1 ’Me joale ho ile ha etsahala hore ha Moroni a se a fumane lengolo lena pelo ea hae e ile ea khothala, ’me o ne a tletse ka nyakallo e kholo ka ho fetisisa ka lebaka la bots’epehi ba Pahorane, hore e ne e se lehlabaphieo ho bolokolohi le lebaka la naha ea habo.

2 Empa hape o ile a lla ka hofetisisa ka lebaka la bokhopo ba bao ba ileng ba khannela Pahorane ho tloha setulong sa kahlolo, ee, ka ho phethela ka lebaka bao ba ileng ba fetoha khahlanong le naha ea bona hape le Molimo oa bona.

3 ’Me ho ile ha etsahala hore Moroni o ile a nka palo e nyane ea banna, ho latela takatso ea Pahorane, ’me a fa Lehi le Teankame taolo holima karolo e setseng ea lebotho la hae, ’me a nka mohoanto oa hae ho leba lefats’eng la Gideone.

4 ’Me o ile a phahamisa folakha ea tokoloho sebakeng se seng le se seng moo a ileng a kena, ’me a fumana lebotho le fe kapa le fe leo a neng a ka le fumana mohoantong oohle oa hae ho leba lefats’eng la Gideone.

5 Me ho ile ha etsahala hore likete li ile tsa phallela lets’oaong la hae, ’me ba ile ba nkela lisabole tsa bona ts’ireletsong ea bolokolohi ba bona, hore ba tle ba se ke ba tla litlamong.

6 ’Me ke joana Moroni a neng a bokelletse hammoho monna ofe kapa ofe ea neng a khona ka mohoanto oa hae ohle, o ile a tla lefats’eng la Gideone; ’me ka ho kopanya lebotho la hae le la Pahorane ba ile ba fetoha matla ka ho fetisisa, esita le matla ho feta banna ba Pachuse, eo e neng e le morena oa baikarohanyi bao ba ileng ba khannela batho ba tokollo kantle ho tsoa lefats’eng la Zarahemla ’me ba ne ba nkile borui ba lefats’e leo.

7 ’Me ho ile ha etsahala hore Moroni le Pahorane ba ile ba theohela le mabotho a bona ho kena lefats’eng la Zarahemla, ’me ba ea pele khahlanong le motse, ’me ba ile ba kopana le banna ba Pachuse, haholo hoo ba ileng ba tla ho tla loana.

8 ’Me bonang, Pachuse o ile a bolaoa ’me banna ba hae ba ile ba nkeloa ho ba bats’oaruoa, ’me Pahorane a tsosolosetsoa setulong sa hae sa kahlolo.

9 ’Me banna ba Pachuse ba ile ba fumana teko ea bona, ho latela molao, hape le batho bao ba morena ba ileng ba nkuoa le ho lahleloa chankaneng; ’me ba ile ba bolaoa ho latela molao; ee, banna bao ba Pachuse le batho bao ba morena, mang kapa mang ea neng a keke a nka lihlomo ts’ireletsong ea naha ea bona, empa a ne a ka loana khahlanong le eona, ba ne ba bolaoa.

10 ’Me ke joana ho bileng molemo hore molao ona o be o eloe hloko ka thata bakeng sa polokeho ea naha ea bona; ee, ’me mang kapa mang ea neng a fumanoa a hanyetsa bolokolohi ba bona o ne a bolaoa kapele ho latela molao.

11 ’Me ke joana ho ileng ha fela selemo sa mashome a mararo sa puso ea baahloli holim’a sechaba sa Nefi; Moroni le Pahorane ba ne ba tsosolositse khotso lefats’eng la Zarahemla, har’a sechaba sa habo bona, ka ho hlabisetsa lefu ho bohle ba neng ba sa ts’epahalle lebaka la bolokolohi.

12 ’Me ho ile ha etsahala hore ka qalo ea selemo sa mashome a mararo a motso o mong a puso ea baahloli holim’a sechaba sa Nefi, Moroni hang hang o ile a etsa hore lijo li romeloe ’me hape le lebotho la banna ba likete li ts’eletseng ba romeloe ho Helamane, ho mo thusa ho boloka karolo eo ea lefats’e.

13 ’Me hape o ile a etsa hore lebotho la banna ba likete li ts’eletseng, ka bongata bo lekaneng ba lijo, le tle le romeloe ho mabotho a Lehi le Teankame. ’Me ho ile ha etsahala hore sena se ile sa etsoa ho matlafatsa lefats’e leo khahlanong le Ba-Lamane.

14 ’Me ho ile ha etsahala hore Moroni le Pahorane, ka ho sia karolo e kholo ea banna lefats’eng la Zarahemla, ba ile ba nka mohoanto oa bona ka karolo e kholo ea banna ho leba lefats’eng la Nefiha, ba ikemiselitse ho ketola Ba-Lamane motseng oo.

15 ’Me ho ile ha etsahala hore ha ba ntse ba hoanta ho leba lefats’eng leo, ba ile ba nka karolo e kholo ea banna ba Ba-Lamane, ’me ba ba bolaea, ’me ba nka lijo tsa bona le libetsa tsa bona tsa ntoa.

16 ’Me ho ile ha etsahala hore kamor’a hore ba ba nke, ba ile ba etsa hore ba kene selekaneng hore ha ba sa tla nka libetsa tsa bona tsa ntoa khahlanong le Ba-Nefi.

17 ’Me ha ba se ba kene selekaneng sena ba ile ba ba romela ho ea lula le sechaba sa Ammone, ’me ka lipalo ba ne ba ka ba likete tse ’ne bao ba neng ba sa bolaoa.

18 ’Me ho ile ha etsahala hore ha ba se ba ba rometse hole ba ile ba pheella mohoanto oa bona ho leba lefats’eng la Nefiha. ’Me ho ile ha etsahala hore ha ba se ba tlile motseng oa Nefiha, ba ile ba hloma litente tsa bona thoteng ea Nefiha, eo e neng e le pela motse oa Nefiha.

19 Joale Moroni o ne a lakatsa hore Ba-Lamane ba tle ka ntle ho tla loana khahlanong le bona, holima thota; Ba-Lamane, ka ho tseba sebete sa bona se seholo ka ho fetisisa, ’me ba bona boholo ba lipalo tsa bona, ka baka leo ba ne ba sa qeke ho tsoela kantle khahlanong le bona; ka baka leo ha ba ka ba tla ho tla loana ka letsatsi leo.

20 ’Me ha bosiu bo tla, Moroni o ile a tsamaela pele lefifing la bosiu, ’me a tla holim’a kaholimo ho lebota ho ea hloela kantle hore na ke karolong e fe ea motse moo ba hlommeng liahelo tsa bona le lebotho la bona.

21 ’Me ho ile ha etsahala hore ba ne ba le ka bophirima, pela monyako; ’me kaofela ba ne ba robetse. ’Me joale Moroni o ile a khutlela ho lebotho la hae, ’me a etsa hore ba tle ba lokise kapele likhoele tse matla le lileri, tse tla leketlisetsoa tlase ho hlaha kaholimo ho lebota ho ea ka karolong e kahare ea lebota.

22 ’Me ho ile ha etsahala hore Moroni o ile a etsa hore banna ba hae ba tle ba hoantele pele ’me ba tle kaholimo ho lebota, ’me ba itheholele tlase ka har’a karolo eo ea motse, ee, esita le ka bochabela, moo Ba-Lamane ba neng ba sa hloma liahelo le mabotho a bona.

23 ’Me ho ile ha etsahala hore kaofela ba ile ba theohela tlase ka har’a motse bosiu, ka mekhoa ea likhoele tsa bona tse matla le li leri tsa bona; ke joana ha hoseng ho tla kaofela ba ne ba le kahar’a mabota a motse.

24 ’Me joale, ha Ba-Lamane ba tsoha ’me ba bona hore mabotho a Moroni a ne a le kahar’e ho mabota, ba ne ba ts’ohile ka ho fetisisa, haholo hoo hore ba ile ba balehela kantle ka khoro.

25 ’Me joale ha Moroni a bona hore ba ne ba baleha ka pele ho eena, o ile a etsa hore banna ba hae ba tle ba hoantele pele khahlanong le bona, ’me ba bolaea ba bangata, le ho potapota ba bang ba bangata, ’me ba banka e le bats’oaruoa; ’me karolo e setseng ea bona e ile ea balehela lefats’eng la Moroni, le neng le le meeling pela lebopo la leoatle.

26 Ke joana Moroni le Pahorane ba ileng ba fumana borui ba motse Nefiha ntle le tahlehelo le moea o le mong; ’me ho ne ho ena le Ba-Lamane ba bangata ba bolailoeng.

27 Joale ho ile ha etsahala hore Ba-Lamane ba bangata bao e neng e le bats’oaruoa ba ne ba lakatsa ho kopana le sechaba sa Ammone ’me ba fetohe sechaba se lokolohileng.

28 ’Me ho ile ha etsahala hore joaloka ba bangata ba neng ba lakatsa joalo, ho bona ho ile ha fanoa ho latela litakatso tsa bona.

29 Ka baka leo, bats’oaruoa bohle ba Ba-Lamane ba ile ba kopana le sechaba sa Ammone, ’me ba qala ho sebetsa ka ho fetisisa, ba lema mobu, ba holisa mekhoa eohle ea lijo thollo, le likhuts’oane le mehlape ea mefuta eohle; ’me ke joana Ba-Nefi ba ileng ba imolloa ho tsoa moroalong o moholo; ee, haholo hoo hore ba ile ba imoloha ho tsoa ho bats’oaruoa bohle ba Ba-Lamane.

30 Joale ho ile ha etsahala hore Moroni, kamor’a hore a fumane borui ba motse oa Nefiha, ka ha a ne a nkile bats’oaruoa ba bangata, hoo ho ileng ha fokotsa mabotho a Ba-Lamane ka ho fetisisa, ’me ka ha ba ne ba fumane hape Ba-Nefi ba bangata ba neng ba nkuoe e le bats’oaruoa, hoo ho ileng ha matlafatsa lebotho la Moroni ka ho fetisisa; ka baka leo Moroni o ile a tsamaea ho tloha lefats’eng la Nefiha ho ea lefats’eng la Lehi.

31 ’Me ho ile ha etsahala hore ha Ba-Lamane ba bona hore Moroni o ne a tla khahlanong le bona, hape ba ne ba ts’ohile ’me ba baleha ka pele ho lebotho la Moroni.

32 ’Me ho ile ha etsahala hore Moroni le lebotho la hae ba ile ba ba lelekisa ho tloha motse le motse, ho fihlela ba kopana le Lehi le Teankame; ’me Ba-Lamane ba ile ba baleha ho tloha ho Lehi le Teankame, esita le tlase holim’a meeli e pela lebopo la leoatle, hofihlela ba tla lefats’eng la Moroni.

33 ’Me mabotho a Ba-Lamane a ne a bokelletsoe hammoho, haholo hoo hore e be kaofela e ne e le sehlopha se le seng lefats’eng la Moroni. Joale Ammorone, morena oa Ba-Lamane, hape o ne a ena le bona.

34 ’Me ho ile ha etsahala hore Moroni le Lehi le Teankame ba ile ba hloma liahelo tsa bona ’moho ho potoloha meeling ea lefats’e la Moroni, haholo hoo hore Ba-Lamane ba ne ba likalikelitsoe meeling pela lefella ka boroa, le meeli e pela lefella ka bochabela.

35 ’Me ke joana ba ileng ba hloma liahelo tsa bona bosiu. Hobane bonang, Ba-Nefi le Ba-Lamane le bona ba ne ba khathetse ka lebaka la boholo ba mohoanto oa bona; ka baka leo ha ba ka ba qeta holim’a leqheka ka nako ea bosiu ntle le Teankame; hobane o ne a halefetse Ammorone ka hofetisisa, haholo hoo hore o ile a nahana hore Ammorone le ngoana’bo Amalickia, ba bile sesosa sa ntoa ena e ts’oareletseng lipakeng tsa bona le Ba-Lamane, eo e bileng lebaka la ntoa e ngata hakaalo le ts’ollo ea mali, ee, le tlala e ngata hakaalo.

36 ’Me ho ile ha etsahala hore Teankame ka khalefo ea hae o ile a ea lihlomong tse ahiloeng tsa Ba-Lamane, ’me a itheholela tlase holim’a mabota a motse. ’Me o ile a tsamaea ka khoele, ho tsoa sebakeng ho ea sebakeng haholo hoo hore o ile a fumana morena; ’me o ile a lahlela lerumo ho eena, leo le ileng la mo hlaba pela pelo. Empa bonang, morena o ile a tsosa bahlanka ba hae pele a shoa, haholo hoo hore e be ba ile ba lelekisa Teankame, ’me ba mo bolaea.

37 Joale ho ile ha etsahala hore ha Lehi le Moroni ba tseba hore Teankame o ne a shoele ba ile ba tlala masoabi ka ho fetisisa; hobane bonang, o ile ea ba monna ea loanneng ka sebete bakeng sa naha ea habo, ee, motsoalle oa ’nete oa tokoloho; ’me o ile a sotlehela masoabi a bohloko ka ho fetisisa a mangata. Empa bonang, o ne a shoele, ’me a tsamaile tsela ea lefats’e lohle.

38 Joale ho ile ha etsahala hore Moroni o ile a hoantela pele ka hosasane, ’me a tla holim’a Ba-Lamane, haholo hoo hore ba ile ba ba bolaea ka polao e kholo; ’me ba ile ba ba khannela kantle ho lefats’e leo; ’me ba ile ba baleha, esita le hore ha ba ka ba khutla ka nako eo khahlanong le Ba-Nefi.

39 ’Me ke joana ho bileng pheletso ea selemo sa mashome a mararo le motso o mong sa puso ea baahloli holim’a sechaba sa Nefi; ’me ke joana ba ileng ba ba le lintoa, le ts’ollo ea mali, le tlala, le mahlomola, sebakeng sa lilemo tse ngata.

40 ’Me ho bile le lipolao, le litoants’ano, le liphapang, le mekhoa eohle ea bokhopo hara’ sechaba sa Nefi; le ha ho le joalo bakeng sa ba lokileng, ee, ka lebaka la lithapelo tsa ba lokileng, ba ile ba hauheloa.

41 Empa bonang, ka lebaka la bolelele bo fetisisang ba ntoa lipakeng tsa Ba-Nefi le Ba-Lamane ba bangata ba ile ba fetohela ho thatafala, ka lebaka la bolelele bo fetisisang ba ntoa; ’me ba bangata ba ile ba nolofatsoa ka lebaka la mahlomola a bona, haholo hoo hore ba ile ba ikokobetsa ka pele ho Molimo, esita le botebong ba boikokobetso.

42 ’Me ho ile ha etsahala hore kamor’a hore Moroni a matlafatse likarolo tseo tsa lefats’e tse neng li hlahelletse ka ho fetisa ho Ba-Lamane, ho fihlela li ba matla ho lekana, o ile a khutlela motseng oa Zarahemla; ’me hape Helamane o ile a khutlela sebakeng sa bojalefa ba hae; ’me ho ne ho boetse ho na le khotso e thehiloeng har’a sechaba sa Nefi.

43 ’Me Moroni o ile a nehela ka taolo ea mabotho a hae matsohong a mora oa hae, eo lebitso la hae e neng e le Moroniha; ’me o ile a ea phomolong ntlong ea hae hore a tle a qete karolo e setseng ea matsatsi a hae ka khotso.

44 ’Me Pahorane o ile a khutlela setulong sa hae sa kahlolo; le Helamane o ile a inkela ho eena ho ruta sechaba lentsoe la Molimo; hobane ka lebaka la lintoa le litoants’ano tse ngata hakaalo ho ne ho bile molemo hore molao o etsoe hape ka kerekeng.

45 Ka baka leo, Helamane le ba habo ba ile ba tsamaea, ’me ba phatlalatsa lentsoe la Molimo ka matla a maholo ho kholisa batho ba bangata ka bokhopo ba bona, hoo ho ileng ha etsa hore ba bakele libe tsa bona ’me le ho kolobelletsoa ho Morena Molimo oa bona.

46 ’Me ho ile ha etsahala hore ba ile ba theha hape kereke ea Molimo, hohle lefats’eng leo lohle.

47 Ee, ’me le litaolo li ile tsa etsoa malebana le molao. ’Me le baahloli ba bona, ’me baahloli ba bona ba baholo ba ile ba khethoa.

48 ’Me sechaba sa Nefi se ile sa qala ho atleha hape lefats’eng leo, ’me ba qala ho eketseha le ho ba matla ka hofetisisa hape lefats’eng leo. ’Me ba ile ba qala ho rua ka ho fetisisa.

49 Empa ho sa tsotellehe maruo a bona, kapa matla a bona, kapa katleho ea bona, ha ba ka ba phahamisetsoa boikhohomosong mahlong a bona; le ha ho le joalo ba ne ba sa ee butle ho hopola Morena Molimo oa bona; empa ba ile ba ikokobetsa ka ho fetisisa ka pele ho eena.

50 Ee, ba ile ba hopola hore na ke lintho tse kholo hakae tseo Morena a ba etselitseng tsona, hore o ile a ba lopolla lefung, le litlamong, le ho tsoa literonkong, le ho tloha ho mekhoa eohle ea mahlomola ’me o ne a ba lopollotse ho tsoa matsohong a lira tsa bona.

51 ’Me ba ile ba rapela ho Morena Molimo oa bona ho tsoelapele, haholo hoo hore Morena o ile a ba hlohonolofatsa, ho latela lentsoe la hae, hoo ba ileng ba ba matla le ho atleha lefats’eng leo.

52 ’Me ho ile ha etsahala hore lintho tsena tsohle li ile tsa etsoa. ’Me Helamane o ile a shoa, ka selemo sa mashome a mararo a metso e mehlano sa puso ea baahloli holim’a sechaba sa Nefi.