1 Kag karon natabo ini nga si Moroni wala nag-untat sa paghimo sang mga pagpanghanda para sa giyera, ukon sa pagpangapin sang iya katawhan batok sa mga Lamanhon; kay nagsugo sia nga dapat magsugod ang iya mga kasoldadohan sa pag-umpisa sang ika-beynte nga tuig sang pagginahum sang mga hukom, nga dapat sila magsugod sa pagkutkot sang duta sa palibot sang tanan nga siyudad, sa bug-os nga kadutaan nga ginapanag-iyahan sang mga Nefinhon.

2 Kag sa ibabaw sining mga bungyod sang duta nagsugo sia nga dapat may mga troso, huo, mga hinimo nga mga troso nga ginpatindog sa kataason sang tawo, sa palibot sang mga siyudad.

3 Kag nagsugo sia nga sa sining mga hinimo nga mga troso dapat may nakabalay nga may taliwis sa ibabaw sang kudal nga mga troso sa palibot; kag malig-on kag mataas ang mga ini.

4 Kag nagsugo sia nga magpatindog sang mga tore nga kitaon inang binalay nga may taliwis nga kudal, kag nagsugo sia nga magpatindog sang mga lugar sang pangamlig sa sinang mga tore, agud ang mga bato kag mga baslay sang mga Lamanhon indi makasamad sa ila.

5 Kag ginhanda ang mga ini agud makahaboy sila sang mga bato halin sa ibabaw sini, suno sa ila ikalipay kag sa ila kusog, kag magpatay sa kon sin-o nga magtilaw nga magpalapit sa mga pader sang siyudad.

6 Gani naghanda si Moroni sang mga pamakod batok sa pag-abot sang ila mga kaaway, sa palibot sang tagsa ka siyudad sa bug-os nga kadutaan.

7 Kag natabo ini nga si Moroni nagsugo nga ang iya mga kasoldadohan maglakat padulong sa este sang kamingawan; huo, kag naglakat sila kag ginpanabog ang tanan nga Lamanhon nga yara sa este sang kamingawan padulong sa ila kaugalingon nga mga duta, nga yara sa sur sang duta sang Zarahemla.

8 Kag ang duta sang Nefi nagausoy nga tadlong halin sa este nga dagat padulong sa weste.

9 Kag natabo ini nga sang mapanabog ni Moroni ang tanan nga Lamanhon pagwa sa este nga kamingawan, nga yara sa norte sang mga duta nga ila ginapanag-iyahan, ginpahanabo niya nga ang mga pumuluyo nga yara sa duta sang Zarahemla kag sa kadutaan sa palibot magkadto sa este nga kamingawan, bisan tubtob sa mga dulonan nga malapit sa baybayon, kag panag-iyahan ang duta.

10 Kag ginbutangan man niya sing mga kasoldadohan sa sur, sa mga dulonan sang ila mga ginapanag-iyahan, kag ginsugo sila nga magpatindog sing mga pamakod agud maamligan nila ang ila mga kasoldadohan kag ang ila katawhan halin sa mga kamot sang ila mga kaaway.

11 Kag gani ginpangkakas niya ang tanan nga pamakod sang mga Lamanhon sa este sang kamingawan, huo, kag amo man sa weste, nga ginapamakuran ang dulonan sa tunga sang mga Nefinhon kag mga Lamanhon, sa tunga sang duta sang Zarahemla kag sa duta sang Nefi, halin sa weste nga dagat, nga nagalab-ot malapit sa ulo sang suba sang Sidon—nga ang mga Nefinhon nagapanag-iya sang tanan nga kadutaan pa-norte, huo, bisan sang tanan nga kadutaan pa-norte sang duta nga Bugana, suno sa ila ikalipay.

12 Gani si Moroni, upod ang iya mga kasoldadohan, nga nagadugang adlaw-adlaw tungod sang pasalig sang pangamlig nga nahimo sang iya mga binuhatan sa ila, nagtinguha sa pag-utod sang kusog kag sang gahum sang mga Lamanhon halin sa mga kadutaan nga ila ginapanag-iyahan, agud madulaan sila sang gahum sa mga kadutaan nga ila ginapanag-iyahan.

13 Kag natabo ini nga ginsugdan sang mga Nefinhon ang pagpahamtang sing isa ka siyudad, kag gintawag nila ang ngalan sang siyudad nga Moroni; kag malapit ini sa este nga dagat; kag yara ini sa sur malapit sa dulonan sang mga ginapanag-iyahan sang mga Lamanhon.

14 Kag ginsugdan man nila ang isa ka sadsaran para sa isa ka siyudad sa tunga sang siyudad sang Moroni kag sang siyudad sang Aaron, nga nagaangot sang mga dulonan sang Aaron kag Moroni; kag gintawag nila ang ngalan sang siyudad, ukon sang duta, nga Nefias.

15 Kag nagsugod man sila sa sinang amo man nga tuig sa pagtukod sang madamo nga siyudad sa norte, ang isa sa pinasahi nga paagi nga ila gintawag nga Lehi, nga yara sa norte malapit sa mga dulonan sang baybayon.

16 Kag gani natapos ang ika-beynte nga tuig.

17 Kag sa sining mainuswagon nga mga sirkumstansya yara ang katawhan ni Nefi sa pagsugod sang ika-beynte uno nga tuig sang pagginahum sang mga hukom sa katawhan ni Nefi.

18 Kag nag-uswag sila sing tuman, kag nangin tuman sila kamanggaranon; huo, nagdamo sila kag nagbakod sa duta.

19 Kag gani makita naton kon daw ano kamaluluy-on kag katarong ang tanan nga pagpakigbagay sang Ginuo, sa pagtuman sang tanan niya nga pulong sa mga anak sang katawhan; huo, makita naton nga ang iya mga pulong napamatud-an, bisan sa sini nga tion, nga iya ginhambal kay Lehi nga nagasiling:

20 Bulahan ikaw kag ang imo mga anak; kag pagabugayan sila; kon magtuman sila sang akon mga kasugoan magauswag sila sa duta. Apang dumduma, kon indi sila magtuman sang akon mga kasugoan pagasikwayon sila sa presensya sang Ginuo.

21 Kag makita naton nga ining mga promisa napamatud-an na sa katawhan ni Nefi; kay ang ila mga pag-ilinaway kag ang ila mga pagbinaisay, huo, ang ila mga pagpamatay, kag ang ila mga pagpangagaw, kag ila pagsimba sa mga dios-dios, ang ila mga pagkamakihilawason, kag ang ila mga kangil-aran, nga yara sa ila, ang nagdala sa ila sang ila mga giyera kag sang ila mga kalaglagan.

22 Kag inang mga matutum sa pagtuman sang mga kasugoan sang Ginuo ginluwas sa tanan nga tinion, samtang linibo sang ila malain nga mga kauturan ang gintugyan sa pagkaulipon, ukon sa pagkapatay paagi sa espada, ukon sa pag-usmod sa pagkawala’y pagtuo, kag magsimpon sa mga Lamanhon.

23 Apang tan-awa wala pa gid sing mas malipayon nga tion sa katawhan ni Nefi, halin sang mga adlaw ni Nefi, sangsa mga adlaw ni Moroni, huo, bisan sa sini nga tion, sa ika-beynte uno nga tuig sang pagginahum sang mga hukom.

24 Kag natabo ini nga ang ika-beynte dos nga tuig sang pagginahum sang mga hukom natapos man sa paghidaet; huo, kag ang ika-beynte tres man nga tuig.

25 Kag natabo ini nga sa pagsugod sang ika-beynte kwatro nga tuig sang pagginahum sang mga hukom, nangin may paghidaet man kuntani sa katawhan ni Nefi kon indi tungod sa isa ka pagbinaisay nga natabo sa tunga nila parte sa duta sang Lehi, kag sa duta sang Morianton, nga nagatambi sa mga dulonan sang Lehi; nga pareho nga yara sa mga dulonan nga malapit sa baybayon.

26 Kay tan-awa, ang katawhan nga nagapanag-iya sang duta sang Morianton nag-angkon sing isa ka bahin sang duta sang Lehi; gani nagsugod nga may mainit nga pagbinaisay sa tunga nila, sa bagay nga ang katawhan sang Morianton nagkapot sang mga armas batok sa ila mga kauturan, kag determinado sila paagi sa espada sa pagpatay sa ila.

27 Apang tan-awa, ang katawhan nga nagapanag-iya sang duta sang Lehi nagpinalagyo padulong sa kampo ni Moroni, kag nagdangop sa iya para sa bulig; kay tan-awa wala sila sa sayop.

28 Kag natabo ini nga sang nakita sang katawhan sang Morianton, nga ginapangunahan sing isa ka lalaki nga ang ngalan amo si Morianton, nga ang katawhan sang Lehi nagpinalagyo padulong sa kampo ni Moroni, tuman sila nga nagkahadlok nga basi salakayon sila sang kasoldadohan ni Moroni kag pamatyon sila.

29 Gani, gintanom ni Morianton sa ila mga tagipusuon nga malagyo sila sa duta nga pa-norte, nga nalibutan sang dalagko nga katubigan, kag angkonon ang duta nga pa-norte.

30 Kag tan-awa, natuman na nila kuntani ini nga plano, (nga nangin isa kuntani ka kabangdanan sa paghalayaon) apang tan-awa, si Morianton nga isa ka lalaki nga tuman kamainiton, gani naakig sia sa isa sang iya mga alagad nga babayi, kag gin-atake niya ini kag ginsakit sing tuman.

31 Kag natabo ini nga nalagyo sia, kag nagkadto sa kampo ni Moroni, kag ginsugiran si Moroni sang tanan nga butang parte sa amo nga bagay, kag parte man sa ila tinutuyo nga magpalagyo padulong sa duta pa-norte.

32 Karon tan-awa, ang katawhan nga yara sa duta nga Bugana, ukon sa mas maathag sa Moroni, nagkahadlok nga magapamati sila sa mga pulong ni Morianton kag magbuylog sa iya katawhan, kag sa sini maangkon niya ang mga bahin sang duta, nga magapahamtang sang kabangdanan sang malubha nga mga kadangatan sa katawhan ni Nefi, huo, nga ang amo nga mga kadangatan magaresulta sa pagkawasak sang ila kahilwayan.

33 Gani si Moroni nagpadala sing isa ka kasoldadohan, upod ang ila kampo, agud unahan ang katawhan ni Morianton, agud tapnaon ang ila pagpalagyo padulong sa duta pa-norte.

34 Kag natabo ini nga wala nila sila maunahi tubtob nga nakalab-ot sila sa mga dulonan sang duta nga Kamingaw; kag didto naunahan nila sila, malapit sa makitid nga alagyan nga nagapadulong malapit sa dagat padulong sa duta pa-norte, huo, malapit sa dagat, sa weste kag sa este.

35 Kag natabo ini nga ang kasoldadohan nga ginpadala ni Moroni, nga ginapangunahan sing isa ka lalaki nga ang ngalan amo si Teancum, nagsugata sa katawhan ni Morianton; kag sa pagkabatinggilan sang katawhan ni Morianton, (nga ginpaisog sang iya kalainan kag sang iya nagapang-into nga mga pulong) nga isa ka inaway ang nagsugod sa tunga nila, sa diin napatay ni Teancum si Morianton kag ginpierde ang iya kasoldadohan, kag gindala sila nga mga bihag, kag nagbalik sa kampo ni Moroni. Kag gani natapos ang ika-beynte kwatro nga tuig sang pagginahum sang mga hukom sa katawhan ni Nefi.

36 Kag gani napabalik ang katawhan ni Morianton. Kag sa ila pagpakighisugot nga amligan ang paghidaet gindala sila pabalik sa duta sang Morianton, kag natabo ang pag-isa sa tunga nila kag sang katawhan sang Lehi; kag gindala man sila pabalik sa ila mga kadutaan.

37 Kag natabo ini nga sa amo man nga tuig nga ang paghidaet napanumbalik sa katawhan ni Nefi, nga si Nefias, ang ika-duha nga puno nga hukom, napatay, pagkatapos nga nakapungko sa hukom-lingkuranan sing may perpekto nga katarong sa atubang sang Dios.

38 Apang, ginbalibaran niya si Alma sa pagkapot sinang mga kasulatan kag sinang mga butang nga ginakabig ni Alma kag sang iya mga amay nga labing sagrado; gani ginhatag ni Alma ang mga ini sa iya anak nga si Helaman.

39 Tan-awa, natabo ini nga ang anak nga lalaki ni Nefias amo ang napilian sa pagpungko sa hukom-lingkuranan, bilang bulos sa iya amay; huo, napilian sia nga puno nga hukom kag gobernador sang katawhan, upod ang isa ka panumpa kag sagrado nga ordinansa sa paghukom sing matarong, kag sa pag-amlig sang paghidaet kag sang kahilwayan sang katawhan, kag sa pagtugot sa ila sang ila sagrado nga mga pribilihiyo sa pagsimba sang Ginuo nga ila Dios, huo, sa pagsakdag kag pagpapabilin sang kawsa sang Dios sa bug-os niya nga mga inadlaw, kag sa pagdala sang mga malain sa hustisya suno sa ila krimen.

40 Karon tan-awa, ang iya ngalan amo si Pahoran. Kag si Pahoran nagpungko sa lingkuranan sang iya amay, kag nagsugod sang iya pagginahum sa katawhan ni Nefi sa hingapusan sang ika-beynte kwatro nga tuig.