1 Kag natabo ini, sa pagsugod sang ika-treinta’y sais nga tuig sang pagginahum sang mga hukom sa katawhan ni Nefi, nga si Siblon ang nagkapot sang sagrado nga mga butang nga gintugyan kay Helaman ni Alma.

2 Kag isa sia ka matarong nga tawo, kag naglakat sia sing matarong sa atubang sang Dios; kag nagtinguha sia sa paghimo sang maayo sing dalayon, sa pagtuman sang mga kasugoan sang Ginuo nga iya Dios; kag amo man ang ginhimo sang iya utod.

3 Kag natabo ini nga si Moroni napatay man. Kag gani natapos ang ika-treinta’y sais nga tuig sang pagginahum sang mga hukom.

4 Kag natabo ini nga sa ika-treinta’y siyete nga tuig sang pagginahum sang mga hukom, may isa ka dako nga grupo sang mga lalaki, bisan tubtob sa kadamuon nga lima ka libo kag apat ka gatos ka tawo, upod ang ila mga asawa kag ang ila mga kabataan, nga naggwa halin sa duta sang Zarahemla padulong sa duta pa-norte.

5 Kag natabo ini nga si Hagot, sia nga isa ka tuman ka mausisa nga lalaki, gani naglakat sia kag nagpasad sang tuman kadako nga sakayan-dagat, sa mga dulonan sang duta nga Bugana, malapit sa duta nga Kamingaw kag ginpalayag ini sa weste nga dagat, malapit sa makitid nga alagyan nga nagapadulong sa duta pa-norte.

6 Kag tan-awa, may madamo nga Nefinhon nga nagsulod sa sini kag nagpalayag upod ang madamo nga panigana, kag madamo man nga babayi kag kabataan; kag nagpalayag sila pa-norte. Kag gani natapos ang ika-treinta’y siyete nga tuig.

7 Kag sa ika-treinta’y otso nga tuig, ini nga lalaki nagpasad sang iban pa nga mga sakayan-dagat. Kag ang nauna nga sakayan-dagat nagbalik man, kag madamo pa gid nga mga tawo ang nagsulod sa sini; kag nagdala man sila sing madamo nga panigana, kag nagpalayag liwat padulong sa duta pa-norte.

8 Kag natabo ini nga wala na gid sing nabatian pa parte sa ila. Kag naghunahuna kami nga nagkalalumos sila sa kaidadalman sang dagat. Kag natabo ini nga isa pa ka sakayan-dagat ang nagpalayag; kag kon diin ini nagkadto wala kami nakahibalo.

9 Kag natabo ini nga sa sini nga tuig may madamo nga katawhan nga nagkadto padulong sa duta pa-norte. Kag gani natapos ang ika-treinta’y otso nga tuig.

10 Kag natabo ini, sa ika-treinta’y nuebe nga tuig sang pagginahum sang mga hukom, si Siblon napatay man, kag si Corianton nagkadto sa duta pa-norte sa isa ka sakayan-dagat agud magdala sing mga panigana sa katawhan nga nagkadto sa sina nga duta.

11 Gani nangin kinahanglanon para kay Siblon nga ihatag yadtong sagrado nga mga butang, antes sang iya kamatayon, sa anak ni Helaman, nga ang ngalan Helaman, nga ginhingadlan sunod sa ngalan sang iya amay.

12 Karon tan-awa, ang tanan nga mga kinurit nga yara sa pag-amlig ni Helaman ginsulat kag ginpadala sa mga anak sang katawhan sa bug-os nga kadutaan, luwas lang nga ini amo ang mga bahin nga ginsugo ni Alma nga indi pag-ipahayag.

13 Apang, ining mga butang pagatipigan nga sagrado, kag ipasa-pasa halin sa isa ka henerasyon pakadto sa isa; gani, sa sini nga tuig, ginhatag ang mga ini kay Helaman antes sang kamatayon ni Siblon.

14 Kag natabo ini, sa sini man nga tuig nga may pila ka mga nagsilipak nga nagbuylog sa mga Lamanhon; kag ginsugyot naman sila liwat sa kaakig batok sa mga Nefinhon.

15 Kag sa sini man nga tuig nagdulhog sila upod ang tuman kadamo nga kasoldadohan agud magpakig-away batok sa katawhan sang Moronias, ukon batok sa kasoldadohan sang Moronias, nga sa sini napierde sila kag napanabog pabalik liwat sa ila kaugalingon nga mga kadutaan, nga nag-antos sing tuman nga kapierdihan.

16 Kag gani natapos ang ika-treinta’y nuebe nga tuig sang pagginahum sang mga hukom sa katawhan ni Nefi.

17 Kag gani natapos ang kasaysayan ni Alma, kag ni Helaman nga iya anak, kag amo man ni Siblon, nga iya anak.