1 ’Me joale ho ile ha etsahala hore ke ile ka fumana lengolo ho tsoa ho Ammorone, morena, le bolelang hore haeba nka lokolla bats’oaruoa baa ba ntoa, bao re neng re ba nkile hore o tla lokollela motse oa Antipara ho rona.

2 Empa ke ile ka romela lengolo ho morena, hore re ne re na le bonnete ba hore mabotho a rona a ne a lekane ho nka motse oa Antipara ka matla a rona; ’me ka ho lokolla bats’oaruoa bao bakeng sa motse oo re nahana ka borona hore ha se bohlale, ’me re tla lokolla bats’oaruoa ba rona feela ka phapanyetsano.

3 ’Me Ammorone o ile a hanyetsa lengolo la ka, hobane o ne a keke a fapanyetsana bats’oaruoa; ha ho le joalo re ile ra qala ho etsa litokiso tsa ho ea khahlanong le motse oa Antipara.

4 Empa sechaba sa Antipara se ile sa sia motse oo, ’me ba balehela metseng e meng, eo ba neng ba e ruile, ho ea e matlafatsa; ’me ke joana motse oa Antipara o ileng oa oela matsohong a rona.

5 ’Me ke joana e bileng pheletso ea selemo sa mashome a mabeli a metso e robeli sa puso ea baahloli.

6 ’Me ho ile ha etsahala hore qalong ea selemo sa mashome a mabeli a metso e robong, re ile ra fumana phepelo ea lijo, hape le kekelletso lebothong la rona, ho tsoa lefats’eng la Zarahemla, le ho tsoa lefats’eng le potapotileng hohle, ho isa palong ea banna ba likete li ts’eletseng, ntle le ba mashome a ts’eletseng ba bara ba Ba-Ammone ba neng ba tlile ho tla kenella ho ba habo bona, sehlopha sa ka se senyane sa likete tse peli. ’Me joale bona, re ne re le matla, ee, ’me hape ho bile le lijo tse ngata tse tlisoang ho rona.

7 ’Me ho ile ha etsahala hore e ne e le takatso ea rona ho loana ntoa le lebotho le neng le behiloe ho sireletsa motse oa Kumeni.

8 ’Me joale bona, ke tla u bonts’a hore haufi re ile ra fihlela takatso ea rona; ee, ka lebotho la rona le matla, kapa ka karolo ea lebotho la rona le matla, re ile ra potapota, bosiu, motse oa Kumeni, hanyane pele ba ne ba tla amohela phepelo ea lijo.

9 ’Me ho ile ha etsahala hore re ile ra hloma meaho ho potoloha motse oo bakeng sa masiu a mangata; empa re ile ra robala holim’a lisabole tsa rona, le ho boloka balebeli, hore Ba-Lamane ba tle ba sitoe ho tla holim’a rona bosiu ’me ba re bolaee, e leng hoo ba ileng ba ho leka makhetlo a mangata; empa hangata kamoo ba ileng ba leka sena mali a bona a ile a ts’olloa.

10 Kamor’a nako e telele lijo tsa bona li ile tsa fihla, ’me li ne li le haufi le ho kena motseng oo bosiu. ’Me rona, ho ena le ho ba Ba-Lamane, re ne re le Ba-Nefi; ka baka leo, re ile ra ba nka le lijo tsa bona.

11 ’Me ho sa tsotellehe Ba-Lamane ho khaoloa ts’ehetsong ea bona ka mokhoa ona, ba ne ba ntse ba ikemiselitse ho boloka motse oo; ka baka leo ho ile ha fetoha ho ba molemo hore re nke lijo tseo ’me re li romele Juda, le bats’oaruoa ba rona lefats’eng la Zarahemla.

12 ’Me ho ile ha etsahala hore matsatsi a seng mangata a ne a se a fetile pele Ba-Lamane ba lahleheloa ke ts’epo eohle ea thuso; ka baka leo ba ile ba nehelana ka motse oo matsohong a rona; ’me ke joana re ileng ra fihlela merero ea rona ka ho fumana motse oa Kumeni.

13 Empa ho ile ha etsahala hore bats’oaruoa ba rona ba ne ba le bangata hoo hore, ho sa tsotellehe boholo ba lipalo tsa rona, re ile ra qobelleha ho sebelisa lebotho lohle la rona ho ba boloka, kapa ho ba bolaea.

14 Hobane bona, ba ne ba ka thoba ka lipalo tse kholo, ’me ba loane ka majoe, le ka melamu, kapa eng kapa eng eo ba neng ba ka e kenya matsohong a bona, haholo hoo re ileng ra bolaea ho feta likete tse peli tsa bona kamora hore ba inehele e le batsoaruoa ba ntoa.

15 Ka baka leo ho ile ha fetoha ho ba molemo bakeng sa rona, hore re tlise pheletsong maphelo a bona, kapa re ba lebele, ka sabole ka letsohong, ho theohela ho ea lefats’eng la Zarahemla; ’me hape lijo tsa rona li ne li sa fete ho lekana bakeng sa sechaba sa habo rona, ho sa tsotellehe seo re ileng ra se nka ho tsoa ho Ba-Lamane.

16 ’Me joale, maemong ao a hlobaetsang, e ile ea fetoha taba e tebileng haholo ho etsa qeto malebana le bats’oaruoa bana ba ntoa; le ha ho le joalo, re ile ra etsa qeto ea ho ba romela tlase lefats’eng la Zarahemla; ka baka leo re ile ra khetha karolo ea banna ba rona, ’me ra ba fa taolo holim’a bats’oaruoa ba rona ho ea tlase lefats’eng la Zarahemla.

17 Empa ho ile ha etsahala hore hosasane ba ile ba khutla. ’Me joale bona, ha rea ka ra ba botsa malebana le bats’oaruoa; hobane bona, Ba-Lamane ba ne ba re hlasetse, ’me ba khutlile ka nako ho re pholosa ho tsoa ho ho oela matsohong a bona. Hobane bona, Ammorone o ne a ile a romella phepelo e ncha ea lijo bakeng sa ts’ehetso ea bona le hape lebotho le lengata la banna.

18 ’Me ho ile ha etsahala hore banna bao ba ileng ba romeloa le bats’oaruoa ba ile ba fihla ka nako ho ba thibela, joaloka ha ba ne ba le makhatheng a ho re hlola.

19 Empa bona, sehlopha sa ka se senyane sa likete tse peli le mashome a ts’eletseng se ile sa loana ka bohale bo fetisang; ee, ba ne ba tiile ka pele ho Ba-Lamane, ’me ba ile ba fana ka lefu ho bohle ba neng ba le khahlanong le bona.

20 ’Me joaloka ha karolo e setseng ea lebotho la rona e ne e le makhatheng a ho checha kapele ho Ba-Lamane, bano ba likete li peli le mashome a ts’eletseng ba ne ba tiile ’me ba sa ts’oha.

21 Ee, ’me ba ne ba mamela le ho loanela ho phethahatsa lentsoe le leng le le leng la taelo ka bonnete; ee, ’me esita le ho latela tumelo ea bona ho ne ho phethahala ho bona; ’me ke ile ka hopola mantsoe ao ba ileng ba a bolela ho ’na hore bo ’m’a bona ba ba rutile ona.

22 ’Me joale bona, e ne le ba na bara baka, le banna bao ba neng ba khethiloe ho felehetsa bats’oaruoa, bao ho bona re kolotang tlholo ena e kholo; hobane e ne e le bona ba ileng ba otla Ba-Lamane; ka baka leo ba ile ba khannelloa morao ho ea motseng oa Manti.

23 ’Me re ile ra boloka motse oa rona oa Kumeni, ’me re ne re sa timetsoa kaofela ka sabole; le ha ho le joalo, re ne re ile ra hlaheloa ke tahleho e kholo.

24 ’Me ho ile ha etsahala hore kamor’a hore Ba-Lamane ba balehe, hanghang ke ile ka fana ka litaelo tsa hore banna ba ka ba neng ba lemetse ba tle ba tlosoe har’a ba shoeleng, ’me ka etsa hore maqeba a bona a tle a tlamisoe.

25 ’Me ho ile ha etsahala hore ho bile le ba makholo a mabeli, ho tsoa ho likete tse peli le mashome a ts’eletseng, ba ileng ba ilibana ka lebaka la tahlehelo ea mali; le ha ho le joalo, ho latela molemo oa Molimo, le ho makala ha rona ho ho holo, hape le ho nyakallo ea lebotho la rona lohle, ho ne ho sena moea o le mong oa bona o ileng oa timela; ee, le ha ho le joalo ho ne ho se na moea o mong har’a bona ea neng a sa fumana maqeba a mangata.

26 ’Me joale, paballo ea bona e ne e makatsa ho lebotho lohle la rona, hore ebe ba tla pholosoa ha ho ne ho ena le sekete sa ba habo rona ba ileng ba bolaoa. ’Me re etsa ka toka ho e amahanya le matla a mohlolo a Molimo, hobane ka lebaka la tumelo ea bona e fetisisang ho seo ba ileng ba se rutoa ho lumela—hore ho ne ho ena le Molimo ea lokileng, ’me mang kapa mang ea neng a sa belaele, hore ba tla pholosoa ka matla a hae a tsotehang.

27 Joale ena e ne e le tumelo ea bana bao ke buileng ka bona, ba banyane, ’me likelello tsa bona li tiile, ’me ba beha ts’epo ea bona ho Molimo ho tsoelepele.

28 ’Me joale ho ile ha etsahala hore kamor’a hore ke joana re ileng ra hlokomela banna ba rona ba lemetseng, ’me re bolokile ba rona ba shoeleng le hape ba shoeleng ba Ba-Lamane, ba neng ba le bangata, bona, re ile ra botsa Gid malebana le bats’oaruoa bao ba qaling ho ea tlase Zarahemla le bona.

29 Joale Gid e ne e le molaoli e moholo holim’a sehlopha se ileng sa khethoa ho ba lebela ho ea tlase lefats’eng leo.

30 ’Me joale, ana ke mantsoe ao Gid a ileng a a bolela ho ’na: Bona, re ile ra qala ho ea tlase lefats’eng la Zarahemla le bats’oaruoa ba rona. ’Me ho ile ha etsahala hore re ile ra kopana le lihloela tsa mabotho a rona, ba neng ba rometsoe kantle ho ea lebella kampo ea Ba-Lamane.

31 ’Me ba ile ba hoelehetsa ho rona, ba re—Bonang, mabotho a Ba-Lamane a hoantela ho lebana le motse oa Kumeni; ’me bonang, ba tla ba oela holimo, ee, ’me ba tla timetsa sechaba sa rona.

32 ’Me ho ile ha etsahala hore bats’oaruoa ba rona ba ile ba utloa lillo tsa bona, tse ileng tsa etsa hore ba iphe sebete; ’me ba ile ba phahama ka phetohelo khahlanong le rona.

33 ’Me ho ile ha etsahala hore ka lebaka la phetohelo ea bona re ile ra etsa hore lisabole tsa rona li ba oele holimo. ’Me ho ile ha etsahala hore ka sehlopha ba ile ba mathela holim’a lisabole tsa rona, tseo ho tsona, palo e kholo ea bona e ileng ea bolaoa; ’me karolo e setseng ea bona e ile ea phunyeletsa ’me ea baleha ho tloha ho rona.

34 ’Me bona, ha ba se ba balehile ’me re ne re sitoa ho ba fihlela, re ile ra nka mohoanto oa rona ka lebelo ho lebana le motse oa kumeni; ’me bona, re ile ra fihla ka nako hore re ka thusa ba habo rona ka ho boloka motse oo.

35 ’Me bona, re lopollotsoe hape ho tsoa matsohong a lira tsa rona. ’Me ho bokoe lebitso la Molimo oa rona; hobane bona, ke eena ea re lopollotseng; ee, ea entseng ntho ena e kholo bakeng sa rona.

36 Joale ho ile ha etsahala hore ha ’na, Helamane, ke se ke utloile mantsoe ana a Gid, ke ne ke tletse ka nyakallo e fetisisang ka lebaka la molemo oa Molimo ka ho re baballa, hore re se ke ra timela; ee, ’me kea ts’epa hore meea ea bao ba bolailoeng e kene phomolong ea Molimo oa bona.