1 Kag karon natabo ini nga nakabaton ako sing isa ka sulat halin kay Ammoron, ang hari, nga nagapahayag nga kon ihatag ko ang mga bihag sa giyera nga amon nadakpan nga ihatag niya ang siyudad sang Antipara sa amon.

2 Apang ginpadal-an ko sing isa ka sulat ang hari, nga sigurado kami nga nagakaigo ang amon mga puwersa sa pagkuha sang siyudad sang Antipara paagi sa amon kusog; kag ang paghatag sang mga bihag sa baylo sinang siyudad makabig nga kabuangan para sa amon, kag ihatag lamang namon ang amon mga bihag sa binayluhanay.

3 Kag ginbalibaran ni Ammoron ang akon sulat kay indi sia makigbayluhanay sang mga bihag; gani nagsugod kami sa paghimo sang mga pagpanghanda sa pagsalakay sa siyudad sang Antipara.

4 Apang ang katawhan sang Antipara nagbiya sa siyudad, kag nagpinalagyo padulong sa ila iban pa nga mga siyudad, nga ila nasakop, agud pamakuran ang mga ini; kag ang siyudad sang Antipara nahulog sa amon mga kamot.

5 Kag gani natapos ang ika-beynte otso nga tuig sang pagginahum sang mga hukom.

6 Kag natabo ini nga sa pagsugod sang ika-beynte nuebe nga tuig, nakabaton kami sang mga panigana, kag amo man sing dugang pa gid sa amon kasoldadohan, halin sa duta sang Zarahemla, kag halin sa kadutaan sa palibot, sa kadamuon nga anum ka libo ka mga lalaki, wala’y labot sa sisenta ka mga anak nga lalaki sang mga Amonhon nga nag-abot agud magbuylog sa ila mga kauturan, ang akon diutay nga guban sang duha ka libo. Kag karon tan-awa, mabakod kami, huo, kag may madamo man kami sang mga panigana nga gindala sa amon.

7 Kag natabo ini nga luyag namon nga sugdan ang pagpakig-away sa kasoldadohan nga ginbutang agud pangapinan ang siyudad sang Cumeni.

8 Kag karon tan-awa, ipakita ko sa imo nga wala madugayi natuman ang amon handum; huo, paagi sa amon mabakod nga puwersa, ukon paagi sa isa ka bahin sang amon mabakod nga puwersa, ginlibutan namon, sa kagab-ihon, ang siyudad sang Cumeni, antes gid lang sila magbaton sang mga panigana.

9 Kag natabo ini nga nagkampo kami sa palibot sang siyudad sa sulod sang madamo nga mga gab-i; apang nagtulog kami sa amon mga espada, kag nagtalana sang mga bantay, agud ang mga Lamanhon indi makakadto sa amon sa gab-i kag pamatyon kami, nga ila gintilawan sa madamo na nga beses; apang sa makapila ka beses nga ila ini gintilawan nag-agay ang ila dugo.

10 Sa kadugayan ang ila mga panigana nag-abot, kag naghana na sila sa pagsulod sa siyudad sa gab-i. Kag kami, imbes nga mga Lamanhon, mga Nefinhon; gani, ginpangdakop namon sila kag ginkuha ang ila mga panigana.

11 Kag bisan pa nga ang mga Lamanhon nautdan sang ila suporta suno sa sini nga paagi, determinado sila gihapon sa pagdumala sang siyudad; gani nangin kinahanglanon nga kuhaon namon inang mga panigana kag ipadala ang mga ini sa Judea, kag ang amon mga bihag sa duta sang Zarahemla.

12 Kag natabo ini nga indi madamo nga inadlaw ang naglabay antes ang mga Lamanhon nagsugod nga madulaan sang tanan nga paglaum sang panabang; gani gin-ampo nila ang siyudad sa amon mga kamot; kag sa sini natuman namon ang amon mga plano sa pag-angkon sang siyudad sang Cumeni.

13 Apang natabo ini nga ang amon mga bihag tuman kadamo sa bagay nga, sa pihak sang kadakuon sang amon kadamuon, napilitan kami sa paggamit sang tanan namon nga puwersa agud bantayan sila, ukon pamatyon sila.

14 Kay tan-awa, nagapalagyo sila nga tuman kadamo, kag nagapakig-away paagi sa mga bato, kag paagi sa mga inuglampos, ukon bisan ano nga butang nga makaptan sang ila mga kamot, sa bagay nga nakapatay kami sing kapin sa duha ka libo sa ila pagkatapos nga gin-ampo nila ang ila mga kaugalingon bilang mga bihag sa giyera.

15 Gani nangin kinahanglanon para sa amon, nga dapat namon tapuson ang ila mga kabuhi, ukon bantayan sila, nga ang espada sa kamot, padulhog sa duta sang Zarahemla; kag ang amon man mga panigana haluson nga makaigo sa amon kaugalingon nga katawhan, bisan pa inang nakuha namon sa mga Lamanhon.

16 Kag karon, sa sinang tuman kabudlay nga mga sirkumstansya, nangin tuman kaseryoso nga bagay ang magpamat-od parte sining mga bihag sa giyera; apang, nagdesisyon kami nga ipadala sila padulhog sa duta sang Zarahemla; gani nagpili kami sing isa ka bahin sang amon mga tinawo, kag ginhatagan sila sing awtoridad sa amon mga bihag nga magdulhog sa duta sang Zarahemla.

17 Apang natabo ini nga pagkaaga nagbalik sila. Kag karon tan-awa, wala kami namangkot sa ila parte sa mga bihag; kay tan-awa, ang mga Lamanhon nagasalakay sa amon, kag nagbalik sila sa igo nga panahon sa pagluwas sa amon halin sa pagkahulog sa ila mga kamot. Kay tan-awa, si Ammoron nagpadala para sa ila suporta sang bag-o nga mga panigana kag dako pa gid nga kasoldadohan sang mga lalaki.

18 Kag natabo ini nga yadtong mga tinawo nga amon ginpadala upod sa mga bihag nakaabot sa igo nga panahon agud punggan sila tungod nagahana na sila nga daugon kami.

19 Apang tan-awa, ang akon diutay nga guban sang duha ka libo kag sisenta nakig-away sing tuman kabangis; huo, malig-on sila sa atubang sang mga Lamanhon, kag naghatag sing kamatayon sa tanan nga nakig-away sa ila.

20 Kag sang ang nabilin sang amon kasoldadohan nagahana na sa pag-isol sa atubang sang mga Lamanhon, tan-awa, ang duha ka libo kag sisenta malig-on kag wala’y kahadlok.

21 Huo, kag nagtuman sila kag nagtinguha sa paghikot sang tagsa ka pulong sang sugo sing sibo gid; huo, kag bisan suno sa ila pagtuo nahimo ini sa ila; kag nadumduman ko ang mga pulong nga ila ginsiling sa akon nga gintudlo sang ila mga iloy sa ila.

22 Kag karon tan-awa, ining akon mga anak, kag yadtong mga tinawo nga ginpili nga dal-on ang mga bihag, ang ginkautangan namon sining dako nga kadalag-an; kay amo ini sila ang nagpierde sa mga Lamanhon; gani napanabog sila pabalik sa siyudad sang Manti.

23 Kag nahuptan namon ang aton siyudad nga Cumeni, kag wala tanan malaglag paagi sa espada; apang, nakaagom kami sang dako nga kapierdihan.

24 Kag natabo ini nga pagkatapos nga nagpinalagyo ang mga Lamanhon, naghatag ako gilayon sang mga sugo nga ang akon mga tinawo nga napilasan dapat nga panguhaon halin sa mga nagkalamatay, kag nagsugo nga ang ila mga pilas dapat nga mabulong kag mabugkosan.

25 Kag natabo ini nga may duha ka gatos, halin sa akon duha ka libo kag sisenta, nga nagkalalipong tungod sang kakulang sang dugo; apang, suno sa kaayo sang Dios, kag sa amon dako nga katingala, kag amo man sa kalipay sang amon bug-os nga kasoldadohan, wala sing isa sa ila nga napatay; huo, kag wala man sing isa sa ila nga wala nakabaton sang madamo nga pilas.

26 Kag karon, ang pagkaamlig sa ila makatilingalahan sa amon bug-os nga kasoldadohan, huo, nga maluwas sila samtang may isa ka libo sang amon mga kauturan nga nagkalamatay. Kag husto lang nga ginapatungod namon ini sa milagroso nga gahum sang Dios, tungod sang ila tuman nga pagtuo sa sinang gintudlo sa ila nga amo ang patihan—nga may isa ka matarong nga Dios, kag kon sin-o man ang wala nagaduhaduha, nga pagaamligan sila sang iya makatilingala nga gahum.

27 Karon amo ini ang pagtuo sining akon mga ginatumod; lamharon sila, kag ang ila mga kaisipan malig-on, kag ginabutang nila ang ila pagsalig sa Dios sing dalayon.

28 Kag karon natabo ini nga pagkatapos nga natatap namon ang amon pilason nga mga tinawo, kag napanglubong ang amon mga patay kag ang mga patay man sang mga Lamanhon, nga madamo, tan-awa, namangkot kami kay Gid parte sa mga bihag nga ila ginsugdan sa pagpadulhog upod sa ila sa duta sang Zarahemla.

29 Karon si Gid ang puno nga kapitan sang guban nga pinili nga magbantay sa ila padulhog sa duta.

30 Kag karon, amo ini ang mga pulong nga ginsiling ni Gid sa akon: Tan-awa, nagsugod kami sa pagdulhog padulong sa duta sang Zarahemla upod ang amon mga bihag. Kag natabo ini nga nasugat-an namon ang mga espiya sang aton mga kasoldadohan nga ginpadala agud magbantay sang kampo sang mga Lamanhon.

31 Kag nagsinggit sila sa amon nga nagasiling—Tan-awa, ang mga kasoldadohan sang mga Lamanhon nagalakat padulong sa siyudad sang Cumeni; kag tan-awa, salakayon nila sila, huo, kag laglagon ang aton katawhan.

32 Kag natabo ini nga ang amon mga bihag nakabati sang ila sininggit nga nagtuga sa ila nga magpakaisog; kag nag-alsa sila sa pagrebelde batok sa amon.

33 Kag natabo ini, tungod sang ila pagrebelde ginpahanabo namon nga magtupa ang amon mga espada sa ila. Kag natabo ini nga nagdulungan sila sa pagsugata sa amon mga espada, nga sa diin, ang mas madamo sa ila nagkalamatay; kag ang nagkalabilin sa ila nakalusot kag nagpinalagyo halin sa amon.

34 Kag tan-awa, sang nakapalagyo sila kag indi na namon sila malab-ot, madasig kami nga naglakat padulong sa siyudad sang Cumeni; kag tan-awa, igo-igo gid ang amon pag-abot agud mahimo namon nga mabuligan ang amon mga kauturan sa pag-amlig sang siyudad.

35 Kag tan-awa, naluwas kami liwat halin sa mga kamot sang amon mga kaaway. Kag bulahan ang ngalan sang aton Dios; kay tan-awa, sia amo ang nagluwas sa amon; huo, nga naghimo sining dako nga butang para sa amon.

36 Karon natabo ini nga sang ako, si Helaman, nakabati sining mga pulong ni Gid, napuno ako sang tuman kadako nga kalipay tungod sang kaayo sang Dios sa pag-amlig sa amon, agud nga indi kami tanan malaglag; huo, kag nagasalig ako nga ang mga kalag nila nga nagkalamatay nakasulod na sa palahuwayan sang ila Dios.