1 Kag karon natabo ini nga si Alma nagbalik halin sa duta sang Gideon, pagkatapos nga matudloan ang katawhan ni Gideon sing madamo nga butang nga indi masulat, nga nagpahamtang sang sistema sang simbahan, pareho sang iya ginhimo sang una sa duta sang Zarahemla, huo, nagbalik sia sa iya kaugalingon nga balay sa Zarahemla agud magpahuway halin sa mga pagpangabudlay nga iya ginhikot.

2 Kag gani natapos ang ika-siyam nga tuig sang pagginahum sang mga hukom sa katawhan ni Nefi.

3 Kag natabo ini sa pagsugod sang ika-napulo nga tuig sang pagginahum sang mga hukom sa katawhan ni Nefi, nga si Alma naghalin sa sina nga lugar kag nagsugod sang iya pagpanglakaton patabok sa duta sang Melek, sa weste sang suba sang Sidon, sa weste malapit sa mga dulonan sang kamingawan.

4 Kag nagsugod sia sa pagpanudlo sang katawhan sa duta sang Melek suno sa balaan nga paagi sang Dios nga sa sini sia gintawag; kag nagsugod sia sa pagpanudlo sang katawhan sa bilog nga duta sang Melek.

5 Kag natabo ini nga ang katawhan nagkadto sa iya sa tanan nga bahin sang dulonan sang duta nga yara sa kilid sang kamingawan. Kag nabunyagan sila nga yara sa bilog nga duta;

6 Gani sang natapos niya ang iya buluhaton sa Melek naghalin sia sa sina nga lugar, kag naglakat sing tatlo ka adlaw nga pagpanglakaton sa norte sang duta sang Melek; kag nakaabot sia sa isa ka siyudad nga ginatawag nga Amonihas.

7 Karon naandan na sadto sang katawhan ni Nefi ang magtawag sang ila mga duta, kag sang ila mga siyudad, kag sang ila mga baryo, huo, bisan sang tanan nila nga magagmay nga mga baryo, sunod sa ngalan sinang una nga nagpanag-iya sa mga ini; kag gani amo ini sa duta sang Amonihas.

8 Kag natabo ini nga sang nakaabot si Alma sa siyudad sang Amonihas nagsugod sia sa pagwali sang pulong sang Dios sa ila.

9 Karon si Satanas may dako nga kapyot sa mga tagipusuon sang katawhan sang siyudad sang Amonihas; gani indi sila mamati sa mga pulong ni Alma.

10 Apang si Alma nagpangabudlay sing tuman sa espiritu, nga nagpanikasog sa Dios sa hugot nga pangamuyo, agud nga ibubo niya ang iya Espiritu sa katawhan nga yara sa siyudad; agud nga itugot man niya nga mabunyagan niya sila sa paghinulsol.

11 Apang, ginpatig-a nila ang ila mga tagipusuon nga nagasiling sa iya: Tan-awa, nahibal-an namon nga ikaw si Alma; kag nahibal-an namon nga ikaw ang mataas nga pari sa simbahan nga ginpahamtang mo sa madamo nga bahin sang duta, suno sa inyo tradisyon; kag indi kami kabahin sang imo simbahan, kag wala kami nagapati sa amo sina nga binuang nga mga tradisyon.

12 Kag karon nahibal-an namon nga tungod indi kami kabahin sang imo simbahan, nahibal-an namon nga wala ka sing gahum sa amon; kag gintugyan mo ang hukom-lingkuranan kay Nefias; gani indi ikaw ang amon puno nga hukom.

13 Karon sang ginhambal ini sang katawhan, kag ginbais ang tanan niya nga pulong, kag ginpasipalahan sia, kag ginduplaan sia, kag ginpatabog sia pagwa sa ila siyudad, naghalin sia sa sina nga lugar kag nagsugod sang iya pagpanglakaton padulong sa siyudad nga ginatawag nga Aaron.

14 Kag natabo ini nga samtang nagapanglakaton sia pakadto didto, nga ginapabug-atan sang kasubo, nga nagaubog sa tuman nga pag-antos kag kasakit sang kalag tungod sang kalainan sang katawhan nga yara sa siyudad sang Amonihas, natabo ini nga samtang si Alma ginapabug-atan sang kasubo, tan-awa isa ka anghel sang Ginuo ang nagpakita sa iya nga nagasiling:

15 Bulahan ikaw, Alma; gani, ibayaw ang imo ulo kag magkasadya kay may dako ka nga kabangdanan nga magkasadya; kay nangin matutum ka sa pagtuman sang mga kasugoan sang Dios halin sa tion nga nabaton mo ang imo una nga mensahe halin sa iya. Tan-awa, ako amo sia nga nagdul-ong sini sa imo.

16 Kag tan-awa, ginpadala ako agud suguon ka nga magbalik sa siyudad sang Amonihas, kag magwali liwat sa katawhan sang siyudad; huo, magwali sa ila. Huo, ihambal sa ila, luwas lang nga maghinulsol sila pagalaglagon sila sang Ginuong Dios.

17 Kay tan-awa, ginatun-an nila sa sini nga tion agud nga gub-on nila ang kahilwayan sang imo katawhan, (kay amo ini ang ginasiling sang Ginuo) nga batok sa mga pagsulundan, kag mga paghukom, kag mga kasugoan nga iya ginhatag sa iya katawhan.

18 Karon natabo ini nga pagkatapos nga nabaton ni Alma ang iya mensahe halin sa anghel sang Ginuo gilayon sia nga nagbalik sa duta sang Amonihas. Kag nagsulod sia sa siyudad paagi sa isa pa ka alagyan, huo, sa alagyan nga yara sa sur sang siyudad sang Amonihas.

19 Kag sang nagsulod sia sa siyudad gingutom sia, kag nagsiling sia sa isa ka lalaki: Mahatagan mo bala ang isa ka kubos nga alagad sang Dios sang makaon?

20 Kag ang lalaki nagsiling sa iya: Isa ako ka Nefinhon, kag nahibal-an ko nga isa ikaw ka balaan nga propeta sang Dios kay ikaw ang lalaki nga ginhambal sing isa ka anghel sa isa ka panan-awon: Batonon mo. Gani, mag-upod ka sa akon sa akon puluy-an kag hatagan ko ikaw sang akon pagkaon; kag nahibal-an ko nga mangin isa ikaw ka pagpakamaayo sa akon kag sa akon panimalay.

21 Kag natabo ini nga ginbaton sia sang lalaki sa iya puluy-an; kag ang lalaki ginatawag nga si Amulek; kag nagdala sia sang tinapay kag karne kag ginbutang sa atubang ni Alma.

22 Kag natabo ini nga si Alma nagkaon sang tinapay kag nabusog; kag ginpakamaayo niya si Amulek kag ang iya panimalay, kag naghatag sia sing pasalamat sa Dios.

23 Kag pagkatapos nga nakakaon sia kag nabusog nagsiling sia kay Amulek: Ako si Alma, kag ako ang mataas nga pari sa simbahan sang Dios sa bilog nga duta.

24 Kag tan-awa, gintawag ako agud magwali sang pulong sang Dios sa tanan sining katawhan, suno sa espiritu sang rebelasyon kag propesiya; kag yari na ako sa sini nga duta kag indi sila magbaton sa akon, kundi nga gintabog nila ako pagwa kag nagahana na kuntani ako nga talikdan ini nga duta tubtob sa wala’y katapusan.

25 Apang tan-awa, ginsugo ako nga dapat ako magbalik liwat kag magpropesiya sa sining katawhan, huo, kag magpamatuod batok sa ila parte sa ila mga kalainan.

26 Kag karon, Amulek, tungod ginpakaon mo ako kag ginbaton ako, bulahan ikaw; kay gingutom ako, kay nagpuasa ako sa madamo nga inadlaw.

27 Kag si Alma nagtinir sa madamo nga inadlaw upod kay Amulek antes sia nagsugod sa pagwali sa katawhan.

28 Kag natabo ini nga ang katawhan naglala na gid sa ila mga kalainan.

29 Kag ang pulong nag-abot kay Alma nga nagasiling: Lakat; kag amo man ihambal sa akon alagad nga si Amulek, maglakat kag magpropesiya sa sining katawhan nga nagasiling—Maghinulsol kamo, kay ini ang siling sang Ginuo, luwas lang nga maghinulsol kamo bisitahan ko ining katawhan sa akon kaakig; huo, kag indi ko pag-ipaiway ang akon mabangis nga kaakig.

30 Kag si Alma naglakat, kag amo man si Amulek, sa katawhan, agud ipahayag ang mga pulong sang Dios sa ila; kag napuno sila sang Balaan nga Espiritu.

31 Kag may gahum nga ginhatag sa ila sa bagay nga indi sila mahimo nga ihunong sa mga bilanggoan sa idalom-duta; kag indi man mahimo nga ang bisan sin-o nga tawo makapatay sa ila; apang wala sila naggamit sang ila gahum tubtob nga ginpanggapos sila sang lubid kag ginhunong sa bilanggoan. Karon, natabo ini agud mapakita sang Ginuo ang iya gahum paagi sa ila.

32 Kag natabo ini nga naglakat sila kag nagsugod sa pagwali kag sa pagpropesiya sa katawhan suno sa espiritu kag gahum nga ginhatag sang Ginuo sa ila.