga nagagapos sa ila sa pagpati kay Cristo, nga nagapatalang sa ila mga tagipusuon nga magpalayo sa imo, nga amon Dios.

18 Kag sa liwat nagapasalamat kami sa imo, O Dios, nga kami pinili kag balaan nga katawhan. Amen.

19 Karon natabo ini nga pagkatapos nga mabatian ni Alma kag sang iya mga kauturan kag sang iya mga anak nga lalaki ining mga pangamuyo, tuman gid ang ila kakibot.

20 Kay tan-awa, ang tagsa ka tawo nagkadto kag naghalad sining amo man nga mga pangamuyo.

21 Karon ang lugar ginatawag nila nga Rameumptom, nga, kon sayuron, ang balaan nga tilindugan.

22 Karon, halin sa sini nga tilindugan nagahalad sila, ang tagsa ka tawo, sang amo man nga pangamuyo sa Dios, nga nagapasalamat sa ila Dios nga sila mga pinili niya, kag nga wala niya sila ginpatalang suno sa tradisyon sang ila mga kauturan, kag nga ang ila mga tagipusuon wala nabihag nga magpati sa mga butang nga magaabot, nga sa diin wala sila sing may nahibal-an.

23 Karon, pagkatapos nga makahalad ang tanan nga katawhan sang pagpasalamat suno sa sini nga paagi, nagbalik sila sa ila mga puluy-an, nga wala na gid nagahambal pa liwat parte sa ila Dios tubtob nga magtililipon naman sila liwat sang ila mga kaugalingon sa balaan nga tilindugan, agud maghalad sang mga pagpasalamat suno sa ila paagi.

24 Karon sang nakita ini ni Alma ang iya tagipusuon nagkasubo; kay nakita niya nga sila malain kag batinggilan nga katawhan; huo, nakita niya nga ang ila mga tagipusuon nahamtang sa bulawan, kag sa pilak, kag sa tanan nga sari sang matahum nga mga pagkabutang.

25 Huo, kag nakita man niya nga ang ila mga tagipusuon naalsa tubtob sa tuman nga pagpadayawdayaw, sa ila bugal.

26 Kag nag-alsa sia sang iya tingug pa-langit, kag nagsinggit, nga nagasiling: O, ano pa kadugay, O Ginuo, nga tugotan mo nga ang imo mga alagad magpuyo diri sa idalom sa unod, agud magtan-aw sang amo sini kalala nga kalainan sa mga anak sang katawhan?

27 Tan-awa, O Dios, nagapakitluoy sila sa imo, apang ang ila mga tagipusuon nadaug sang ila bugal. Tan-awa, O Dios, nagapakitluoy sila sa imo sa ila mga baba, samtang nagahambog sila, bisan tubtob nga pamatyag nila nga halangdon sila, sa wala’y pulos nga mga butang sang kalibutan.

28 Tan-awa, O Dios ko, ang ila malahalon nga mga panapton, kag ang ila mga singsing, kag ang ila mga pulseras, kag ang ila mga ornamento nga bulawan, kag ang tanan nila nga malahalon nga mga butang nga nagaadorno sa ila; kag tan-awa, ang ila mga tagipusuon nahamtang sa mga ini, apang nagapakitluoy sila sa imo kag nagasiling—Nagapasalamat kami sa imo, O Dios, kay pinili kami nga katawhan sa imo, samtang ang iban madula.

29 Huo, kag nagasiling sila nga ginpahibalo mo sa ila nga mangin wala sang Cristo.

30 O Ginuong Dios, ano kadugay nga tugotan mo nga ang amo sina nga kalainan kag pagkawala’y pagtuo mangin sa sining katawhan? O Ginuo, mahimo bala nga imo ako hatagan sing kusog agud mabatas ko ang akon mga kahuyangan. Kay mahuyang ako, kag ang amo sina nga kalainan sa tunga sining katawhan nagasakit sang akon kalag.

31 O Ginuo, ang akon tagipusuon tuman kamasinulub-on; mahimo bala nga paumpawan mo ang akon kalag kay Cristo. O Ginuo, mahimo bala nga itugot mo sa akon nga makaangkon ako sing kusog, agud mabatas ko sing may pagpaumod ining mga pag-antos nga maagyan ko, tungod sang kalainan sining katawhan.

32 O Ginuo, mahimo bala nga paumpawan mo ang akon kalag, kag ihatag sa akon ang kadalag-an, kag amo man sa akon kapareho nga mga manugpangabudlay nga yari upod sa akon—huo, sanday Amon, kag Aaron, kag Omner, kag amo man sanday Amulek kag Zisrom, kag amo man ang akon duha ka anak nga lalaki—huo, bisan sila tanan mahimo bala nga paumpawan mo, O Ginuo. Huo, mahimo bala nga paumpawan mo ang ila mga kalag kay Cristo.

33 Mahimo bala nga itugot mo sa ila nga makaangkon sila sing kusog, agud mabatas nila ang ila mga pag-antos nga maagyan nila tungod sang mga kalainan sining katawhan.

34 O Ginuo, mahimo bala nga itugot mo sa amon nga makaangkon kami sing kadalag-an sa pagdala sa ila liwat sa imo kay Cristo.

35 Tan-awa, O Ginuo, malahalon ang ila mga kalag, kag madamo sa ila ang amon mga kauturan; gani, hatagi kami, O Ginuo, sang gahum kag kaalam agud nga madala namon ang mga ini, ang amon mga kauturan, liwat sa imo.

36 Karon natabo ini nga sang nasiling ni Alma ining mga pulong, nga gintakdong niya ang iya mga kamot sa ila tanan nga kaupod niya. Kag tan-awa, samtang ginatakdong niya ang iya mga kamot sa ila, napuno sila sang Balaan nga Espiritu.

37 Kag pagkatapos sina nagbinulagay sila sa isa kag isa, nga wala nagahunahuna para sa ila mga kaugalingon kon ano ang ila kaunon, ukon ano ang ila imnon, ukon ano ang ila sul-obon.

38 Kag ang Ginuo nagpanigana para sa ila nga indi sila paggutmon, kag indi man sila pag-uhawon; huo, kag ginhatagan man niya sila sing kusog, agud indi sila magbatas sang ano man nga sari sang mga pag-antos, luwas lang nga madaug sa kalipay kay Cristo. Karon ini nangin suno sa pangamuyo ni Alma; kag ini tungod nagpangamuyo sia sa pagtuo.