1 ’Me joale ho ile ha etsahala hore qalong ea selemo sa mashome a mararo sa puso ea baahloli, ka letsatsi la bobeli la khoeli ea pele, Moroni o ile a fumana lengolo le tsoang ho Helamane, le bolelang boemo ba litaba ba sechaba se karolong eo ea lefats’e.

2 ’Me a na ke mantsoe ao a a ngotseng, a re: Ngoaneso ea ratoang haholo, Moroni, le joalo ka ho Morena litsietsing tsa ntoa ea rona, bona, ngoaneso ea ratoang, ke na le ha nyane ho u bolella malebana le ntoa ea rona karolong ena ea lefats’e.

3 Bona, likete tse peli tsa bara ba banna bao Ammone a ileng a ba tlisa tlase ho tsoa lefats’eng la Nefi—joale o ile oa tseba hore bana ke litloholo tsa Lamane, eo e neng e le mora oa letsibolo oa ntat’a rona Lehi;

4 Joale ha ke hloke ho u hopotsa malebana le meetlo ea bona kapa ho se lumele ha bona, hobane uena ua tseba malebana le lintho tsena tsohle.

5 Ka baka leo ho lekane ho ’na hore ke u bolelle hore likete tse peli tsa bahlankana bana ba ile ba nka libetsa tsa bona tsa ntoa, ’me ba lakatsa hore ke be moetapele oa bona; ’me re tlile ho tla sireletsa naha ea rona.

6 ’Me joale hape u ea tseba malebana le selekane seo bo ntat’a bona ba se entseng, hore ba keke ba nka libetsa tsa bona tsa ntoa khahlanong le ba habo bona ho ts’olla mali.

7 Empa ka selemo sa mashome a mabeli a metso e ts’eletseng, ha ba bona mahlomola a rona le litsietsi tsa rona bakeng sa bona, ba ne ba le makhatheng a ho roba selekane seo ba neng ba se entse ’me ba nke libetsa tsa bona tsa ho re sireletsa.

8 Empa ke ne nkeke ka ba lumella hore ba tle ba robe selekane sena seo ba neng ba se entse, ke nahana hore Molimo o tla re matlafatsa, haholo hoo hore re tle re se ke ra sotleha ho feta ka lebaka la ho phethisa boitlamo boo ba neng ba bo nkile.

9 Empa bona, ke ena ntho e le ngoe eo ho eona re ka fumanang nyakallo e kholo. Hobane bona, ka selemo sa mashome a ts’eletseng, ’na, Helamane, ke ile ka hoanta ka hloohong ea bahlankana bana ba likete li peli ho ea motseng oa Judea, ho ea thusa Antipase, eo u mo khethileng ho ba moetapele holima sechaba sa karolong eo ea lefats’e.

10 ’Me ke ile ka kenya bara baka ba likete tse peli, ( hobane ba ne ba lokeleha ho bitsoa bara) ho lebotho la Antipase, matlafatsong eo Antipase a ileng a nyakalla ka ho fetisisa, hobane bona, lebotho la hae le ne le ile la fokotsoa ke Ba-Lamane hobane mabotho a bona a ile a bolaea palo e kholo ea banna ba rona, hobane ke ka lebaka leo re tlameha ho hlonama.

11 Le ha hole joalo, re ka nna ra its’elisa ntlheng ena, hore ba shoeletse lebaka la naha ea bona le Molimo oa bona, ee, ’me ba thabile.

12 ’Me Ba-Lamane hape ba ne ba bolokile bats’oaruoa ba bangata, bohle bao e leng balaoli ba baholo, hobane ha hona e mong eo ba mo bolokileng a phela. ’Me re nahana hore ka nako ena ba lefats’eng la Nefi; ho joalo haeba ha ba ea bolaoa.

13 ’Me joale ena ke metse eo Ba-Lamane ba fumaneng ho e rua ka ts’ollo ea mali a banna ba rona ba linatla ba bangata ha kaalo.

14 Lefats’e la Manti, kapa motse oa Manti, le motse oa Zeezrome, le motse oa Kumeni, le motse oa Antipara.

15 ’Me ke eona metse ena eo ba ileng ba e rua ha ba fihla motseng oa Juda; ’me ke ile ka fumana Antipase le banna ba hae ba sehla ka matla ho matlafatsa motse oo.

16 Ee, ’me ba ne ba na le khatello ’meleng le moeeng, hobane ba ne ba ile ba loana ka sebete mots’eare le ho sehla bosiu ho boloka metse ea bona; ’me ke joana ba ileng ba sotleha haholo ka mahlomola a mefuta eohle.

17 ’Me joale ba ne ba ikemiselitse ho hapa sebakeng sena kapa ba shoe; ka baka leo u ka nahana hore lebotho lena le lenyane leo ke tlileng le lona; ee, bara bao baka, ba ile ba ba fa ts’epo e kholo le nyakallo e ngata.

18 ’Me joale ho ile ha etsahala hore ha ba-Lamane ba bona hore Antipase o fumane matla a maholo ho feta lebothong la hae, ba ile ba qobelloa ke litaelo tsa Ammorone ho tla khahlanong le motse oa Juda, kapa khahlonong le rona, ho tla loana.

19 ’Me ke joana re ileng ra hauheloa ke Morena; hobane ha e ne eba ba ile ba tla khahlanong le rona bofokoling bona ba rona mohlomong ba ka be ba ile ba timetsa lebotho la rona le lenyane; empa ke joana re ileng ra baballoa.

20 Ba ile ba laeloa ke Ammorone ho boloka metse eo ba neng ba e nkile. ’Me ke joana e bileng pheletso ea selemo sa mashome a ts’eletseng. ’Me ka qalong ea selemo sa mashome a supileng re ne re hlophisitse motse oa rona le rona bakeng sa ts’ireletso.

21 Joale re ne re lakatsa hore Ba-Lamane ba tle ba tle holim’a rona; hobane re ne re sa lakatse ho etsa tlhaselo holim’a bona liqhobosheaneng tsa bona.

22 ’Me ho ile ha etsahala hore re ile ra boloka lihloela ho potoloha, ho lisa metsamao ea Ba-Lamane, hore ba tle ba se re fete bosiu kapa mots’eare ho etsa tlhaselo holim’a metse e meng ea rona e neng e le ho isa ng’a ea leboea.

23 Hobane re ne re tseba hore metseng eo ba ne ba sena matla a lekaneng ho kopana le bona; ka baka leo re ne re lakatsa hore, haeba ba tla feta pel’a rona, ho ba oela kamorao, ’me joana re tle re ba hlasele kamorao ka nako e ts’oanang ba hlaseloa ka pele. Re ne re nahana hore re ka ba hlola; empa bona, re ile ra phoqeha takatsong ena ea rona.

24 Ba ne ba sa qeke ho feta pela rona ka lebotho la bona le felletseng, le ha ho le joalo ba sa qeke le ka karolo, e se re ba se ke ba ba le matla a lekaneng ’me ba tle ba oele.

25 Le ha ho le joalo ba ne ba sa qeke ho hoantela tlase khahlanong le motse oa Zarahemla; le ha ho le joalo ba sa qeke ho ts’ela hlooho ea Sidone, holimo ho ea motseng oa Nefiha.

26 ’Me ke joana, ka mabotho a bona, ba neng ba ikemiselitse ho boloka metse eo ba neng ba e nkile.

27 ’Me ho ile ha etsahala hore khoeling ea bobeli ea selemo sena, ho ile ha tlisoa ho rona lijo tse ngata ho tsoa ho bo ntat’a ba bara bao ba ka ba likete li peli.

28 ’Me hape ho ile ha romeloa ho rona banna ba likete li peli ho tsoa lefats’eng la Zarahemla. ’Me ke joana re neng re itokisitse ka banna ba likete li leshome, le lijo bakeng sa bona, ’me hape le bakeng sa basali ba bona le bana ba bona.

29 ’Me Ba-Lamane, joana ka ho bona mabotho a rona a eketseha ka letsatsi, le lijo li fihla bakeng sa ts’ehetso ea rona, ba ile ba qala ho tlala ts’abo, ’me ba qala ho phakisetsa pele, haeba ho ne ho khoneha ho beha pheletsong ho fumana lijo le matla ha rona.

30 Joale ha re bona hore Ba-Lamane ba qala ho hloka botsitso ka taba ena, re ne re lakatsa ho kenya leqheka ts’ebetsong holim’a bona; ka baka leo Antipase o ile a laela hore ke hoantele pele le bara ba ka ba banyane ho ea motseng o ahisaneng, joaloka ha eka ke jarela lijo ho ea motseng o ahisaneng.

31 ’Me re ne re tlameha ho hoantela pela motse oa Antipara, joaloka ha eka re ne re ea motseng o ka pele, meeling pel’a lebopo la leoatle.

32 ’Me ho ile ha etsahala hore re ile ra hoantela pele, joaloka ha eka ke ka lijo tsa rona, ho ea motseng oo.

33 ’Me ho ile ha etsahala hore Antipase o ile a hoantela pele ka karolo ea lebotho la hae, a siile karolo e setseng ho boloka motse oo. Empa ha a ka a hoantela pele hofihlela ke tsamaile le lebotho la ka le lenyane, ’me ke fihlile pel’a motse oa Antipara.

34 ’Me joale, motseng oa Antipara ho ne ho emisitsoe lebotho le matla ka ho fetisa la Ba-Lamane; ee, ba baloang ka bongata ka ho fetisa.

35 ’Me ho ile ha etsahala hore ha ba se ba tsebisitsoe ke lihloela tsa bona, ba ile ba tla pele ka lebotho la bona ’me ba hoanta khahlanong le rona.

36 ’Me ho ile ha etsahala hore re ile ra baleha ka pele ho bona ho ea ng’a ea leboea. ’Me ke joana re ileng ra etella hole lebotho le matla ka ho fetisa la Ba-Lamane.

37 Ee, esita le bohole bo boholo, haholo hoo ha ba bona lebotho la Antipase le ba lelekisa, ka matla a bona, ha ba ka ba tjekela ka ho le letona kapa le lets’ehali, empa ba ile ba pheella mohoanto oa bona ka tsela e otlolohileng kamora rona, ’me joaloka ha re ne re nahana, e ne e le boikemisetso ba bona ho re bolaea pele Antipase a ka ba fihlela, ’me sena hore ba tle ba se potapotoe ke sechaba sa rona.

38 ’Me joale Antipase, ka ho bona kotsi ea rona, o ile a eketsa lebelo la mohoanto oa lebotho la hae. Empa bona, e ne e le bosiu; ka baka leo ba ile ba sitoa ho re fihlela, le haho le joalo Antipase a sa ka a ba fihlela; ka baka leo re ile ra hloma liahelo bakeng sa bosiu boo.

39 ’Me ho ile ha etsahala hore pele ho mafube a hoseng, bona Ba-Lamane ba ne ba se ntse ba re lelekisa. Joale re ne re sena matla a lekaneng bakeng sa ho ba loants’a; ee, ke ne ke sitoa ho lumella hore bara ba ka ba banyane ba oele matsohong a bona; ka baka leo, re ile ra nts’etsa pele mohoanto oa rona, me re ile ra isa mohoanto oa rona lefelleng.

40 Joale ba ne ba sa qeke ho tjekela ka ho le letona kapa ka ho le lets’ehali e se re ba tle ba potapotoe; le ha ho le joalo le ’nna ke ne ke sa lakatse ho tjekela ka ho le letona kapa le lets’ehali e se re ba tle ba mphihlele, ’me re ne re tla sitoa ho ema khahlanong le bona, empa re bolaoe, ’me ba ne ba tla phonyoha; ’me ke joana re ileng ra baleha letsatsi lohle ho ea lefelleng, esita le ho fihlela ho le lefifi.

41 ’Me ho ile ha etsahala hore hape, ha khanya ea hoseng e fihla re ile ra bona Ba-Lamane holim’a rona, ’me re ile ra baleha ka pele ho bona.

42 Empa ho ile ha etsahala hore ha ba ka ba re phehella ho ea hole pele ba emisa; ’me e ne e le hoseng ha letsatsi la boraro la khoeli ea bosupa.

43 ’Me joale, hore na ba ne ba fihletsoe ke Antipase re ne re sa tsebe, empa ke ile ka re ho banna ba ka: Bonang, ha re tsebe empa e ka ba ba emisitse bakeng sa morero oa hore re tle re tle khahlanong le bona, hore ba tle ba re ts’oase lemeneng la bona.

44 Ka baka leo le reng lona, bara ba ka, na le tla ea khahlanong le bona ho ea loana?

45 ’Me joale ke re ho uena, moholoane oa ka ea ratoang Moroni, hore ke ne ke so bone sebete se seholo joalo, che, eseng har’a Ba-Nefi bohle.

46 Hobane joaloka ha esale ke ba bitsa bara ba ka (hobane kaofela ha bona ba ne ba le banyane) esita le joalo ba ile ba re ho ’na: Ntate, bona Molimo oa rona o na le rona, ’me a keke a lumella hore re tle re oe; joale ha re eeng; re ne re keke ra bolaea ba habo rona haeba ba ne ba ka khaohana le rona; ka baka leo ha re ee, esere ba tle ba hlole lebotho la Antipase.

47 Joale ba ne ba so ka ba loana, feela ba ne ba sa ts’abe lefu; ’me ba ne ba nahana ho feta ka tokoloho ea bo ntat’a bona ho feta ka maphelo a bona; ee, ba ne ba rutiloe ke bo ’m’a bona, hore haeba ba keke ba ba le pelaelo, Molimo o tla ba lopolla.

48 ’Me ba ile ba mphetela mantsoe a bo ’m’a bona, ba re: Ha re na pelaelo bo ’m’a rona ba ea tseba.

49 ’Me ho ile ha etsahala hore ke ile ka khutla le ba ka ba likete li peli khahlanong le Ba-Lamane ba na ba ileng ba re lelekisa. ’Me joale bona, mabotho a Antipase a ne a ile a ba fihlela, ’me ntoa e ts’abehang e ne e qalile.

50 Lebotho la Antipase ke ho khathala, ka lebaka la mohoanto oa bona o molelele ka nako e khuts’oane hakaalo, ba ne ba le haufi le ho oela matsohong a Ba-Lamane; ’me hoja ka se khutle le ba ka ba likete li peli ba ka be ba fihletse morero oa bona.

51 Hobane Antipase o ne a oetse ka sabole, le bongata ba baetapele ba hae, ka lebaka la mokhathala oa bona, o ileng oa bakoa ke lebelo la mohoanto oa bona—ka baka leo banna ba Antipase, ke ho ferekanngoa ke ho oa ha baetapele ba bona, ba ne ba qalile ho inehela ka pele ho Ba-Lamane.

52 ’Me ho ile ha etsahala hore Ba-Lamane ba ile ba khothala, ’me ba qala ho ba pheella; ’me ke joana Ba-Lamane ba neng ba ba pheeletse ka mahlahahlaha a maholo ha Helamane a fihla holim’a bona kamorao ka ba hae ba likete li peli, ’me a qala ho ba bolaea ka ho fetisisa, haholo hoo lebotho lohle la Ba-Lamane le ileng la emisa ’me la fetohela ho Helamane.

53 Joale ha sechaba sa Antipase se bona hore Ba-Lamane ba fetohetse morao, ba ile ba bokella hammoho banna ba bona ’me ba tla hape ho kamorao ha Ba-Lamane.

54 ’Me joale ho ile ha etsahala hore rona, sechaba sa Nefi, sechaba sa Antipase, le ’na le ba ka ba likete li peli, re ile ra potapota Ba-Lamane, ’me ra ba bolaea, ee, haholo hoo ba ileng ba qobelleha ho nehelana ka libetsa tsa bona tsa ntoa le bona e le bats’oaruoa ba ntoa.

55 ’Me joale ho ile ha etsahala hore ha ba se ba inehetse ho rona, bona, ke ile ka bala bahlankana bao ba ileng ba loana le ’na, ka ho ts’aba hore e se re ho bile le ba bangata ba bona ba bolailoeng.

56 Empa bona, ho nyakallo eaka e kholo, ho ne ho se na le ea mong feela oa bona ea oetseng fats’e; ee, ’me ba ne ba ile ba loana joaloka ha eka ke ka matla a Molimo; ee, ha ho ka mohla banna ba kileng ba tsejoa ba loanne ka matla a mohlolo joalo; ’me ka matla a maholo joalo ba ile ba oela holim’a Ba-Lamane, hoo ba ileng ba ba ts’osa; ’me ka lebaka lena Ba-Lamane ba ile ba inehela e le bats’oaruoa ba ntoa.

57 ’Me joaloka ha re ne re se na sebaka bakeng sa bats’oaruoa ba rona, hore re khone ho ba lebela ho ba boloka ho tsoa mabothong a Ba-Lamane, ka baka leo re ile ra ba romela lefats’eng la Zarahemla, le karolo ea banna bao ba neng ba sa bolaoa ba Antipase, le bona; ’me karolo e setseng ke ile ka e kenyeletsa ho Ba-Ammone ba ka ba kenang bonneng, ’me ra hoantela morao motseng oa Juda.