¶ 1 KOE folofola a Jihova aia nae hoko kiate au, o behe,

2 Oua naa ke too kiate koe ha unoho, bea e ikai te ke ma‘u ae gaahi foha moe gaahi ofefine i he botu ni.

3 He oku behe e Jihova ki he gaahi foha bea moe gaahi ofefine aia oku faele‘i i he botu ni, bea ki he e nau gaahi fa‘e aia nae faele‘i akinautolu, bea ki he e nau gaahi tamai aia nae fakatubu akinautolu i he fonua ni;

4 Te nau mate i he gaahi mate kovi; bea e ikai ha tagi koeuhi ko kinautolu; bea e ikai tanu akinautolu; ka te nau hage koe kinohaa i he fuga oe fonua: bea e fakaauha akinautolu e he heleta, moe hoge: bea e kai ho nau agaaga e he faga manu buna oe atā, bea moe faga manu oe fonua.

5 He oku behe e Jihova, Oua naa ke hu ki he fale oe mamahi, bea oua naa alu ke tagi mo fakafiemalie‘i akinautolu: he oku behe e Jihova, Kuou too eku fiemalie mei he kakai ni, io, koe agalelei moe aloofa.

6 E mate fakatouoji i he fonua ni ae lalahi bea moe iki: bea e ikai tanu akinautolu, bea e ikai tagi ae kakai, be fai ae foa, be koe tekefua koeuhi ko kinautolu:

7 Bea e ikai maumau‘i akinautolu e he kakai, koeuhi koe nau mamahi, ke fakafiemalie akinautolu koeuhi koe mate; bea e ikai foaki kiate kinautolu ae ibu oe fiemalie ke inu, koeuhi ko ha tamai be ha fa‘e.

8 Oua foki naa ke alu ki he fale oe katoaga, ke nofo mo kinautolu ke kai mo inu.

9 He oku behe e Jihova oe gaahi kau tau, koe Otua o Isileli; Vakai, teu bule ke oji i he botu ni i ho mou ao, bea i ho mou gaahi aho, ae le‘o oe fiefia, bea moe le‘o oe nekeneka, bea moe le‘o oe tagata taane, bea moe le‘o oe taahine.

¶ 10 Bea ke hoko o behe, oka ke ka fakailo ki he kakai ni ae gaahi lea ni kotoabe, te nau behe kiate koe, Koeha kuo folofola aki e Jihova kiate kimautolu ae kovi lahi ni kotoabe? he koeha e mau hia? bea koeha e mau agahala aia kuo mau fai kia Jihova ko ho mau Otua?

11 Bea te ke toki lea kiate kinautolu, Oku behe e Jihova, Koeuhi kuo liaki au e hoo mou gaahi tamai, bea kuo nau muimui ki he gaahi otua kehe, bea tauhi akinautolu, bea kuo lotu kiate kinautolu, bea kuo nau liaki au, bea oku ikai fai ki he eku fono;

12 Bea kuo mou fai kovi lahi hake akimoutolu i hoo mou gaahi tamai; bea, vakai, oku mou taki taha muimui ki he holi a hono loto kovi, ke oua naa nau fanogo kiate au:

13 Koia teu kabuji akimoutolu i he fonua ni, ki he fonua oku ikai te mou ilo, ko kimoutolu, be ko hoo mou gaahi tamai; bea te mou tauhi i ai ae gaahi otua kehe i he aho moe bo; bea e ikai teu ofa kiate kimoutolu i ai.

¶ 14 Oku behe e Jihova, Koia, vakai, oku ha‘u ae gaahi aho, aia e ikai toe behe ai, Oku moui a Jihova, aia nae omi ae fānau a Isileli mei he fonua ko Ijibite;

15 Ka, Oku moui a Jihova, aia nae omi ae fānau a Isileli mei he fonua tokelau, bea mei he gaahi fonua kotoabe naa ne kabuji akinautolu ki ai: bea teu toe omi akinautolu ki ho nau fonua aia naaku foaki ki he e nau gaahi tamai.

¶ 16 Oku behe e Jihova, Vakai, teu fekau ke omi ae kau toutai toko lahi, bea te nau toutai akinautolu; bea hili ia teu fekau ki he kau tuli manu toko lahi, bea te nau tuli akinautolu mei he mouga kotoabe, bea mei he tafugofuga kotoabe, bea mei he gaahi ana‘i maka.

17 He oku ou fofoga ki ho nau hala kotoabe: bea oku ikai te nau buli i hoku ao, bea oku ikai fakafufu e nau agahala mei hoku fofoga.

18 Bea teu tomua totogi ke liuga ua ki he e nau hia bea moe nau agahala; koeuhi kuo nau fakakovi‘i hoku fonua, bea kuo nau fakabito aki hoku tofia ae gaahi agaaga oe nau gaahi mea kovi mo fakalielia.

19 E Jihova, ko hoku malohi, mo eku kolo, bea mo hoku hufaga i he aho oe mamahi, e ha‘u kiate koe ae kakai Jenitaile mei he gaahi gataaga o mamani, bea te nau behe, Koe mooni nae ma‘u i he e mau gaahi tamai ae gaahi loi, moe mea vaiga, bea moe gaahi mea taeaoga.

20 E gaohi e he kau tagata ae gaahi otua mo onautolu, kae oji oku ikai koe gaahi otua akinautolu?

21 Koia, vakai, teu bule ni kiate kinautolu ke nau ilo hoku nima, mo hoku malohi; bea te nau ilo ko hoku huafa Ko Jihova.