1 Kag karon, anak ko, may pila pa ako ka dugang nga inughambal sa imo sangsa nahambal ko na sa imo utod; kay tan-awa, wala mo bala mapanilagi ang kalig-on sang imo utod, ang iya katampad, kag ang iya katutum sa pagtuman sang mga kasugoan sang Dios? Tan-awa, wala bala sia naghatag sing maayo nga ehemplo sa imo?

2 Kay wala mo paghatagi sing dako nga pagtamod ang akon mga pulong pareho sang ginhimo sang imo utod, sa katawhan sang mga Zoramnon. Karon amo ini ang akon ginahuptan batok sa imo; nagapadayon ka sa paghinambog sa imo kusog kag sa imo kaalam.

3 Kag indi lamang ini, anak ko. Ginhimo mo inang masakit gid para sa akon; kay gintalikdan mo ang pag-alagad, kag nagtabok sa duta sang Siron sa tunga sang mga dulonan sang mga Lamanhon, sa pagsunod sa makihilawason nga si Isabel.

4 Huo, ginbihag niya ang mga tagipusuon sang madamo; apang indi ini igo nga rason para sa imo, anak ko. Dapat nga atipanon mo ang pag-alagad nga gintugyan sa imo.

5 Wala mo bala mahibal-i, anak ko, nga ining mga butang isa ka kangil-aran sa panulok sang Ginuo; huo, labing makangilil-ad sa tanan nga sala luwas sa pagpaagay sang inosente nga dugo ukon pagpanghiwala sang Balaan nga Espiritu?

6 Kay tan-awa, kon ipanghiwala mo ang Balaan nga Espiritu nga sadto nangin may lugar ini sa imo, kag nakahibalo ka nga ginpanghiwala mo ini, tan-awa, isa ini ka sala nga di-mapatawad; huo, kag kon sin-o man ang magpatay batok sa kasanag kag ihibalo sang Dios, indi mahapos para sa iya ang makabaton sang kapatawaran; huo, ginasiling ko sa imo, anak ko, nga indi mahapos para sa iya nga makabaton sang kapatawaran.

7 Kag karon, anak ko, ginapangayo ko sa Dios nga kabay nga indi ka balasulon sang amo kadako nga sala. Indi ako mag-ukat sang imo mga sala, agud tublagon ang imo kalag, kon indi ini para sa imo kaayohan.

8 Apang tan-awa, indi mo matago ang imo mga sala sa Dios; kag luwas lang nga maghinulsol ka magapabilin ang mga ini bilang testimonya batok sa imo sa katapusan nga adlaw.

9 Karon anak ko, luyag ko nga imo hinulsulan kag talikdan ang imo mga sala, kag indi na magsunod sa mga kaibog sang imo mga mata, kundi dumilian ang imo kaugalingon sa tanan sining mga butang; kay luwas lang nga himuon mo ini indi mo gid mapanubli ang ginharian sang Dios. O, dumduma, kag himoa, kag dumilian ang imo kaugalingon sa sining mga butang.

10 Kag ginasugo ko ikaw nga himuon nga magpalaygay sa imo mga magulang sa imo mga buluhaton; kay tan-awa, yara ka pa sa imo pagkapamatan-on, kag nagakinahanglan ka nga tudloan sang imo mga utod. Kag pamatian mo ang ila mga laygay.

11 Indi pagtugoti ang imo kaugalingon nga madala sang bisan ano nga wala’y pulos ukon binuang nga butang; indi pagtugoti ang yawa nga madala liwat ang imo tagipusuon sa pagsunod sinang malain nga mga makihilawason. Tan-awa, O anak ko, daw ano kadako nga kalainan ang imo gindala sa mga Zoramnon; kay sang nakita nila ang imo panggawi indi na sila magpati sa akon mga pulong.

12 Kag karon ang Espiritu sang Ginuo nagasiling sa akon: Sugoa ang imo mga anak nga maghimo sang maayo, kay basi madala nila ang mga tagipusuon sang madamo nga katawhan sa kalaglagan; gani ginasugo ko ikaw, anak ko, sa kahadlok sa Dios, nga untaton mo ang imo mga kalainan;

13 Nga magliso ka sa Ginuo sa bug-os mo nga hunahuna, ikasarang, kag kusog; agud wala ka na sing dugang pa nga tagipusuon nga madala sa paghimo sang malain; kundi nga magbalik sa ila, kag akuon ang imo mga kasaypanan kag inang halit nga imo nahimo.

14 Indi maglagas sang manggad kag sang wala’y pulos nga mga butang sining kalibutan; kay tan-awa, indi mo madala ang mga ini.

15 Kag karon, anak ko, may pila ako ka bagay nga ihambal sa imo parte sa pagkari ni Cristo. Tan-awa, ginasiling ko sa imo, nga amo ini sia ang pat-od gid nga magakari agud magkuha sang mga sala sang kalibutan; huo, magakari sia agud magpahayag sang maayong balita sang kaluwasan sa iya katawhan.

16 Kag karon, anak ko, amo ini ang pag-alagad nga sa diin ikaw gintawag, nga ipahayag ining maayong balita sa sining katawhan, agud ihanda ang ila mga kaisipan; ukon sa mas maathag nga ang kaluwasan mag-abot sa ila, agud mahanda nila ang mga kaisipan sang ila mga anak nga pamatian ang pulong sa tion sang iya pagkari.

17 Kag karon patawhayon ko ang imo hunahuna parte sa sini nga topiko. Tan-awa, matingala ka kon ngaa ining mga butang dapat nga ipahibalo na ngadaan. Tan-awa, ginasiling ko sa imo, indi bala nga ang isa ka kalag sa sini nga tion pareho kamalahalon sa Dios sa isa ka kalag nga mangin yara sa tion sang iya pagkari?

18 Indi bala pareho kakinahanglanon nga ang plano sang pagtubos dapat mapahibalo sa sining katawhan kag amo man sa ila mga anak?

19 Indi bala pareho lang kahapos para sa Ginuo nga magpadala sang iya anghel sa sini nga tion agud ipahayag ining maayong balita sa aton amo man sa aton mga anak, ukon amo man pagkatapos sang tion sang iya pagkari?