1 Kag natabo ini nga nagpahamtang sila sing mga bantay sa mga bihag nga mga Lamanhon, kag ginpilit sila nga magsugod kag ilubong ang ila mga patay, huo, kag ang mga patay man sang mga Nefinhon nga ginpamatay; kag si Moroni nagbutang sing mga tawo sa ila agud bantayan sila samtang nagahikot sila sang ila mga hilimuon.

2 Kag si Moroni nagkadto sa siyudad sang Mulek upod kay Lehi, kag ginsakop ang siyudad kag ginhatag ini kay Lehi. Karon tan-awa, ining si Lehi isa ka lalaki nga nakaupod ni Moroni sa kalabanan sang iya nga mga pagpakig-away; kag isa sia ka lalaki nga pareho kay Moroni, kag nagkasadya sila sa kaluwasan sing isa kag isa; huo, pinalangga nila ang isa kag isa, kag pinalangga man sila sang tanan nga katawhan ni Nefi.

3 Kag natabo ini nga pagkatapos nga napanglubong sang mga Lamanhon ang ila mga patay kag amo man sang mga patay sang mga Nefinhon, ginpalakat sila pabalik sa duta nga Bugana; kag si Teancum, suno sa mga mando ni Moroni, nagsugo nga magsugod sila sa pagpangabudlay sa pagkutkot sang kanal palibot sa duta, ukon sa siyudad, nga Bugana.

4 Kag nagsugo sia nga magpatindog sila sang pader nga mga troso sa nasulod nga pangpang sang kanal; kag gintampok nila ang duta halin sa kanal sa pagsagang sang pader nga mga troso; kag gani ginpaobra nila ang mga Lamanhon tubtob nga napalibutan nila ang siyudad sang Bugana sang mabakod nga pader sang mga troso kag duta, nga tuman kataas.

5 Kag ini nga siyudad nangin isa ka tuman kalig-on nga pamakod halin sadto; kag sa sini nga siyudad ginbantayan nila ang mga bihag nga mga Lamanhon; huo, bisan sa sulod sang pader nga ila ginsugo sa ila nga ipatindog paagi sa ila kaugalingon nga mga kamot. Karon si Moroni napilitan nga suguon ang mga Lamanhon sa pag-obra; tungod mahapos ang magbantay sa ila samtang nagaobra sila; kag luyag niya nga handa ang tanan sang iya mga puwersa kon magsalakay sia sa mga Lamanhon.

6 Kag natabo ini nga si Moroni nagmadinalag-on batok sa isa sang pinakadako nga mga kasoldadohan sang mga Lamanhon, kag nabawi ang pagpanag-iya sang siyudad sang Mulek, nga isa sang pinakamalig-on nga mga pamakod sang mga Lamanhon sa duta sang Nefi; kag gani nakapatindog man sia sang pamakod agud huptan ang iya mga bihag.

7 Kag natabo ini nga wala na sia nagtinguha pa sang inaway batok sa mga Lamanhon sa sina nga tuig, kundi nga gingamit niya ang iya mga tinawo sa paghanda para sa giyera, huo, kag sa paghimo sang mga pamakod agud magbantay batok sa mga Lamanhon, huo, kag sa pagluwas sang ila mga babayi kag sang ila mga anak halin sa gutom kag pag-antos, kag sa pagpanigana sang pagkaon para sa ila mga kasoldadohan.

8 Kag karon natabo ini nga ang mga kasoldadohan sang mga Lamanhon, sa weste nga dagat, sa sur, samtang wala si Moroni tungod sang pila ka mga padihot sa tunga sang mga Nefinhon, nga nangin kabangdanan sang ila mga pag-ilinaway, nakakuha sing bentaha sa mga Nefinhon, huo, sa bagay nga naangkon nila ang pila sang ila mga siyudad sa sina nga bahin sang duta.

9 Kag gani tungod sang kalainan sa ila mismo, huo, tungod sang mga pag-ilinaway kag mga padihot sa ila mismo nabutang sila sa labing peligroso nga mga kahimtangan.

10 Kag karon tan-awa, may pila ako ka bagay nga ihambal parte sa katawhan ni Amon, nga, sa ginsuguran, mga Lamanhon; apang paagi kay Amon kag sa iya mga kauturan, ukon sa mas maathag paagi sa gahum kag pulong sang Dios, nahaylo sila sa Ginuo; kag gindala sila padulhog sa duta sang Zarahemla, kag sugod sadto nga tion gin-amligan sang mga Nefinhon.

11 Kag tungod sang ila panumpa nadumilian sila sa pagkapot sang mga armas batok sa ila mga kauturan; kay nakahimo sila sing isa ka panumpa nga indi na gid sila magpaagay pa sang dugo; kag suno sa ila panumpa nagkalamatay sila kuntani; huo, gintugotan na lang nila kuntani ang ila mga kaugalingon nga mahulog sa mga kamot sang ila mga kauturan, kon indi tungod sang kaluoy kag sang tuman nga gugma nga may yara kanday Amon kag ang iya mga kauturan para sa ila.

12 Kag sa sini nga kabangdanan gindala sila padulhog sa duta sang Zarahemla; kag sugod sa sina nga tion gin-amligan sila sang mga Nefinhon.

13 Apang natabo ini nga sang nakita nila ang peligro, kag ang madamo nga mga pag-antos kag mga kabudlayan nga ginbatas sang mga Nefinhon para sa ila, nagbatyag sila sang kaluoy kag luyag nila nga magkapot sang mga armas sa pagpangapin sang ila pungsod.

14 Apang tan-awa, samtang nagahana na sila nga magkapot sang ila mga armas sa giyera, gindaug sila sang mga pagpanghaylo ni Helaman kag sang iya mga kauturan, kay nagahana na sila nga maglapas sang panumpa nga ila ginhimo.

15 Kag si Helaman nagakahadlok nga basi sa paghimo sini madulaan sila sang ila mga kalag; gani ang tanan nga nagsulod sa sini nga kasugtanan napilitan sa pagtan-aw sang ila mga kauturan nga nagaubog sa ila mga pag-antos, sa ila peligroso nga mga kahimtangan sa sini nga tion.

16 Apang tan-awa, natabo ini nga may madamo sila nga mga anak nga lalaki nga wala nakasulod sa kasugtanan nga indi sila magkapot sang ila mga armas sa giyera agud pangapinan ang ila mga kaugalingon batok sa ila mga kaaway; gani nagtipon sila sang ila mga kaugalingon sa sini nga tion, ang tanan nga makasarang magkapot sang mga armas, kag gintawag nila ang ila mga kaugalingon nga mga Nefinhon.

17 Kag nagsulod sila sa isa ka kasugtanan nga magpakig-away para sa kahilwayan sang mga Nefinhon, huo, nga mag-amlig sang duta tubtob nga sa paghatag sang ila mga kabuhi; huo, bisan nga nakighisugot sila nga indi gid nila pag-iampo ang ila kahilwayan, kundi nga magpakig-away sila sa tanan nga sirkumstansya agud amligan ang mga Nefinhon kag ang ila mga kaugalingon halin sa pagkaulipon.

18 Karon tan-awa, may duha ka libo sinang mga pamatan-on nga nagsulod sa sining kasugtanan kag nagkapot sang ila mga armas sa giyera agud pangapinan ang ila pungsod.

19 Kag karon tan-awa, tungod wala gid sila halin sadto nangin pabug-at sa mga Nefinhon, sila karon sa sini nga tion nangin isa ka dako nga bulig man; kay nagkapot sila sang ila mga armas sa giyera, kag luyag nila nga si Helaman ang ila mangin lider.

20 Kag tanan sila mga pamatan-on, kag tuman sila kadalayawon sa kaisog, kag amo man sa kusog kag kapagsik; apang tan-awa, indi lamang ini—mga lalaki sila nga tampad sa tanan nga tion sa bisan ano nga butang nga ginatugyan sa ila.

21 Huo, mga lalaki sila sang kamatuoran kag kaligdong kay gintudloan sila sa pagtuman sang mga kasugoan sang Dios kag sa paglakat sing matarong sa iya atubang.

22 Kag karon natabo ini nga si Helaman naglakat sa unahan sang iya duha ka libo ka lamharon nga mga soldado, bilang suporta sa katawhan sa mga dulonan sang duta sa sur nga malapit sa weste nga dagat.

23 Kag gani natapos ang ika-beynte otso nga tuig sang pagginahum sang mga hukom sa katawhan ni Nefi.