1 ’Me ho ile ha etsahala qalong ea selemo sa mashome a mararo a metso e ts’eletseng sa puso ea baahloli holim’a sechaba sa Nefi, hore Shiblone o ile a nka taolo ea lintho tseo tse halalelang tse lokoletsoeng ho Helamane ke Alma.

2 ’Me e ne e le monna ea lokileng, ’me o ne a tsamaea ka ho loka ka pele ho Molimo; ’me o ne a ela hloko ho tsoelapele ho etsa botle, ho boloka litaelo tsa Morena Molimo oa hae; ’me hape le ngoanabo.

3 ’Me ho ile ha etsahala hore Moroni o ile a shoa le eena. ’Me ke joana e bileng pheletso ea selemo sa mashome a mararo a metso e ts’eletseng sa puso ea baahloli.

4 ’Me ho ile ha etsahala hore ka selemo sa mashome a mararo a metso e supileng sa puso ea baahloli, ho ne ho na le sehlopha se seholo sa banna, esita le ho isa boleng ba banna ba likete li hlano le makholo a mane, le basali ba bona le bana ba bona, ba fallela ho tsoa lefats’eng la Zarahemla ho ea lefats’eng le neng le le ho ea leboea.

5 ’Me ho ile ha etsahala hore Hagothe, eena e le monna ea bohelehele ka ho fetisisa, ka baka leo o ile a tsamaea ’me a ikhahela sekepe se seholo, meeling ea lefats’e la Nala, pela lefats’e la Mahlomoleng, ’me a se khannela pele ho kena leoatleng la bophirima, ka khoro e sesane e neng e etella ho ea leboea.

6 ’Me bonang ho ne ho ena le Ba-Nefi ba bangata ba ileng ba kena hona mono ’me ba tsamaea ka lijo tse ngata, ’me hape le basali ba bangata le bana; ’me ba ile ba nka tsela ea bona ho ea ’nga ea leboea. ’Me ke joana e bileng pheletso ea selemo sa mashome a mararo a metso e supileng.

7 ’Me ka selemo sa mashome a mararo a metso e robeli, monna enoa o ile a aha likepe tse ling. ’Me le sekepe sa pele se ile sa khutla le sona, ’me batho ba bang ba bangata ba ile ba kena ka ho sona; ’me hape ba ile ba nka lijo tse ngata, ’me ba tsamaea hape ho ea lefats’eng le ’nga ea leboea.

8 ’Me ho ile ha etsahala hore ha ho ka ha hlola ho utloahala letho ka bona. ’Me re nahana hore ba qoetse botebong ba leoatle. ’Me ho ile ha etsahala hore sekepe se seng le sona se ile sa tsamaea; ’me hore na se ile kae ha re tsebe.

9 ’Me ho ile ha etsahala hore ka selemo sena ho ne ho ena le batho ba bangata ba ile ba tsamaea ho ea lefats’eng le ’nga ea leboea. ’Me ke joana e bileng pheletso ea selemo sa mashome a mararo a metso e robeli.

10 ’Me ho ile ha etsahala hore ka selemo sa mashome a mararo a metso e robong sa puso ea baahloli, Shiblone o ile a shoa le eena, ’me Koriantone o ne a tsamaile ho ea lefats’eng le ’nga ea leboea ka sekepe, ho isa lijo ho batho ba ileng lefats’eng leo.

11 Ka baka leo ho bile molemo bakeng sa Shiblone ho fana ka lintho tseo tse halalelang, pele ho lefu la hae, ho mora oa Helamane, ea neng a bitsoa Helamane, a bitsoa ka lebitso la ntat’ae.

12 Joale bonang, lingoliloeng tseo tsohle li ne li le taolong ea Helamane li ne li ngotsoe ’me tsa romelloa har’a bana ba batho hohle lefats’eng leo lohle, ntle le hore likarolo tse neng li laetsoe ho Alma hore li se ke tsa ea pele.

13 Le ha hole joalo, lintho tsena li ne li bolokiloe li halalela, ’me tsa nelehetsanoa ho ea tlase ho tloha molokong o mong ho ea ho o mong; ka baka leo, ka selemo sena li ne li filoe Helamane, pele ho lefu la Shiblone.

14 ’Me ho ile ha etsahala hore hape ka selemo sena ho ne ho ena le baikhaohanyi ba ileng ba ea ho Ba-Lamane; ’me ba ile ba hlohleletsoa ho halefa hape khahlanong le Ba-Nefi.

15 ’Me hape ka sona selemo se ts’oanang ba ile ba tla tlase le lebotho le lengata ho loana khahlanong le sechaba sa Moroniha, kapa khahlanong le lebotho la Moroniha, e leng moo ba ileng ba otloa le ho khanneloa morao mafats’eng a bona, ba sotlehetse tahleho e kholo.

16 ’Me ke joana e bileng pheletso ea selemo sa mashome a mararo a metso e robong sa puso ea baahloli holima sechaba sa Nefi.

17 ’Me ke joana e bileng pheletso ea pale ea Alma, le Helamane mora oa hae, le hape Shiblone, eo e ne le mora oa hae.