¶ 1 KOE folofola nae hoko mei a Jihova kia Jelemaia, hili hono tukuage ia mei Lama e Nebusaatani koe eiki oe kau leo, he nae ha‘ijia aki ia ae maea ukamea fihifihi fakataha moe kau bobula kotoabe o Jelusalema mo Juta, aia nae ave fakabobula ki Babilone.

2 Bea nae behe e he eiki oe kau leo kia Jelemaia, kuo fakaha e Jihova ko ho Otua ae kovi ni, ki he botu ni.

3 Bea koeni, kuo fakahoko ia e Jihova, bea kuo fai o hage ko ene folofola: koeuhi kuo mou fai agahala kia Jihova, bea ikai talagofua ki hono le‘o, koia kuo hoko ai ae mea ni kiate kimoutolu.

4 Bea koeni, vakai, kuou vete mei ho nima he aho ni ae maea ukamea fihifihi. Bea kabau oku lelei kiate koe ke ta o mo au ki Babilone, ha‘u; bea teu fai lelei kiate koe: bea kabau oku kovi kiate koe ke ta o mo au ki Babilone, tuku: vakai oku i ho ao ae fonua kotoabe: bea koe botu oku lelei mo aoga kiate koe ke alu ki ai, ke ke alu ki ai.

5 Bea i he heeki ai te ne liliu atu, naa ne behe, Koia ke ke nofo mo Ketalia koe foha o Ahikami koe foha o Safani, aia nae fakanofo e he tu‘i o Babilone ke bule ki he gaahi kolo o Juta, bea ke ke nofo mo ia moe kakai: be te ke alu ki ha botu oku lelei kiate koe ke alu ki ai. Bea nae foaki kiate ia e he eiki oe kau leo ae oho moe totogi, bea tukuage ia.

6 Bea nae alu ai a Jelemaia kia Ketalia koe foha o Ahikami i Misiba; o nofo mo ia bea moe kakai nae toe i he fonua.

¶ 7 Bea i he fanogo ae eiki tau kotoabe aia nae i he gaahi goue, akinautolu mo ho nau kakai, kuo fakanofo e he tu‘i o Babilone a Ketalia koe foha o Ahikami ke bule i he fonua, bea kuo tukuage kiate ia ae kau tagata, moe kau fefine, moe fānau, bea moe kakai majiva oe fonua, akinautolu nae ikai fetuku fakabobula ki Babilone;

8 Naa nau ha‘u kia Ketalia i Misiba, io ko Isimeli koe foha o Natania, bea ko Johanani mo Jonatani koe ogo foha o Kalia, bea ko Selaia koe foha o Tanumeti, bea koe gaahi foha o Ifai koe tagata Nitofa, bea mo Jeasania koe foha oe tagata mei Meaka, akinautolu mo ho nau kau tagata.

9 Bea nae fuakava kiate kinautolu moe nau kakai e Ketalia koe foha o Ahikami koe foha o Safani, o behe, Oua naa mou manavahe ke tauhi ki he kau Kalitia: mou nofo i he fonua, bea tauhi ae tu‘i o Babilone, bea e lelei ia kiate kimoutolu.

10 Bea koeni, vakai, teu nofo i Misiba, ke tauhi ae kau Kalitia, akinautolu e ha‘u kiate kitautolu: ka ko kimoutolu, ke mou tanaki ae uaine, moe gaahi fua momoho, moe lolo, bea tuku ia ki he gaahi buha, bea nonofo i ho mou gaahi kolo aia kuo mou ma‘u.

11 Bea kuo fanogo foki ae kau Jiu kotoabe nae i Moabe, bea i he kau Amoni, bea i Itomi, bea mo kinautolu kotoabe nae i he gaahi botu, kuo tuku e he tu‘i o Babilone ae toega kakai i Juta, bea kuo fakanofo ke bule kiate kinautolu a Ketalia koe foha o Ahikami koe foha o Safani;

12 Nae liliu mai ae kau Jiu kotoabe mei he gaahi botu kotoabe nae kabuji akinautolu ki ai, o nau ha‘u ki he fonua o Juta, kia Ketalia i Misiba: bea naa nau tanaki ae uaine moe gaahi fua momoho o lahi aubito.

¶ 13 Bea nae ha‘u kia Ketalia i Misiba, a Johanani koe foha o Kalia, bea moe houeiki kotoabe oe kau tau nae i he goue.

14 Bea nau behe kiate ia, Oku ke ilo bau kuo fekau e Belisi koe tu‘i oe kau Amoni a Isimeli koe foha o Natania ke tamate‘i koe? Ka nae ikai tui kiate kinautolu e Ketalia koe foha o Ahikami.

15 Bea nae lea fakafufu a Johanani koe foha o Kalia kia Ketalia i Misiba, o behe Oku ou kole kiate koe, tuku keu alu, bea teu tamatei‘i a Isimeli koe foha o Natania, bea e ikai ilo ia e ha tagata e toko taha: te ne tamate‘i koe, koeumaa; ke fakamovetevete ae kau Jiu kotoabe kuo fakataha kiate koe, bea auha ae toega kakai i Juta?

16 Bea nae behe e Ketalia koe foha o Ahikami kia Johanani koe foha o Kalia, E ikai te ke fai ae mea ni: he oku ke lohiaki‘i a Isimeli.