1 Joale ho ile ha etsahala hore ka selemo sa bo mashome a mararo sa puso ea baahloli holim’a sechaba sa Nefi, kamor’a hore Moroni a fumane le ho bala lengolo la Helamane, o ne a nyakalletse ka ho fetisisa ka lebaka la boiketlo, ee, katleho e fetisisang eo Helamane a bileng le eona, ka ho fumana mafats’e a neng a lahlehile.

2 Ee, ’me o ile a etsa ho tsebahale ho sechaba sa habo, lefats’eng leo lohle ho potoloha karolong eo a neng a le ho eona, hore ba ke ba nyakalle le bona.

3 ’Me ho ile ha etsahala hore hang hang o ile a romela lengolo ho Pahorane, a lakatsa hore a tle a etse hore banna ba bokelloe hammoho ho matlafatsa Helamane, kapa mabotho a Helamane, haholo hoo hore ka bobebe a ke a boloke karolo eo ea lefats’e eo a atlehileng ka mokhoa oa mohlolo hakalo ho e fumana hape.

4 ’Me ho ile ha etsahala hore ha Moroni a se a rometse lengolo ho ea lefats’eng la Zarahemla, o ile a qala ho beha moralo hore a tle a fumane karolo e setseng ea maruo ao le metse eo Ba-Lamane ba e nkileng ho bona.

5 ’Me ho ile ha etsahala hore ha Moroni joana a ntse a etsa litokiso ho ea khahlanong le Ba-Lamane ho ea loana, bonang, sechaba sa Nefiha, se neng se bokane hammoho ho tsoa motseng oa Moroni le Motse oa Lehi le motse oa Moriantone, e ile ea hlaseloa ke Ba-Lamane.

6 Ee, esita le bao ba ileng ba qobelloa ho baleha ho tloha lefats’eng la Manti, le lefats’e le potapotileng hohle, ba ne ba tlile ’me ba kopane le Ba-Lamane karolong ena ea lefats’e.

7 ’Me ke joana ba neng ba le bangata ka ho fetisisa, ee, me ba fumana matla letsatsi le letsatsi, ka taelo ea Ammorone ba ile ba tla khahlanong le sechaba sa Nefiha, ’me ba ile ba qala ho ba bolaea ka polao e fetisisang.

8 ’Me mabotho a bona a ne a le mangata hoo karolo e setseng ea sechaba sa Nefiha e ileng ea qobelleha ho baleha ka pele ho bona; ’me ba ile ba tla ’me ba kopana le lebotho la Moroni.

9 ’Me joale joaloka ha Moroni a ne a nahanne hore ho tla ba le banna ba romeloang ho ea motseng oa Nefiha, ho isa thusong ea sechaba seo ho boloka motse, ’me a tseba hore ho ne ho le bobebe ho boloka motse ho oela matsohong a Ba-Lamane ho feta ho o nka hape ho bona, o ne a nahanne hore ba tla boloka motse oo ha bobebe.

10 Ka baka leo o ile a boloka lebotho lohle la hae libakeng tseo tse neng li khutlisitsoe.

11 ’Me joale, ha Moroni a bona hore motse oa Nefiha o ne o lahlehile o ne a le masoabi ka ho fetisisa, ’me a qala ho belaela, ka lebaka la bokhopo ba sechaba, hore na ha ba na oela matsohong a bahabo bona.

12 Joale ena e ne e le eona taba ka balaoli ba baholo bohle ba hae. Ba ile ba belaela le ho makala ka lebaka la bokhopo ba sechaba, ’me sena ka lebaka la katleho ea Ba-Lamane holim’a bona.

13 ’Me ho ile ha etsahala hore Moroni o ne a halefetse ’muso, ka lebaka la ho se tsotelle ha bona malebana le bolokolohi ba naha ea bona.