¶ 1 BEA koeni, i hono hogofulu ma valu ta‘u oe tu‘i ko Jeloboami nae hoko a Abija ke bule ki Juta.

2 Bea nae bule ia i he ta‘u e tolu i Jelusalema. Bea koe higoa o ene fa‘e foki ko Mikaia koe ofefine o Ulieli o Kibea. Bea nae fetauaki a Abija mo Jeloboami.

3 Bea nae teu ae tau e Abija koe fuu kau ta‘u oe kau tagata to‘a, io koe kau tagata fili e toko fa kilu: bea nae fokotuu foki e Jeloboami ae tau ke tali ia koe tau tagata to‘a malohi kuo fili e toko valu kilu.

4 Bea nae tuu hake a Abija ki he mouga ko Simalemi, aia oku i he mouga ko Ifalemi, o ne behe, Fanogo kiate au, akoe ko Jeloboami, bea mo Isileli, kotoabe;

5 Ikai oku totonu ke mou ilo nae foaki o Jihova koe Otua o Isileli ae buleaga o Isileli kia Tevita ke taegata, io, kiate ia bea ki hono gaahi foha i he fuakava masima?

6 Ka kuo tuu hake a Jeloboami koe foha o Nibati, koe tamaioeiki a Solomone koe foha o Tevita, bea kuo ne agatuu ki hono eiki.

7 Bea kuo tanaki o fakataha kiate ia ae kau tagata noabe, koe fānau oe agakovi, bea kuo nau fakamalohi‘i akinautolu kia Lehoboami koe foha o Solomone, i he kei jii a Lehoboami mo loto vaivai, bea nae ikai mafai ia ke teke‘i akinautolu.

8 Bea koeni oku mou mahalo te mou faa fai ke tau‘i ae buleaga o Jihova i he nima oe gaahi foha o Tevita; bea koe fuu kakai toko lahi akimoutolu, bea oku iate kimoutolu ae gaahi uhiki bulu koula, aia nae gaohi e Jeloboami koe gaahi otua mo omoutolu.

9 Ikai kuo mou kabuji kituaa ae kau taulaeiki a Jihova, koe gaahi foha o Elone, moe kau Livai, bea kuo mou gaohi ae kau taulaeiki kiate kimoutolu o hage koe kakai oe gaahi buleaga kehekehe? bea koia fulibe oku alu atu ke fakatabu‘i ia eia be aki ha bulu mui, moe faga sibi tagata e fitu, e hoko leva ia koe taulaeiki okinautolu oku ikai koe otua.

10 Ka ko kinautolu, ko ho mau Otua a Jihova, bea nae ikai te mau liaki ia; bea koe kau taulaeiki, aia oku gaue kia Jihova, koe gaahi foha o Elone, bea moe kau Livai oku nau fai be e nau gaahi gaue:

11 Bea oku nau tutu kia Jihova i he bogibogi kotoabe moe efiafi kotoabe ae gaahi feilaulau tutu moe mea namu kakala: bea oku nau ai ae ma oe ao foki ki he balebale maonioni; moe tuugamāma koula mo hono gaahi māma o ia, ke tutu i he efiafi kotoabe: he oku mau tauhi ae fekau a Jihova ko ho mau Otua; ka kuo mou liaki ia ekimoutolu.

12 Bea, vakai, oku iate kimautolu mooni ae Otua ko ho mau Eiki tau, mo ene kau taulaeiki ke nau fakaogo ae gaahi mealea ke kalagaekina ae manavahe kiate kimoutolu. Ae fānau a Isileli, oua naa mou tau kia Jihova koe Otua o hoo mou gaahi tamai; koeuhi e ikai te mou monuia.

¶ 13 Ka nae fai e Jeloboami ke hiki ae malumu mei ho nau tua: koia naa nau i he ao o Juta bea nae i ho nau tua ae malumu.

14 Bea i he jio ki mui a Juta, vakai, nae i ho nau ao ae tau, bea i ho nau tua: bea naa nau tagi kia Jihova, bea nae ifi o fakaogo e he kau taulaeiki ae gaahi mealea.

15 Bea nae toki mavava ai ae kau tagata Juta; bea i he mavava ae kau tagata Juta, nae hoko o behe, nae ta‘i e he Otua a Jeloboami mo Isileli kotoabe i he ao o Abija mo Juta.

16 Bea nae hola ae fānau a Isileli mei he ao o Juta: bea nae fakatukutuku‘i akinautolu e he Otua ki ho nau nima.

17 Bea nae ta‘i akinautolu e Abija mo hono kakai i he tamate‘i lahi; koia nae tamate ai oe kakai Isileli, ae kau tagata fili, e toko nima kilu.

18 Nae behe be hono fakavaivai ae fānau a Isileli i he kuoga koia, bea nae malohi o lava‘i e he fānau a Juta, koe mea i he e nau tui kia Jihova koe Otua oe nau gaahi tamai.

19 Bea nae tuli e Abija a Jeloboami, o ne ma‘u meiate ia ae gaahi kolo, ko Beteli mo hono gaahi kolo, mo Jesana mo hono gaahi kolo, mo Ifalemi mo hono gaahi kolo oia.

20 Bea nae ikai toe ma‘u e Jeloboami ha malohi i he gaahi aho o Abija: bea nae ta‘i ia e Jihova, bea bekia ia.

¶ 21 Ka nae fakaaau o malohi a Abija, bea fakamau ia moe unoho e toko hogofulu ma fa, bea nae tubu iate ia ae foha e toko uofulu ma toko ua, moe ofefine e toko hogofulu ma toko ono.

22 Bea ko hono toe oe gaue a Abija, mo ene gaahi aga, mo ene gaahi lea ikai kuo tohi i he  tohi talanoa oe balofita ko Ito?