1 Kag karon natabo ini nga, pagkatapos gid nga naangkon ni Amalikia ang ginharian nagsugod sia sa pagsugyot sang mga tagipusuon sang mga Lamanhon batok sa katawhan ni Nefi; huo, nagpili sia sang mga tawo nga maghambal sa mga Lamanhon halin sa ila mga tore, batok sa mga Nefinhon.

2 Kag gani ginsugyot niya ang ila mga tagipusuon batok sa mga Nefinhon, sa bagay nga sa hingapusan nga bahin sang ika-disenuebe nga tuig sang pagginahum sang mga hukom, nga natuman niya ang iya mga plano tubtob sina nga tion, huo, nga nahimo nga hari sang mga Lamanhon, naghandum man sia sa paggahum sa bug-os nga kadutaan, huo, kag sa tanan nga katawhan nga yara sa kadutaan, ang mga Nefinhon kag amo man ang mga Lamanhon.

3 Gani natuman niya ang iya plano, kay napatig-a niya ang mga tagipusuon sang mga Lamanhon kag nabulag ang ila mga kaisipan, kag nasugyot sila sa pagkaakig, sa bagay nga nakatipon sia sing dako nga kasoldadohan agud magpakig-away batok sa mga Nefinhon.

4 Kay determinado na sia, tungod sang tuman nga kadamuon sang iya katawhan, nga daugon ang mga Nefinhon kag dal-on sila sa pagkaulipon.

5 Kag gani nagpili sia sang puno nga mga kapitan halin sa mga Zoramnon, sila nga labing nakasunar sang kusog sang mga Nefinhon, kag sang ila mga lugar nga palanagoan, kag ang pinakamahuyang nga mga bahin sang ila mga siyudad; gani ginpili niya sila nga mangin puno nga mga kapitan sang iya mga kasoldadohan.

6 Kag natabo ini nga nagbiya sila sa ila kampo, kag nagkadto sa duta sang Zarahemla sa kamingawan.

7 Karon natabo ini nga samtang si Amalikia nagaangkon sang gahum paagi sa pagpatalang kag pagpangdaya, si Moroni, sa pihak nga bahin, nagahanda sang mga kaisipan sang katawhan nga mangin tampad sa Ginuo nga ila Dios.

8 Huo, ginapabakod niya ang mga kasoldadohan sang mga Nefinhon, kag nagapatindog sang magagmay nga mga kuta, ukon mga lugar nga palanagoan; nga nagapatumpok sang mga bungyod sang duta sa palibot agud malipdan ang iya mga kasoldadohan, kag amo man nagapatindog sang mga pader nga bato agud maglikop sa ila, sa palibot sang ila mga siyudad kag sang mga dulonan sang ila mga kadutaan; huo, sa tanan nga palibot sang kadutaan.

9 Kag sa ila pinakamahuyang nga mga pamakod ginbutangan niya sang mas madamo nga tinawo; kag gani ginpamakuran niya kag ginpalig-on ang duta nga ginapuy-an sang mga Nefinhon.

10 Kag gani ginahanda niya ang pagsakdag sang ila kahilwayan, sang ila mga kadutaan, sang ila mga asawa, kag sang ila mga anak, kag sang ila paghidaet, kag agud nga magkabuhi sila sa Ginuo nga ila Dios, kag mapadayon nila inang ginatawag sang ila mga kaaway nga kawsa sang mga Cristohanon.

11 Kag si Moroni isa ka mabukod kag isa ka gamhanan nga lalaki; isa sia ka lalaki nga may perpekto nga paghangop; huo, isa ka lalaki nga wala nagakalipay sa pagpaagay sang dugo; isa ka lalaki nga ang kalag nagakalipay sa kahilwayan kag sa pagkaindependiente sang iya pungsod, kag sang iya mga kauturan halin sa pagkaulipon;

12 Huo, isa ka lalaki nga ang tagipusuon puno sa pagpasalamat sa iya Dios, tungod sang madamo nga pribilihiyo kag mga bugay nga iya ginhatag sa iya katawhan; isa ka lalaki nga nagpangabudlay sing tuman para sa kaayohan kag kasigurohan sang iya katawhan.

13 Huo, kag isa sia ka lalaki nga malig-on sa pagtuo kay Cristo, kag nakapanumpa sia sing isa ka panumpa nga pangapinan ang iya katawhan, ang iya mga kinamatarong, kag ang iya pungsod, kag ang iya relihiyon, bisan tubtob sa pagkaubos sang iya dugo.

14 Karon ang mga Nefinhon gintudloan sa pagpangapin sang ila mga kaugalingon batok sa ila mga kaaway, bisan tubtob sa pagpaagay sang dugo kon ini kinahanglanon; huo, kag gintudloan man sila nga indi gid mag-una sa pagsalakay, huo, indi mag-alsa sang espada luwas lang nga ini batok sa kaaway, luwas lang nga ini sa pag-amlig sang ila mga kabuhi.

15 Kag amo ini ang ila pagtuo, nga paagi sa paghimo sini ang Dios magapauswag sa ila sa duta, ukon sa iban nga pulong, kon matutum sila sa pagtuman sang mga kasugoan sang Dios nga pauswagon niya sila sa duta; huo, nga paandaman sila nga magpalagyo, ukon maghanda para sa giyera, suno sa ila peligro;

16 Kag amo man, nga ang Dios magapahibalo sa ila kon diin sila makadto agud pangapinan ang ila mga kaugalingon batok sa ila mga kaaway, kag paagi sa paghimo sini, ang Ginuo magaluwas sa ila; kag ini amo ang pagtuo ni Moroni, kag ang iya tagipusuon nagakasadya sa sini; indi sa pagpaagay sang dugo kundi sa paghimo sang maayo, sa pag-amlig sang iya katawhan, huo, sa pagtuman sang mga kasugoan sang Dios, huo, kag sa pagbato sa kalainan.

17 Huo, sa pagkamatuod, sa pagkamatuod, ginasiling ko sa inyo, kon ang tanan nga tawo nangin, sa karon, kag dalayon nga mangin kapareho ni Moroni, tan-awa, ang mga gahum mismo sang impiyerno magauyog kuntani sa wala’y katapusan; huo, ang yawa indi gid makaangkon sing gahum sa mga tagipusuon sang mga anak sang katawhan.

18 Tan-awa, isa sia ka lalaki nga pareho kay Amon, ang anak ni Mosias, huo, bisan sa iban pa nga mga anak ni Mosias, huo, kag kay Alma man kag iya mga anak, kay sila tanan mga tawo sang Dios.

19 Karon tan-awa, sanday Helaman kag ang iya mga kauturan indi menos ang pagkamapuslanon sa katawhan sangsa kay Moroni; kay nagwali sila sang pulong sang Dios, kag nagpangbunyag sila padulong sa paghinulsol sang tanan nga tawo kon sin-o man ang magpamati sa ila mga pulong.

20 Kag gani nagpadayon sila, kag ang katawhan nagpaubos sang ila mga kaugalingon tungod sang ila mga pulong, sa bagay nga nangin lubos sila nga ginpasulabi sang Ginuo, kag gani hilway sila sa mga giyera kag mga pagbinaisay sa tunga nila, huo, bisan sa sulod sang apat ka tuig.

21 Apang, pareho sang akon ginsiling, sa hingapusan nga bahin sang ika-disenuebe nga tuig, huo, sa pihak sang ila paghidaet sa tunga nila, napilitan sila bisan indi nila gusto nga magpakig-away sa ila mga kauturan, ang mga Lamanhon.

22 Huo, kag sa malip-ot nga pulong, ang ila mga giyera wala gid nag-untat sa sulod sang madamo nga tinuig batok sa mga Lamanhon, sa pihak nga indi gid nila gusto.

23 Karon, ginakasubo nila ang pagkapot sang mga armas batok sa mga Lamanhon, tungod wala sila nagakalipay sa pagpaagay sang dugo; huo, kag indi lamang ini—ginakasubo nila nga mangin kabangdanan sa pagdala sang madamo kaayo sang ila mga kauturan pagwa sa sini nga kalibutan padulong sa wala’y katapusan nga kalibutan, nga indi handa sa pag-atubang sa ila Dios.

24 Apang, indi sila makatugot nga pamatyon sila, agud ang ila mga asawa kag ang ila mga anak pamatyon nga wala sing kaluoy sang sapat-sapaton nga kapintas sinang ila anay mga kauturan, huo, nga nagsipak man sa ila simbahan, kag nagbiya sa ila kag nagplano agud laglagon sila paagi sa pagbuylog sa mga Lamanhon.

25 Huo, indi sila makabatas nga ang ila mga kauturan magakasadya sa dugo sang mga Nefinhon, samtang nga may yara pa nga magtuman sang mga kasugoan sang Dios, kay ang promisa sang Ginuo amo nga kon magtuman sila sang iya mga kasugoan magauswag sila sa duta.