¶ 1 BEA nae fekau e Hesekaia ki Isileli kotoabe mo Juta, bea tohi eia ae gaahi tohi foki ki Ifalemi mo Manase, koeuhi ke nau ha‘u ki he fale o Jihova i Jelusalema, ke fai ae  katoaga oe Lakaatu kia Jihova koe Otua o Isileli.

2 He nae fakakaukau e he tu‘i mo hono gaahi houeiki, moe fakataha kotoa i Jelusalema, ke fai ae  katoaga oe Lakaatu i hono ua oe mahina.

3 He nae ikai te nau faa fai ia i he gaahi aho koia koeuhi nae teeki ai fakaoji e he kau taulaeiki ae fakamaa akinautolu ke lahi ki ai, bea nae teeki ai fakakatoa akinautolu e he kakai ki Jelusalema.

4 Bea nae fiemalie ai ae tu‘i bea moe kakai fakataha kotoabe.

5 Bea naa nau tuutuuni ae fono ke fanogonogo kalaga i Isileli kotoabe, mei Beasiba ki Tani, koeuhi ke nau ha‘u ke fai ae  katoaga oe Laka‐atu kia Jihova koe Otua o Isileli i Jelusalema: he nae ikai te nau fai ia o fuoloa o hage koia nae tohi.

6 Bea nae alu ae kau ave tohi moe gaahi tohi mei he tu‘i mo hono houeiki ki he botu kotoabe o Isileli mo Juta, o hage koe fekau ae tu‘i o behe, Ae gaahi fānau a Isileli, mou toe tafoki kia Jihova koe Otua o Ebalahame, mo Aisake, mo Isileli bea e tafoki mai ia kiate kimoutolu oku toe, akimoutolu kuo hao mei he nima oe gaahi tu‘i o Asilia.

7 Bea oua naa mou hage ko hoo mou gaahi tamai, bea hage ko ho mou gaahi kaiga, aia nae fai agahala kia Jihova koe Otua oe nau gaahi tamai, bea naa ne tukuage akinautolu ki he malaia, o hage koia oku mou mamata ki ai.

8 Bea koeni ke oua naa mou kia kekeva, o hage ko hoo mou gaahi tamai, kae tukuage akimoutolu kia Jihova, bea hu ki hono fale nofoaga, aia nae fakatabu‘i ke taegata; bea tauhi a Jihova ko ho mou Otua, koeuhi ke tafoki hono houhau lahi meiate kimoutolu.

9 He kabau te mou toe tafoki kia Jihova, e ilo e ho mou gaahi kaiga mo hoo mou fānau ae agaofa i he ao akinautolu nae taki o fakabobula‘i akinautolu, koia te nau toe ha‘u ai ki he fonua ni: he ko Jihova ko ho mou Otua oku agalelei ia mo agaofa, bea e ikai te ne kalofaki hono fofoga meiate kimoutolu, o kabau te mou tafoki kiate ia.

10 Koia nae alu ai ae kau ave tohi mei he kolo ki he kolo i he fonua kotoabe o Ifalemi mo Manase, io o a‘u atu ki Sebuloni: ka naa nau kata manuki kiate kinautolu, bea taukae akinautolu.

11 Ka nae ai ae niihi i Aseli mo Manase, mo Sebuloni, naa nau fakavaivai akinautolu, bea ha‘u ki Jelusalema.

12 Bea nae i Juta foki ae nima oe Otua ke foaki kiate kinautolu ae loto taha ke fai ae fekau ae tu‘i moe houeiki, i he folofola a Jihova.

¶ 13 Bea nae fakakatoa i Jelusalema ae fuu kakai lahi ke fai ae katoaga oe ma tae fakalevani i hono ua oe mahina, koe fakataha lahi aubito.

14 Bea naa nau tuu hake o fetuku o liaki ae gaahi feilaulauaga nae i Jelusalema, bea nau ave ke mamao ae gaahi feilaulauaga oe mea namu kakala, o liaki ia ki he vaitafe ko Kitiloni.

15 Bea naa nau toki tamate‘i ae  manu oe Laka‐atu i hono hogofulu ma fa oe aho i hono ua oe mahina: bea nae ma ae kau taulaeiki moe kau Livai, o nau fakamaa akinautolu, o nau omi ae gaahi feilaulau tutu ki he fale o Jihova.

16 Bea naa nau tuu i ho nau botu o tāu mo ho nau aga, o fakatatau ki he fekau a Mosese koe tagata ae Otua: nae luluku e he kau taulaeiki ae toto, aia naa nau ma‘u mei he nima oe kau Livai.

17 He nae i ai ae toko lahi i he fakataha nae ikai fakamaa: koia nae i he kau Livai ae fekau ki he tamate‘i oe gaahi  manu oe Laka‐atu, ma anautolu kotoabe nae ikai maa, ke fakatabu‘i akinautolu kia Jihova.

18 He koe kakai toko lahi, io ae toko lahi o Ifalemi, mo Manase, mo Isaka, mo Sebuloni, nae teeki ai te nau fakamaa akinautolu, ka naa nau kai ae Laka‐atu kae ikai hage koia kuo tohi. Ka nae lotua akinautolu e Hesekaia, o behe, E Jihova lelei fakamolemolea akinautolu kotoabe,

19 Oku teuteu ho nau loto ke kumi ki he Otua, ko Jihova koe Otua o ene gaahi tamai, ka oku heeki ai fakamaa ia o fakatatau ki he fakamaa oe fale nofoaga.

20 Bea nae tokaga e Jihova kia Hesekaia, o ne fakamoui ae kakai.

21 Bea nae fai e he fānau a Isileli nae i Jelusalema ae katoaga oe ma tae fakalevani i he aho e fitu i he fiefia lahi: bea nae fakaogo lelei a Jihova e he kau Livai moe kau taulaeiki i he aho hokohoko be, i he hiva moe mea faiva le‘o lahi kia Jihova.

22 Bea nae lea fakafiemalie e Hesekaia ki he kau Livai kotoabe nae akonaki i he ilo lelei o Jihova: bea naa nau kai kotoabe lolotoga ae katoaga i he aho e fitu, o atu ae gaahi feilaulau fakalelei, o fai e nau vete kia Jihova koe Otua oe nau gaahi tamai.

23 Bea nae alea fakataha akinautolu kotoabe ke toe tauhi moe aho e fitu: bea naa nau tauhi ae aho kehe e fitu i he fiefia.

24 He nae foaki e Hesekaia koe tu‘i o Juta ki he kakai fakataha ae faga bulu e taha afe, moe sibi e fitu afe; bea foaki e he houeiki ki he kakai fakataha ae faga bulu e taha afe moe sibi e taha mano: bea nae fakamaa akinautolu e he kau taulaeiki toko lahi.

25 Bea nae fiefia ae fakataha kotoabe o Juta, fakataha moe kau taulaeiki moe kau Livai, bea moe kakai fakataha kotoabe nae ha‘u mei he fonua o Isileli, o nau nofo i Juta.

26 Koia nae i Jelusalema ae fiefia lahi: he talu mei he kuoga o Solomone koe foha o Tevita koe tu‘i o Isileli nae ikai ha mea behe i Jelusalema.

¶ 27 Bea nae toki tuu hake ae kau taulaeiki moe kau Livai o nau tabuaki‘i ae kakai: bea nae ogo‘i ho nau le‘o, bea nae a‘u atu e nau lotu ki hono afioaga maonioni, i he lagi.