1 Kag karon natabo ini, sa ika-onse nga bulan sang ika-disenuebe nga tuig, sa ika-napulo nga adlaw sang bulan, ang mga kasoldadohan sang mga Lamanhon nalantawan nga nagapadulong sa duta sang Amonihas.

2 Kag tan-awa, ang siyudad napasad liwat, kag si Moroni nagpahamtang sang kasoldadohan sa tupad sang mga dulonan sang siyudad, kag gintampukan nila sang duta sa palibot agud amligan sila halin sa mga baslay kag sa mga bato sang mga Lamanhon; kay tan-awa, nagapakig-away sila gamit ang mga bato kag mga pana.

3 Tan-awa, nagsiling ako nga ang siyudad sang Amonihas napasad liwat. Ginasiling ko sa inyo, huo, nga kabahin sini ang ginpasad liwat; kag tungod ginguba ini sadto sang mga Lamanhon tungod sang kalainan sang katawhan, naghunahuna sila nga mangin isa ini liwat ka mahapos nga bilihagon para sa ila.

4 Apang tan-awa, daw ano kadako ang ila kapaslawan; kay tan-awa, ang mga Nefinhon nagkutkot sa paghimo sing makitid nga bungyod sang duta sa palibot nila, nga mataas kaayo nga ang mga Lamanhon indi makahaboy sing maayo sang ila mga bato kag sang ila mga baslay sa ila, kag indi man sila makapalapit sa ila luwas lang nga paagi sa ila lugar sang entrada.

5 Karon sa sini nga tion ang puno nga mga kapitan sang mga Lamanhon natingala gid, tungod sang kaalam sang mga Nefinhon sa paghanda sang ila mga lugar sang pangamlig.

6 Karon ang mga lider sang mga Lamanhon naghunahuna, tungod sang ila kadamuon, huo, naghunahuna sila nga mangin may pribilihiyo sila sa pagsalakay sa ila pareho sang ila ginhimo sadto; huo, kag nahandaan man nila ang ila mga kaugalingon sing mga taming sa butkon, kag mga taming sa dughan; kag nahandaan man nila ang ila mga kaugalingon sing mga biste nga panit, huo, sang tuman kadamol nga mga biste agud tabunan ang ila pagkahublas.

7 Kag tungod nga handa sila naghunahuna sila nga madali nila nga madaug kag mapaidalom ang ila mga kauturan sa gota sang pagkaulipon, ukon laglagon kag pamatyon sila suno sa ila ikalipay.

8 Apang tan-awa, sa ila tuman nga katingala, handa sila para sa ila, sa paagi nga wala pa gid mahibal-i sa mga anak ni Lehi. Karon handa na sila para sa mga Lamanhon, agud magpakig-away suno sa sahi sang mga gintudlo ni Moroni.

9 Kag natabo ini nga ang mga Lamanhon, ukon ang mga Amalikianhon, tuman nga natingala sa ila sari sang pagpanghanda para sa giyera.

10 Karon, kon si haring Amalikia ang nagdulhog halin sa duta sang Nefi, sa unahan sang iya kasoldadohan, ayhan ginsugo niya ang mga Lamanhon nga salakayon ang mga Nefinhon sa siyudad sang Amonihas; kay tan-awa, wala gid sia nagaulikid sa dugo sang iya katawhan.

11 Apang tan-awa, si Amalikia mismo wala nagdulhog agud magpakig-away. Kag tan-awa, ang iya puno nga mga kapitan wala nangisog nga magsalakay sa mga Nefinhon sa siyudad sang Amonihas, kay ginliwat ni Moroni ang pagdumala sang mga pagpanghikot sang mga Nefinhon, sa bagay nga ang mga Lamanhon napaslawan sa ila mga lugar nga ginakutaan kag indi sila makasalakay sa ila.

12 Gani nag-isol sila sa kamingawan, kag nagbiya sa ila kampo kag nagkadto sa duta sang Noe, nga nagahunahuna nga ina ang mangin madason nga pinakamaayo nga lugar para sa ila nga magsalakay sa mga Nefinhon.

13 Kay wala sila nakahibalo nga si Moroni nagpamakod, ukon nagpasad sang mga kuta sang pangamlig, para sa tagsa ka siyudad sa tanan nga bahin sang kadutaan sa palibot; gani, nagkadto sila sa duta sang Noe upod ang malig-on nga determinasyon; huo, ang ila puno nga mga kapitan nagkadto kag nagpanumpa nga laglagon nila ang katawhan sang sina nga siyudad.

14 Apang tan-awa, sa ila kakibot, ang siyudad sang Noe, nga sang una isa ka mahuyang nga lugar, subong, paagi sa mga pahito ni Moroni, nangin mabakod, huo, bisan labaw pa sa kabakod sang siyudad sang Amonihas.

15 Kag karon, tan-awa, ini kinaalam kay Moroni; kag naghunahuna sia nga mahadlokan sila sa siyudad sang Amonihas; kag tungod ang siyudad sang Noe sang una nangin amo ang pinakamahuyang nga bahin sang duta, gani magakadto sila didto agud magpakig-away; kag gani nangin suno ini sa iya mga luyag.

16 Kag tan-awa, si Moroni nagpili kay Lehi nga mangin puno nga kapitan sang mga tawo sa sina nga siyudad; kag amo man ini nga Lehi nga nagpakig-away batok sa mga Lamanhon sa kapatagan sa este sang suba sang Sidon.

17 Kag karon tan-awa natabo ini nga sang natukiban sang mga Lamanhon nga si Lehi ang nagadumala sa siyudad ginluyahan sila liwat sing buot, kay ginakahadlokan nila si Lehi sing tuman; apang ang ila puno nga mga kapitan nakapanumpa sing isa ka panumpa nga salakayon ang siyudad; gani, gindala nila pataklad ang ila mga kasoldadohan.

18 Karon tan-awa, ang mga Lamanhon indi makasulod sa ila mga kuta sang pangamlig sa bisan ano nga paagi luwas sa entrada, tungod sang kataason sang bungyod nga gintampok pataas, kag sang kadalumon sang kanal nga ginkutkot sa palibot, luwas lang nga ini paagi sa entrada.

19 Kag gani ang mga Nefinhon nakahanda sa paglaglag sang tanan nga magtilaw sa pagtaklas pasulod sa kuta sa iban nga alagyan paagi sa paghaboy sang mga bato kag mga baslay sa ila.

20 Gani handa sila, huo, isa ka grupo sang pinakamakusog nila nga mga tinawo, nga may ila mga espada kag ila mga tirador, sa pag-igo sa tanan nga magtinguha sa pagtaklas pasulod sa ila lugar sang pangamlig paagi sa lugar sang entrada; kag gani handa sila nga pangapinan ang ila mga kaugalingon batok sa mga Lamanhon.

21 Kag natabo ini nga gindala pataklad sang mga kapitan sang mga Lamanhon ang ila mga kasoldadohan sa atubang sang lugar sang entrada, kag nagsugod sa pagpakig-away batok sa mga Nefinhon, agud magsulod sa ila lugar sang pangamlig; apang tan-awa, ginpanabog sila pabalik sa nagkalain-lain nga tion, sa bagay nga nagkalamatay sila sa dako nga pagpamatay.

22 Karon sang nahibal-an nila nga indi sila makakuha sing kusog batok sa mga Nefinhon sa alagyan, nagsugod sila sa pagguba sang ila mga bungyod sang duta agud may yara sila sing maagyan padulong sa ila mga kasoldadohan, agud makaangkon sila sing patas nga kahigayunan sa pag-away; apang tan-awa, sa sining mga pagpaninguha ginhapay sila sang mga bato kag mga baslay nga nag-igo sa ila; kag imbes nga matampukan ang ila mga kanal paagi sa pagtapan sang mga bungyod nga duta, natampukan ang mga ini halos sang ila patay kag pilason nga mga lawas.

23 Gani ang mga Nefinhon nakaangkon sang tanan nga gahum sa ila mga kaaway; kag gani ang mga Lamanhon nagtinguha sa paglaglag sang mga Nefinhon tubtob nga ang ila puno nga mga kapitan nagkalamatay tanan; huo, kag kapin sa isa ka libo sang mga Lamanhon ang nagkalamatay; samtang, sa pihak nga bahin, wala sing bisan isa man lang ka tawo sang mga Nefinhon ang napatay.

24 May mga singkwenta nga napilasan, nga nataya sa mga baslay sang mga Lamanhon sa mayor nga alagyan, apang natamingan sila sang ila mga taming sa butkon, kag sang ila mga taming sa dughan, kag sang ila mga panaming sa ulo, sa bagay nga ang ila mga pilas yara sa ila mga batiis, nga ang madamo sang mga ini tuman kalubha.

25 Kag natabo ini nga sang nakita sang mga Lamanhon nga ang ila puno nga mga kapitan nagkalamatay na tanan nagpalagyo sila padulong sa kamingawan. Kag natabo ini nga nagbalik sila sa duta sang Nefi, agud pahibal-on ang ila hari nga si Amalikia, nga isa ka Nefinhon sa pagkabun-ag, parte sa ila dako nga pagkapierde.

26 Kag natabo ini nga naakig sia sing tuman sa iya katawhan tungod wala niya makuha ang iya handum sa mga Nefinhon; wala niya sila mapaidalom sa gota sang pagkaulipon.

27 Huo, naakig sia sing tuman, kag ginsumpa niya ang Dios, kag si Moroni man, nga nagasumpa sing panumpa nga imnon niya ang iya dugo; kag ini tungod si Moroni nagtuman sang mga kasugoan sang Dios sa paghanda para sa kasigurohan sang iya katawhan.

28 Kag natabo ini nga sa pihak nga bahin, ang katawhan ni Nefi nagpasalamat sa Ginuo nga ila Dios, tungod sang iya wala’y tupong nga gahum sa pagluwas sa ila halin sa mga kamot sang ila mga kaaway.

29 Kag gani natapos ang ika-disenuebe nga tuig sang pagginahum sang mga hukom sa katawhan ni Nefi.

30 Huo, may dalayon nga paghidaet sa ila, kag tuman kadako nga kauswagan sa simbahan tungod sang ila pagtuman kag katutum nga ila ginhatag sa pulong sang Dios, nga ginpahayag sa ila nanday Helaman, kag Siblon, kag Corianton, kag Amon kag sang iya mga kauturan, huo, kag sang tanan nga gin-ordin sa balaan nga paagi sang Dios, nga nabunyagan padulong sa paghinulsol, kag ginpadala agud magwali sa katawhan.