¶ 1 BEA nae omi e he kakai oe fonua a Jihoaasi koe foha o Josaia, o fakanofo ia koe tu‘i koe fetogi o ene tamai i Jelusalema.

2 Nae uofulu ta‘u moe ta‘u e tolu ae motua o Jihoaasi i he ene kamata bule, bea nae bule ia i he mahina e tolu i Jelusalema.

3 Bea nae liu‘i ia e he tu‘i o Ijibite i Jelusalema, o ne bule ke totogi e he fonua aki ae taleniti koula e taha.

4 Bea ne fakanofo e he tu‘i o Ijibite hono tokoua ke tu‘i ia ki Juta mo Jelusalema, o ne liu‘a hono higoa ko Jihoiakimi. Bea nae buke e Niko a hono tokoua ko Jihoaasi o fetuku ia ki Ijibite.

¶ 5 Nae uofulu ta‘u moe ta‘u e nima ae motua o Jihoiakimi i he ene kamata bule, bea nae bule ia i he ta‘u e hogofulu ma taha i Jelusalema: bea nae fai kovi eia i he ao o Jihova ko hono Otua.

6 Bea nae ha‘u ke tau‘i ia a Nebukanesa koe tu‘i o Babilone, bea naa ne ha‘i ia aki ae gaahi mea ha‘i ke fetuku ia ki Babilone.

7 Bea nae fetuku foki e Nebukanesa ae gaahi ibu oe fale o Jihova ki Babilone, o tuku ia ki hono fale tabu i Babilone.

8 Bea koeni ko hono toe oe gaue a Jihoiakimi, mo ene fakalielia naa ne fai, mo ia nae ilo iate ia, vakai, kuo tohi ia i he tohi oe gaahi tu‘i o Isileli mo Juta: bea nae fetogi ia i he bule e Jihoiakini ko hono foha.

¶ 9 Nae valu ta‘u ae motua o Jihoiakini i he ene kamata bule, bea nae bule ia i he mahina e tolu moe aho e hogofulu i Jelusalema: bea nae fai kovi eia i he ao o Jihova.

10 Bea i he hili ae ta‘u, nae fekau e he tu‘i ko Nebukanesa, bea nae omi ia ki Babilone, fakataha moe gaahi ibu matamata lelei oe fale o Jihova, bea nae fakanofo a Setikia ko hono tokoua ke ne tu‘i ki Juta mo Jelusalema.

¶ 11 Nae uofulu ta‘u moe ta‘u e taha ae motua o Setikia i he ene kamata bule, bea nae bule ia i he ta‘u e hogofulu ma taha i Jelusalema.

12 Bea nae fai eia ae kovi i he ao o Jihova, ko hono Otua, bea nae ikai te ne fakavaivai ia i he ao o Jelemaia koe balofita nae lea mei he fofoga o Jihova.

13 Bea nae agatuu ia foki ki he tu‘i ko Nebukanesa, aia naa ne fakafuakava‘i ia ki he Otua: ka naa ne fakakekeva hono kia, bea fakafefeka ki hono loto i he tae fie tafoki kia Jihova koe Otua o Isileli.

¶ 14 Bea nae fai hala foki ae kau taulaeiki lahi kotoabe, moe kakai, o fai hala lahi o fakatatau ki he gaahi agakovi ae hiteni; o nau fakahala‘i ae fale o Jihova i Jelusalema aia naa ne fakatabu‘i.

15 Bea nae kouna kiate kinautolu e Jihova koe Otua oe nau gaahi tamai ene kau talafekau, nae tuu hegihegi hake, bea fekau; koe mea i he ene agaofa ki hono kakai, bea ki hono botu nofoaga:

16 Ka naa nau manuki ki he kau talafekau ae Otua, bea tae tokaga ki he ene gaahi lea, mo fai kovi ki he ene kau balofita, bea nae tubu ai ae houhau a Jihova ki hono kakai, bea nae ikai ha fakamoui.

17 Koia naa ne omi ai kiate kinautolu ae tu‘i oe kakai Kalitia, aia nae tamate‘i e nau kau talavou aki ae heleta i he fale oe nau fakatahaaga, bea nae ikai ha ofa ki ha talavou be ki ha taahine, ae tagata motua, be koia oku mabelu i he motua lahi: naa ne tuku akinautolu kotoabe ki hono nima.

18 Bea moe gaahi ibu kotoabe oe fale oe Otua, ae lahi moe jii, moe gaahi koloa ae fale o Jihova, moe gaahi koloa ae tu‘i, moe  koloa a hono houeiki: bea nae omi ia kotoabe ki Babilone.

19 Bea naa nau tutu ae fale oe Otua; bea holoki hifo ae a maka o Jelusalema, bea nae tutu hono gaahi fale fakaeieiki oia aki ae afi, bea maumau ae gaahi nāunāu matamatalelei kotoabe nae i ai.

20 Bea ko kinautolu nae hao mei he heleta naa ne fetuku akinautolu ki Babilone; aia naa nau nofo ai koe kau tamaioeiki kiate ia bea ki hono gaahi foha o a‘u ki he bule ae buleaga o Beasia:

21 Ke fakamooni ae folofola a Jihova i he gutu o Jelemaia, ke oua ke ma‘u fiemalie be e he fonua hono gaahi aho tabu: he koeuhi i he ene nofo lala be naa ne ma‘u ae aho tabu ke fakakakato ae ta‘u e fitugofulu.

¶ 22 Bea koeni i he uluaki ta‘u o Kolesi koe tu‘i o Beasia, ke fakatonutonu ai ae folofola a Jihova i he gutu o Jelemaia, nae laga‘i e Jihova ae laumalie o Kolesi koe tu‘i o Beasia, koeuhi ke fanogonogo ae fono i hono buleaga kotoabe, bea ke ai ia i he tohi foki, o behe,

23 Oku behe e Kolesi koe tu‘i o Beasia, Kuo tuku e Jihova koe Otua oe lagi, ae gaahi buleaga kotoabe o mamani kiate au: bea kuo ne fekau kiate au keu laga ae fale moona i Jelusalema aia oku i Juta. Kohai ia iate kimoutolu kotoabe oku o hono kakai? Ke iate ia a Jihova ko hono Otua, bea tuku ke alu hake ia.