1 Tan-awa pinalangga kong mga kauturan, bangod gintugotan ako nga magkadto sa inyo, gani tilawan ko nga maghambal sa inyo sa akon mga pulong; huo, paagi sa akon kaugalingon nga baba, kay ini ang una nga tion nga naghambal ako sa inyo paagi sa mga pulong sang akon baba, ako nga nabukot sing lubos sa hukom-lingkuranan, bangod sang madamo nga tulumanon sa bagay nga indi ako makakadto sa inyo.

2 Kag bisan pa, indi kuntani ako makakadto subong sa sini nga tion kon ang hukom-lingkuranan wala pag-ihatag sa lain agud maggahum bulos sa akon; kag ang Ginuo sa dako nga kaluoy nagtugot nga magkadto ako sa inyo.

3 Kag tan-awa, nagkadto ako nga may dako nga mga paglaum kag tuman nga handum nga makita ko nga nagpaubos kamo sang inyo mga kaugalingon sa atubang sang Dios, kag nagpadayon kamo sa pagpangamuyo para sa iya grasya, nga makita ko nga wala kamo sang sala sa iya atubang, agud nga makita ko nga wala kamo sa makahaladlok nga kahimtangan nga ginaagyan sang aton mga kauturan sa Zarahemla.

4 Apang bulahan ang ngalan sang Dios, tungod gintugotan niya ako nga mahibal-an, huo, ginhatag niya sa akon ang tuman kadako nga kalipay nga mahibal-an nga napahamtang sila liwat sa dalanon sang iya pagkamatarong.

5 Kag nagasalig ako, suno sa Espiritu sang Dios nga yari sa akon, nga makaagom man ako sing kalipay sa inyo; apang wala ako nagahandum nga ang akon kalipay sa inyo mabatyagan paagi sa tuman nga pag-antos kag kasubo nga naagom ko sa mga kauturan sa Zarahemla, kay tan-awa, ang akon kalipay nabatyagan para sa ila pagkatapos sang pag-ubog sa tuman nga pag-antos kag kasubo.

6 Apang tan-awa, nagasalig ako nga wala kamo sa kahimtangan sing tuman nga pagkawala’y pagtuo pareho sang inyo mga kauturan; nagasalig ako nga wala kamo nag-alsa sa bugal sang inyo mga tagipusuon; huo, nagasalig ako nga wala kamo nagpahamtang sang inyo mga tagipusuon sa mga manggad kag sa wala’y pulos nga mga butang sang kalibutan; huo, nagasalig ako nga wala kamo nagasimba sa mga dios-dios, kundi nga nagasimba kamo sa matuod kag buhi nga Dios, kag nagahulat kamo sa magaabot nga kapatawaran sang inyo mga sala nga may pagtuo nga wala’y katubtuban.

7 Kay tan-awa, ginasiling ko sa inyo may madamo nga butang nga magaabot; kag tan-awa, may isa ka butang nga mas dako ang importansya sangsa ini tanan—kay tan-awa, ang tion indi na tuman kalayo nga ang Manunubos magakabuhi kag magakari sa iya katawhan.

8 Tan-awa, wala ako nagasiling nga magakari sia sa aton sa tion sang iya pagpuyo sa iya lawas nga dutan-on; kay tan-awa, ang Espiritu wala nagsiling sa akon nga amo sini ang matabo. Karon parte sini nga butang wala ako nakahibalo; apang ini lamang ang akon nahibal-an, nga ang Ginuong Dios may gahum nga himuon ang tanan nga butang nga suno sa iya pulong.

9 Apang tan-awa, ini lamang ang ginhambal sang Espiritu sa akon nga nagasiling: Magpahayag sa sining katawhan nga nagasiling—Maghinulsol kamo, kag ihanda ang alagyan sang Ginuo, kag maglakat sa iya mga banas, nga matadlong; kay tan-awa, ang ginharian sang langit malapit na, kag ang Anak sang Dios magakari sa ibabaw sang duta.

10 Kag tan-awa, igabun-ag sia ni Maria, sa Jerusalem nga amo ang duta sang aton mga katigulangan, sia nga isa ka birhen, isa ka malahalon kag pinili nga instrumento, nga pagalandungan kag magapanamkon paagi sa gahum sang Balaan nga Espiritu, kag magabun-ag sing isa ka anak nga lalaki, huo, bisan ang Anak sang Dios.

11 Kag magalakat sia nga magabatas sang mga kasakit kag mga pag-antos kag mga pagsulay sang tagsa ka sahi; kag ini agud nga matuman ang pulong nga nagasiling nga dal-on niya sa iya kaugalingon ang mga kasakit kag mga balatian sang iya katawhan.

12 Kag dal-on niya sa iya kaugalingon ang kamatayon, agud mapalos niya ang mga gapos sang kamatayon nga nagahigot sang iya katawhan; kag dal-on niya sa iya kaugalingon ang ila mga kahuyangan, agud ang iya tagipusuon mapuno sang kaluoy, suno sa unod, agud mahibal-an niya suno sa unod kon paano buligan ang iya katawhan suno sa ila mga kahuyangan.

13 Karon ang Espiritu nakahibalo sang tanan nga butang; apang ang Anak sang Dios magaantos suno sa unod agud madala niya sa iya kaugalingon ang mga sala sang iya katawhan, agud mapanas niya ang ila mga kalapasan suno sa gahum sang iya pagtubos; kag karon tan-awa, amo ini ang testimonya nga yari sa akon.

14 Karon ginasiling ko sa inyo nga kinahanglan gid kamo nga maghinulsol, kag mabun-ag liwat; kay ang Espiritu nagasiling nga kon indi kamo mabun-ag liwat indi kamo makapanubli sang ginharian sang langit; gani dali na kag magpabunyag sa paghinulsol, agud mahugasan kamo halin sa inyo mga sala, agud makaangkon kamo sang pagtuo sa Kordero sang Dios, nga nagakuha sang mga sala sang kalibutan, nga gamhanan sa pagluwas kag sa pagtinlo halin sa tanan nga pagkadi-matarong.

15 Huo, ginasiling ko sa inyo dali na kag indi magkahadlok, kag ipahigad ang tagsa ka sala, nga madali nga nagatublag sa inyo, nga nagagapos sa inyo sa kalaglagan, huo, dali na kag himoa, kag ipakita sa inyo Dios nga nakahanda kamo sa paghinulsol sang inyo mga sala kag magsulod sa isa ka kasugtanan upod sa iya nga tumanon ang iya mga kasugoan, kag magsaksi sini sa iya sa sini nga adlaw paagi sa paglusong sa mga tubig sang pagbunyag.

16 Kag kon sin-o man ang nagahimo sini, kag nagatuman sang mga kasugoan sang Dios sumugod sa sina nga tion, ang amo man makadumdum nga nagsiling ako sa iya, huo, madumduman niya nga nagsiling ako sa iya nga makaangkon sia sang kabuhi nga wala’y katapusan suno sa testimonya sang Balaan nga Espiritu nga nagapamatuod sa akon.

17 Kag karon pinalangga kong mga kauturan, nagapati bala kamo sa sining mga butang? Tan-awa, ginasiling ko sa inyo, huo, nahibal-an ko nga nagapati kamo sa mga ini; kag ang paagi nga nahibal-an ko nga nagapati kamo sa mga ini amo ang paagi sa pagpahayag sang Espiritu nga yari sa akon. Kag karon tungod ang inyo pagtuo mabakod parte sina, huo, parte sa mga butang nga akon ginhambal, dako ang akon kalipay.

18 Kay pareho sang akon ginsiling sa inyo halin sa ginsuguran, nga may dako ako nga handum nga wala kamo sa makahaladlok nga kahimtangan pareho sang inyo mga kauturan, kag nakita ko nga ang akon mga handum natuman.

19 Kay makita ko nga yara kamo sa mga banas sang pagkamatarong; makita ko nga yara kamo sa banas nga nagapadulong sa ginharian sang Dios; huo, makita ko nga ginahimo ninyo nga matadlong ang iya mga banas.

20 Makita ko nga ginpahibalo sa inyo, paagi sa pagpamatuod sang iya pulong, nga wala sia nagalakat sa tiko nga mga banas; ukon wala man sia nagabag-o sang iya ginhambal; ukon wala man sia sa bisan pinakadiutay nagaliso halin sa tuo pakadto sa wala, ukon halin sa sinang husto pakadto sa sinang sayop; gani, ang iya alagyan isa ka wala’y katapusan nga nagalibot nga alagyan.

21 Kag wala sia nagapuyo sa di-balaan nga mga templo; ukon indi man mabaton ang kahigkoan ukon bisan ano nga di-matinlo sa ginharian sang Dios; gani ginasiling ko sa inyo nga ang tion magaabot, huo, kag ini mangin sa katapusan nga adlaw, nga sia nga mahigko magapabilin sa iya kahigkoan.

22 Kag karon pinalangga kong mga kauturan, nagsiling ako sining mga butang sa inyo agud mapukaw ko kamo sa paghunahuna sang inyo tulumanon sa Dios, agud maglakat kamo nga wala’y kabasulanan sa iya atubang, agud maglakat kamo suno sa balaan nga paagi sang Dios, nga suno sa sini kamo ginbaton.

23 Kag karon luyag ko nga kamo mangin mapainubuson, kag mangin masinulundon kag malulo; mahapos pangabayon; puno sang pagpaumod kag pagkamainantuson; nga may pagpugong sa kaugalingon sa tanan nga butang; nga matutum sa pagtuman sang mga kasugoan sang Dios sa tanan nga tinion; nga nagapangayo sang kon ano man nga mga butang nga inyo ginakinahanglan, nga espirituhanon kag dutan-on; nga dalayon nga nagabalus sang mga pagpasalamat sa Dios tungod sang kon ano man nga mga butang nga inyo ginabaton.

24 Kag siguroha nga kamo may pagtuo, paglaum, kag putli nga paghigugma, kag sa sina pirme kamo nga magabugana sa maayo nga mga buluhaton.

25 Kag kabay nga pakamaayohon kamo sang Ginuo, kag tipigan ang inyo mga biste nga wala’y mantsa, agud sa katapusan madala kamo sa pagpungko upod kanday Abraham, Isaac, kag Jacob, kag sang balaan nga mga propeta nga yara na halin pa sang pagsugod sang kalibutan, nga ang inyo mga biste wala’y mantsa bisan pareho nga ang ila mga biste wala’y mantsa, sa ginharian sang langit agud indi na maggwa pa.

26 Kag karon pinalangga kong mga kauturan, ginhambal ko ining mga pulong sa inyo suno sa Espiritu nga nagapamatuod sa akon; kag ang akon kalag nagakasadya sing tuman tungod sang tuman nga katutum kag pagpamati nga inyo ginhatag sa akon pulong.

27 Kag karon, kabay nga mangin sa inyo ang paghidaet sang Dios, kag sa inyo mga balay kag mga duta, kag sa inyo mga panong kag mga baka, kag sa tanan nga inyo ginapanag-iyahan, sa inyo mga babayi kag sa inyo mga anak, suno sa inyo pagtuo kag maayo nga mga binuhatan, sugod subong kag sa wala’y katapusan. Kag gani nahambal ko na. Amen.