1 Kag karon, anak ko, nahangpan ko nga may dugang pa nga nagatublag sa imo kaisipan, nga indi mo mahangpan—nga amo ang parte sa hustisya sang Dios sa pagsilot sang makasasala; kay ginahunahuna mo nga indi matarong nga ang makasasala italana sa isa ka kahimtangan sang kalisud.

2 Karon tan-awa, anak ko, ipaathag ko ini nga butang sa imo. Kay tan-awa, pagkatapos nga ginpagwa sang Ginuong Dios ang aton una nga mga ginikanan sa hardin sang Eden, agud mag-uma sang duta, nga sa diin sila ginkuha—huo, ginpagwa niya ang tawo, kag ginbutang niya sa punta nga este nga bahin sang hardin sang Eden, ang querubin, kag nagadabadaba nga espada nga nagatiyog, agud bantayan ang kahoy sang kabuhi—

3 Karon, makita naton nga ang tawo nangin pareho sa Dios, nga nakahibalo sang maayo kag malain; kag basi ikab-ot niya sang iya kamot, kag magkuha man sa kahoy sang kabuhi, kag magkaon kag mabuhi sa wala’y katapusan, ang Ginuong Dios nagbutang sang querubin kag sang nagadabadaba nga espada, agud indi sia makakaon sang bunga—

4 Kag sa sini makita naton, nga may isa ka tion nga gintugot sa tawo nga maghinulsol, huo, isa ka tion sang pagtilaw, isa ka tion sa paghinulsol kag pag-alagad sa Dios.

5 Kay tan-awa, kon ginkab-ot gilayon ni Adan sang iya kamot, kag nagkaon sa kahoy sang kabuhi, nagkabuhi kuntani sia sa wala’y katapusan, suno sa pulong sang Dios, nga wala sing tion sa paghinulsol; huo, kag ang pulong sang Dios nangin wala’y pulos kuntani, kag ang dako nga plano sang kaluwasan napaslawan kuntani.

6 Apang tan-awa, gintalana sa tawo nga mapatay—gani, tungod ginpalayo sila sa kahoy sang kabuhi dapat nga pahalinon sila sa ibabaw sang duta—kag ang tawo nagtalang sa wala’y katapusan, huo, nangin tawo sila nga nahulog.

7 Kag karon, imo nakita paagi sa sini nga ang aton una nga mga ginikanan ginsikway sa dutan-on kag sa espirituhanon halin sa presensya sang Ginuo; kag gani makita naton nga nangin ulipon sila sa pagsunod sang ila kaugalingon nga kabubut-on.

8 Karon tan-awa, indi nagakaigo nga ang tawo pagabawion halin sa sining dutan-on nga kamatayon kay pagagub-on sina ang dako nga plano sang kalipayan.

9 Gani, tungod ang kalag indi gid mapatay, kag ang pagkahulog nagdala sa tanan nga tawo sang espirituhanon nga kamatayon kag amo man sang dutan-on, kon sayuron, ginsikway sila halin sa presensya sang Ginuo, nagakaigo nga ang tawo pagabawion halin sa sining espirituhanon nga kamatayon.

10 Gani, tungod sila nangin dutan-on, lawasnon, kag yawan-on, sa kinaugali, ining kahimtangan sang pagtilaw nangin isa ka kahimtangan para sa ila nga maghanda; nangin isa ini ka kahimtangan sang pagpanghanda.

11 Kag karon dumduma, anak ko, kon indi tungod sa plano sang pagtubos, (ibutang ta kon wala ini) pagkatapos gid nga napatay sila ang ila mga kalag nangin miserable, nga nasikway halin sa presensya sang Ginuo.

12 Kag karon, wala sing paagi sa pagbawi sang mga tawo halin sa sining nalaglag nga kahimtangan nga gindala sang tawo sa iya kaugalingon tungod sang iya mismo nga pagkadi-matinumanon;

13 Gani, suno sa hustisya, ang plano sang pagtubos indi mapahanabo, lamang sa mga kondisyon sang paghinulsol sang mga tawo sa sining kahimtangan sang pagtilaw, huo, sa sining kahimtangan sang pagpanghanda; kay luwas sa sining mga kondisyon, ang kaluoy indi mag-epekto luwas lang kon gub-on sini ang buluhaton sang hustisya. Karon ang buluhaton sang hustisya indi maguba; kay kon mag-amo, ang Dios indi na mangin Dios.

14 Kag gani makita naton nga ang tanan nga tawo nahulog, kag napaidalom sila sa hustisya; huo, sa hustisya sang Dios, nga nagtalana sa ila nga isikway halin sa iya presensya sa wala’y katapusan.

15 Kag karon, ang plano sang kaluoy indi mapahanabo luwas lang nga pagahimuon ang pagbayad-sala; gani ang Dios mismo magabayad para sa mga sala sang kalibutan, agud ipahanabo ang plano sang kaluoy, agud masabat ang mga ginapangayo sang hustisya, agud ang Dios mangin isa ka perpekto, matarong nga Dios, kag isa ka maluluy-on man nga Dios.

16 Karon, ang paghinulsol indi makaabot sa mga tawo luwas lang nga may silot, nga wala’y katapusan man pareho sang kabuhi sang kalag, nga naangot kasupak sa plano sang kalipayan, nga wala’y katapusan man pareho sang kabuhi sang kalag.

17 Karon, paano makahinulsol ang isa ka tawo luwas lang nga nakasala sia? Paano sia makasala kon wala sing layi? Paano mangin may layi luwas lang nga may silot?

18 Karon, may silot nga naangot, kag isa ka matarong nga layi nga ginhatag nga nagdala sing pagbasol sang konsiyensya sa tawo.

19 Karon, kon wala sing layi nga ginhatag—kon ang isa ka tawo nagpatay dapat sia mapatay—mahadlok bala sia nga mapatay kon magpatay sia?

20 Kag amo man, kon wala sing layi nga ginhatag batok sa sala ang mga tawo indi mahadlok magpakasala.

21 Kag kon wala sing layi nga ginhatag, kon ang mga tawo makasala ano ang mahimo sang hustisya, ukon sang kaluoy man, kay wala ini sila sing epekto sa tinuga?

22 Apang may layi nga ginhatag, kag silot nga naangot, kag paghinulsol nga gintugot; nga sa amo nga paghinulsol, nagaepekto ang kaluoy; kay kon indi, angkonon sang hustisya ang tinuga kag ipatuman ang layi, kag ang layi magapatuman sang silot; kon indi amo sini, ang mga buluhaton sang hustisya maguba, kag ang Dios indi na mangin Dios.

23 Apang ang Dios nagapadayon nga mangin Dios, kag ang kaluoy nagaepekto sa mga mahinulsulon, kag ang kaluoy nagaabot tungod sang pagbayad-sala; kag ang pagbayad-sala nagapahanabo sang pagkabanhaw sang mga minatay; kag ang pagkabanhaw sang mga minatay nagadala sang mga tawo pabalik sa presensya sang Dios; kag gani ginapanumbalik sila sa iya presensya, agud hukman suno sa ila mga binuhatan, suno sa layi kag hustisya.

24 Kay tan-awa, ang hustisya nagapatuman sang tanan niya nga ginapangayo, kag amo man ang kaluoy nagaepekto sa tanan nga iya; kag gani, wala gid sing maluwas kundi ang matuod-tuod nga mga mahinulsulon.

25 Ano, nagahunahuna ka bala nga makawatan sang kaluoy ang hustisya? Ginasiling ko sa imo, Indi; bisan isa ka tipik. Kay kon mag-amo sini, ang Dios indi na mangin Dios.

26 Kag gani ginapahanabo sang Dios ang iya dako kag wala’y katapusan nga mga katuyoan, nga ginhanda halin pa sa pagtuga sang kalibutan. Kag gani ginapahanabo ang kaluwasan kag ang pagtubos sang mga tawo, kag ang ila man kalaglagan kag kalisud.

27 Gani, O anak ko, kon sin-o man ang magpalapit makapalapit kag mag-inom sang mga tubig sang kabuhi sing wala’y pagdumili; kag kon sin-o man ang indi magpalapit ang amo man wala ginapilit nga magpalapit; apang sa katapusan nga adlaw igapanumbalik ini sa iya suno sa iya mga binuhatan.

28 Kon naluyagan niya ang paghimo sang malain, kag wala nakahinulsol sa iya mga inadlaw, tan-awa, malain ang iya pagadangatan, suno sa pagpanumbalik sang Dios.

29 Kag karon, anak ko, ginapangabay ko nga indi ka na magpatublag sa sining mga butang, kag pabay-i nga ang mga sala mo lamang ang magtublag sa imo, sa sinang pagtublag nga magadala sa imo sa paghinulsol.

30 O anak ko, ginapangabay ko nga indi mo na pag-ipanghiwala ang hustisya sang Dios. Indi na pagtinguhaa nga ipangatarungan ang imo kaugalingon sa pinakadiutay nga punto tungod sang imo mga sala, paagi sa pagpanghiwala sang hustisya sang Dios; kundi tugoti ang hustisya sang Dios, kag ang iya kaluoy, kag ang iya pagkamainantuson nga lubos nga maggahum sa imo tagipusuon; kag tugoti ini nga magdala sa imo sa yab-ok sa pagpaubos.

31 Kag karon, anak ko, gintawag ikaw sang Dios nga magwali sang pulong sa sining katawhan. Kag karon, anak ko, maglakat ka, ipahayag ang pulong sing may kamatuoran kag kaligdong, agud madala mo ang mga kalag padulong sa paghinulsol, agud ang dako nga plano sang kaluoy mag-epekto sa ila. Kag kabay nga ihatag sang Dios sa imo ang suno sa akon mga pulong. Amen.