1 ’Me bona, joale ho ile ha etsahala hore morero oa rona o latelang e ne e le ho fumana motse oa Manti; empa bona, ho ne ho se na tsela eo re neng re ka khona ho ba etella kantle ho motse ka lihlopha tsa rona tse nyane. Hobane bona, ba ile ba hopola sa ne seo hofihlela joale re ileng ra se etsa; ka baka leo re ne re sitoa ho ba thetsetsa hole ho tsoa liqhobosheaneng tsa bona.

2 ’Me ba ne ba le bangata haholo hoo ho feta lebotho la rona hore re ne re sa qeke ho ea pele le ho ba hlasela liqhobosheaneng tsa bona.

3 Ee, ’me ho ile ha fetoha ho ba molemo hore re tle re sebelise banna ba rona ho boloka likarolo tseo tsa lefats’e tseo re neng re li fumane hape leruong la rona; ka baka leo ho ile ha fetoha ho ba molemo hore re tle re eme, hore re ke re fumane matla a eketsehileng ho tsoa lefats’eng la Zarahemla ’me hape le phepelo e ncha ea lijo.

4 ’Me ho ile ha etsahala hore ke joana ke ileng ka romela boemeli ho ’musi oa lefats’e la rona, ho mo tloaetsa malebana le litaba tsa sechaba sa rona. ’Me ho ile ha etsahala hore re ile ra emela ho amohela lijo le matla ho tsoa lefats’eng la Zarahemla.

5 Empa bona, sena se ile sa re ruisa molemo empa hanyane; hobane Ba-Lamane le bona ba ne ba ntse ba amohela matla a maholo ho tloha letsatsi ka letsatsi, ’me hape le lijo tse ngata; ’me ke joana maemo a rona a neng a le ka teng ka sebaka sena sa nako.

6 ’Me Ba-Lamane ba ne tla pele khahlonong le rona nako le nako, ba sebetsa ka leqheka ho re timetsa; le ha ho le joalo re ne re sitoa ho tla loana le bona, ka lebaka la ho khutlela morao ha bona liqhobosheaneng tsa bona.

7 ’Me ho ile ha etsahala hore re ile ra mamella maemo ana a thata sebaka sa likhoeli tse ngata, esita le ho fihlela re ne re le makhatheng a ho timela ka lebaka la ho hloka lijo.

8 Empa ho ile ha etsahala hore re ile ra fumana lijo, tse ileng tsa lebeloa ho tla ho rona ke lebotho la banna ba likete li peli ho re thusa; ’me ena ke thuso eohle eo re ileng ra e amohela, ho its’ireletsa le naha ea rona khahlonong le ho oela matsohong a lira tsa rona, ee, ho loana le sera se neng se sa baloe.

9 ’Me joale lebaka la lihlong tsena tsa rona, kapa lebaka la hore hobaneng ba sa ka ba romela matla a fetang ho rona, ha re tsebe; ka baka leo re ne re saretsoe ’me hape re tletse ts’abo, e se re ka mekhoa e meng likahlolo tsa Molimo li tla tla holim’a lefats’e la rona, ho phetholeng ha rona le timetso e felletseng.

10 Ka baka leo re ile ra ts’ollela meea ea rona thapelong ho Molimo, hore a ke a re matlafatse le ho re lopolla liatleng tsa lira tsa rona, ee, ’me hape ho re fa matla hore re tle re boloke metse ea rona, le mafats’e a rona, le maruo a rona, bakeng sa ts’ehetso ea sechaba sa rona.

11 Ee, ’me ho ile ha etsahala hore Morena Molimo oa rona o ile a re etela ka litiisetso hore o tla re lopolla; ee, haholo hore o ile a bolela khotso meeng ea rona, ’me a re fa tumelo e kholo, ’me o ile a etsa hore re tle ts’epele re topollo ea rona ka eena.

12 ’Me re ile ra ipha sebete ka lebotho la rona le lenyane leo re ileng ra le amohela, ’me re ne re tsitsitse ka boikemisetso ba ho hlola lira tsa rona, le ho boloka mafats’e a rona, le maruo a rona, le basali ba rona, le bana ba rona, le lebaka ka tokoloho ea rona.

13 ’Me ke joana re ileng ra tsamaea ka matla a rona khahlanong le Ba-Lamane, ba neng ba le motseng oa Manti; ’me re ile ra hloma litente tsa rona pela lehlakore la lefella, le neng le le pela motse oo.

14 ’Me ho ile ha etsahala hore ka hosasane, hore ha Ba-Lamane ba bona hore re ne re le meeling pela lefella le neng le le pela motse, hore ba ile ba romela kantle lihloela ho potoloha le rona hore ba ke ba fumane palo le matla a lebotho la rona.

15 ’Me ho ile ha etsahala hore ha ba bona hore re ne re se matla, ho latela lipalo tsa rona, le ka ho ts’aba hore re tla ba khaola ho tsoa ts’ehetsong ea bona ntle le hore ba tsoele kantle ho tla loana khahlanong le rona le ho re bolaea, ’me hape ka ho nahana hore ba ka re timetsa ha bobebe ka lipalo tsa bona tse ngata, ka baka leo ba ile ba qala ho etsa litokiso tsa ho tsoela kantle khahlanong le rona.

16 ’Me itse ha re bona hore ba ne ba ntse ba etsa litokiso ho tsoela kantle khahlanong le rona, bona, ke ile ka etsa hore Gid, ka palo e nyane ea banna, a tle a ipate lefelleng, hape le hore Tiamnere le palo e nyane ea banna le bona ba ipate lefelleng.

17 Joale Gid le banna ba hae ba ne ba le ka ho le letona ’me ba bang ba le ka ho le lets’ehali; ’me ha joana ba se ba ipatile, bona, ke ile ka sala, le karolo e setseng ea lebotho la ka, sona sebakeng sona seo se ts’oanang moo re ileng ra qala ho hloma litente tsa rona khahlanong le nako eo Ba-Lamane ba tlang ho tla kantle ho loana.

18 ’Me ho ile ha etsahala hore Ba-Lamane ba ile ba tla kantle ka lebotho la bona le lengata khahlanong le rona. ’Me ha ba se ba tlile ’me ba le lekhatheng la ho oela holim’a rona ka sabole, ke ile ka etsa hore bao ba neng ba ena le ’na, ba khutlele morao ho kena lefelleng.

19 ’Me ho ile ha etsahala hore Ba-Lamane ba ile ba latela kamor’a rona ka lebelo le leholo, hobane ba ne ba lakatsa ka ho fetisisa ho re fihlela hore ba tle ba re bolaee; ka baka leo ba ile ba re latela ho kena lefelleng; ’me re ile ra feta lipakeng tsa Gid le Tiamnere, haholo hoo hore ebe ha ba ka ba fumanoa ke Ba-Lamane.

20 ’Me ho ile ha etsahala hore ha Ba-Lamane ba se ba fetile pela teng, kapa ha lebotho le se le fetile pela teng, Gid le Tiamnere ba ile ba phahama libakeng tsa bona tsa lekunutu, ’me ba khaola lihloela tsa Ba-Lamane hore ba sitoe ho khutlela motseng.

21 ’Me ho ile ha etsahala hore ha ba se ba ba khaotse, ba ile ba mathela motseng ’me ba oela holim’a balebeli ba neng ba siiloe ho lebela motse, haholo hoo hore ba ile ba ba timetsa ’me ba nka borui ba motse oo.

22 Joale sena se ile sa etsoa hobane Ba-Lamane ba ile ba lumella lebotho la bona lohle, ntle le balebeli ba seng ba kae feela, ho etelloa hole ho kena lefelleng.

23 ’Me ho ile ha etsahala hore Gid le Tiamnere ka mekhoa ena ba ile ba fumana leruo la liqhobosheane tsa bona. ’Me ho ile ha etsahala hore re ile ra nka leeto la rona re ne re tsamaile haholo lefelleng ho lebana le lefats’e la Zarahemla.

24 ’Me ha Ba-Lamane ba bona hore ba ne ba hoantela ho leba lefats’eng la Zarahemla, ba ne ba ts’ohile ka ho fetisisa, e se re ho ne ho ena le moralo o behiloeng ho etella ho ea timelong; ka baka leo ba ile ba qala ho khutlela morao ho kena lefelleng hape, ee, esita le morao ka tsela e ts’oanang eo ba tlileng ka eona.

25 ’Me bona, e ne e le bosiu ’me ba ile ba hloma litente tsa bona, hobane balaoli ba baholo ba Ba-Lamane ba ne ba nahana hore Ba-Nefi ba ne ba khathetse ka lebaka la mohoanto oa bona, ’me ka ho hopola hore ba ne ba khannile lebotho la bona lohle ka baka leo ha ba ka ba eba le mohopolo malebana le lefats’e la Manti.

26 Joale ho ile ha etsahala hore ha e ne e se e le bosiu, ke ile ka etsa hore banna ba ka ba se ke ba robala, empa hore ba hoante ho ea pele ka tsela engoe ho leba lefats’eng la Manti.

27 ’Me ka lebaka la mohoanto ona nakong ea bosiu, bona, ka la hosasane re ne re le ka ng’ane ho Ba-Lamane, haholo hoo hore e be re ile ra fihla pele ho bona motseng oa Manti.

28 ’Me ke joana ho ileng ha etsahala, hore ka leqheka lena re ile ra nka borui ba motse oa Manti ntle le ts’ollo ea mali.

29 ’Me ho ile ha etsahala hore ha mabotho a Ba-Lamane a fihla pel’a motse, ’me ba bona hore re ne re itokiselitse ho kopana le bona, ba ile ba makala ka ho fetisisa le ho otloa ke letsoalo le leholo, haholo hoo hore e be ba ile ba balehela lefelleng.

30 Ee, ’me ho ile ha etsahala hore mabotho a Ba-Lamane a ile a balehela kantle ho karolo eohle ea lefats’e leo. Empa bona, ba jarelletse le bona basali ba bangata le bana ho tsoa lefats’eng leo.

31 ’Me metse eo e neng e ile ea hapuoa ke Ba-Lamane, kaofela ha eona ka sebaka sa nako ena e boruing ba rona; ’me bo ntat’a rona le basali ba rona le bana ba rona ba ntse ba khutlela mahaeng a bona, bohle ntle le bao ba nkiloeng e le bats’oaruoa ’me ba jareloa hole ke Ba-Lamane.

32 Empa bona, mabotho a rona a manyane ho boloka palo e kholo joalo ea metse le maruo a maholo joalo.

33 Empa bona, re ts’epa Molimo oa rona ea re fileng tlholo holim’a mafats’e ao, haholo hoo hore e be re fumane metse eo le mafats’e ao, ao e leng a rona.

34 Joale ha re tsebe lebaka leo ’muso o sa re feng matla a eketsehileng; le ha ho le joalo le bana bao ba nyolohetseng ho rona ha ba tsebe hobaneng re sa fumana matla a maholo ho feta.

35 Bona, ha re tsebe empa e ka ba hore ha lea atleha, ’me le huletse hole mabotho ao ho kena karolong eo ea lefats’e; haeba ho joalo, ha re lakatse ho tletleba.

36 ’Me haeba ha ho joalo, bona, rea ts’oha hore ho na le karohano ka ’musong, hore ha ba romele banna ba fetang ho tla re thusa; hobane rea tseba hore ba bangata ho feta bao ba ba rometseng.

37 Empa, bona, ha hona taba—re ts’epa hore Molimo o tla re lopolla, ho sa tsotellehe bofokoli ba mabotho a rona, ee, ’me a re lopolle ho tsoa matsohong a lira tsa rona.

38 Bona, sena ke selemo sa mashome a mabeli a metso e robong, karolong e pheletsong, ’me re na le borui ba mafats’e a rona; ’me Ba-Lamane ba balehetse lefats’eng la Nefi.

39 ’Me bara bao ba sechaba sa Ammone, bao ke buileng hantle hakaalo ka bona, ba na le ’na motseng oa Manti; ’me Morena o ba ts’ehelitse, ee, ’me o ba bolokile ho ho oela ka sabole, haholo hoo hore esita le moea o le mong ha hona o bolailoeng.

40 Empa bona, ba fumana maqeba a mangata; le ha ho le joalo ba ema ba tiile tokolohong eo ka eona Molimo a ba entseng hore ba lokolohe; ’me ba mafolofolo ho hopola Morena Molimo oa bona letsatsi le letsatsi; ee, ba ela hloko ho boloka melao ea hae, le likahlolo tsa hae, le litaelo tsa hae ka ho tsoelapele; ’me tumelo ea bona e matla boporofeteng bo malebana le seo se tlang ho tla.

41 ’Me joale, moholoane oaka ea ratoang, Moroni, e ke Morena Molimo oa rona ea re lopollotseng ’me a re etsa hore re lokolohe, a o boloke ho tsoelapele ponts’eng ea hae; ee, ’me e ke a ka hauhela sechaba sena, esita le hore u ke u atlehe ho fumana borui ba sohle seo Ba-Lamane ba se nkileng ho tsoa ho rona, seo e neng e le bakeng sa ts’ehetso ea rona. ’Me joale, bona, ke koala lengolo la ka. Ke Helamane, mora oa Alma.