1 Karon natabo ini nga sang natapos hambal ni Amulek ining mga pulong, nagbiya sila halin sa kadam-an kag nagkadto sa duta sang Jerson.

2 Huo, kag ang iban pa nga mga kauturan, pagkatapos nila wali sang pulong sa mga Zoramnon, nagkadto man sa duta sang Jerson.

3 Kag natabo ini nga pagkatapos nga naghinambalanay ang mas kinilala nga bahin sang mga Zoramnon parte sa mga pulong nga ginwali sa ila, naakig sila tungod sang pulong, kay ginguba sini ang ila katusohan; gani indi sila mamati sa mga pulong.

4 Kag nagpasugo sila kag gintipon ang tanan nga katawhan sa bug-os nga kadutaan, kag ginhambalan upod sa ila ang parte sa mga pulong nga ginpanghambal.

5 Karon ang ila mga tagdumala kag ang ila mga pari kag ang ila mga manunudlo wala nagpahibalo sa katawhan parte sa ila mga tuyo; gani nahibal-an nila sing sekreto ang mga kaisipan sang tanan nga katawhan.

6 Kag natabo ini nga pagkatapos nga nahibal-an nila ang mga kaisipan sang tanan nga katawhan, yadtong mga nagaugyon sa mga pulong nga ginpanghambal ni Alma kag sang iya mga kauturan ginpanabog halin sa duta; kag madamo sila; kag nagkadto man sila sa duta sang Jerson.

7 Kag natabo ini nga gintudloan sila nanday Alma kag sang iya mga kauturan.

8 Karon ang katawhan sang mga Zoramnon naakig sa katawhan ni Amon nga yara sa Jerson, kag ang puno nga tagdumala sang mga Zoramnon, nga isa ka malain kaayo nga tawo, nagpasugo sa katawhan ni Amon nga ginapangabay sila nga tabugon nila halin sa ila duta ang tanan nga nagkadto halin sa ila padulong sa ila duta.

9 Kag nagpabutyag sia sang madamo nga pamahog batok sa ila. Kag karon ang katawhan ni Amon wala nahadlok sa ila mga pulong; gani wala nila sila pagpanabuga, kundi nga ginbaton nila ang tanan nga imol sang mga Zoramnon nga nagkadto sa ila; kag gintatap nila sila, kag ginpabistehan sila, kag ginhatagan sila sang mga duta bilang ila mga palanublion; kag ginbuligan sila suno sa ila mga kakulangan.

10 Karon ginpukaw sini ang mga Zoramnon sa kaakig batok sa katawhan ni Amon, kag nagsugod sila sa pagpakigsimpon sa mga Lamanhon kag sa pagpukaw man sa ila sa kaakig batok sa ila.

11 Kag gani ang mga Zoramnon kag ang mga Lamanhon nagsugod sa paghimo sang mga pagpanghanda para sa giyera batok sa katawhan ni Amon, kag batok man sa mga Nefinhon.

12 Kag gani natapos ang ika-disesiyete nga tuig sang pagginahum sang mga hukom sa katawhan ni Nefi.

13 Kag ang katawhan ni Amon naghalin sa duta sang Jerson, kag nagkadto sa duta sang Melek, kag ginhatagan sing lugar sa duta sang Jerson ang mga kasoldadohan sang mga Nefinhon, agud makapakig-away sila batok sa mga kasoldadohan sang mga Lamanhon kag sa mga kasoldadohan sang mga Zoramnon; kag gani nagsugod ang isa ka giyera sa tunga sang mga Lamanhon kag sang mga Nefinhon, sa ika-disiotso nga tuig sang pagginahum sang mga hukom; kag isa ka panaysayon ang igahatag parte sa ila mga giyera pagkatapos sini.

14 Kag si Alma, kag si Amon, kag ang ila mga kauturan, kag amo man ang duha ka anak nga lalaki ni Alma nagbalik sa duta sang Zarahemla, pagkatapos nga nangin mga instrumento sa mga kamot sang Dios sa pagdala sang madamo nga mga Zoramnon sa paghinulsol; kag ang tanan nga nadala sa paghinulsol ginpanabog pagwa sa ila duta; apang nakaangkon sila sang mga duta bilang ila palanublion sa duta sang Jerson, kag nagkapot sila sang mga armas agud pangapinan ang ila mga kaugalingon, kag ang ila mga asawa, kag mga kabataan, kag ang ila mga duta.

15 Karon si Alma, nga nagkasubo tungod sang kalainan sang iya katawhan, huo tungod sang mga giyera, kag sang mga pagpaagay sang dugo, kag sang mga pagbinaisay nga yara sa ila; kag pagkatapos nga magpahayag sang pulong, ukon ginpadala nga magpahayag sang pulong, sa tanan nga katawhan sa tagsa ka siyudad; kag nakita nga ang mga tagipusuon sang katawhan nagsugod sa pagtig-a, kag nagsugod sila nga masaklaw tungod sang kaistrikto sang pulong, ang iya tagipusuon nangin tuman ka masinulub-on.

16 Gani, nagsugo sia nga ang iya mga anak nga lalaki magtililipon agud mahatagan niya ang kada isa sa ila sang iya laygay, sing tinag-isaisa, parte sa mga butang nga naangot sa pagkamatarong. Kag may panaysayon kami sang iya mga kasugoan nga ginhatag niya sa ila suno sa iya kaugalingon nga kasulatan.