1 Kag karon, anak ko, may pila ako ka bagay nga ihambal parte sa pagpanumbalik nga nasambit na; kay tan-awa, may pila nga nagpatiko sang balaan nga mga kasulatan, kag nagtalang sing tuman tungod sini nga butang. Kag nahangpan ko nga ang imo kaisipan ginatublag man parte sini nga butang. Apang tan-awa, ipaathag ko ini sa imo.

2 Ginasiling ko sa imo, anak ko, nga ang plano sang pagpanumbalik kinahanglanon suno sa hustisya sang Dios; kay kinahanglanon nga ang tanan nga butang dapat mapanumbalik sa ila husto nga paagi. Tan-awa, kinahanglanon kag matarong, suno sa gahum kag pagkabanhaw ni Cristo, nga ang kalag sang tawo dapat nga mapanumbalik sa iya sini lawas, kag ang tagsa ka bahin sang lawas dapat mapanumbalik sa iya kaugalingon.

3 Kag kinahanglanon suno sa hustisya sang Dios nga ang mga tawo dapat nga mahukman suno sa ila mga binuhatan; kag kon ang ila mga binuhatan maayo sa sini nga kabuhi, kag ang mga tinutuyo sang ila mga tagipusuon maayo, nga sila dapat man, sa katapusan nga adlaw, mapanumbalik sa sinang maayo.

4 Kag kon ang ila mga binuhatan malain igapanumbalik ang mga ini sa ila bilang malain. Gani, ang tanan nga butang igapanumbalik sa ila husto nga pagkahamtang, ang tagsa ka butang sa iya sini kinaandan nga lawas—ang may kamatayon pagabangonon sa pagkawala’y kamatayon, madunot sa indi madunot—pagabangonon sa nagapadayon nga kalipayan agud magpanubli sang ginharian sang Dios, ukon sa nagapadayon nga kalisud agud magpanubli sang ginharian sang yawa, ang isa sa isa ka bahin, ang isa sa pihak—

5 Ang isa pagabangonon sa kalipayan suno sa iya mga kaluyag sang kalipayan, ukon maayo suno sa iya mga kaluyag sang maayo; kag ang isa sa malain suno sa iya mga kaluyag sang malain; kay tungod gingusto niya nga maghimo sang malain sa bug-os nga adlaw sa amo man maangkon niya ang iya padya nga malain pag-abot sang gab-i.

6 Kag amo man ini sa pihak nga bahin. Kon nakahinulsol sia sang iya mga sala, kag gingusto ang pagkamatarong tubtob sa katapusan sang iya mga adlaw, sa amo man pagapadyaan sia sa pagkamatarong.

7 Amo ini sila ang gintubos sang Ginuo; huo, amo ini sila ang mga pinanguha, nga ginluwas halin sa sinang nagapadayon nga gab-i sang kadudulman; kag tungod sini magatindog sila ukon mahulog; kay tan-awa, sila ang ila kaugalingon nga mga hukom, kon maghimo sang maayo ukon maghimo sang malain.

8 Karon, ang mga mando sang Dios indi maliwat; gani, ang dalan ginhanda agud kon sin-o man ang maluyag mahimo nga makalakat sa sini kag maluwas.

9 Kag karon tan-awa, anak ko, indi magpasimpalad sing isa pa ka sala batok sa imo Dios sa sinang mga bahin sang doktrina, nga tubtob karon nagpasimpalad ka sa paghimo sang sala.

10 Indi paghunahunaa, tungod nahambal ang parte sa pagpanumbalik, nga ipanumbalik ka halin sa sala padulong sa kalipayan. Tan-awa, ginasiling ko sa imo, ang kalainan wala gid nangin kalipayan.

11 Kag karon, anak ko, ang tanan nga tawo nga yara sa kahimtangan sang kinaugali, ukon masiling ko, sa isa ka dutan-on nga kahimtangan, yara sa apdo sang kapaitan kag sa mga gapos sang kalainan; wala sila sang Dios sa kalibutan, kag ginsupak nila ang kinaugali sang Dios; gani, yara sila sa kahimtangan nga supak sa kinaugali sang kalipayan.

12 Kag karon tan-awa, ang buot silingon bala sang pulong nga pagpanumbalik amo ang pagkuha sing isa ka butang nga may kinaugali nga kahimtangan kag ibutang ini sa isa ka di-kinaugali nga kahimtangan, ukon ibutang ini sa isa ka kahimtangan nga kabaliskaran sang iya kinaugali?

13 O, anak ko, indi amo sini ang matabo; kundi ang buot silingon sang pulong nga pagpanumbalik amo ang pagpabalik liwat sang malain sa malain, ukon dutan-on sa dutan-on, ukon yawan-on sa yawan-on—mabuot para sa sinang mabuot; maayo para sa sinang maayo; matarong para sa sinang matarong; maluluy-on para sa sinang maluluy-on.

14 Gani, anak ko, siguroha nga maluluy-on ka sa imo mga kauturan; makigbagay sing maayo, maghukom sing matarong, kag dalayon nga maghimo sing maayo; kag kon himuon mo ining tanan nga butang gani magabaton ka sang imo padya; huo, ang kaluoy mapanumbalik sa imo liwat; ang hustisya mapanumbalik sa imo liwat; ang matarong nga paghukom mapanumbalik sa imo liwat; kag ang maayo ipadya sa imo liwat.

15 Kay inang imo ginapatubas magabalik sa imo liwat, kag mapanumbalik; gani, ang pulong nga pagpanumbalik lubos pa gid nga nagakondenar sang makasasala, kag wala gid nagapakamatarong sa iya.