1 Bonang, joale ho ile ha etsahala hore hang kamor’a hore Moroni a romele lengolo la hae ho ’musi e moholo, o ile a fumana lengolo le tsoang ho Pahorane, ’musi e moholo. ’Me ana ke mantsoe ao a ileng a a fumana:

2 ’Na, Pahorane, eo ke leng ’musi e moholo oa lefats’e lena, ke romela mantsoe ana ho Moroni, molaoli e moholo holim’a lebotho. Bona, ke re ho uena, Moroni, hore ha ke thabele mahlomola a hau a maholo, ee, ho soabisa moea oaka.

3 Empa bona, ho na le bao ba nyakallang ke mahlomola a hau, ee, haholo hoo hore ba phahame ka phetohelo khahlanong le ’na, ’me le bao ba sechaba sa ka beo e leng batho ba tokoloho, ee, ’me bao ba phahameng ba bangata ka ho fetisisa.

4 ’Me ke bona ba batlileng ho nka setulo sa kahlolo ho tsoa ho ’na bao e bileng sesosa sa bokhopo bona bo boholo; hobane ba sebelisitse lithoholetso tse kholo, ’me ba khelositse lipelo tsa batho ba bangata, hoo e tla bang lebaka la mahlomola a bohloko har’a rona; ba ts’oere lijo tsa rona, ’me ba ts’ositse batho ba rona ba tokollo hore ebe ha ba tla ho uena.

5 ’Me bona, ba nkhanetse kantle ka pele ho bona, ’me ke balehetse lefats’eng la Gideone, le banna ba bangata joaloka moo ke neng ke khona ho ba fumana.

6 ’Me bona, ke romeletse phatlalatso hohle karolong ena ea lefats’e; ’me bona, ba phallela ho rona letsatsi le letsatsi, lihlomong tsa bona, ts’ireletsong ea naha ea bona le bolokolohi ba bona, le ho phetetsa moo re fosuoeng.

7 ’Me ba tlile ho rona, haholo hoo hore bao ba phahameng ka phetohelo khahlanong le rona ba re hanyetsa ponts’eng, ee, haholo hoo hore ba ea re ts’aba ’me ha ba qeke ho tla kantle khahlanong le rona ho loana.

8 Ba nkile borui ba lefats’e leo, kapa motse, oa Zarahemla; ba khethile morena holim’a bona, ’me o ngolletse morena oa Ba-Lamane, moo teng a kopaneng selekaneng le eena; moo selekaneng seo a lumetseng ho boloka motse oa Zarahemla, poloko eo a nahanang hore e tla nolofalletsa Ba-Lamane ho hapa karolo e setseng ea lefats’e leo, ’me o tla behoa morena holim’a sechaba sena ha ba tla hapuoa tlas’a Ba-Lamane.

9 ’Me joale, lengolong la hau u nkahlotse, empa ha ho na taba; ha kea halefa, empa ke nyakalletse boholong ba pelo ea hau. ’Na, Pahorane, ha ke batle matla, ntle le hore ke boloke setulo sa ka sa kahlolo hore ke boloke litokelo le tokoloho ea sechaba sa heso. Moea oaka o tsitsitse tokolohong eane eo Molimo a re entseng hore re lokolohe.

10 ’Me joale, bona, re tla hanyetsa bokhopo esita le ho isa ts’ollong ea mali. Re tla ts’olla mali a Ba-Lamane haeba ba tla isa letsoho la bona lefats’eng la rona.

11 Re keke ra ts’olla mali a ba habo rona haeba ba ke ke ba phahama ka phetohelo ’me ba nka sabole khahlanong le rona.

12 Re ne re tla ikenya tlasa joko ea litlamo haeba ho ne ho hlokeha ka toka ea Molimo, kapa haeba o tla re laela ho etsa joalo.

13 Empa bona ha a re laele hore re tla inehela ho lira tsa rona, empa hore re behe ts’epo ea rona ho eena, me o tla re lopolla.

14 Ka baka leo, ngoaneso ea ratoang, Moroni, ha re hanyetse bobe ’me eng kapa eng eo re sitoang ho e hanyetsa ka mantsoe a rona, ee, joaloka liphetohelo le liphapang, ha re li hanyetse ka sabole tsa rona, hore re ke re boloke bolokolohi ba rona, hore re ke re nyakalle molemong o moholo oa kereke ea rona, le lebakeng la Molopolli oa rona le Molimo oa rona.

15 Ka baka leo, tloho ho ’na kapele ka ba seng bakae ba banna ba hau ’me o sie karolo e setseng taolong ea Lehi le Teankame; ba fe matla a ho tsamaisa ntoa karolong eno ea lefats’e, ho latela Moea oa Molimo, oo hape e leng moea oa bolokolohi o ka ho bona.

16 Bona ke rometse lijo tse seng kae ho bona, hore ba se ke ba timela hofihlela u ka khona ho tla ho ’na.

17 Bokella mmoho lebotho le fe kapa le fe leo u ka khonang mohoantong oa hau ho tla mona, ’me re tla ea kapele khahlanong le baikarohanyi bano, ka matla a Molimo oa rona ho latela tumelo e ka ho rona.

18 ’Me re tla nka borui ba motse oa Zarahemla, hore re ke re fumane lijo tse eketsehileng ho li romela pele ho Lehi le Teankame; ee, re tla ea pele khahlanong le bona ka matla a Morena, ’me re tla tlisa pheletsong bokhopo bona bo boholo.

19 ’Me joale, Moroni, ke nyakalletse ho amohela lengolo la hau, hobane hanyane ke ne ke ts’oenyehile malebana le seo re tlamehang ho se etsa, hore na e tla ba toka ho ea khahlanong le ba habo rona.

20 Empa u itse, ntle le hore ba bake Morena o u laetse hore u ee khahlanong le bona.

21 Bona hore u matlafatsa Lehi le Teankame ho Morena; ba bolelle hore ba se ke ba ts’aba, hobane Molimo o tla ba lopolla, ee, hape le bohle bao ba tsitsisitseng tokolohong eo Molimo a ba entseng hore ba lokolohe. ’Me joale ke koala lengolo la ka ho ngoaneso ea ratoang, Moroni.