ພາກທີ 109
ຄຳອະທິຖານທີ່ກ່າວອຸທິດພຣະວິຫານທີ່ເມືອງເຄີດແລນ, ລັດໂອໄຮໂອ, ວັນທີ 27 ເດືອນມີນາ, 1836. ອີງຕາມໃບຖະແຫລງການຂອງສາດສະດາ, ຄຳອະທິຖານນີ້ໄດ້ຖືກມອບໃຫ້ແກ່ເພິ່ນໂດຍການເປີດເຜີຍ.
1–5, ພຣະວິຫານເຄີດແລນໄດ້ຖືກສ້າງຂຶ້ນເພື່ອເປັນສະຖານທີ່ໃຫ້ບຸດມະນຸດສະເດັດມາຢ້ຽມຢາມ; 6–21, ມັນຄວນເປັນບ້ານແຫ່ງການອະທິຖານ, ຖືສິນອົດເຂົ້າ, ສັດທາ, ຮຽນຮູ້, ລັດສະໝີພາບ, ແລະ ລະບຽບ, ແລະ ບ້ານຂອງພຣະເຈົ້າ; 22–33, ຂໍໃຫ້ຄົນທີ່ບໍ່ກັບໃຈ ທີ່ຕໍ່ຕ້ານຜູ້ຄົນຂອງພຣະຜູ້ເປັນເຈົ້າຖືກເຮັດໃຫ້ສັບສົນ; 34–42, ຂໍໃຫ້ໄພ່ພົນຂອງພຣະເຈົ້າອອກໄປດ້ວຍອຳນາດເພື່ອເຕົ້າໂຮມຄົນຊອບທຳສູ່ຊີໂອນ; 43–53, ຂໍໃຫ້ໄພ່ພົນຂອງພຣະເຈົ້າຖືກປົດປ່ອຍຈາກສິ່ງໜ້າຢ້ານກົວທັງຫລາຍ ຊຶ່ງຈະຖອກເທລົງມາເທິງຄົນຊົ່ວໃນຍຸກສຸດທ້າຍ; 54–58, ຂໍໃຫ້ປະຊາຊາດ ແລະ ຜູ້ຄົນ ແລະ ສາດສະໜາຈັກທັງຫລາຍຕຽມຮັບພຣະກິດຕິຄຸນ; 59–67, ຂໍໃຫ້ຊາວຢິວ, ຊາວເລມັນ, ແລະ ຊາວອິດສະຣາເອນທັງຫລາຍໄດ້ຮັບການໄຖ່; 68–80, ຂໍໃຫ້ໄພ່ພົນຂອງພຣະເຈົ້າໄດ້ຮັບການສວມມົງກຸດດ້ວຍລັດສະໝີພາບ ແລະ ກຽດຕິຍົດ ແລະ ໄດ້ຮັບຄວາມລອດນິລັນດອນ.
1 ຂໍ ຂອບພຣະໄທແດ່ພຣະນາມຂອງພຣະອົງ, ໂອ້ ອົງພຣະຜູ້ເປັນເຈົ້າຂອງອິດສະຣາເອນ, ຜູ້ຮັກສາ ພັນທະສັນຍາ ແລະ ສະແດງຄວາມເມດຕາແກ່ຜູ້ຮັບໃຊ້ຂອງພຣະອົງຜູ້ເດີນໄປຢ່າງພາກພູມໃຈ ຕໍ່ພຣະພັກຂອງພຣະອົງ, ດ້ວຍສຸດຫົວໃຈຂອງພວກເຂົາ—
2 ພຣະອົງຜູ້ໄດ້ບັນຊາຜູ້ຮັບໃຊ້ຂອງພຣະອົງໃຫ້ ສ້າງບ້ານແດ່ພຣະນາມຂອງພຣະອົງໃນສະຖານທີ່ນີ້ [ເຄີດແລນ].
3 ແລະ ບັດນີ້ ພຣະອົງເຫັນແລ້ວ, ໂອ້ ພຣະຜູ້ເປັນເຈົ້າ, ວ່າຜູ້ຮັບໃຊ້ຂອງພຣະອົງໄດ້ເຮັດຕາມພຣະບັນຊາຂອງພຣະອົງ.
4 ແລະ ບັດນີ້ ພວກຂ້າພຣະອົງທູນຂໍພຣະອົງ, ພຣະບິດາຜູ້ບໍລິສຸດ, ໃນພຣະນາມຂອງພຣະເຢຊູຄຣິດ, ພຣະບຸດຈາກຊວງເອິກຂອງພຣະອົງ, ຊຶ່ງໃນພຣະນາມຂອງພຣະອົງເທົ່ານັ້ນທີ່ຄວາມລອດສາມາດຖືກປະຕິບັດຕໍ່ລູກຫລານມະນຸດ, ພວກຂ້າພຣະອົງທູນຂໍພຣະອົງ, ໂອ້ ພຣະອົງເຈົ້າເອີຍ, ໂປດຮັບ ບ້ານຫລັງນີ້, ອັນເປັນ ຝີມືຂອງພວກຂ້າພຣະອົງ, ຜູ້ຮັບໃຊ້ຂອງພຣະອົງ, ຊຶ່ງພຣະອົງໄດ້ບັນຊາພວກຂ້າພຣະອົງໃຫ້ສ້າງ.
5 ເພາະພຣະອົງຮູ້ວ່າ ພວກຂ້າພຣະອົງໄດ້ເຮັດວຽກງານນີ້ຜ່ານຄວາມທຸກຍາກລຳບາກອັນແສນສາຫັດ; ແລະ ຈາກຄວາມຍາກຈົນຂອງພວກຂ້າພຣະອົງ, ພວກຂ້າພຣະອົງໄດ້ຖວາຍເຂົ້າຂອງ ຂອງພວກຂ້າພຣະອົງເພື່ອສ້າງ ບ້ານແດ່ພຣະນາມຂອງພຣະອົງ, ເພື່ອວ່າບຸດມະນຸດຈະມີບ່ອນສະແດງພຣະອົງເອງໃຫ້ປະຈັກແກ່ຜູ້ຄົນຂອງພຣະອົງ.
6 ແລະ ດັ່ງທີ່ພຣະອົງໄດ້ກ່າວໄວ້ຢູ່ໃນ ການເປີດເຜີຍ, ທີ່ໄດ້ປະທານໃຫ້ແກ່ພວກຂ້າພຣະອົງ, ເອີ້ນພວກຂ້າພຣະອົງວ່າເປັນເພື່ອນຂອງພຣະອົງ, ໂດຍກ່າວວ່າ—ຈົ່ງເອີ້ນໃຫ້ມີການຊຸມນຸມທີ່ສັກສິດ, ດັ່ງທີ່ເຮົາໄດ້ບັນຊາພວກເຈົ້າ;
7 ແລະ ເນື່ອງຈາກວ່າຄົນທັງປວງບໍ່ມີສັດທາ, ພວກເຈົ້າຈົ່ງສະແຫວງຫາຢ່າງພາກພຽນ ແລະ ສິດສອນຖ້ອຍຄຳແຫ່ງປັນຍາໃຫ້ກັນແລະກັນ; ແທ້ຈິງແລ້ວ, ພວກເຈົ້າຈົ່ງສະແຫວງຫາຖ້ອຍຄຳແຫ່ງປັນຍາຢູ່ໃນປຶ້ມທີ່ດີທີ່ສຸດ; ຈົ່ງສະແຫວງຫາການຮຽນຮູ້, ແມ່ນແຕ່ໂດຍການສຶກສາ ແລະ ໂດຍສັດທານຳອີກ;
8 ຈົ່ງວາງລະບຽບຕົນເອງ; ຕຽມສິ່ງທີ່ຈຳເປັນທຸກຢ່າງ; ແລະ ສະຖາປະນາບ້ານ, ແມ່ນແຕ່ບ້ານແຫ່ງການອະທິຖານ, ບ້ານແຫ່ງການຖືສິນອົດເຂົ້າ, ບ້ານແຫ່ງສັດທາ, ບ້ານແຫ່ງການຮຽນຮູ້, ບ້ານແຫ່ງລັດສະໝີພາບ, ບ້ານແຫ່ງລະບຽບ, ບ້ານຂອງພຣະເຈົ້າ;
9 ເພື່ອການເຂົ້າມາຂອງພວກເຈົ້າຈະເປັນໄປໃນພຣະນາມຂອງພຣະຜູ້ເປັນເຈົ້າ; ເພື່ອການອອກໄປຂອງພວກເຈົ້າຈະເປັນໄປໃນພຣະນາມຂອງພຣະຜູ້ເປັນເຈົ້າ; ເພື່ອການທັກທາຍທັງໝົດຂອງພວກເຈົ້າຈະເປັນໄປໃນພຣະນາມຂອງພຣະຜູ້ເປັນເຈົ້າ, ດ້ວຍມືທີ່ຍົກຂຶ້ນແດ່ພຣະຜູ້ສູງສຸດ—
10 ແລະ ບັດນີ້, ພຣະບິດາຜູ້ບໍລິສຸດ, ພວກຂ້າພຣະອົງທູນຂໍໃຫ້ພຣະອົງຊ່ວຍເຫລືອພວກຂ້າພຣະອົງ, ຜູ້ຄົນຂອງພຣະອົງ, ດ້ວຍພຣະຄຸນຂອງພຣະອົງ, ໃນການເອີ້ນໃຫ້ມີການຊຸມນຸມທີ່ສັກສິດຂອງພວກຂ້າພຣະອົງ, ເພື່ອວ່າມັນຈະເປັນໄປເພື່ອໃຫ້ກຽດແດ່ພຣະອົງ ແລະ ເພື່ອການຮັບຮອງອັນສູງສົ່ງຂອງພຣະອົງ;
11 ແລະ ໃນວິທີທີ່ພວກຂ້າພຣະອົງຈະຖືກພົບເຫັນວ່າມີຄຸນຄ່າ, ໃນສາຍພຣະເນດຂອງພຣະອົງ, ເພື່ອຈະໄດ້ສຳເລັດຜົນໃນ ຄຳສັນຍາຊຶ່ງພຣະອົງໄດ້ກະທຳໄວ້ກັບພວກຂ້າພຣະອົງ, ຜູ້ຄົນຂອງພຣະອົງ, ໃນການເປີດເຜີຍທີ່ໄດ້ມອບໃຫ້ແກ່ພວກຂ້າພຣະອົງ;
12 ເພື່ອວ່າ ລັດສະໝີພາບຂອງພຣະອົງຈະລົງມາສະຖິດຢູ່ເທິງຜູ້ຄົນຂອງພຣະອົງ, ແລະ ເທິງບ້ານຫລັງນີ້ຂອງພຣະອົງ, ຊຶ່ງພວກຂ້າພຣະອົງໄດ້ອຸທິດແດ່ພຣະອົງ, ເພື່ອວ່າມັນຈະໄດ້ຮັບການຊຳລະໃຫ້ບໍລິສຸດ ແລະ ຖືກອຸທິດຖວາຍໃຫ້ສັກສິດ, ແລະ ເພື່ອວ່າການປະທັບຢູ່ທີ່ສັກສິດຂອງພຣະອົງຈະດຳເນີນຕໍ່ໄປໃນບ້ານຫລັງນີ້;
13 ແລະ ເພື່ອວ່າຜູ້ຄົນທັງປວງທີ່ຈະເຂົ້າສູ່ທາງເຂົ້າບ້ານຂອງພຣະຜູ້ເປັນເຈົ້າ ຈະຮູ້ສຶກເຖິງອຳນາດຂອງພຣະອົງ, ແລະ ຍອມ ຮັບຮູ້ວ່າ ພຣະອົງໄດ້ຊຳລະບ່ອນນີ້ໃຫ້ບໍລິສຸດ, ແລະ ວ່າມັນເປັນບ້ານຂອງພຣະອົງ, ເປັນສະຖານທີ່ສັກສິດຂອງພຣະອົງ.
14 ແລະ ຂໍໃຫ້ພຣະອົງຈົ່ງປະທານ, ພຣະບິດາຜູ້ບໍລິສຸດເອີຍ, ໃຫ້ທຸກຄົນຜູ້ທີ່ຈະນະມັດສະການໃນບ້ານຫລັງນີ້ໄດ້ຮັບການສິດສອນຖ້ອຍຄຳແຫ່ງປັນຍາຢູ່ໃນປຶ້ມທີ່ດີທີ່ສຸດ; ແລະ ໃຫ້ພວກເຂົາສະແຫວງຫາການຮຽນຮູ້, ແມ່ນແຕ່ໂດຍການສຶກສາ, ແລະ ໂດຍສັດທານຳອີກ, ດັ່ງທີ່ພຣະອົງໄດ້ກ່າວ;
15 ແລະ ໃຫ້ພວກເຂົາເຕີບໂຕຂຶ້ນໃນພຣະອົງ, ແລະ ໄດ້ຮັບຄວາມສົມບູນແຫ່ງພຣະວິນຍານບໍລິສຸດ, ແລະ ເປັນລະບຽບຕາມກົດຂອງພຣະອົງ, ແລະ ຕຽມພ້ອມທີ່ຈະຮັບສິ່ງຈຳເປັນທຸກຢ່າງ;
16 ແລະ ໃຫ້ບ້ານແຫ່ງນີ້ເປັນບ້ານແຫ່ງການອະທິຖານ, ບ້ານແຫ່ງການຖືສິນອົດເຂົ້າ, ບ້ານແຫ່ງສັດທາ, ບ້ານແຫ່ງລັດສະໝີພາບ ແລະ ຂອງພຣະເຈົ້າ, ແມ່ນແຕ່ບ້ານຂອງພຣະອົງ;
17 ໃຫ້ການເຂົ້າມາທັງໝົດຂອງຜູ້ຄົນຂອງພຣະອົງ, ສູ່ບ້ານແຫ່ງນີ້, ເປັນໄປໃນພຣະນາມຂອງພຣະຜູ້ເປັນເຈົ້າ;
18 ໃຫ້ການອອກໄປທັງໝົດຂອງເຂົາເຈົ້າຈາກບ້ານແຫ່ງນີ້ ເປັນໄປໃນພຣະນາມຂອງພຣະຜູ້ເປັນເຈົ້າ;
19 ແລະ ໃຫ້ການທັກທາຍທັງໝົດຂອງເຂົາເຈົ້າ ເປັນໄປໃນພຣະນາມຂອງພຣະຜູ້ເປັນເຈົ້າ, ດ້ວຍມືບໍລິສຸດ, ທີ່ຍົກຂຶ້ນແດ່ພຣະຜູ້ສູງສຸດ;
20 ແລະ ບໍ່ອະນຸຍາດໃຫ້ ສິ່ງທີ່ບໍ່ສະອາດເຂົ້າມາໃນບ້ານຂອງພຣະອົງ ເພື່ອເຮັດໃຫ້ມັນເປິເປື້ອນ;
21 ແລະ ເມື່ອຜູ້ຄົນຂອງພຣະອົງລ່ວງລະເມີດ, ຄົນໜຶ່ງຄົນໃດກໍຕາມໃນພວກເຂົາ, ເຂົາເຈົ້າຈະກັບໃຈຢ່າງໄວ ແລະ ກັບຄືນມາຫາພຣະອົງ, ແລະ ພົບຄວາມໂປດປານໃນສາຍພຣະເນດຂອງພຣະອົງ, ແລະ ຖືກຮັບຄືນສູ່ພອນຊຶ່ງພຣະອົງໄດ້ແຕ່ງຕັ້ງໄວ້ໃຫ້ຖອກເທລົງມາເທິງຄົນເຫລົ່ານັ້ນ ທີ່ຈະນອບນ້ອມ ຄາລະວະພຣະອົງຢູ່ໃນບ້ານຂອງພຣະອົງ.
22 ແລະ ພວກຂ້າພຣະອົງທູນຂໍພຣະອົງ, ພຣະບິດາຜູ້ບໍລິສຸດ, ໃຫ້ຜູ້ຮັບໃຊ້ຂອງພຣະອົງອອກໄປຈາກບ້ານແຫ່ງນີ້ໂດຍມີອຳນາດຂອງພຣະອົງເປັນອາວຸດ, ແລະ ໃຫ້ພຣະນາມຂອງພຣະອົງຢູ່ກັບເຂົາເຈົ້າ, ແລະ ໃຫ້ລັດສະໝີພາບຂອງພຣະອົງຢູ່ອ້ອມຮອບເຂົາເຈົ້າ, ແລະ ເຫລົ່າທູດຂອງພຣະອົງຮັບຜິດຊອບດູແລເຂົາເຈົ້າ;
23 ແລະ ຈາກສະຖານທີ່ແຫ່ງນີ້ ເຂົາເຈົ້າຈະນຳຂ່າວສຳຄັນ ແລະ ປະເສີດ, ຕາມຄວາມຈິງ, ໄປຍັງ ທີ່ສຸດຂອງແຜ່ນດິນໂລກ, ເພື່ອວ່າເຂົາເຈົ້າຈະໄດ້ຮູ້ວ່າ ນີ້ຄືວຽກງານຂອງພຣະອົງ, ແລະວ່າພຣະອົງຈະຍື່ນພຣະຫັດຂອງພຣະອົງອອກໄປ, ເພື່ອເຮັດໃຫ້ສິ່ງທີ່ພຣະອົງໄດ້ຮັບສັ່ງໄວ້ ໂດຍປາກຂອງສາດສະດາທັງຫລາຍກ່ຽວກັບຍຸກສຸດທ້າຍສຳເລັດຄົບຖ້ວນ.
24 ພວກຂ້າພຣະອົງທູນຂໍພຣະອົງ, ພຣະບິດາຜູ້ບໍລິສຸດ, ຈົ່ງໂປດສະຖາປະນາຜູ້ຄົນທີ່ຈະນະມັດສະການ, ແລະ ມີຊື່ສຽງ ແລະ ຖານະໃນບ້ານແຫ່ງນີ້ຂອງພຣະອົງ, ແກ່ທຸກລຸ້ນ ແລະ ຊົ່ວນິລັນດອນ;
25 ເພື່ອວ່າອາວຸດທີ່ຖືກ ສ້າງຂຶ້ນຕໍ່ຕ້ານເຂົາເຈົ້າຈະບໍ່ຈະເລີນ; ເພື່ອວ່າຄົນທີ່ຂຸດ ຫລຸມດັກເຂົາເຈົ້າຈະຕົກລົງໄປໃນຫລຸມນັ້ນເອງ;
26 ເພື່ອວ່າບໍ່ມີການມົ້ວສຸມລັບແຫ່ງຄວາມຊົ່ວຮ້າຍໃດ ຈະມີອຳນາດເພື່ອລຸກຂຶ້ນ ແລະ ຊະນະຜູ້ຄົນຂອງພຣະອົງ ຊຶ່ງຢູ່ເທິງຜູ້ຄົນເຫລົ່ານັ້ນ ທີ່ ພຣະນາມຂອງພຣະອົງຈະຢູ່ນຳໃນບ້ານແຫ່ງນີ້;
27 ແລະ ຖ້າຫາກຜູ້ຄົນໃດຈະລຸກຂຶ້ນຕໍ່ຕ້ານຜູ້ຄົນເຫລົ່ານີ້, ກໍໃຫ້ພຣະພິໂລດຂອງພຣະອົງຈົ່ງເກີດກັບພວກເຂົາ;
28 ແລະ ຖ້າຫາກພວກເຂົາຈະລົງໂທດຜູ້ຄົນເຫລົ່ານີ້ ຂໍໃຫ້ພຣະອົງຈົ່ງລົງໂທດພວກເຂົາ; ຂໍໃຫ້ພຣະອົງຈົ່ງຕໍ່ສູ້ໃຫ້ຜູ້ຄົນຂອງພຣະອົງ ດັ່ງທີ່ພຣະອົງໄດ້ເຮັດໃນວັນແຫ່ງການສູ້ຮົບ, ເພື່ອວ່າເຂົາເຈົ້າຈະໄດ້ຖືກປົດປ່ອຍຈາກມືຂອງສັດຕູທັງປວງຂອງເຂົາເຈົ້າ.
29 ພວກຂ້າພຣະອົງທູນຂໍພຣະອົງ, ພຣະບິດາຜູ້ບໍລິສຸດ, ຈົ່ງເຮັດໃຫ້ທຸກຄົນທີ່ແຜ່ຂ່າວເທັດໄປທົ່ວໂລກຕໍ່ຕ້ານຜູ້ຮັບໃຊ້ ຫລື ບັນດາຜູ້ຮັບໃຊ້ຂອງພຣະອົງ ຍອມຈຳນົນ, ແລະ ຕົກຕະລຶງ, ແລະ ຖືກນຳມາສູ່ຄວາມອັບອາຍ ແລະ ຄວາມສັບສົນ, ຖ້າຫາກພວກເຂົາບໍ່ກັບໃຈ, ເມື່ອພຣະກິດຕິຄຸນອັນເປັນນິດຈະຖືກປະກາດໃນຫູຂອງພວກເຂົາ;
30 ແລະ ໃຫ້ວຽກງານທັງໝົດຂອງພວກເຂົາບໍ່ມີປະໂຫຍດ, ແລະ ຖືກກວາດລ້າງໄປໂດຍລູກ ໝາກເຫັບ, ແລະ ໂດຍການພິພາກສາ ຊຶ່ງພຣະອົງຈະສົ່ງມາຍັງພວກເຂົາໃນຄວາມພຣະພິໂລດຂອງພຣະອົງ, ເພື່ອຢຸດຕິ ການເວົ້າຕົວະ ແລະ ການໃສ່ຮ້າຍປ້າຍສີຜູ້ຄົນຂອງພຣະອົງ.
31 ເພາະພຣະອົງຮູ້, ໂອ້ ພຣະຜູ້ເປັນເຈົ້າ, ວ່າຜູ້ຮັບໃຊ້ຂອງພຣະອົງບໍລິສຸດຢູ່ຕໍ່ພຣະພັກຂອງພຣະອົງ ໃນການກ່າວຄຳພະຍານເຖິງພຣະນາມຂອງພຣະອົງ, ຊຶ່ງເຂົາເຈົ້າໄດ້ຮັບທຸກທໍລະມານກັບສິ່ງເຫລົ່ານີ້.
32 ສະນັ້ນ ພວກຂ້າພຣະອົງທູນຂໍພຣະອົງ ຢູ່ຕໍ່ພຣະພັກຂອງພຣະອົງ ເພື່ອການປົດປ່ອຍອັນຄົບຖ້ວນ ແລະ ບໍລິບູນ ແລະ ຈາກພາຍໃຕ້ ແອກນີ້;
33 ຈົ່ງຫັກມັນເຖີດ, ໂອ້ ພຣະຜູ້ເປັນເຈົ້າ; ຈົ່ງຫັກມັນອອກຈາກຄໍຂອງຜູ້ຮັບໃຊ້ຂອງພຣະອົງ, ໂດຍອຳນາດຂອງພຣະອົງ, ເພື່ອວ່າພວກຂ້າພຣະອົງຈະໄດ້ລຸກຂຶ້ນໃນທ່າມກາງຄົນລຸ້ນນີ້ ແລະ ເຮັດວຽກງານຂອງພຣະອົງ.
34 ໂອ້ ພຣະເຢໂຮວາ, ຈົ່ງມີຄວາມເມດຕາຕໍ່ຜູ້ຄົນເຫລົ່ານີ້, ແລະ ເນື່ອງຈາກມະນຸດທັງປວງເຮັດ ບາບ, ຈົ່ງໃຫ້ອະໄພແກ່ການລ່ວງລະເມີດຂອງຜູ້ຄົນຂອງພຣະອົງ, ແລະ ໃຫ້ສິ່ງເຫລົ່ານັ້ນຖືກລົບລ້າງໄປຕະຫລອດການດ້ວຍເຖີດ.
35 ຂໍໃຫ້ ການເຈີມຂອງຜູ້ປະຕິບັດສາດສະໜາກິດຂອງພຣະອົງ ຖືກຜະນຶກໄວ້ເທິງເຂົາເຈົ້າດ້ວຍອຳນາດຈາກເບື້ອງບົນ.
36 ຂໍໃຫ້ເກີດສຳເລັດຜົນກັບເຂົາເຈົ້າ, ດັ່ງທີ່ໄດ້ເກີດກັບຄົນເຫລົ່ານັ້ນໃນວັນເພັນເຕຄໍສະເຕ; ຂໍຈົ່ງຖອກເທຂອງປະທານແຫ່ງ ການເວົ້າພາສາລົງມາຍັງຜູ້ຄົນຂອງພຣະອົງ, ແມ່ນແຕ່ມີລີ້ນເປັນ ຮູບເໝືອນແປວໄຟ, ແລະ ການແປຄວາມໝາຍນັ້ນ.
37 ແລະ ຂໍໃຫ້ບ້ານຂອງພຣະອົງເຕັມປ່ຽມ, ດັ່ງດ້ວຍລົມອັນມີພະລັງແຮງ, ດ້ວຍ ລັດສະໝີພາບຂອງພຣະອົງ.
38 ຂໍຈົ່ງສວມ ປະຈັກພະຍານແຫ່ງພັນທະສັນຍາ ໃຫ້ຜູ້ຮັບໃຊ້ຂອງພຣະອົງ, ເພື່ອວ່າເມື່ອເຂົາເຈົ້າອອກໄປ ແລະ ປະກາດພຣະຄຳຂອງພຣະອົງ ເຂົາເຈົ້າຈະ ຜະນຶກກົດ, ແລະ ຕຽມໃຈຂອງໄພ່ພົນຂອງພຣະອົງສຳລັບການພິພາກສາທັງຫລາຍ ທີ່ພຣະອົງພວມຈະສົ່ງມາ, ໃນພຣະພິໂລດຂອງພຣະອົງ, ເທິງຜູ້ອາໄສ ຂອງ ແຜ່ນດິນໂລກ, ເພາະການລ່ວງລະເມີດຂອງພວກເຂົາ, ເພື່ອວ່າຜູ້ຄົນຂອງພຣະອົງຈະບໍ່ທໍ້ຖອຍໃຈໃນວັນແຫ່ງຄວາມຫຍຸ້ງຍາກ.
39 ແລະ ເມືອງໃດກໍຕາມທີ່ຜູ້ຮັບໃຊ້ຂອງພຣະອົງຈະເຂົ້າໄປ, ແລະ ຜູ້ຄົນຂອງເມືອງນັ້ນຮັບເອົາປະຈັກພະຍານຂອງເຂົາເຈົ້າ, ຂໍຈົ່ງໃຫ້ສັນຕິສຸກຂອງພຣະອົງ ແລະ ຄວາມລອດຂອງພຣະອົງຢູ່ກັບເມືອງນັ້ນ; ເພື່ອວ່າເຂົາເຈົ້າຈະໄດ້ເຕົ້າໂຮມຄົນຊອບທຳອອກຈາກເມືອງນັ້ນ, ເພື່ອວ່າພວກເຂົາຈະໄດ້ມາສູ່ ຊີໂອນ, ຫລື ສູ່ສະເຕກຂອງນາງ, ບ່ອນທີ່ໄດ້ກຳນົດໄວ້ຂອງພຣະອົງ, ພ້ອມດ້ວຍເພງແຫ່ງຄວາມສຸກອັນເປັນນິດ;
40 ແລະ ຈົນກວ່າການນີ້ຈະສຳເລັດ, ຂໍຢ່າໃຫ້ການພິພາກສາຂອງພຣະອົງຕົກລົງມາສູ່ເມືອງນັ້ນ.
41 ແລະ ເມືອງໃດກໍຕາມທີ່ຜູ້ຮັບໃຊ້ຂອງພຣະອົງຈະເຂົ້າໄປ, ແລະ ຜູ້ຄົນຂອງເມືອງນັ້ນບໍ່ໄດ້ຮັບເອົາປະຈັກພະຍານຂອງຜູ້ຮັບໃຊ້ຂອງພຣະອົງ, ແລະ ຜູ້ຮັບໃຊ້ຂອງພຣະອົງໄດ້ເຕືອນພວກເຂົາໃຫ້ຊ່ວຍຕົນເອງ ໃຫ້ລອດຈາກຄົນລຸ້ນທີ່ຊົ່ວຮ້າຍນີ້, ຂໍໃຫ້ເກີດກັບເມືອງນັ້ນດັ່ງທີ່ພຣະອົງໄດ້ຮັບສັ່ງໂດຍປາກຂອງສາດສະດາຂອງພຣະອົງ.
42 ແຕ່ຂໍພຣະອົງຈົ່ງປົດປ່ອຍ, ໂອ້ ພຣະເຢໂຮວາ, ພວກຂ້າພຣະອົງທູນຂໍພຣະອົງ, ຜູ້ຮັບໃຊ້ຂອງພຣະອົງຈາກມືຂອງພວກເຂົາ, ແລະ ຊຳລະເຂົາເຈົ້າຈາກເລືອດຂອງພວກເຂົາ.
43 ໂອ້ ພຣະຜູ້ເປັນເຈົ້າ, ພວກຂ້າພຣະອົງບໍ່ເບີກບານໃນຄວາມພິນາດຂອງເພື່ອນມະນຸດຂອງພວກຂ້າພຣະອົງ; ຈິດວິນຍານຂອງພວກເຂົາແມ່ນລ້ຳຄ່າຕໍ່ພຣະອົງ;
44 ແຕ່ພຣະຄຳຂອງພຣະອົງຕ້ອງສຳເລັດຄົບຖ້ວນ. ຂໍຈົ່ງຊ່ວຍເຫລືອຜູ້ຮັບໃຊ້ຂອງພຣະອົງທີ່ຈະກ່າວ, ດ້ວຍ ພຣະຄຸນຂອງພຣະອົງຊ່ວຍເຂົາເຈົ້າກ່າວວ່າ: ຂໍໃຫ້ເປັນໄປຕາມພຣະປະສົງຂອງພຣະອົງເທີ້ນ, ໂອ້ ພຣະຜູ້ເປັນເຈົ້າ, ແລະ ບໍ່ແມ່ນຂອງພວກຂ້າພຣະອົງ.
45 ພວກຂ້າພຣະອົງຮູ້ວ່າ ພຣະອົງໄດ້ຮັບສັ່ງໂດຍປາກຂອງສາດສະດາຂອງພຣະອົງເຖິງສິ່ງທີ່ໜ້າຢ້ານກົວ ກ່ຽວກັບຄົນຊົ່ວໃນ ຍຸກສຸດທ້າຍ—ວ່າພຣະອົງຈະຖອກເທການພິພາກສາ ຂອງພຣະອົງລົງມາຈົນເກີນກວ່າທີ່ຈະວັດແທກໄດ້;
46 ສະນັ້ນ, ໂອ້ ພຣະຜູ້ເປັນເຈົ້າ, ຂໍຈົ່ງປົດປ່ອຍຜູ້ຄົນຂອງພຣະອົງຈາກຄວາມເສຍຫາຍຂອງຄົນຊົ່ວ; ຂໍຈົ່ງເຮັດໃຫ້ຜູ້ຮັບໃຊ້ຂອງພຣະອົງສາມາດຜະນຶກກົດ, ແລະ ຜູກມັດປະຈັກພະຍານ, ເພື່ອວ່າເຂົາເຈົ້າຈະພ້ອມແລ້ວທີ່ຈະຕ້ານທານກັບວັນແຫ່ງການເຜົາໄໝ້.
47 ພວກຂ້າພຣະອົງທູນຂໍພຣະອົງ, ພຣະບິດາຜູ້ບໍລິສຸດ, ຈົ່ງນຶກເຖິງຄົນເຫລົ່ານັ້ນທີ່ໄດ້ຖືກຜູ້ອາໄສຂອງເຂດແຈ໊ກສັນ, ລັດມີເຊີຣີ, ຂັບໄລ່ໜີຈາກແຜ່ນດິນທີ່ເປັນມູນມໍລະດົກຂອງເຂົາເຈົ້າ, ແລະ ຈົ່ງຫັກ, ໂອ້ ພຣະຜູ້ເປັນເຈົ້າ, ແອກແຫ່ງຄວາມທຸກຍາກລຳບາກນີ້ ຊຶ່ງວາງຢູ່ເທິງເຂົາເຈົ້າ.
48 ພຣະອົງຮູ້ແລ້ວ, ໂອ້ ພຣະຜູ້ເປັນເຈົ້າ, ວ່າເຂົາເຈົ້າໄດ້ຖືກຄົນຊົ່ວກົດຂີ່ຂົ່ມເຫັງ ແລະ ເຮັດໃຫ້ເປັນທຸກຫລາຍ; ແລະ ຫົວໃຈຂອງພວກຂ້າພຣະອົງ ເຕັມໄປດ້ວຍຄວາມໂສກເສົ້າ ເນື່ອງດ້ວຍພາລະອັນແສນສາຫັດຂອງເຂົາເຈົ້າ.
49 ໂອ້ ພຣະຜູ້ເປັນເຈົ້າ, ດົນນານ ປານໃດທີ່ພຣະອົງຈະຍອມໃຫ້ຜູ້ຄົນເຫລົ່ານີ້ ແບກຫາບຄວາມທຸກນີ້, ແລະ ສຽງຮ້ອງຈາກຄົນບໍລິສຸດຂອງເຂົາເຈົ້າໄດ້ຂຶ້ນເຖິງພຣະກັນ ຂອງພຣະອົງ, ແລະ ເລືອດຂອງເຂົາເຈົ້າຂຶ້ນໄປເປັນປະຈັກພະຍານຕໍ່ພຣະພັກຂອງພຣະອົງ, ແລະ ຈະບໍ່ສະແດງປະຈັກພະຍານຂອງພຣະອົງເພື່ອຊ່ວຍເຫລືອເຂົາເຈົ້າບໍ?
50 ຂໍຈົ່ງມີ ເມດຕາ, ໂອ້ ພຣະຜູ້ເປັນເຈົ້າ, ຕໍ່ກຸ່ມອັນຕະພານທີ່ຊົ່ວຮ້າຍ, ຜູ້ໄດ້ຂັບໄລ່ຜູ້ຄົນຂອງພຣະອົງ, ເພື່ອວ່າພວກເຂົາຈະເຊົາປຸ້ນ, ເພື່ອວ່າພວກເຂົາຈະກັບໃຈຈາກບາບຂອງພວກເຂົາ ຖ້າຫາກການກັບໃຈຈະເປັນໄປໄດ້ສຳລັບພວກເຂົາ;
51 ແຕ່ຖ້າຫາກພວກເຂົາບໍ່ເຮັດ, ຂໍຈົ່ງອ້າແຂນຂອງພຣະອົງ, ໂອ້ ພຣະຜູ້ເປັນເຈົ້າ, ແລະ ໄຖ່ສິ່ງນັ້ນທີ່ພຣະອົງໄດ້ກຳນົດໄວ້ ເປັນຊີໂອນສຳລັບຜູ້ຄົນຂອງພຣະອົງ.
52 ແລະ ຖ້າຫາກມັນເປັນຢ່າງອື່ນບໍ່ໄດ້, ເພື່ອອຸດົມການຂອງຜູ້ຄົນຂອງພຣະອົງຈະບໍ່ລົ້ມເຫລວຢູ່ຕໍ່ພຣະພັກຂອງພຣະອົງ ກໍຂໍໃຫ້ພຣະພິໂລດຂອງພຣະອົງເກີດກັບພວກເຂົາ, ແລະ ຄວາມເຄືອງແຄ້ນຂອງພຣະອົງຈົ່ງຕົກລົງໃສ່ເທິງພວກເຂົາ, ເພື່ອວ່າພວກເຂົາຈະເສື່ອມໂຊມລົງ, ທັງຮາກ ແລະ ກິ່ງງ່າ, ຈາກພາຍໃຕ້ຟ້າສະຫວັນ;
53 ແຕ່ຕາບໃດທີ່ພວກເຂົາຈະກັບໃຈ, ຂໍພຣະອົງຈົ່ງປານີ ແລະ ເມດຕາ, ແລະ ຂໍຈົ່ງຫັນເອົາພຣະພິໂລດຂອງພຣະອົງໄປ ເມື່ອພຣະອົງທອດພຣະເນດເບິ່ງພຣະພັກ ຂອງພຣະຜູ້ທີ່ຖືກເຈີມໄວ້ຂອງພຣະອົງ.
54 ຂໍຈົ່ງມີເມດຕາ, ໂອ້ ພຣະອົງເຈົ້າເອີຍ, ຕໍ່ປະຊາຊາດທັງປວງຂອງແຜ່ນດິນໂລກ; ຂໍຈົ່ງມີເມດຕາຕໍ່ຜູ້ປົກຄອງແຜ່ນດິນຂອງພວກຂ້າພຣະອົງ; ຂໍໃຫ້ຫລັກທຳເຫລົ່ານັ້ນ, ຊຶ່ງໄດ້ຮັບການປົກປ້ອງຢ່າງສົມກຽດ ແລະ ສະຫງ່າງາມ, ນັ້ນຄື, ລັດຖະທຳມະນູນຂອງແຜ່ນດິນຂອງພວກຂ້າພຣະອົງ, ໂດຍບັນພະບຸລຸດຂອງພວກຂ້າພຣະອົງ, ໄດ້ຮັບການສະຖາປະນາໄວ້ຕະຫລອດການ.
55 ຂໍຈົ່ງລະນຶກເຖິງບັນດາກະສັດ, ເຈົ້າຊາຍ, ຜູ້ສູງສັກ, ແລະ ບຸລຸດທີ່ຍິ່ງໃຫຍ່ທັງຫລາຍຂອງແຜ່ນດິນໂລກ, ແລະ ຜູ້ຄົນທັງປວງ, ແລະ ສາດສະໜາຈັກຕ່າງໆ, ຄົນຍາກຈົນ, ຄົນຂັດສົນ, ແລະ ຄົນທີ່ເປັນທຸກທັງປວງ ຂອງແຜ່ນດິນໂລກ;
56 ເພື່ອວ່າຫົວໃຈຂອງພວກເຂົາຈະອ່ອນລົງ ເມື່ອຜູ້ຮັບໃຊ້ຂອງພຣະອົງຈະອອກໄປຈາກບ້ານຂອງພຣະອົງ, ໂອ້ ພຣະເຢໂຮວາ, ເພື່ອສະແດງປະຈັກພະຍານເຖິງພຣະນາມຂອງພຣະອົງ; ເພື່ອວ່າອະຄະຕິຂອງພວກເຂົາຈະເປີດທາງໃຫ້ ຄວາມຈິງ, ແລະ ຜູ້ຄົນຂອງພຣະອົງຈະໄດ້ຮັບຄວາມໂປດປານໃນສາຍຕາຂອງຜູ້ຄົນທັງປວງ;
57 ເພື່ອວ່າທີ່ສຸດທັງໝົດຂອງແຜ່ນດິນໂລກ ຈະຮູ້ວ່າພວກຂ້າພຣະອົງ, ຜູ້ຮັບໃຊ້ຂອງພຣະອົງ, ໄດ້ຍິນສຸລະສຽງຂອງພຣະອົງ, ແລະ ວ່າພຣະອົງໄດ້ສົ່ງພວກຂ້າພຣະອົງມາ;
58 ເພື່ອວ່າຈາກບັນດາຄົນທັງຫລາຍເຫລົ່ານີ້, ຜູ້ຮັບໃຊ້ຂອງພຣະອົງ, ບັນດາບຸດຂອງຢາໂຄບ, ຈະເຕົ້າໂຮມຄົນຊອບທຳອອກມາ ເພື່ອສ້າງນະຄອນສັກສິດແດ່ພຣະນາມຂອງພຣະອົງ, ດັ່ງທີ່ພຣະອົງໄດ້ບັນຊາພວກເຂົາ.
59 ພວກຂ້າພຣະອົງທູນຂໍພຣະອົງ ຈົ່ງໂປດກຳນົດ ສະເຕກອື່ນໆໄວ້ໃຫ້ຊີໂອນທີ່ນອກເໜືອໄປຈາກສະເຕກແຫ່ງນີ້ ຊຶ່ງພຣະອົງໄດ້ກຳນົດໄວ້, ເພື່ອວ່າ ການເຕົ້າໂຮມຂອງຜູ້ຄົນຂອງພຣະອົງຈະດຳເນີນໄປໃນອຳນາດ ແລະ ເດຊານຸພາບອັນຍິ່ງໃຫຍ່, ເພື່ອວ່າວຽກງານຂອງພຣະອົງ ຈະຖືກຕັດໃຫ້ ສັ້ນລົງໃນຄວາມຊອບທຳ.
60 ບັດນີ້ ຖ້ອຍຄຳເຫລົ່ານີ້, ໂອ້ ພຣະຜູ້ເປັນເຈົ້າ, ພວກຂ້າພຣະອົງໄດ້ທູນຢູ່ຕໍ່ພຣະພັກຂອງພຣະອົງ, ກ່ຽວກັບການເປີດເຜີຍ ແລະ ພຣະບັນຍັດ ຊຶ່ງພຣະອົງໄດ້ປະທານໃຫ້ແກ່ພວກຂ້າພຣະອົງ, ຜູ້ທີ່ຖືກລະບຸໄວ້ກັບ ຄົນຕ່າງຊາດ.
61 ແຕ່ພຣະອົງຮູ້ແລ້ວວ່າ ພຣະອົງມີຄວາມຮັກທີ່ຍິ່ງໃຫຍ່ສຳລັບລູກຫລານຂອງຢາໂຄບ, ຜູ້ໄດ້ກະຈັດກະຈາຍໄປຢູ່ຕາມພູເຂົາເປັນເວລາດົນນານ, ໃນວັນທີ່ເມກບົດບັງ ແລະ ມືດມົນ.
62 ສະນັ້ນພວກຂ້າພຣະອົງຈຶ່ງທູນຂໍພຣະອົງ ຂໍຈົ່ງມີເມດຕາຕໍ່ລູກຫລານຂອງຢາໂຄບ, ເພື່ອວ່າ ເຢຣູຊາເລັມ, ຈາກຊົ່ວໂມງນີ້ໄປ, ຈະເລີ່ມໄດ້ຮັບການໄຖ່;
63 ແລະ ແອກແຫ່ງຄວາມເປັນທາດຈະເລີ່ມຫັກອອກຈາກເຊື້ອສາຍຂອງ ດາວິດ;
64 ແລະ ລູກຫລານຂອງ ຢູດາ ຈະເລີ່ມກັບໄປຍັງ ແຜ່ນດິນ ຊຶ່ງພຣະອົງໄດ້ປະທານໃຫ້ແກ່ອັບຣາຮາມ, ບິດາຂອງພວກເຂົາ.
65 ແລະ ເຮັດໃຫ້ ຜູ້ທີ່ເຫລືອຢູ່ຂອງຢາໂຄບ, ຜູ້ທີ່ໄດ້ຖືກສາບແຊ່ງ ແລະ ຂ້ຽນຕີເພາະການລ່ວງລະເມີດຂອງພວກເຂົາ, ປ່ຽນໃຈເຫລື້ອມໃສຈາກສະພາບອັນຮ້າຍກາດ ແລະ ປ່າເຖື່ອນຂອງພວກເຂົາມາສູ່ຄວາມສົມບູນຂອງພຣະກິດຕິຄຸນອັນເປັນນິດ;
66 ເພື່ອວ່າພວກເຂົາຈະວາງອາວຸດ ແຫ່ງການນອງເລືອດຂອງພວກເຂົາ, ແລະ ຢຸດຕິການກະບົດຂອງພວກເຂົາ.
67 ແລະ ຂໍໃຫ້ຜູ້ທີ່ເຫລືອຢູ່ທັງໝົດ ຂອງ ອິດສະຣາເອນ ທີ່ກະຈັດກະຈາຍໄປ, ຜູ້ທີ່ຖືກຂັບໄລ່ໄປສູ່ທີ່ສຸດຂອງແຜ່ນດິນໂລກ, ມາສູ່ຄວາມຮູ້ເລື່ອງຄວາມຈິງ, ເຊື່ອໃນພຣະເມຊີອາ, ແລະ ຖືກໄຖ່ຈາກການກົດຂີ່ຂົ່ມເຫັງ, ແລະ ປິຕິຍິນດີຢູ່ຕໍ່ພຣະພັກຂອງພຣະອົງ.
68 ໂອ້ ພຣະອົງເຈົ້າເອີຍ, ຂໍຈົ່ງລະນຶກເຖິງຜູ້ຮັບໃຊ້ຂອງພຣະອົງ, ໂຈເຊັບ ສະມິດ, ຜູ້ລູກ, ແລະ ຄວາມທຸກທໍລະມານ ແລະ ການຖືກຂົ່ມເຫັງທັງໝົດຂອງລາວ—ລາວໄດ້ເຮັດ ພັນທະສັນຍາແນວໃດກັບ ພຣະເຢໂຮວາ, ແລະ ໄດ້ປະຕິຍານຕໍ່ພຣະອົງ, ໂອ້ ພຣະເຈົ້າອົງຍິ່ງໃຫຍ່ຂອງຢາໂຄບ—ແລະ ພຣະບັນຍັດ ຊຶ່ງພຣະອົງໄດ້ປະທານໃຫ້ແກ່ລາວ, ແລະ ທີ່ລາວໄດ້ພະຍາຍາມຢ່າງຈິງໃຈທີ່ຈະເຮັດຕາມພຣະປະສົງຂອງພຣະອົງ.
69 ຂໍຈົ່ງມີເມດຕາ, ໂອ້ ພຣະຜູ້ເປັນເຈົ້າ, ຕໍ່ພັນລະຍາ ແລະ ລູກໆຂອງລາວ, ເພື່ອວ່າພວກເຂົາຈະໄດ້ສູງສົ່ງຢູ່ໃນທີ່ປະທັບຂອງພຣະອົງ, ແລະ ໄດ້ຮັບການປົກປັກຮັກສາໂດຍພຣະຫັດທີ່ທະນຸຖະໜອມຂອງພຣະອົງ.
70 ຂໍຈົ່ງມີເມດຕາຕໍ່ຍາດຕິພີ່ນ້ອງ ທີ່ໃກ້ຊິດທັງໝົດຂອງພວກເຂົາ, ເພື່ອວ່າອະຄະຕິຂອງພວກເຂົາຈະຖືກທຳລາຍ ແລະ ຖືກກວາດລ້າງໄປດັ່ງດ້ວຍນ້ຳຖ້ວມ; ເພື່ອວ່າພວກເຂົາຈະໄດ້ປ່ຽນໃຈເຫລື້ອມໃສ ແລະ ໄດ້ຮັບການໄຖ່ພ້ອມກັບອິດສະຣາເອນ, ແລະ ຮູ້ວ່າພຣະອົງເປັນພຣະເຈົ້າ.
71 ຂໍຈົ່ງລະນຶກເຖິງ, ໂອ້ ພຣະຜູ້ເປັນເຈົ້າ, ປະທານທັງຫລາຍ, ແມ່ນແຕ່ປະທານທັງຫລາຍຂອງສາດສະໜາຈັກຂອງພຣະອົງ, ເພື່ອວ່າພຣະຫັດຂວາຂອງພຣະອົງ ຈະເຮັດໃຫ້ພວກເພິ່ນສູງສົ່ງ, ພ້ອມກັບຄອບຄົວທັງຫລາຍຂອງພວກເພິ່ນ, ແລະ ຍາດຕິພີ່ນ້ອງທີ່ໃກ້ຊິດຂອງພວກເພິ່ນນຳອີກ, ເພື່ອວ່າຊື່ຂອງພວກເພິ່ນຈະຖືກຈື່ຈຳ ແລະ ຢູ່ໃນຄວາມຊົງຈຳອັນເປັນນິດຈາກລຸ້ນສູ່ລຸ້ນ.
72 ຂໍຈົ່ງລະນຶກເຖິງສາດສະໜາຈັກທັງປວງຂອງພຣະອົງ, ໂອ້ ພຣະຜູ້ເປັນເຈົ້າ, ພ້ອມກັບຄອບຄົວທັງປວງຂອງເຂົາເຈົ້າ, ແລະ ຍາດຕິພີ່ນ້ອງທີ່ໃກ້ຊິດຂອງເຂົາເຈົ້າ, ພ້ອມກັບຄົນປ່ວຍໂຊ ແລະ ຄົນເປັນທຸກທັງປວງຂອງເຂົາເຈົ້າ, ພ້ອມກັບຄົນຍາກຈົນ ແລະ ອ່ອນໂຍນທັງປວງຂອງແຜ່ນດິນໂລກ; ເພື່ອວ່າ ອານາຈັກ, ຊຶ່ງພຣະອົງໄດ້ຈັດຕັ້ງໄວ້ໂດຍບໍ່ໄດ້ໃຊ້ມື, ຈະກາຍເປັນພູເຂົາໃຫຍ່ ແລະ ເຕັມທັງແຜ່ນດິນໂລກ;
73 ເພື່ອວ່າສາດສະໜາຈັກຂອງພຣະອົງ ຈະອອກມາຈາກຖິ່ນແຫ້ງແລ້ງກັນດານແຫ່ງຄວາມມືດ, ແລະ ສ່ອງແສງງົດງາມດັ່ງ ດວງເດືອນ, ແຈ່ມແຈ້ງດັ່ງດວງຕາເວັນ, ແລະ ເປັນໜ້າຢ້ານກົວດັ່ງກອງທັບມາພ້ອມກັບທຸງ;
74 ແລະ ຮັບການຕົກແຕ່ງດັ່ງເຈົ້າສາວສຳລັບວັນນັ້ນ ເມື່ອພຣະອົງຈະເປີດຟ້າສະຫວັນ, ແລະ ເຮັດໃຫ້ພູເຂົາ ໄຫລລົງໄປ ເນື່ອງດ້ວຍການປະທັບຢູ່ຂອງພຣະອົງ, ແລະ ຫຸບເຂົາຈະຖືກຍົກຂຶ້ນສູງ, ບ່ອນຫລຸບໂນນ ຈະຖືກເຮັດໃຫ້ຮາບພຽງ; ເພື່ອວ່າລັດສະໝີພາບຂອງພຣະອົງຈະເຕັມແຜ່ນດິນໂລກ;
75 ເພື່ອວ່າເມື່ອເວລາສຽງແກດັງຂຶ້ນເພື່ອເອີ້ນຄົນຕາຍ, ພວກຂ້າພຣະອົງຈະຖືກ ຮັບຂຶ້ນໄປໃນເມກເພື່ອພົບພຣະອົງ, ເພື່ອວ່າພວກຂ້າພຣະອົງຈະໄດ້ຢູ່ກັບພຣະຜູ້ເປັນເຈົ້າຕະຫລອດໄປ;
76 ເພື່ອວ່າອາພອນຂອງພວກຂ້າພຣະອົງຈະບໍລິສຸດ, ເພື່ອວ່າພວກຂ້າພຣະອົງຈະຖືກຫຸ້ມຫໍ່ດ້ວຍ ເສື້ອຄຸມແຫ່ງຄວາມຊອບທຳ, ດ້ວຍກ້ານຕານຢູ່ໃນມືຂອງພວກຂ້າພຣະອົງ, ແລະ ໄດ້ຮັບ ມົງກຸດແຫ່ງລັດສະໝີພາບ ຢູ່ເທິງຫົວຂອງພວກຂ້າພຣະອົງ, ແລະ ເກັບກ່ຽວ ຄວາມຊື່ນຊົມນິລັນດອນ ແທນ ຄວາມທຸກທໍລະມານທັງປວງ ຂອງພວກຂ້າພຣະອົງ.
77 ໂອ້ ອົງພຣະຜູ້ເປັນເຈົ້າຜູ້ຊົງລິດອຳນາດຍິ່ງໃຫຍ່, ຂໍຈົ່ງຟັງພວກຂ້າພຣະອົງໃນຄຳວິງ ວອນເຫລົ່ານີ້ຂອງພວກຂ້າພຣະອົງ, ແລະ ຕອບພວກຂ້າພຣະອົງຈາກສະຫວັນ, ທີ່ປະທັບອັນສັກສິດຂອງພຣະອົງ, ບ່ອນທີ່ພຣະອົງປະທັບຢູ່ເທິງພຣະບັນລັງ, ດ້ວຍ ລັດສະໝີພາບ, ກຽດຕິຍົດ, ອຳນາດ, ເດຊານຸພາບ, ຄວາມຍິ່ງໃຫຍ່, ການຄອບຄອງ, ຄວາມຈິງ, ຄວາມຍຸດຕິທຳ, ການພິພາກສາ, ຄວາມເມດຕາ, ແລະ ຄວາມສົມບູນອັນບໍ່ມີທີ່ສິ້ນສຸດ, ຈາກເປັນນິດເຖິງເປັນນິດ.
78 ໂອ້ ຂໍຈົ່ງຟັງ, ໂອ້ ຂໍຈົ່ງຟັງ, ໂອ້ ຂໍຈົ່ງຟັງພວກຂ້າພຣະອົງ, ໂອ້ ພຣະຜູ້ເປັນເຈົ້າ! ແລະ ຂໍຈົ່ງຕອບຄຳອ້ອນວອນເຫລົ່ານີ້, ແລະ ຂໍຈົ່ງຮັບເອົາການອຸທິດຖວາຍບ້ານແຫ່ງນີ້ແດ່ພຣະອົງ, ວຽກງານຈາກມືຂອງພວກຂ້າພຣະອົງ, ຊຶ່ງພວກຂ້າພຣະອົງໄດ້ສ້າງແດ່ພຣະນາມຂອງພຣະອົງ;
79 ແລະ ສາດສະໜາຈັກນີ້ນຳອີກ, ເພື່ອໃສ່ພຣະນາມຂອງພຣະອົງໄວ້ເທິງນັ້ນ. ແລະ ຂໍຈົ່ງຊ່ວຍເຫລືອພວກຂ້າພຣະອົງ ໂດຍອຳນາດຂອງພຣະວິນຍານຂອງພຣະອົງ, ເພື່ອວ່າພວກຂ້າພຣະອົງຈະໄດ້ປະສານສຽງຂອງພວກຂ້າພຣະອົງ ຮ່ວມກັບ ເຊຣາຟີມເຫລົ່ານັ້ນທີ່ຮຸ່ງແຈ້ງ ແລະ ສ່ອງແສງຢູ່ອ້ອມຮອບພຣະບັນລັງຂອງພຣະອົງ, ພ້ອມດ້ວຍການໂຮຮ້ອງສັນລະເສີນ, ຮ້ອງໂຮຊັນນາແດ່ພຣະເຈົ້າ ແລະ ພຣະເມສານ້ອຍ!
80 ແລະ ຂໍຈົ່ງໃຫ້ຜູ້ຄົນເຫລົ່ານັ້ນ, ຜູ້ທີ່ຖືກເຈີມໄວ້ຂອງພຣະອົງ, ໄດ້ຖືກ ຫຸ້ມຫໍ່ດ້ວຍຄວາມລອດ, ແລະ ໄພ່ພົນຂອງພຣະອົງຮ້ອງສະໜັ່ນດ້ວຍຄວາມຊື່ນຊົມ. ອາແມນ, ແລະ ອາແມນ.