1 Joale mora oaka, ke mona hanyenyane ho feta seo ke tlang ho se bolela ho uena; hobane kea lemoha hore kelello ea hau e ts’oenyehile malebana le ho tsoha bafung ha ba shoeleng.

2 Bona, ke re ho uena, hore ha hona tsoho ea bafu—kapa, ke tla re, ka mantsoe a mang, hore ’mele ona o shoang ha o apare bophelo bo sa feleng, sebolu sena ha se apare bophelo—hofihlela kamora ho tla ha Kreste.

3 Bona, o tlisa ho etsahala ho tsoha bafung ha ba shoeleng. Empa bona, mora oaka, ho tsoha bafung ha ho so fihle. Joale, ke u phuthullela sephiri; leha ho le joalo, li ngata liphiri tse bolokiloeng, tseo ho se nang ea li tsebang ntle le Molimo ka bo eena. Empa ke u bonts’a ntho e le ngoe eo ke e batlileng ka mafolofolo ho Molimo hore nke ke e tsebe—hoo ke malebana le tsoho ea bafu.

4 Bona, hona le nako e khethiloeng hore batho bohle ba tla tla ho tsoa ho ba shoeleng. Joale ho tla ha nako ena ha ho mang ea tsebang; empa Molimo o oa e tseba nako e khethiloeng.

5 Joale, hore na e tla ba nako e le ngoe, kapa nako ea bobeli, kapa nako ea boraro, hore batho ba tla tla ho tsoa ho ba shoeleng, ha se taba; hobane Molimo o tseba lintho tsena tsohle; ’me ho lekane ho ’na ho tseba hore ena ke eona taba—hore ho na le nako e khethiloeng ea hore bohle ba tla tsoha bafung.

6 Joale ho ne ho tlameha ho hlokahala hore ho be le sebaka lipakeng tsa nako ea lefu le nako ea ho tsoha bafung.

7 ’Me joale ke lakatsa ho batla hore na ho etsahala joang ka meea ea batho ho tloha nakong e ea lefu ho isa nakong e khethiloeng bakeng sa tsoho ea bafu?

8 Joale hore na ho na le ho feta nako e le ngoe e khethiloeng bakeng sa batho ho tsoha ha se taba; hobane bohle ha ba shoe ka nako e le ngoe, ’me nako e lekantsoe ho batho feela.

9 Ka baka leo, ho na le nako e khethiloeng ho batho hore ba tla tsoha bafung; ’me ho na le sebaka lipakeng tsa nako ea lefu le tsoho ea bafu. ’Me joale, malebana le sebaka sena sa nako, se etsahalang ka meea ea batho ke ntho eo ke e batlileng ka mafolofolo ho Morena ho e tseba; ’me ena ke ntho eo ke e tsebang.

10 ’Me ha nako e tla ha bohle ba tla tsoha, joale ba tla tseba hore Molimo o tseba linako tsohle tse khethetsoeng motho.

11 Joale, malebana le boemo ba moea lipakeng tsa lefu le tsoho ea bafu—bona, e entsoe hore e tsebahale ho ’na ke lengeloi, hore meea ea batho bohle, hang ha e se e falletse ho tloha ’meleng ona o shoang, ee, meea ea batho bohle, hore na e lokile kapa e mebe, e nkeloa hae ho Molimo eane ea ba fileng bophelo.

12 ’Me joale ho tla etsahala, hore meea ea ba lokileng e amoheloa boemong ba thabo, boo bo bitsoang paradeisi, boemo ba phomolo, boemo ba khotso, moo ba tlang ho phomolo ho tsoa mathateng a bona le ho tsoa litabeng tsohle, le mahlomola.

13 ’Me joale ho tla etsahala, hore meea ea ba khopo, ee, ba babe—hobane bona, ha ba na karolo kapa karolo ea moea oa Morena; hobane bona, ba khethile mesebetsi e mebe ho ena le e metle; ka baka leo moea oa diabolose o ile oa kena ka ho bona, ’me oa nka taolo ea ntlo ea bona—’me bana ba tla lahleloa kantle lefifing le kantle; moo ho tla bang liboko le lillo le litsikitlano tsa meno, ’me sena ka lebaka la bokhopo ba bona, ba etelletsoe ho ea litlamong ke thato ea diabolose.

14 Joale bona ke boemo ba meea ea ba khopo, ee, lefififng le boemong ba ho ts’abeha, ts’abo e tletseng ho batla khalefo e tukang ea khalefo ea Molimo holim’a bona; ke joana ba salang boemong bona, joalo le ka ba lokileng paradeising, hofihlela nako ea bona ea ho tsoha bafung.

15 Joale, ho na le ba bang utloisisitseng hore boemo bona ba thabo le boemo bona ba tlokotsi ba moea, pele ho tsoho ea bafu, e ne e le tsoho ea bafu ea pele. Ee, kea lumela hore mohlomong e ka bitsoa tsoho ea bafu, ho tsosoa ha moea kapa moea le phetisetso ea teng thabong kapa tlokotsing, ho latela mantsoe a boletsoeng.

16 ’Me bona, hape ho boletsoe, hore ho na le tsoho ea bafu ea pele, tsoho ea bafu ea bohle bao ba bileng teng, kapa ba teng, kapa ba tla ba teng, ho ea tlase ho ho tsoha bafung ha Kreste ho tsoa ho ba shoeleng.

17 Joale, ha re nahane hore ho tsoha bafung hona ha pele ho boletsoeng ka hona ka mokhoa ona, e ka ba ho tsoha bafung ha meea le phetisetso ea bona ho ea thabong kapa tlokotsing. U keke ua nahana hore sena ke seo e se bolelang.

18 Bona, ke re ho uena, Che; empa ho bolela ho kopana hape ha moea le ’mele, ea bao ba ho tloha matsatsing a Adama ho ea tlase ho ho tsoha bafung ha Kreste.

19 Joale, hore na meea le ’mele ea bao ho boletsoeng ka bona e tla kopana hang, ba khopo joalo le ka ba lokileng, ha ke bolele, etsa hore ho lekane, hore ke re bohle bao ba tsoha; kapa ka mantsoe a mang, ho tsoha ha bona bafung ho tla etsahala pele ho ho tsoha bafung ha bao ba shoang kamor’a ho tsoha bafung ha Kreste.

20 Joale, mora oaka, ha ke bolele hore ho tsoha bafung ha bona ho tla ka nako ea ho tsoha bafung ha Kreste; empa bona, ke u fa sena e le maikutlo a ka, hore meea le ’mele e ea kopana, ea ba lokileng, ka nako ea hotsoha bafung ha Kreste, le nyolohelo ea hae ho ea leholimong.

21 Empa hore na ke ka ho tsoha ha hae bafung kapa kamorao, ha ke bolele; empa ke hakana ke bolelang, hore ho na le sebaka lipakeng tsa lefu le ho tsoha bafung ha ’mele, le boemo ba moea thabong kapa tlokotsing hofihlela nako e khethiloeng ke Molimo hore ba shoeleng ba tla tsoha, ’me ba kopane bobeli moea le ’mele, ’me ba tlisoe ho tla ema ka pele ho Molimo, ’me ba ahloloe ho latela mesebetsi ea bona.

22 Ee, hona ho tlisa tsosoloso ea lintho tseo li boletsoeng ka melomo ea baporofeta.

23 Moea o tla tsosoletsoa ho ’mele, le ’me ho moea; ee, ’me litho tsohle le manonyoletso li tla tsosolosetsoa ho ’mele oa teng; ee, esita le moriri oa hlooho ha ona ho lahleha; empa lintho tsohle li tla tsosolosetsoa sebopehong sa tsona se nepahetseng le ho phetheha.

24 ’Me joale, mora oaka, ena ke eona tsosoloso e boletsoeng ka melomo ea baporofeta—

25 ’Me joale ba lokileng ba tla khanya ’musong oa Molimo.

26 Empa bona, lefu le ts’abehang le tla tla holim’a ba khopo, hobane ba ea shoa ho lintho tse amanang le ho loka, hobane ha ba ea hloeka, ’me ha hona letho le sa hloekang le ka jang lefa ’muso oa Molimo, empa ba lahleloa kantle, ’me ba fetisetsoa ho nka lithoaloana tsa ho sebetsa ha bona kapa mesebetsi ea bona, e bileng mebe; ’me ba noa lits’ifa tsa senoelo se babang.