1 ’Me ho ile ha etsahala hore o ile a ngolla hape ’musi oa lefats’e leo, eo e neng e le Pahorane, ’me ana ke mantsoe ao a ileng a a ngola, a re: Bona, ke lebisa lengolo la ka ho Pahorane, motseng oa Zarahemla, eo e leng moahloli e moholo le ’musi holim’a lefats’e leo, hape le ho bohle ba khethiloeng ke sechaba sena ho busa le ho tsamaisa litaba tsa ntoa ena.

2 Hobane bona, ke na le hanyenyane ho bolela ho bona ka tsela ea kahlolo; hobane, lona ka bolona lea tseba hore le khethiloe ho bokella mmoho banna, le ho ba hlomella ka lisabole, le ka melamu, le mekhoa eohle ea libetsa tsa ntoa tsa mofuta o mong le o mong, ’me le romele khahlanong le Ba-Lamane, likarolong life kapa life tseo ba ka tlang lefats’eng la rona.

3 ’Me joale bona, ke re ho uena hore ’na, hape le banna ba ka, hape le Helamane le banna ba hae, re sotlehile ka hofetisisa lits’otlehong tse kholo; ee, esita le tlala, lenyora, le mokhathala, le mekhoa eohle ea mahlomola a mefuta eohle.

4 Empa bona, ha e ne eba tsena ebile tsona feela lits’otleho tsa rona re ne re keke ra belaela.

5 Empa bona, e bile kholo polao har’a sechaba sa rona; ee, likete li oele ka sabole, ha ho ne ho ka be ho bile ka tsela engoe haeba le ne le ka be le fane ho mabotho a rona matla le thuso e lekaneng bakeng sa bona. Ee, e bile kholo tlhokomoloho ea lona malebana le rona.

6 ’Me joale re lakatsa ho tseba lebaka la tlhokomoloho ena e kholo ka ho fetisisa; ee, re lakatsa ho tseba lebaka la boemo ba lona ba ho se re nahanele.

7 Na le nahana ho lula holim’a literone tsa lona ka boemo ba ho hloka kelello e sa nahaneng, ha lira tsa lona li ntse li jala mosebetsi oa lefu ho le potoloha? Ee, ha ba ntse ba bolaea likete tsa ba habo lona—

8 Ee, esita le bao ba shebetseng holimo ho lona bakeng sa ts’ireletso, ee, ba le behileng boemong ba hore le ka be le ba thusitse, ee, le ka be le rometse mabotho ho bona, ho ba matlafatsa, ’me le pholositse likete tsa bona ho ho oa ka sabole.

9 Empa bona, sena ha se phetho—le ba hanetse ka lijo tsa lona, haholo hoo hore ba bangata ba loanne le ho tsoa mali a maphelo a bona ka lebaka la litakatso tsa bona tse kholo tseo ba neng ba ena le tsona bakeng sa sechaba sena; ee, ’me sena ba se entse ha ba ne ba le lekhatheng la ho timela ka tlala, ka lebaka la tlhokomoloho ea lona e kholo ka ho fetisisa malebana le bona.

10 ’Me joale, bana beso ba ratoang—hobane le lokela ho ba ba ratoang, ee, ’me le lokela hore e be le ile la itlhohlelletsa ka mafolofolo bakeng sa boiketlo le bolokolohi ba sechaba sena; empa bonang, le ba hlokomolohile haholo hoo hore mali a likete a tla tla holim’a lihlooho tsa lona bakeng sa boiphetetso; ee, hobane ho ne ho tsebahala ho Molimo lillo tsohle tsa bona, le lits’otleho tsohle tsa bona—

11 Bonang, na le nahana hore le ka lula holim’a literone tsa lona, ’me ka lebaka la molemo o fetisang oa Molimo le keke la etsa letho ’me o tla le lopolla? Bonang, haeba le nahanne tjena le nahanetse lefeela.

12 Na le nahana hore, ka lebaka la hore ba bangata hakaalo ba habo lona ba bolailoe ke ka lebaka la bokhopo ba bona? Ke re ho lona, haeba le nahana tjena le nahanetse lefeela; hobane ke re ho lona, ho na le ba bangata ba oeleng ka sabole; ’me bonang ke ho isa kahlolong ea lona;

13 Hobane Morena o lumella ba lokileng hore ba bolaoe hore toka ea hae le kahlolo li ke li tle holim’a ba khopo; ka baka leo ha le hloke ho nahana hore ba lokileng ba lahlehile hobane ba bolailoe; empa bonang, ba kena phomolong ea Morena Molimo oa bona.

14 ’Me joale bonang, ke re ho lona, ke ts’aba ka ho fetisisa hore likahlolo tsa Molimo li tla tla holim’a sechaba sena, ka lebaka la botsoa ba bona bo fetisisang, ee, esita le botsoa ba ’muso oa rona, le tlhokomoloho ea bona e fetisisang malebana le ba habo bona, ee, malebana le bao ba bolailoeng.

15 Hobane ha e ne e se ka bokhopo boo qalong bo qalileng ka hloohong ea rona, re ka be re mamelletse lira tsa rona hore ebe ba ne ba ka sitoa ho fumana matla holim’a rona.

16 Ee, ha e ne e se ka ntoa e ileng ea qhoma har’a rona; ee, ha e ne e se ka batho bana ba morena, ba bakileng ts’ollo ea mali e kholo hakaalo har’a rona; ee, ka nako eo re neng re loants’ana har’a rona, haeba re ne re ile ra kopanya matla a rona joaloka ha hofihlela joale re entse; ee, ha e ne se ka takatso ea matla le tokelo tseo batho bao ba morena ba neng ba na le eona holim’a rona; ha eba ba ne ba ile ba ts’epahalla lebaka la rona la bolokolohi ba rona, ’me ba ikopanya le rona, ’me ba ea khahlanong le lira tsa rona, ho ena le ho nka lisabole tsa bona khahlanong le rona, hoo e bileng lebaka la ts’ollo e ngata hakaalo ea mali har’a rona; ee, haeba re ne re ile ra ea khahlanong le bona ka matla a Morena, re ka be re qhalile lira tsa rona, hobane e ka be e etsahetse, ho latela ho phethahatsa ha lentsoe la hae.

17 Empa bonang, joale Ba-Lamane ba tla holim’a rona, ba nka borui ba mafats’e a rona, ’me ba bolaea sechaba sa rona ka sabole, ee, basali ba rona le bana ba rona, hape le ho ba jarela litlamong, ba etsa hore ba sotlehe ka mekhoa eohle ea mahlomola, ’me sena ka lebaka la bokhopo bo boholo ba bao ba batlang matla le tokelo, ee, esita le batho bao ba morena.

18 Empa hobaneng ke tlameha ho bua haholo malebana le taba e? Hobane ha re tsebe empa keng lona ka bolona le batla tokelo. Ha re tsebe empa le lona hape le mahlabaphieo ho naha ea lona.

19 Kapa ke hore le re hlokomohile hobane le ka har’e bohareng ba naha ea rona ’me le potapotiloe ke ts’ireletso, hore ha le etse hore lijo li romeloe ho rona, hape le banna ho matlafatsa mabotho a rona?

20 Na le lebetse litaelo tsa Morena Molimo oa lona? Ee, na le lebetse litlamong tsa bo ntat’a rona? Na le lebetse linako tse ngata tseo le ileng la lopolloa ho tsoa matsohong a lira tsa lona?

21 Kapa le nahana hore Morena o tla ’ne a re lopolle, ha re lutse holim’a literone tsa rona ’me re sa etse ts’ebeliso ea mekhoa eo Morena a re fileng eona?

22 Ee, na le tla lula ka botsoa ha le potapotiloe ka likete tsa bao, ee, mashome a likete, bao le bona ba lutseng ka botsoa, ha ho na le likete ho potoloha meeling ea lefats’e leo ba ntseng ba oa ka sabole, ee, ba lemetseng le ho tsoa mali?

23 Na le nahana hore Molimo o tla le sheba joaloka ba se nang molato ha le lutse feela ’me le bona lintho tsena? Bonang, ke re ho lona, Che. Joale ke lakatsa hore le hopole hore Molimo o boletse hore lefiso le kahar’e le tla hloekisoa pele, ’me joale e be lefiso le kantle le tla hloekisoa le lona.

24 ’Me joale, ntle le hore le bakele seo le se entseng, ’me le qale ho ema le ho etsa, ’me le romele lijo le banna ho rona, hape le ho Helamane, hore le ke le ts’ehetse likarolo tseo tsa naha ea rona tseo a li khutlisitseng, le hore hape reke re khutlise karolo e setseng ea maruo a rona likarolong tsena, bonang ho tla ba molemo hore re se hlole re loants’a Ba-Lamane hofihlela qalong re hloekisitse lefiso la rona le kahare, ee, esita le hlooho e kholo ea ’muso oa rona.

25 ’Me ntle le hore le arabe lengolo la ka, ’me le tsoele kantle ’me le mpots’e moea oa ’nete oa bolokolohi, ’me le leke ho matlafatsa mabotho a rona, ’me le ba fe lijo bakeng sa ts’ehetso ea bona, bonang, ke tla sia karolo ea batho ba ka ba tokollo ho boloka karolo ena ea lefats’e la rona, ’me ke tla sia matla le hlohonolofatso ea Molimo holim’a bona, hore ho se be le matla a mang a ka sebetsang khahlanong le bona—

26 ’Me sena ka lebaka la tumelo ea bona e fetisang, le mamello ea bona litsietsing tsa bona—

27 ’Me ke tla tla ho lona, ’me haeba ho na le mang har’a lona ea nang le takatso ea bolokolohi, ee, haeba ho na le esita le tlhase ea bolokolohi e setseng, bonang, ke tla hlohleletsa borabele har’a lona, esita le bao ba nang le litakatso ho ikhapela matla le tokelo ba tla fetoha fela.

28 Ee, bonang ha ke ts’abe matla a lona kapa tokelo ea lona, empa ke Molimo oa ka eo ke mo ts’abang; ’me ke ho latela litaelo tsa hae hore e be ke nka sabole ea ka ho sireletsa lebaka la naha ea heso, ’me ke lebaka la bokhopo ba lona re mamelletseng tahlehelo e ngata hakaalo.

29 Bonang ke nako, ee, nako joale e atametse, hore ntle le hore le itsosolosetse ts’ireletsong ea naha ea lona le bana ba lona ba banyane, sabole ea toka e leketlile holim’a lona; ee, ’me e tla le oela holimo ’me e le etele esita le timelong ea lona eohle.

30 Bonang, ke emetse thuso ho tsoa ho lona; ’me ntle le hore le sebeletse ho re imolla, bonang, kea tla ho lona esita le lefats’eng la Zarahemla, ’me ke le otle ka sabole, haholo hoo hore le keke la hlola le eba le matla ho thibela tsoelopele ea sechaba sena lebakeng la bolokolohi ba rona.

31 Hobane bonang, Morena a keke a lumella hore le tle le phele le ho ba matla bokhopong ba lona ho timetsa sechaba se lokileng.

32 Bonang, na le ka nahana hore Morena o tla le hauhela ’me a tle kantle ka kahlolo khahlanong le Ba-Lamane, ha e le mekhoa ea bo ntat’a bona e bakileng lehloeo la bona, ee, ’me le menahantsoe ke bao ba ikhaohantseng ho tsoa ho rona, ha bokhopo ba lona e le ka lebaka la lerato la lona la khanya le lintho tsa lefeela tsa lefats’e?

33 Lea tseba hore le tlola litaelo tsa Molimo, ’me lea tseba hore le li hatikela tlasa maoto a lona. Bonang, Morena o itse ho ’na: Haeba bao u ba khethileng ho ba babusi ba sa bakele libe tsa bona le bokhopo, u tla nyolohela ho ea loana khahlanong le bona.

34 ’Me joale bonang, ’na, Moroni, kea susumetsoa, ho latela selekane seo ke se entseng ho boloka litaelo tsa Molimo oa ka; ka baka leo ke lakatsa hore u tle u mamele lentsoe la Molimo, ’me u romele kapele ho ’na lijo tsa hau le banna ba hau, hape le ho Helamane.

35 ’Me bona, haeba u keke ua etsa sena ke tla ho uena ka lebelo; hobane bona, Molimo a keke a lumella hore re timele ke tlala; ka baka leo o tla re fa lijo tsa lona, esita le haeba e tlameha hore e be ka sabole. Joale bona hore u phethahatsa lentsoe la Molimo.

36 Bona, ke Moroni, molaoli oa hau e moholo. Ha ke batle matla, empa ho a hulela tlase. Ha ke batle thoriso ea lefats’e, empa khanya ea Molimo oa ka, le bolokolohi le boiketlo ba naha ea heso. ’Me ke joana ke koalang lengolo la ka.