1 Kag karon, natabo ini, sa ika-beynte sais nga tuig sang pagginahum sang mga hukom sa katawhan ni Nefi, tan-awa, sang nakabugtaw ang mga Lamanhon sa una nga aga sang una nga bulan, tan-awa, natukiban nila nga patay na si Amalikia sa iya kaugalingon nga tolda; kag nakita man nila nga si Teancum nakahanda na sa pagpakig-away sa ila sa sina nga adlaw.

2 Kag karon, sang nakita ini sang mga Lamanhon kinulbaan sila; kag ginbayaan nila ang ila plano sa pagpanglakaton padulong sa duta pa-norte, kag nag-isol upod ang tanan nila nga kasoldadohan padulong sa siyudad sang Mulek, kag nangita sang pangamlig sa ila mga pamakod.

3 Kag natabo ini nga ang utod ni Amalikia amo ang pinili nga hari sang katawhan; kag ang iya ngalan amo si Ammoron; gani si haring Ammoron, ang utod ni haring Amalikia, amo ang pinili nga maghari bulos sa iya.

4 Kag natabo ini nga nagsugo sia nga dapat huptan sang iya katawhan yadtong mga siyudad nga ila nakuha paagi sa pagpaagay sang dugo; kay wala sila sing nakuha nga ano man nga mga siyudad luwas lang nga nadulaan sila sing madamo nga dugo.

5 Kag karon, nakita ni Teancum nga ang mga Lamanhon determinado sa paghupot sadtong mga siyudad nga ila naagaw, kag yadtong mga bahin sang kadutaan nga ila naangkon; kag nakita man nga tuman ang ila kadamuon, naghunahuna si Teancum nga indi maayo nga tilawan niya nga salakayon sila sa ila mga kuta.

6 Apang ginpapabilin niya ang iya mga tawo sa palibot, nga daw nagahimo sang pagpanghanda para sa giyera; huo, kag matuod gid nga nagahanda sia nga pangapinan ang iya kaugalingon batok sa ila, paagi sa paghimo sang mga kuta sa palibot kag paghanda sang mga lugar nga palanagoan.

7 Kag natabo ini nga nagpadayon sia sa paghanda para sa giyera tubtob nga si Moroni nakapadala sing dako nga kadamuon sang mga tinawo agud pabakuron ang iya kasoldadohan.

8 Kag si Moroni nagpadala man sing mga mando sa iya nga dapat niya huptan ang tanan nga bihag nga nahulog sa iya mga kamot; kay pareho nga ang mga Lamanhon nakadakop sang madamo nga bihag, nga dapat niya huptan ang tanan nga bihag nga mga Lamanhon bilang panggawad para sinang mga nadakpan sang mga Lamanhon.

9 Kag nagpadala man sia sing mando sa iya nga dapat niya pamakuran ang duta nga Bugana, kag amligan ang makitid nga alagyan nga nagapadulong sa duta pa-norte, kay basi maangkon sang mga Lamanhon ina nga duta kag makaangkon sing gahum sa pagtublag sa ila sa tagsa ka bahin.

10 Kag si Moroni nagpadala pa gid sa iya, nga nagapangabay sa iya nga mangin matutum sa pag-amlig sina nga bahin sang duta, kag magpangita sia sang tagsa ka oportunidad sa pagsilot sa mga Lamanhon dira dapit, tubtob sa iya masarangan, agud basi mahimo nga makuha niya liwat paagi sa taktika ukon sa iban pa nga paagi yadtong mga siyudad nga naagaw halin sa ila mga kamot; kag iya man pamakuran kag palig-onon ang mga siyudad sa palibot, nga wala nahulog sa mga kamot sang mga Lamanhon.

11 Kag nagsiling man sia sa iya, luyag ko magkadto sa imo, apang tan-awa, ang mga Lamanhon nagasalakay sa amon sa mga dulonan sang duta malapit sa weste nga dagat; kag tan-awa, magabato ako sa ila, gani indi ako makakadto sa imo.

12 Karon, ang hari (si Ammoron) naghalin sa duta sang Zarahemla, kag nagpahibalo sa reyna parte sa kamatayon sang iya utod nga lalaki, kag nakapanipon sing dako nga kadamuon sang mga tinawo, kag nagsulong batok sa mga Nefinhon malapit sa mga dulonan sang weste nga dagat.

13 Kag gani nagtinguha sia sa pagtublag sang mga Nefinhon, kag sa pagpalagas palayo sa bahin sang ila mga puwersa sa sina nga bahin sang duta, samtang ginsugo niya inang mga ginbilin niya nga puy-an ang mga siyudad nga iya naagaw, agud ila man matublag ang mga Nefinhon sa mga dulonan malapit sa este nga dagat, kag angkonon ang ila mga kadutaan tubtob sa ila masarangan, suno sa gahum sang ila mga kasoldadohan.

14 Kag gani ang mga Nefinhon yara sa sinang peligroso nga mga kahimtangan sa hingapusan sang ika-beynte sais nga tuig sang pagginahum sang mga hukom sa katawhan ni Nefi.

15 Apang tan-awa, natabo ini, sa ika-beynte siyete nga tuig sang pagginahum sang mga hukom, nga si Teancum, sa mando ni Moroni—nga nagpahamtang sang mga kasoldadohan agud amligan ang sur kag ang weste nga mga dulonan sang kadutaan, kag nakasugod sang iya pagpanglakaton padulong sa duta nga Bugana, agud mabuligan niya si Teancum upod ang iya mga tinawo sa pagbawi sang mga siyudad nga nadula sa ila—

16 Kag natabo ini nga si Teancum nakabaton sing mga mando sa paghimo sang pagsalakay sa siyudad sang Mulek, kag sa pagbawi sini kon mahimo.

17 Kag natabo ini nga si Teancum naghimo sing mga pagpanghanda agud magsalakay sa siyudad sang Mulek, kag magsulong upod ang iya kasoldadohan batok sa mga Lamanhon; apang nakita niya nga indi niya mahimo nga madaug sila samtang yara sila sa ila mga pamakod; gani ginbayaan niya ang iya mga plano kag nagbalik liwat sa siyudad nga Bugana, agud maghulat sa pag-abot ni Moroni, agud makabaton sia sing kusog sa iya kasoldadohan.

18 Kag natabo ini nga si Moroni nag-abot upod ang iya kasoldadohan sa duta nga Bugana, sa hingapusan nga bahin sang ika-beynte siyete nga tuig sang pagginahum sang mga hukom sa katawhan ni Nefi.

19 Kag sa pagsugod sang ika-beynte otso nga tuig, sanday Moroni kag Teancum kag madamo sang puno nga mga kapitan naghiwat sing isa ka konseho sang giyera—kon ano ang ila dapat himuon agud nga mapagwa nila ang mga Lamanhon agud magpakig-away batok sa ila; ukon agud nga sa kon ano man nga paagi mahimo nila sila nga maganyat sa paggwa sa ila mga pamakod, agud makakuha sila sing bentaha sa ila kag mabawi ang siyudad sang Mulek.

20 Kag natabo ini nga nagpadala sila sing mga emisaryo sa kasoldadohan sang mga Lamanhon, nga nagapangapin sang siyudad sang Mulek, sa ila lider, nga ang ngalan amo si Jacob, nga nagapangabay sa iya nga maggwa sia upod ang iya mga kasoldadohan agud atubangon sila sa mga kapatagan sa tunga sang duha ka siyudad. Apang tan-awa, si Jacob, nga isa ka Zoramnon, indi maggwa upod ang iya kasoldadohan agud atubangon sila sa mga kapatagan.

21 Kag natabo ini nga si Moroni, nga nawad-an sing paglaum nga maatubang sila sa patas nga inaway, gani, nagdesisyon sia sa isa ka plano agud maganyat niya ang mga Lamanhon nga maggwa sa ila mga pamakod.

22 Gani nagsugo sia nga si Teancum magdala sing diutay lang nga tinawo kag maglakat padulhog malapit sa baybayon; kag si Moroni kag ang iya kasoldadohan, sa gab-i, naglakat sa kamingawan, sa weste sang siyudad sang Mulek; kag gani, pagkaaga, sang matukiban sang mga bantay sang mga Lamanhon sanday Teancum, nagdalagan sila kag ginsugid ini kay Jacob, nga ila lider.

23 Kag natabo ini nga ang mga kasoldadohan sang mga Lamanhon nagsulong batok kanday Teancum, nga nagahunahuna paagi sa ila kadamuon nga madaug nila si Teancum tungod sang ila kadiutayon. Kag sang nakita ni Teancum ang mga kasoldadohan sang mga Lamanhon nga nagasalakay batok sa ila nagsugod sia sa pag-isol padulhog malapit sa baybayon, pa-norte.

24 Kag natabo ini nga sang nakita sang mga Lamanhon nga nagsugod sia sa pagpalagyo, nagpakaisog sila kag ginlagas sila sing may kapagsik. Kag samtang ginadala palayo ni Teancum ang mga Lamanhon nga nagalagas sa ila sa wala sing pulos, tan-awa, nagsugo si Moroni nga isa ka bahin sang iya kasoldadohan nga upod sa iya magsulong padulong sa siyudad, kag agawon ini.

25 Kag amo ini ang ila ginhimo, kag ginpamatay ang tanan sadtong nabilin agud pangapinan ang siyudad, huo, ang tanan sadtong indi mag-ampo sang ila mga armas sa giyera.

26 Kag gani naagaw ni Moroni ang siyudad sang Mulek paagi sa isa ka bahin sang iya kasoldadohan, samtang nagasulong sia upod ang nabilin sang iya kasoldadohan agud atubangon ang mga Lamanhon kon magbalik sila halin sa paglagas kay Teancum.

27 Kag natabo ini nga ginlagas sang mga Lamanhon sanday Teancum tubtob nga nag-abot sila malapit sa siyudad nga Bugana, kag dayon gin-atubang sila ni Lehi kag sang diutay nga kasoldadohan nga ginbilin agud pangapinan ang siyudad nga Bugana.

28 Kag karon tan-awa, sang malantawan sang puno nga mga kapitan sang mga Lamanhon si Lehi upod ang iya kasoldadohan nga nagasalakay batok sa ila, nagpinalagyo sila sa tuman nga kagumon, kay basi indi na nila maangkon ang siyudad sang Mulek antes sila malab-ot nanday Lehi; kay ginakapoy na sila tungod sang ila pagsulong, kag ang mga tinawo ni Lehi mga mapagsik pa.

29 Karon wala mahibal-i sang mga Lamanhon nga si Moroni yara nagasunod sa ila likod upod ang iya kasoldadohan; kag ang ginakahadlokan lamang nila amo si Lehi kag ang iya mga tinawo.

30 Karon indi luyag ni Lehi nga malab-ot sila tubtob nga maatubang nila si Moroni kag ang iya kasoldadohan.

31 Kag natabo ini nga antes nakaisol sing malayo ang mga Lamanhon nalibutan na sila sang mga Nefinhon, sang mga tinawo ni Moroni sa isa ka bahin, kag sang mga tinawo ni Lehi sa pihak, nga ang tanan sa ila mga mapagsik kag puno sang kusog; apang ang mga Lamanhon ginakapoy na tungod sang ila malawig nga paglakat.

32 Kag ginmandoan ni Moroni ang iya mga tinawo nga salakayon nila sila tubtob nga iampo nila ang ila mga armas sa giyera.

33 Kag natabo ini nga si Jacob, nga amo ang ila lider, nga isa man ka Zoramnon, kag may di-malupig nga espiritu, ginpangunahan niya ang mga Lamanhon sa pagpakig-away nga may tuman nga kaakig batok kay Moroni.

34 Si Moroni nga yara sa ruta sang ila pagsulong, gani si Jacob determinado sa pagpatay sa ila kag hawanan ang iya alagyan patabok sa siyudad sang Mulek. Apang tan-awa, si Moroni kag ang iya mga tinawo mas mabaskog; gani wala sila naghatag sing alagyan sa atubang sang mga Lamanhon.

35 Kag natabo ini nga nag-away sila sa magtimbang nga bahin nga may tuman nga kaakig; kag may madamo nga nagkalamatay sa magtimbang nga bahin; huo, kag si Moroni napilasan kag si Jacob napatay.

36 Kag si Lehi nagdutdot sa ila likod nga may dako nga kaakig upod ang iya kusganan nga mga tinawo, sa bagay nga ang mga Lamanhon sa likod nag-ampo sang ila mga armas sa giyera; kag ang nagkalabilin sa ila, nga tuman nga nagatalang-talang, indi na makahibalo kon diin makadto ukon magsalakay.

37 Karon si Moroni nga nakakita sang ila pagtalang-talang, nagsiling sia sa ila: Kon dal-on ninyo diri ang inyo mga armas sa giyera kag itugyan ang mga ini, tan-awa, ipaiway namon ang pagpaagay sang inyo dugo.

38 Kag natabo ini nga sang nabatian sang mga Lamanhon ining mga pulong, ang ila puno nga mga kapitan, ang tanan nga wala nagkalamatay, nagpalapit kag ginhaboy ang ila mga armas sa giyera sa tiilan ni Moroni, kag ginsugo man ang ila mga tinawo nga amo man ang ila himuon.

39 Apang tan-awa, madamo ang indi; kag inang mga nagpangindi sa pagtugyan sang ila mga espada ginpangdakop kag gingapos, kag ang ila mga armas sa giyera ginpanguha sa ila, kag ginpilit sila nga maglakat upod sa ila mga kauturan padulong sa duta nga Bugana.

40 Kag karon ang kadamuon sang mga bihag nga ginpangdala nagsobra pa sa kadamuon sadtong mga nagkalamatay, huo, sobra pa sangsa sadtong mga nagkalamatay sa magtimbang nga bahin.