¶ 1 KOE folofola a Jihova aia nae hoko kia Jelemaia koe balofita ki he kakai Jenitaile.

2 Ki Ijibite, bea ki he tau a Felo aiko koe tu‘i o Ijibite, aia nae i he vaitaife ko Iufaletesi i Kakemisi, aia nae ta‘i e Nebukanesa koe tu‘i o Babilone i hono fa oe ta‘u o Jihoiakimi koe foha o Josaia koe tu‘i o Juta.

3 Mou fekau ke ai ae fakaū moe ba, bea fakaofiofi mai ki he tau.

4 Ai ae nāunāu ki he faga hose, bea mou fakaheka ae kau heka hose, bea tuu mai mo ho mou tatā tau; fakagigila ae gaahi tao, ai ae gaahi kofu tau.

5 Koeha kuou mamata ai kiate kinautolu kuo nau manavahe, bea fakaholomui? kuo ta hifo ho nau kau malohi, kuo nau hola vave, bea ikai jio ki mui: he nae tuu takatakai ae manavahe, oku behe e Jihova.

6 Oua naa tuku ke buna atu ae vee vave, be hao ae tagata malohi; te nau tūkia, bea to ki he botu tokelau ki he vee vai o Iufaletesi.

7 Kohai eni oku alu hake o hage koe vai lahi, oku gau‘e hono gaahi vai, o hage koe vaitafe?

8 Oku tuu hake a Ijibite o hage koe vai lahi, bea oku gau‘e hono gaahi vai o hage koe vaitafe; bea oku ne behe, Teu alu hake, bea teu ufiufi ae fonua; bea teu fakaauha ae kolo mo hono kakai.

9 Mou unuunu mai ae faga hose; bea fakamatalili‘i ae gaahi saliote; bea tuku ke alu atu ae kau tagata malohi i he tau; koe kau Itiobea moe kau Libea, ko kinautolu oku buke ae fakaū; bea moe kau Litia, oku too o teke ae kautana.

10 He koe aho eni oe Eiki ko Jihova oe gaahi kau tau, koe aho oe houhau koeuhi ke ne tautea eia ki hono gaahi fili: bea e fakaauha e he heleta, bea e makona ia, bea fakakona aki ia ho nau toto: he oku ma‘u e he Eiki ko Jihova oe gaahi kau tau ae feilaulau i he botu tokelau i he vaitafe ko Iufaletesi.

11 E taahine koe ofefine o Ijibite, alu hake ki Kiliati o too mai ae lolo faitoo: e tae aoga ae gaahi faitoo lahi kiate koe; koeuhi e ikai te ke moui.

12 Kuo fanogo ae gaahi buleaga ki hoo ma, bea kuo bito ae fonua i he tagi: he kuo febaki ae tagata malohi moe tagata malohi, bea kuo na higa fakatouoji.

¶ 13 Koe lea nae folofola aki e Jihova kia Jelemaia koe balofita, ki he ha‘u a Nebukanesa koe tu‘i o Babilone ke ta‘i ae fonua ko Ijibite.

14 Mou fakaha i Ijibite, bea fakailo i Mikitoli, bea fakaha i Nofe mo Tabanesi: mou behe, Tuu mau, bea ke teuteu; koeuhi e fakaauha takatakai iate koe e he heleta.

15 Koeha kuo tafe atu ai a hoo kau malohi? nae ikai te nau tuu, koeuhi nae kabuji akinautolu e Jihova.

16 Kuo ne fakahigaki ae toko lahi, io, kuo nau fetaotaomi: koia naa nau, febeheaki, Tuu bea ke tau toe alu ki ho tau kakai, bea ki he fonua nae faele‘i ai akitautolu koeuhi koe heleta ae malohi.

17 Naa nau tagi i ai, Koe logoaa be Felo koe tu‘i o Ijibite; kuo oji ae kuoga nae tuutuuni.

18 Oku behe e he tu‘i, aia ko hono huafa ko Jihova oe gaahi kau tau, Hage oku ou moui, koe mooni e hage ko Teboa i he gaahi mouga, bea hage ko Kameli i he ene ofi ki tahi, e behe ene ha‘u.

19 E ofefine oku nofo i Ijibite, teuteu koe ke ke alu ki he fakabobula: koeuhi e fakalala a Nofe, bea e fakaauha ke oji hano kakai.

20 Oku tatau a Ijibite moe bulu fefine jii oku fakaofoofa aubito, ka oku ha‘u ae fakaauha; oku ha‘u ia mei he tokelau.

21 Bea oku tatau moe faga bulu kuo fagabeji a hono kau tagata totogi; bea kuo nau foki ki mui, bea kuo nau hola fakataha: nae ikai te nau tuu mai, koeuhi nae hoko mai ae aho o hoo nau tuutamaki, bea moe aho oe nau tautea.

22 E ogo hono le‘o o hage koe alu ae gata; he te nau alu atu kiate ia moe kau tau, te nau ha‘u kiate ia, moe gaahi tohi, o hage koe kau ta akau.

23 Oku behe e Jihova, Te nau tuuji hifo hono gaahi vao akau, ne ogo oku ikai faa kumi ki ai; koeuhi oku nau toko lahi i he faga hee, bea tae faa laua.

24 E fakama‘i ae taahine Ijibite; e tukuage ia ki he nima oe kakai mei he tokelau.

25 Oku behe e Jihova oe gaahi kau tau, koe Otua o Isileli; Vakai, teu tautea ae kakai toko lahi o No, mo Felo, mo Ijibite, mo ho nau gaahi otua, bea mo ho nau gaahi tu‘i; io, a Felo mo kinautolu oku falala kiate ia:

26 Bea teu tukuage akinautolu ki he nima okinautolu oku kumi ki he e nau moui, bea ki he nima o Nebukanesa koe tu‘i o Babilone, moe nima o ene kau tamaioeiki: bea oku behe e Jihova, Hili ia e toki fakakakai ia, o hage koe gaahi aho i mua.

¶ 27 Kae oua naa ke manavahe, E Jekobe ko eku tamaioeiki: bea oua naa ke bubutuu, E Isileli: he vakai, teu fakamoui koe mei he mamao, bea mo ho hako mei he fonua oku nau bobula ki ai; bea e liliu mai a Jekobe, bea te ne mālōlō, mo fiemalie, bea e ikai fakamanavahe‘i ia e ha toko taha.

28 Oku behe e Jihova, Oua naa ke manavahe, E Jekobe ko eku tamaioeiki: he oku ou iate koe; he teu fakaoji ae gaahi buleaga aia kuou kabuji koe ki ai: ka e ikai teu fakagatagata koe, ka teu tautea jii koe, bea e ikai teu fakaauha aubito koe.