¶ 1 BEA i he fakaoji ae mea ni kotoabe, nae alu a Isileli kotoabe nae i ai, ki he gaahi kolo kotoabe o Juta, o laiki ae gaahi mea tamabua ke fakaikiiki, bea nae ta ae gaahi vao tabu, bea holoki hifo ae gaahi botu maoluga moe gaahi feilaulauaga mei Juta kotoabe mo Benijimani, i Ifalemi foki mo Manase, ke fakaauha kotoabe. Bea nae toki alu ae fānau kotoabe o Isileli, o taki taha ae tagata ki hono tofia, i he e nau gaahi kolo onautolu.

¶ 2 Bea nae tuutuuni e Hesekaia ae gaahi lakaga oe kau taulaeiki moe kau Livai o fakatatau mo ho nau lakaga, ae tagata taki taha o fakatatau mo ene gaue, koe kau taulaeiki moe kau Livai ki he gaahi feilaulau tutu, bea moe gaahi feilaulau fakamelino, ke gaue, bea ke nau fakafetai, bea ke fakamalo i he gaahi mataba oe gaahi fale nofoaga o Jihova.

3 Bea naa ne vahe‘i ae mea ae tu‘i ki he feilaulau tutu, ki he feilaulau tutu i he bogibogi moe efiafi, moe gaahi feilaulau tutu ki he gaahi aho tabu, bea ki he gaahi tuu efiafi, bea ki he gaahi katoaga fai mau, o hage koia kuo tohi i he fono o Jihova.

4 Bea naa ne fekau foki ki he kakai nae nofo i Jelusalema ke atu ae vahega oe kau taulaeiki moe kau Livai, koeuhi ke fakafiemalie‘i akinautolu i he fono a Jihova.

¶ 5 Bea i he ogo kitua ae fekau, nae omi leva e he fānau a Isileli, ae uluaki fua lahi aubito oe uite, moe uaine, moe lolo, moe honi, bea mei he gaahi mea kotoabe oku tubu i he goue: bea moe vahega oe mea kotoabe naa nau omi o lahi aubito.

6 Bea koe fānau a Isileli mo Juta, nae nofo i he gaahi kolo o Juta, naa nau omi foki ae vahega oe faga bulu moe faga sibi, bea moe vahega oe mea tabu nae fakatabu‘i kia Jihova ko ho nau Otua, bea nae fokotuu ia i he fokotuuga.

7 I hono tolu oe mahina naa nau kamata ai hono gaahi tuuga oe gaahi fokotuuga, bea nae fakaoji ia i hono fitu oe mahina.

8 Bea i he ha‘u a Hesekaia moe houeiki o mamata ki he gaahi fokotuuga, naa nau fakafetai kia Jihova mo hono kakai Isileli.

9 Bea nae fehui e Hesekaia ki he kau taulaeiki moe kau Livai ki he gaahi fokotuuga mea.

10 Bea nae talia ia e Asalia koe taulaeiki lahi i he fale o Satoki, o ne behe, Talu mei he aho nae kamata omi e he kakai ae gaahi mea foaki ki he fale o Jihova, oku mau ma‘u ae mea lahi ke kai, bea oku toe lahi: he kuo tabuaki e Jihova a hono kakai: bea koia oku toe koe fuu mea lahi ni.

¶ 11 Bea nae fekau e Hesekaia ke teuteu ae gaahi botu fale i he fale o Jihova; bea naa nau teuteu ia,

12 O nau omi totonu ki ai ae gaahi mea foaki moe gaahi vahega mea oe gaahi mea nae fakatabu‘i: bea nae bule ki ai a Kononaia koe tagata Livai, bea hoko moia a Simi ko hono tokoua.

13 Bea ko Jehieli, mo Asasia, mo Nehati, mo Asaeli, mo Jelimoti, mo Josabati, mo Ilieli, mo Isimakia, mo Mehati, mo Benaia, koe kau eginaki i he bule a Kononaia, mo Simi ko hono tokoua, i he fekau a Hesekaia koe tu‘i, mo Asalia koe bule oe fale oe Otua.

14 Bea ko Kole koe foha o Imina koe tagata Livai, koe leo mataba ki he botu hahake, nae bule ia ki he gaahi mea foaki loto ofa ki he Otua, ke tufaki ae gaahi mea foaki a Jihova, moe gaahi mea maonioni lahi.

15 Bea nae hoko mo ia, a Iteni, mo Miniamini, mo Jesua, mo Simaia, mo Amalia, mo Sikania, i he gaahi kolo oe kau taulaeiki, i he e nau gaue totonu, ke tufa ki ho nau gaahi kaiga i ho nau lakaga, ki he lahi bea moe jii:

16 Bea moe nau tohi hohoko oe fānau tagata, mei he tolu ta‘u o fai hake, io ke atu kiate kinautolu taki taha nae hu ki he fale o Jihova, ho nau inaji ki he aho taki taha o fakatatau moe nau gaue o fakatatau mo ho nau lakaga;

17 Ki he hokohoko oe kau taulaeiki i he fale oe nau gaahi tamai, moe kau Livai mei he uofulu ta‘u o fai hake, o fakatatau moe nau gaue mo ho nau lakaga;

18 Bea ki he hokohoko oe nau fānau jii kotoabe, ko ho nau gaahi unoho, mo ho nau gaahi foha, mo ho nau gaahi ofefine, i he kakai fakataha kotoabe: he naa nau fakatabu‘i akinautolu i he maonioni i he e nau gaue totonu:

19 Bea koe gaahi foha o Elone foki aia koe kau taulaeiki akinautolu, naa nau nofo i he gaahi goue i he gaahi botu itua i ho nau gaahi kolo, i ho nau gaahi kolo kotoabe, koe kau tagata nae lau ho nau higoa, ke atu ae gaahi vahega ki he fānau tagata kotoabe i he kau taulaeiki, bea kiate kinautolu kotoabe nae lau i ho nau hokohoko i he kau Livai.

¶ 20 Bea nae fai behe be e Hesekaia i Juta kotoabe, o ne fai aia nae lelei mo agatonu mo mooni i he ao o Jihova ko hono Otua.

21 Bea koe gaue kotoabe naa ne hoko o fai i he gaue oe fale oe Otua, bea i he fono, bea i he gaahi fekau, ke kumi ki hono Otua, naa ne fai ia aki hono loto kotoa, bea naa ne mouiaai.